សហរដ្ឋអាមេរិក ប្រកាសពីកញ្ចប់ជំនួយយោធាថ្មី ២.៥ពាន់លានដុល្លារ ក្នុងនោះមានទាំងរថពាសដែក Stryker សម្រាប់អ៊ុយក្រែន

(វ៉ាស៊ីនតោន)៖ មន្ទីរបញ្ចកោណ នៅថ្ងៃព្រហស្បតិ៍សប្ដាហ៍នេះ (ម៉ោងនៅវ៉ាស៊ីនតោន) បានប្រកាសផ្ដល់ជំនួយយោធាបន្ថែម ២.៥ពាន់លានដុល្លារ សម្រាប់អ៊ុយក្រែន ហើយនៅក្រោមកញ្ចប់ជំនួយយោធាថ្មីនេះ ក្នុងនោះរួមមានការផ្ដល់ជាលើកដំបូងនូវរថពាសដែក Stryker និងរថពាសដែកប្រយុទ្ធ Bradley បន្ថែមដែលអាចនឹង ត្រូវបានប្រើទប់ទល់នឹងប្រតិបត្តិការវាយលុកសាជាថ្មីណាមួយរបស់រុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី២០ ខែមករា ឆ្នាំ២០២៣។

ការប្រកាសពីកញ្ចប់ជំនួយយោធាថ្មីខាងលើ ធ្វើឡើងតែមួយថ្ងៃប៉ុណ្ណោះ មុននឹងបណ្ដាប្រទេសលោកខាងលិចជួបប្រជុំគ្នានៅឯមូលដ្ឋានទ័ពអាកាសមួយ ក្នុងប្រទេស អាល្លឺម៉ង់ នៅថ្ងៃសុក្រសប្ដាហ៍នេះ ដើម្បីពិភាក្សាពីការផ្ដល់ជំនួយយោធាឱ្យអ៊ុយក្រែន។ បើតាមមន្ទីរបញ្ចកោណ នៅក្នុងកញ្ចប់ជំនួយយោធាថ្មីនេះរួមមានរថពាសដែក Stryker ចំនួន៩០គ្រឿង និងរថពាសដែកប្រយុទ្ធ Bradley ចំនួន៥៩គ្រឿង បន្ថែមពីលើរថពាសដែកប្រយុទ្ធ Bradley ៥០គ្រឿងដែលសហរដ្ឋអាមេរិកបញ្ជូនឱ្យ អ៊ុយក្រែន នៅក្រោមកញ្ចប់យោធាកាលពីពេលមុន។

គួរបញ្ជាក់ថា នៅក្រោមកញ្ចប់ជំនួយយោធាថ្មីខាងលើ ក៏មានគ្រាប់រំសេវសម្រាប់ប្រព័ន្ធមីស៊ីល HIMARS ដែលរុស្ស៉ីបានប្រើយ៉ាងមានប្រសិទ្ធភាពនៅលើសមរភូមិ នាពេលកន្លងមក។ ប៉ុន្តែមិនមានរថក្រោះប្រយុទ្ធ M1 Abrams ដែលអ៊ុយក្រែនបានស្នើសុំនោះទេ ខណៈមានសេចក្ដីរាយការណ៍ថាអាល្លឺម៉ង់នឹងបញ្ជូនរថក្រោះធុនធ្ងន់ របស់ខ្លួនឱ្យអ៊ុយក្រែន បើសហរដ្ឋអាមេរិកធ្វើដូចគ្នានេះដែរ៕ ផ្តល់សិទ្ធិដោយ៖ freshnews