(បាងកក)៖ តុលាការធម្មនុញ្ញថៃ នៅថ្ងៃចន្ទ ទី២៣ ខែមិថុនា ត្រូវបានរំពឹងថានឹងចាប់ផ្ដើមការត្រួតពិនិត្យជាបឋម លើញត្តិមួយដាក់ជូនដោយសមាជិកព្រឹទ្ធសភាមួយក្រុម ដើម្បីទាមទារឱ្យទម្លាក់លោកស្រី Paetongtarn Shinawatra ចេញពីតំណែងនាយករដ្ឋមន្ត្រី។ នេះបើតាមកាសែត Bangkok Post។ ញត្តិខាងលើដែលត្រូវបានដាក់ជូនលេខាធិការដ្ឋាននៃតុលាការធម្មនុញ្ញថៃកាលពីសប្ដាហ៍មុន នឹងត្រូវឆ្លងកាត់ការត្រួតពិនិត្យបឋមដោយក្រុមមន្ត្រី ដើម្បីកំណត់ថាតើញត្តិនេះ បំពេញតាមគ្រប់លក្ខខណ្ឌតម្រូវសម្រាប់យកទៅពិចារណាឬក៏អត់? ដំណើរការត្រួតពិនិត្យបឋមនេះរួមមាន ការផ្ទៀងផ្ទាត់ហត្ថលេខារបស់អ្នកដាក់ញត្តិ ហើយមន្ត្រីតុលាការ នឹងត្រួតពិនិត្យថាតើហេតុផលដែលត្រូវបានលើកឡើងដើម្បីដកតំណែងលោកស្រី Paetongtarn អនុលោមតាមរដ្ឋធម្មនុញ្ញដែរឬទេ? ក្នុងករណីដែលដំណើរការនេះត្រូវបានបិទបញ្ចប់នៅថ្ងៃអង្គារស្អែក នោះញត្តិខាងលើអាចនឹងត្រូវបានយកទៅពិចារណានៅថ្ងៃព្រហស្បតិ៍សប្ដាហ៍នេះ៕ ផ្ដល់សិទ្ធិដោយ៖ Fresh News

(ស៊ីដនី)៖ នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃចន្ទ ទី២៣ ខែមិថុនា បាននិយាយថាទីក្រុងកង់បេរ៉ាគាំទ្រការវាយប្រហាររបស់សហរដ្ឋអាមេរិកលើអ៉ីរ៉ង់ តែអំពាវនាវឱ្យមាន ការបន្ធូរបន្ថយជម្លោះ និងត្រឡប់ទៅរកការចរចាតាមផ្លូវការទូត។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ ថ្លែងទៅកាន់ក្រុមអ្នកសារព័ត៌មាន ក្នុងទីក្រុងកង់បេរ៉ា លោក Albanese បានលើកឡើងថា «ពិភពលោកបានឯកភាពគ្នាជាយូរមកហើយថាអ៉ីរ៉ង់មិនអាចត្រូវបានអនុញ្ញាតឱ្យមានអាវុធនុយក្លេអ៊ែរ ឡើយ ហើយយើងគាំទ្រសកម្មភាពដើម្បីរារាំងកុំឱ្យអ៉ីរ៉ង់មានអាវុធនុយក្លេអ៊ែរ»។ តាមលោក Albanese ព័ត៌មានបានបង្ហាញយ៉ាងច្បាស់ថាអ៉ីរ៉ង់បានចម្រាញ់សារធាតុអ៊ុយរ៉ាញ៉ូមដល់ ៦០ភាគរយ ហើយគ្មានការពន្យល់ថាតើហេតុអ្វីអ៉ីរ៉ង់ចម្រាញ់អ៊ុយរ៉ាញ៉ូមដល់៦០ភាគរយនោះទេ ក្រៅតែពីចូលរួមក្នុងកម្មវិធីមួយដែលមិនមែនជាថាមពលនុយក្លេអ៊ែរស៊ីវិល។ តែព្រមពេលជាមួយគ្នា រដ្ឋមន្ត្រីការបរទេសអូស្ត្រាលី លោកស្រី Penny Wong បាននិយាយថាការវាយប្រហារលើអ៉ីរ៉ង់ជាសកម្មភាពឯកតោភាគីរបស់សហរដ្ឋអាមេរិក ហើយថាអូស្ត្រាលីបានចូលរួម ជាមួយចក្រភពអង់គ្លេស និងបណ្ដាប្រទេសដទៃ ក្នុងការអំពាវនាវឱ្យអ៉ីរ៉ង់ត្រឡប់មករកតុចរចាឡើងវិញ៕ ផ្ដល់សិទ្ធិដោយ៖ Fresh News

(មូស្គូ)៖ រុស្ស៊ី នៅថ្ងៃអាទិត្យនេះ បានថ្កោលទោសយ៉ាងខ្លាំងក្លាចំពោះការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែររបស់អ៊ីរ៉ង់ ដោយមន្ត្រីជាន់ខ្ពស់បានចោទប្រកាន់លោក ដូណាល់ ត្រាំ ថាបាន «ចាប់ផ្តើមសង្គ្រាមថ្មីមួយសម្រាប់សហរដ្ឋអាមេរិក» និងបង្កើន «ហានិភ័យនៃសង្គ្រាមលោកលើកទីបី»។ នេះបើយោងតាម ទីភ្នាក់ងារសារព័ត៌មាន Reuters នៅថ្ងៃទី២២ ខែមិថុនា ឆ្នាំ២០២៥។ ក្រសួងការបរទេសរុស្ស៊ី បានហៅការវាយប្រហារនេះថាជា «គ្មានការទទួលខុសត្រូវ» និងជា «ការបំពានយ៉ាងធ្ងន់ធ្ងរលើច្បាប់អន្តរជាតិ»។ ចំណែក លោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ី បានបន្ថែមការរិះគន់ផ្ទាល់ខ្លួនលើ Telegram ថា «លោក ត្រាំ ដែលចូលកាន់តំណែងក្នុងនាមជាអ្នកបង្កើតសន្តិភាព បានចាប់ផ្តើមសង្គ្រាមថ្មី ជាមួយនឹងភាពជោគជ័យបែបនេះ លោក ត្រាំ នឹងមិនឈ្នះពានរង្វាន់ណូបែលសន្តិភាពទេ»។ ទន្ទឹមនឹងនេះ លោក Leonid Slutsky ប្រធានគណៈកម្មាធិការកិច្ចការបរទេសនៃសភាឌូម៉ា បាននិយាយថា ការវាយប្រហារនេះ «គ្មានហេតុផលផ្នែកយោធាសម្រាប់សហរដ្ឋអាមេរិក ហើយមិនអាចរាប់ជាសុចរិតក្រោមច្បាប់អន្តរជាតិបានទេ»។ លោកបានព្រមានថា ទង្វើនេះ «បង្កើនហានិភ័យនៃសង្គ្រាមលោកលើកទីបី»។ គួរបញ្ជាក់ថា ការថ្កោលទោសរបស់រុស្ស៊ី ធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ […]

