បញ្ជាការដ្ឋានអង្គរក្សសម្តេចតេជោ ហ៊ុន សែន ប្រជុំដកពិសោធន៍បន្ទាន់ ក្រោយករណីអតីតនាយករដ្ឋមន្ត្រីជប៉ុន មានរឿងកើតឡើងថ្មីៗនេះ

(កណ្តាល)៖ នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងខ.ភ.ម និងជាមេបញ្ជាការ បញ្ជាការដ្ឋានអង្គរក្ស នៅថ្ងៃទី៨ ខែកក្កដា ឆ្នាំ២០២២ បានរៀបចំប្រជុំដកពិសោធន៍បន្ទាន់ជាមួយមេបញ្ជាការ មេបញ្ជាការរង នាយទាហានបង្គោលទាំងអស់ របស់បញ្ជាការដ្ឋានអង្គរក្ស ក្រោយហេតុការណ៍ធ្វើឃាត លើលោក ស្ស៊ិនសូ អាបេ អតីតនាយករដ្ឋមន្ត្រីជប៉ុន ដែលត្រូវបាន ឃាតកបាញ់ប្រហាក្នុងកំឡុងពេលដែល លោក កំពុងថ្លែងសុន្ទរកថាក្នុងទីក្រុង Nara ភាគខាងលិចប្រទេសជប៉ុនសម្រាប់យុទ្ធនាការឃោសនាបោះឆ្នោត។

នៅក្នុងកិច្ចប្រជុំនេះ នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង បានដាក់បទបញ្ជាយ៉ាងដាច់ណាត់ឱ្យ មេបញ្ជាការ មេបញ្ជាការរង នាយទាហានបង្គោលទាំងអស់ ត្រូវយកចិត្តទុកដាក់ខ្ពស់ និងពង្រឹងបន្ថែមទៀតលើកិច្ចការងារ ការពារសន្តិសុខសុវត្ថិភាព ជូនថ្នាក់ដឹកនាំកំពូលរបស់ជាតិ-អន្តរជាតិ ពិសេសនោះគឺ ការពារសន្តិសុខ សុវត្ថិភាពជូន សម្តេចតេជោនាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត ឱ្យបាន១០០% ទោះក្នុងតម្លៃណាក៏ដោយ។

សូមបញ្ជាក់ថា ស៊ីនហ្សូ អាបេ (Shinzo Abe) អតីតនាយករដ្ឋមន្ត្រីជប៉ុន បានស្លាប់បាត់បង់ជីវិតនៅមន្ទីរពេទ្យ ក្រោយត្រូវបានបាញ់ប្រហារក្នុងអំឡុងពេលធ្វើយុទ្ធនាការឃោសនាបោះឆ្នោតថ្នាក់ជាតិ នៅភាគខាងលិចទីក្រុងណារ៉ា ប្រទេសជប៉ុន នៅព្រឹកថ្ងៃសុក្រ ទី០៨ ខែកក្កដា ឆ្នាំ២០២២នេះ៕ ផ្តល់សិទ្ធិដោយ៖ freshnews