(បរទេស)៖ ក្រុមហ៊ុនបណ្តាញផ្សព្វផ្សាយសង្គមយក្ស Meta Platform បាននិយាយនៅថ្ងៃពុធសប្តាហ៍នេះថា ខ្លួននឹងចាប់ផ្តើមដាក់ដំណើរការមុខងារថ្មីមួយដែលមានឈ្មោះថា «Broadcast Channel» នៅលើភ្លេតហ្វមចំនួនពីររបស់ខ្លួនគឺ Facebook និង Messenger។ ខណៈមុខងារថ្មីនេះនឹងអនុញ្ញាតបុគ្គលសាធារណៈក៏ដូចជាអ្នកបង្កើតមាតិកាផ្សេងៗអាចចែករំលែកសាររបស់ពួកគេទៅកាន់មនុស្សជាច្រើនឥតដែនកំណត់។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១៩ ខែតុលា ឆ្នាំ២០២៣។ Meta កំពុងធ្វើតេស្តសាកល្បងទៅលើជម្រើសមុខងារជាច្រើននៅលើបណ្តាញផ្សព្វផ្សាយរបស់ខ្លួន។ ជាក់ស្តែងជុំវិញការប្រកាសចេញមុខងារ Broadcast Channel ថ្មីនេះត្រូវបានប្រភពឱ្យដឹងថា បានធ្វើឡើងស្របពេលដែលបណ្តាញផ្សព្វផ្សាយ Telegram ដែលជាគូប្រជែងដ៏ធំរបស់ខ្លួនបានដើរតួដ៏សំខាន់នៅក្នុងជម្លោះរវាងអ៊ីស្រាអែល និងក្រុមហាម៉ាស់ ដែលជាមធ្យោបាយចម្បងដែលក្រុមអ៊ីស្លាមនិយមប៉ាឡេស្ទីនប្រើដើម្បីទំនាក់ទំនងជាមួយពិភពលោក។ យ៉ាងណាមិញចំពោះ Broadcast Channel នេះក៏មានមុខងារស្រដៀងទៅនឹងមុខងាររបស់ Telegram មួយចំនួនផងដែរ ដោយវានឹងអនុញ្ញាតឱ្យអ្នកប្រើប្រាស់អាចចែករំលែកសារទៅកាន់មនុស្សជាច្រើនឥតដែនកំណត់បើធៀបនឹងមុខងារ Group ដែល Facebook និង Messenger កំពុងដំណើរការបច្ចុប្បន្ន។ មុខងារទាំងនោះរួមមាន គាំទ្រការបង្ហោះអត្ថបទ រូបភាព ស្ទង់មតិ(polls) ប្រតិកម្ម(reactions) និងមុខងារជាច្រើនទៀត។ គួរជម្រាបដែរថា សម្រាប់មមុខងារថ្មីចុងក្រោយនេះ Meta ត្រៀមនឹងដាក់ចេញនៅប៉ុន្មានសប្តាហ៍ខាងមុខនេះតែម្តង៕ ផ្តល់សិទ្ធិដោយ៖ freshnews

(មូស្គូ)៖ ក្រសួងស្ថានការណ៍គ្រាអាសន្ននៃប្រទេសរុស្ស៉ី បានឱ្យដឹងថា នៅថ្ងៃព្រហស្បតិ៍នេះ រុស្ស៉ីបានបញ្ជូនជំនួយមនុស្សធម៌ចំនួន២៧តោន សម្រាប់ប្រជាជនស៉ីវិលប៉ាឡេស្ទីន នៅឯតំបន់ Gaza Strip ដែលនឹងត្រូវដឹកជញ្ជូនទៅកាន់ទីនោះ ពីប្រទេសអេហ្ស៉ីប។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី១៩ ខែតុលា ឆ្នាំ២០២៣។ លោក Ilya Denisov ដែលជាអនុរដ្ឋមន្រ្តីនៃក្រសួងខាងលើ បាននិយាយដូច្នេះថា «យន្តហោះពិសេសមួយ១គ្រឿង បានចេញដំណើរ​ពីព្រលានយន្តហោះនៅក្រុង Ramenskoye ក្បែរទីក្រុងមូស្គូ ឆ្ពោះទៅកាន់ទីក្រុង El-Arish នៃប្រទេសអេហ្ស៉ីប។ ជំនួយមនុស្សធម៌របស់រុស្ស៉ី នឹងត្រូវប្រគល់ឱ្យទៅអឌ្ឍចន្ទក្រហមរបស់អេហ្ស៉ីប ដើម្បីបញ្ជូនទៅតំបន់ Gaza Strip»។ បើតាមលោក Denisov ជំនួយនោះរួមមានស្បៀងអាហារ ដូចជាស្រូវសាលី ស្ករ អង្ករ និងមី។ កាលពីថ្ងៃពុធសប្តាហ៍នេះ ប្រធានាធិបតីអាមេរិក លោក ចូ បៃដិន បានប្រកាសពីកិច្ចព្រមព្រៀងមួយ ដើម្បីអនុញ្ញាតឱ្យជំនួយមនុស្សធម៌ ដែលកំពុងត្រូវការជាចាំបាច់ អាចចូលទៅកាន់តំបន់ Gaza បាន ជាទីដែលប្រជាជនប៉ាឡេស្ទីនប្រមាណជា១លាននាក់ បានរត់ភៀសខ្លួនពី​ផ្ទះសម្បែងរបស់ពួកគេ […]