(តេហេរ៉ង់)៖ នៅថ្ងៃអាទិត្យ ទី២២ ខែមិថុនា រដ្ឋមន្រ្តីការបរទេសអ៉ីរ៉ង់ លោក Abbas Araghchi បានថ្កោលទោសការវាយប្រហាររបស់សហរដ្ឋអាមេរិក មកលើទីតាំងនុយក្លេអ៊ែរសំខាន់ៗរបស់ខ្លួន ថាជាទង្វើដ៏អាក្រក់ហួសហេតុ ហើយបាននិយាយថា​ ប្រទេសរបស់លោកមានសិទ្ធិស្របច្បាប់ ដើម្បីការពារអធិបតេយ្យរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ លោក Araghchi បានបង្ហោះសារលើបណ្តាញសង្គមដូច្នេះថា «ព្រឹត្តិការណ៍ព្រឹកនេះ គឺអាក្រក់ហួសហេតុជាខ្លាំង ហើយវានឹងមានផលវិបាកយ៉ាងយូរអង្វែង។ ការវាយប្រហារនេះ គឺជាទង្វើគ្មានស្គាល់ច្បាប់… ជាទង្វើរបស់ឧក្រិដ្ឋជន»។ លោកប្រមុខការទូតអ៉ីរ៉ង់បានបន្តថា «ស្របតាមធម្មនុញ្ញរបស់អង្គការសហប្រជាជាតិ និងច្បាប់ចែងអំពីការអនុញ្ញាតឱ្យ​មានការឆ្លើយតបស្របច្បាប់ក្នុងការការពារខ្លួន អ៉ីរ៉ង់រក្សាសិទ្ធិប្រើជម្រើសគ្រប់យ៉ាង ដើម្បីការពារអធិបតេយ្យ ផលប្រយោជន៍ និងប្រជាជនរបស់ខ្លួន»។ គួរបញ្ជាក់ថា ទីបំផុត រយៈពេល៨ថ្ងៃក្រោយអ៉ីស្រាអែលចាប់ផ្តើមសង្រ្គាមផ្លូវអាកាសប្រឆាំងនឹងប្រទេសអ៉ីរ៉ង់ សហរដ្ឋអាមេរិក បានសម្រេចចិត្តចូលរួមជាមួយសម្ព័ន្ធមិត្តរបស់ខ្លួន ដោយកាលពីយប់ថ្ងៃសៅរ៍ ទី២១ ខែមិថុនា (ពេលវេលានៅអាមេរិក) ប្រធានាធិបតីអាមេរិក លោក ដូណាល់ ត្រាំ បានប្រកាសថា យោធាអាមេរិកបានវាយប្រហារលើ ទីតាំងចម្រាញ់សារធាតុនុយក្លេអ៊ែរចម្បងៗរបស់អ៉ីរ៉ង់។ មន្រ្តីអាមេរិក បានបង្ហើបឱ្យដឹងថា យន្តហោះទម្លាក់គ្រាប់បែក B-2 និងគ្រាប់បែកធុនធ្ងន់ហៅថា bunker buster ដែល១គ្រាប់ទម្ងន់ជាង១ម៉ឺនគីឡូក្រាម ត្រូវបានប្រើប្រាស់ក្នុងប្រតិបត្តិការនោះ។ […]

(វ៉ាស៉ីនតោន)៖ នាយប់ថ្ងៃសៅរ៍ ទី២១ ខែមិថុនា ប្រធានាធិបតីអាមេរិក លោក ដូណាល់ ត្រាំ បាននិយាយថា ការវាយប្រហារតាមផ្លូវអាកាសរបស់អាមេរិក បានកម្ទេចទាំងស្រុងនូវទីតាំងចម្រាញ់សារធាតុនុយក្លេអ៊ែររបស់អ៉ីរ៉ង់ ហើយលោកបានគំរាមថា នឹងមានការវាយប្រហារបន្ថែមទៀត ប្រសិនបើទីក្រុងតេហេរ៉ង់មិនព្រមស្វែងរកសន្តិភាពឆាប់ៗ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ អំឡុងការថ្លែងសារខ្លីមួយទាំងយប់ទៅកាន់ប្រជាជាតិ លោកប្រធានាធិបតីអាមេរិក បានលើកឡើងយ៉ាងដូច្នេះថា «វានឹងមានជម្រើស២ គឺសន្តិភាពឬមួយក៏សោកនាដកម្មសម្រាប់អ៉ីរ៉ង់ ដែលអាក្រក់ខ្លាំងបំផុត ធៀបនឹងអ្វីដែលយើងបានមើលឃើញ អំឡុងពេលជាងមួយសប្តាហ៍​មកនេះ។ ចូរចាំថានៅមានគោលដៅជាច្រើនទៀត ដែលនៅសល់។ ប្រសិនបើសន្តិភាពមិនអាចសម្រេចបានឆាប់ៗទេ យើងនឹងវាយប្រហារគោលដៅទាំងនោះបន្ថែមទៀត»។ គួរបញ្ជាក់ថា បើតាមលោក ត្រាំ យោធាអាមេរិកបានធ្វើសកម្មភាពវាយប្រហារទៅលើ ទីតាំងនុយក្លេអ៊ែរសំខាន់ៗ៣កន្លែងរបស់អ៉ីរ៉ង់ រួមមាន Fordow, Natanz និង Esfahan។ ការវាយប្រហារនេះកើតមានឡើងត្រឹម២ថ្ងៃប៉ុណ្ណោះ បន្ទាប់ពី លោក ត្រាំ បាននិយាយថា រូបលោកនឹងសម្រេចចិត្ត ក្នុងរយៈពេល២សប្តាហ៍ ថាតើនឹងចូលរួម ឬមិនចូលរួម ក្នុងសង្រ្គាមអ៉ីស្រាអែលប្រឆាំងនឹងអ៉ីរ៉ង់។ មន្រ្តីអាមេរិកបានបង្ហើបឱ្យដឹងថា យន្តហោះទម្លាក់គ្រាប់បែក B-2 ដែលអាចផ្ទុកគ្រាប់បែកធុនធ្ងន់ ដើម្បីកម្ទេចទីតាំងកប់នៅជ្រៅខ្លាំងក្រោមផ្ទៃដី ត្រូវបានប្រើប្រាស់ក្នុងប្រតិបត្តិការខាងលើ៕ ផ្ដល់សិទ្ធិដោយ៖ Freshnews

(ថៃ)៖ យោងតាមសារព័ត៌មានរបស់ថៃ បានឱ្យដឹងថា ជនជាតិថៃ២៣នាក់ ត្រូវបានសមត្ថកិច្ចថៃ ឃាត់ខ្លួនពេលព្យាយាមលួចឆ្លងដែនចូលមកធ្វើការនៅកម្ពុជា។ ក្នុងនោះ២២នាក់ ជាអ្នកស្វែងរកការងារនៅកម្ពុជា និងម្នាក់ជាមរខ្យល់នាំផ្លូវ។ អ្នកព្យាយាមឆ្លងដែននេះ មានអ្នកខ្លះធ្វើការនៅកាស៊ីណូក្នុងក្រុងប៉ោយប៉ែត និងខ្លះទៀត មានបំណងឆ្លងមករកការងារនៅកម្ពុជា។ ដើម្បីឆ្លងដែនពួកគេបង់ឱ្យមេខ្យល់ចន្លោះ ២៥០០ ទៅ ៥០០០បាត។ ពួកគេត្រូវបានឃាត់ខ្លួនម៉ោងប្រមាណ១១យប់ថ្ងៃទី២០ ខែមិថុនា ឆ្នាំ២០២៥ នៅឃុំខ្លងណាំសៃ ស្រុកអារញ្ញ ខេត្តស្រះកែវ ប្រទេសថៃ។ ការចាប់ខ្លួននេះ មានការផ្ទុះអាវុធ បណ្តាលឱ្យមេខ្យល់រងរបួសថែមទៀតផង៕ ផ្ដល់សិទ្ធិដោយ៖ Freshnews

(វ៉ាស៉ីនតោន)៖ ទីបំផុតសហរដ្ឋអាមេរិក បានចូលរួមជាផ្លូវការក្នុងសង្រ្គាមរបស់អ៉ីស្រាអែល ដោយកាលពីថ្ងៃសៅរ៍ ទី២១ ខែមិថុនា ប្រធានាធិបតីអាមេរិក លោក ដូណាល់ ត្រាំ បានប្រកាសថា យោធាអាមេរិក បានធ្វើសកម្មភាពវាយប្រហារទៅលើ ទីតាំងនុយក្លេអ៊ែរ៣កន្លែងរបស់អ៉ីរ៉ង់ ក្នុងនោះរួមមានទាំងកន្លែងចម្រាញ់សារធាតុអ៊ុយរ៉ាញ៉ូមក្រោមដី នៅទីតាំង Fordo។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ លោក ត្រាំ បានបង្ហោះសារលើបណ្តាញសង្គមយ៉ាងដូច្នេះថា «យើងបានសម្រេចការវាយប្រហារដ៏ជោគជ័យលើទីតាំងនុយក្លេអ៊ែរ ៣កន្លែងនៅប្រទេសអ៉ីរ៉ង់ រួមមាន Fordow, Natanz និង Esfahan»។ សេចក្តីប្រកាសនេះកើតមានឡើងត្រឹម២ថ្ងៃប៉ុណ្ណោះ បន្ទាប់ពី លោក ត្រាំ បាននិយាយថា រូបលោកនឹងសម្រេចចិត្ត ក្នុងរយៈពេល២សប្តាហ៍ ថាតើនឹងចូលរួម ឬមិនចូលរួម ក្នុងសង្រ្គាមអ៉ីស្រាអែលប្រឆាំងនឹងអ៉ីរ៉ង់។ ទីក្រុងតេហេរ៉ង់ ធ្លាប់បានគំរាមសងសឹកលើ កងកម្លាំងអាមេរិកនៅមជ្ឈិមបូព៌ា ប្រសិនបើលោក ត្រាំ ចូលរួមជាមួយអ៉ីស្រាអែល វាយប្រហារលើខ្លួន។ គួរបញ្ជាក់ថា នៅថ្ងៃដដែលមុនលោក ត្រាំ ប្រកាសដូចខាងលើ មានសេចក្តីរាយការណ៍ថា យន្តហោះទម្លាក់គ្រាប់បែក B-2 ដែលត្រូវគេស្គាល់ថា អាចផ្ទុកគ្រាប់បែកបំកម្ទេចទីតាំងក្រោមដីជ្រៅៗនោះ បានហោះចាកចេញពីសហរដ្ឋអាមេរិក។ […]

(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃសុក្រ ទី២០ ខែមិថុនា បាននិយាយថានាយកទីភ្នាក់ងារស៊ើបការណ៍សម្ងាត់ជាតិ លោកស្រី Tulsi Gabbard បានវាយតម្លៃខុសដែលនិយាយថាគ្មានភស្តុតាងបញ្ជាក់ថាអ៉ីរ៉ង់កំពុងផលិតអាវុធនុយក្លេអ៊ែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ លោក ត្រាំ បានបដិសេធការវាយតម្លៃរបស់លោកស្រី Gabbard កាលពីដើមឆ្នាំ២០២៥ ដែលនិយាយថាតេហេរ៉ង់មិនមែនកំពុងផលិតអាវុធនុយក្លេអ៊ែរ នៅពេលរូបលោកត្រូវបាន សាកសួរដោយក្រុមអ្នកសារព័ត៌មាននៅឯអាកាសយានដ្ឋានក្នុងទីក្រុង Morristown រដ្ឋ New Jersey។ លោក ត្រាំ បានបញ្ជាក់យ៉ាងខ្លីថាលោកស្រីវាយតម្លៃខុសហើយ។ គួរបញ្ជាក់ថា កាលពីខែមីនា ឆ្នាំ២០២៥ លោកស្រី Gabbard បានផ្ដល់សក្ខីកម្មទៅកាន់សភាទាំង២របស់សហរដ្ឋអាមេរិកថាសហគមន៍ទីភ្នាក់ងារស៊ើបការណ៍សម្ងាត់ជាតិអាមេរិក បានបន្តជឿជាក់ថាតេហេរ៉ង់មិនមែនកំពុងផលិតអាវុធនុយក្លេអ៊ែរនោះទេ។ «សហគមន៍ស៊ើបការណ៍សម្ងាត់ជាតិបន្តវាយតម្លៃថាអ៉ីរ៉ង់មិនមែនកំពុងផលិតអាវុធនុយក្លេអ៊ែរនោះទេ»។ នេះជាការគូសបញ្ជាក់របស់លោកស្រី នៅពេលនោះ។ ក៏ប៉ុន្តែ កាលពីថ្ងៃសុក្រ ទី២០ ខែមិថុនា លោកស្រី បានបង្ហោះសារលើបណ្ដាញទំនាក់ទំនងសង្គមថាប្រព័ន្ធផ្សព្វផ្សាយបានយល់ខុសចំពោះការលើកឡើងរបស់លោកស្រី។ ប្រមុខ ចារកម្មអាមេរិករូបនេះបានលើកឡើងថា «សហរដ្ឋអាមេរិកទទួលបានព័ត៌មានសម្ងាត់ថាអ៉ីរ៉ង់កំពុងស្ថិតលើចំណុចដែលអាចផលិតអាវុធនុយក្លេអ៊ែរ ក្នុងរយៈពេលប៉ុន្មានសប្ដាហ៍ ឬច្រើនខែ ប្រសិនបើអ៉ីរ៉ង់សម្រេចចិត្តថាផលិត។ លោកប្រធានាធិបតី ត្រាំ បានបញ្ជាក់យ៉ាងច្បាស់រួចហើយថារឿងបែបនេះមិនអាចកើតឡើងឡើយ ហើយខ្ញុំយល់ស្រប»៕ ផ្ដល់សិទ្ធិដោយ៖ […]

(បាងកក)៖ វិស័យឯកជនសំខាន់ៗក្នុងប្រទេសថៃ បានព្រមានថា បញ្ហាអស្ថិរភាពនយោបាយនាពេលនេះ អាចនឹងធ្វើឱ្យសេដ្ឋកិច្ចថៃ ដែលស្ថិតក្នុងសភាពផុយស្រួយស្រាប់ទៅហើយនោះ កាន់តែចុះខ្សោយខ្លាំងថែមទៀត ដោយបានទទូចឱ្យរដ្ឋាភិបាលតម្កល់​ការរួបរួមសាមគ្គីជាតិ និងស្ថិរភាពសេដ្ឋកិច្ចរយៈពេលវែង ជាអាទិភាពចម្បង។ នេះបើតាមការចេញផ្សាយដោយសារព័ត៌មានថៃ The Nation។ លោក Isara Boonyoung ប្រធានក្រុមប្រឹក្សាភិបាលពាណិជ្ជកម្ម នៃគណៈកម្មាធិការអចលនទ្រព្យរបស់ប្រទេសថៃ បាននិយាយថា ការសម្រេចចិត្តលើគោលនយោបាយ ចាំបាច់ត្រូវតែផ្តោតអាទិភាពទៅលើ ស្ថិរភាពជាតិនិងសេដ្ឋកិច្ចរយៈពេលវែង ព្រមទាំងការកសាង​ទំនុកចិត្តរបស់សាធារណជន។ លោក Isara បានសង្កត់ធ្ងន់ថា ភាពប្រេះឆាផ្នែកនយោបាយ បូករួមជាមួយឱនភាពសេដ្ឋកិច្ចសកល ក្តីកង្វល់អំពីពន្ធអាមេរិក និងបញ្ហាព្រំដែន កំពុងគំរាមកំហែងធ្វើឱ្យភាពងាយរងគ្រោះនៃសេដ្ឋកិច្ចថៃ កាន់តែស៉ីជម្រៅមួយកម្រិតទៀត។ លោក Thienprasit Chaiyapatranun ប្រធានសមាគមសណ្ឋាគារថៃ ក៏បានបង្ហាញក្តីកង្វល់ផងដែរ ជុំវិញផលប៉ះពាល់នៃ​ភាពតានតឹងនយោបាយក្នុងស្រុក និងទំនាក់ទំនងថៃ-កម្ពុជាមកលើវិស័យទេសចរណ៍។ ចំណែកខាងវិស័យលក់ដូរទំនិញវិញ បានលើកឡើងថា