(បរទេស)៖ ថ្មីៗនេះក្រុមហ៊ុន Nokia បានចុះហត្ថលេខាលើកិច្ចព្រមព្រៀងផ្តល់អាជ្ញាប័ណ្ណប៉ាតង់រយៈពេលវែងថ្មីមួយជាមួយនឹងក្រុមហ៊ុន Apple ខណៈដែលអាជ្ញាប័ណ្ណបច្ចុប្បន្នរវាងក្រុមហ៊ុនទាំងពីរនឹងផុតកំណត់នៅចុងឆ្នាំ២០២៣នេះ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០១ ខែកក្កដា ឆ្នាំ២០២៣។

Nokia គឺជាសាជីវកម្មទូរគមនាគមន៍ពហុជាតិសាសន៍ប្រទេសហ្វាំងឡង់ ហើយបច្ចុប្បន្នគឺជាក្រុមហ៊ុនដែលកាន់ប៉ាតង់ 5G ក្នុងដៃច្រើនជាងគេ។ ផលប័ត្រប៉ាតង់របស់ Nokia ត្រូវបានបង្កើតឡើងក្នុងទឹកប្រាក់ជាង ១៥២.៧០ពាន់លានដុល្លារ ដែលបានវិនិយោគក្នុងការស្រាវជ្រាវ និង អភិវឌ្ឍន៍ (R&D) ហើយទទួលបានមកវិញនូវប៉ាតង់សរុបប្រហែល ២០,០០០ប៉ាតង់ រួមទាំងជាង ៥,៥០០ប៉ាតង់ផ្សេងទៀតដែលប្រកាសថាមានតម្លៃខ្លាំងសម្រាប់បណ្តាញ 5G។

ជាមួយនឹងការបន្តកិច្ចព្រមព្រៀងផ្តល់ប៉ាតង់ថ្មីរវាងក្រុមហ៊ុនទាំងពីរ Nokia រំពឹងថា ខ្លួននឹងទទួលបានប្រាក់ចំណូលគួរសមពីផ្នែកនេះដែលនឹងចាប់ផ្តើមនៅខែមករា ឆ្នាំ២០២៤ខាងមុខនេះ។ លោកស្រី Jenni Lukander ប្រធានផ្នែក Nokia បាននិយាយថា «កិច្ចព្រមព្រៀងនេះឆ្លុះបញ្ជាំងពីភាពរឹងមាំនៃផលប័ត្រប៉ាតង់របស់ Nokia, ការវិនិយោគរយៈពេលជាច្រើនទសវត្សរ៍នៅក្នុង R&D និងការរួមចំណែកដល់ស្តង់ដាឧបករណ៍ចល័ត និងដំណើរផលិតបច្ចេកវិទ្យាផ្សេងទៀត»។

គួរជម្រាបដែរថា Nokia ធ្លាប់ជាក្រុមហ៊ុនឈានមុខគេនៅលើទីផ្សារស្មាតហ្វូននៅក្នុងអំឡុងឆ្នាំ២០០៥ ដល់២០១១ ពោលគឺកំឡុងពេលដែល Nokia ប្រកាសបង្ហាញ និងដាក់លក់ទូរស័ព្ទត្រកូល N ដោយក្នុងនោះ N70 គឺទទួលបានប្រជាប្រិយភាពខ្លាំង ប៉ុន្តែនៅចុងឆ្នាំ២០១១ ការលក់ទូរស័ព្ទដៃរបស់ Nokia បានដាំក្បាលចុះយ៉ាងខ្លាំង៕​ ផ្តល់សិទ្ធិដោយ៖ freshnews