ពាណិជ្ជកម្មកម្ពុជាជាមួយប្លុក RCEP កើនឡើងលើស២៤ពាន់លាន ដុល្លារក្នុងឆមាសទី១ ឆ្នាំនេះ

យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ទំហំពាណិជ្ជកម្មរវាងកម្ពុជា ជាមួយបណ្តាប្រទេសជាសមាជិកនៃ កិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) សម្រេច បានទឹកប្រាក់រហូតដល់ ២៤,៤ពាន់លានដុល្លារអាម៉េរិក នៅក្នុងឆមាស ទី១ ឆ្នាំ២០២៦នេះ ដែលតួលេខនេះមាន​ការកើនឡើង ២៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។

បើយោងតាមរបាយការណ៍ផ្លូវការរបស់ក្រសួងពាណិជ្ជកម្មបានឱ្យដឹងថា ក្នុងរយ:ពេល ៦ខែដើមឆ្នាំនេះ ការនាំចេញ​ទំនិញរបស់​កម្ពុជាទៅ កាន់បណ្តាប្រទេសសមាជិក RCEP សរុបជាទឹកប្រាក់ ៥,៦៣ពាន់លាន ដុល្លារ ពោលគឺកើនឡើង ១១,៨ ភាគរយ ខណៈការនាំចូលត្រឡប់មក វិញ មានទំហំទឹកប្រាក់ ១៨,៨ពាន់លានដុល្លារ កើនឡើង ២៨ភាគរយ។

របាយការណ៍ដដែលបានគូសរំលេចថា កិច្ចព្រមព្រៀងពាណិជ្ជកម្ម សេរីដ៏ធំមួយនេះ នៅតែជាទីផ្សារស្នូលយ៉ាងសំខាន់របស់កម្ពុជា ដោយ បានក្តាប់យកទំហំពាណិជ្ជកម្មជិត ៦៤ភាគរយ នៃបរិមាណពាណិជ្ជកម្ម សរុបរបស់កម្ពុជាជាមួយពិភពលោក ដែលមាន​តម្លៃសរុប ៣៨,២ពាន់ លានដុល្លារ ក្នុងរយៈពេល៦ខែនៃឆ្នាំ២០២៦នេះ។

ក្នុងចំណោមសមាជិកទាំងអស់ប្រទេសដៃគូពាណិជ្ជកម្មសំខាន់ៗ របស់កម្ពុជានៃRCEP រួមមាន ចិន វៀតណាម សិង្ហបុរី ជប៉ុនជាដើម។

កំណើនពាណិជ្ជកម្មដ៏រឹងមាំនេះបានស្តែងឱ្យឃើញយ៉ាងច្បាស់ថា កិច្ចព្រមព្រៀង RCEP ដែលជាកិច្ចព្រមព្រៀងពាណិជ្ជកម្ម​សេរី​ដ៏ធំ​មួយនៅលើពិភពលោក បន្តដើរតួនាទីជាក្បាលម៉ាស៊ីនដ៏សំខាន់​ក្នុង​ការជំរុញកំណើនសេដ្ឋកិច្ចកម្ពុជា លើកកម្ពស់​ការនាំ​ចេញក្នុងរយៈ​ពេលវែង ព្រមទាំងទាក់ទាញលំហូរការវិនិយោគផ្ទាល់ពីបរទេស (FDI) មកកាន់កម្ពុជាបន្ថែមទៀត។

គួររំលឹកផងដែរថា កិច្ចព្រមព្រៀង RCEP បានចូលជាធរមានកាល​ពីឆ្នាំ២០២២ ដោយប្រមូលផ្តុំប្រទេសចំនួន ១៥ នៅក្នុងតំបន់​អាស៊ី-ប៉ាស៊ីហ្វិក រួមមានប្រទេសសមាជិកអាស៊ានទាំង ១០ (លើកលែងតែ​ទីម័រឡេស្តេ) និងប្រទេសដៃគូពាណិជ្ជកម្មធំៗចំនួន ៥ ទៀត គឺ ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់៕

ប្រភព៖ ក្រសួងព័ត៌មាន