ព្រឹត្តិការណ៍នយោបាយនាពេលថ្មីៗនេះ បានធ្វើឱ្យរង្គោះរង្គើទំនុកចិត្តរបស់អ្នកប្រើប្រាស់ ហើយបានទទូចឱ្យរដ្ឋាភិបាលថៃ ចាត់វិធានការឱ្យបានច្បាស់លាស់ដើម្បីដោះស្រាយ។ ទន្ទឹមគ្នា បរិយាកាសធុរកិច្ច ក៏ហាក់មិនមានសន្ទុះ ខណៈក្រុមហ៊ុននានានៅទន្ទឹងរង់ចាំមើល ភាពច្បាស់លាស់ឡើងវិញ នៃស្ថានការណ៍នយោបាយ។ គួរបញ្ជាក់ថា នាយករដ្ឋមន្រ្តីថៃ លោកស្រី Paetongtarn Shinawatra […]

(ស៉ីដនី)៖ នៅថ្ងៃសុក្រ ទី២០ ខែមិថុនា ប្រទេសអូស្ត្រាលី បានប្រកាសពីការផ្អាកប្រតិបត្តិការនៃស្ថានទូតរបស់ខ្លួន ក្នុងទីក្រុងតេហេរ៉ង់ ដោយលើកឡើងពីស្ថានភាពសន្តិសុខយ៉ាប់យ៉ឺន ខណៈដែលអ៉ីស្រាអែល បានវាយលុកទីតាំងនុយក្លេអ៊ែរអ៉ីរ៉ង់ម្តងទៀត ហើយសង្រ្គាមតាមផ្លូវអាកាសដែលមានរយៈពេលមួយសប្តាហ៍មកនេះ មិនទាន់មានសញ្ញាថមថយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ រដ្ឋមន្រ្តីការបរទេស លោកស្រី Penny Wong បានឱ្យដឹងថា បុគ្គលិកការពារជាតិ និងយន្តហោះអូស្រ្តាលី កំពុងត្រូវបានដាក់ពង្រាយទៅកាន់តំបន់មជ្ឈិមបូព៌ា ជាផ្នែកមួយនៃផែនការសង្គ្រោះបន្ទាន់ ដើម្បីជួយជម្លៀសពលរដ្ឋ និងអ្នកការទូតរបស់ខ្លួន នៅពេលដែលដែនអាកាសត្រូវបានបើក និងមិនសម្រាប់ការប្រយុទ្ធណាមួយទេ។ តាមលោកស្រី Wong បុគ្គលិកកុងស៊ុលអូស្រ្តាលីនៅអ៉ីរ៉ង់ កំពុងត្រូវបានបញ្ជូនទៅកាន់ប្រទេសជិតខាងគឺអាស៊ៃបៃហ្សង់ រួមទាំងច្រកព្រំដែននៃប្រទេសនេះ ដើម្បីជួយដល់ប្រជាជនអូស្ត្រាលី ដែលចាកចេញពីអ៉ីរ៉ង់តាមផ្លូវគោក។ ទិន្នន័យផ្លូវការបង្ហាញថា មានប្រជាជនអូស្ត្រាលីប្រហែល ២ ០០០នាក់ និងគ្រួសាររបស់ពួកគេ បានស្នើសុំជំនួយដើម្បីចាកចេញពីអ៉ីរ៉ង់។ គួរបញ្ជាក់ថា អ៉ីស្រាអែល​ បានបើកការវាយប្រហារ​តាម​ផ្លូវអាកាស​ប្រឆាំង​នឹង​អ៊ីរ៉ង់ ​ដោយ​និយាយថាវាជាការ​វាយ​ប្រហារ​ទុក​មុន​ ដើម្បី​រារាំង​អ៉ីរ៉ង់​ពី​ការ​អភិវឌ្ឍ​អាវុធ​នុយក្លេអ៊ែរ។ អ៉ីរ៉ង់​ បាន​បដិសេធនូវការចោទប្រកាន់របស់អ៉ីស្រាអែល ហើយ​បានបើកការវាយប្រហារ​សងសឹកវិញ៕ ផ្ដល់សិទ្ធិដោយ៖ Fresh News