(បរទេស)៖ នៅថ្ងៃអង្គារសប្តាហ៍នេះក្រុមហ៊ុនបច្ចេកវិទ្យាយក្ស Apple បានធ្វើការប្រកាសចេញផលិតផលថ្មីមួយរបស់ខ្លួនប្រភេទខ្មៅដៃ Apple Pencil ជំនាន់ទី២ ជាមួយនឹងការបំពាក់ដោយរន្ធ USB-C ជាលើកដំបូង។ ខណៈការចេញលក់លើកនេះមានតម្លៃ ៧៩ដុល្លារ ដែលជាតម្លៃសមរម្យជាងបើធៀបនឹងជំនាន់ទីមួយមានតម្លៃ ១២៩ដុល្លារឯណោះ។ នេះបើយោងតាមការចេញផ្សាយរបស់សារព័ត៌មាន GSMArena នៅថ្ងៃទី១៨ ខែតុលា ឆ្នាំ២០២៣។ យោងតាមខ្លឹមសារចេញផ្សាយបានឱ្យដឹងថា Apple Pencil ជំនាន់ថ្មីដែលមានតម្លៃសមរម្យនេះបានបាត់នូវការគាំទ្រមុខងារមួយចំនួន ដោយក្នុងនោះរួមមាន កង្វះមុខងារសង្កត់លើអេក្រង់ Pressure Sensitivity ការគាំទ្រមុខងារឥតខ្សែ និងប៉ះ ២ដងដើម្បីផ្លាស់ប្តូរមុខងារនៅលើខ្មៅដៃជាដើម។ ទោះជាយ៉ាងណាក៏ដោយ Apple Pencil ថ្មីនៅតែជាជម្រើសដ៏ល្អសម្រាប់អ្នកប្រើប្រាស់ដែលកំពុងតែស្វែងរកស្ទីលដែលមានតម្លៃសមរម្យសម្រាប់ iPad របស់ពួកគេ។ វាក៏ជាជម្រើសដ៏ល្អសម្រាប់អ្នកប្រើប្រាស់ដែលមិនត្រូវការចំណុចខ្វះខាតខាងលើនេះ ព្រោះថាការផ្តល់ជូននេះគឺមានតម្លៃទាបជាងពាក់កណ្តាលបើធៀបនឹងម៉ូដែលមុន។ គួរជម្រាបដែរថា Apple Pencil ថ្មីគឺអាចប្រើបានជាមួយ iPad គ្រប់ម៉ូដែលដែលមានរន្ធ USB-C ខណៈការចេញលក់វិញនឹងចាប់ផ្តើមពីខែវិច្ឆិកាខាងមុខនេះតទៅ៕ ផ្តល់សិទ្ធិដោយ៖ freshnews

(ប៉េកាំង)៖ លោកប្រធានាធិបតី ស៉ី ជីនពីង បាននិយាយនៅថ្ងៃពុធនេះថា ចិននឹងបញ្ចូលមូលនិធិថ្មីក្នុងទំហំទឹកប្រាក់ជាង ១០០ពាន់លានដុល្លារ ទៅក្នុងគំនិតផ្តួចផ្តើមខ្សែក្រវាត់និងផ្លូវ ហៅកាត់ BRI របស់ប្រទេសចិន។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន AFP នៅថ្ងៃពុធ ទី១៧ ខែតុលា ឆ្នាំ២០២៣។ លោក ស៉ី បានប្រកាសថា ធនាគារអភិវឌ្ឍន៍ចិន និងធនាគារនាំចេញ-នាំចូល ដែលជាអ្នកផ្តល់កម្ចីដ៏សំខាន់នៅក្នុងគម្រោងខ្សែក្រវាត់និងផ្លូវ នាពេលឥឡូវនេះ នឹងផ្តល់ប្រាក់កម្ចីបន្ថែមចំនួន១០០ពាន់លានដុល្លារទៀត។ ធនាគារទាំងពីរនឹងបង្កើតឱកាសផ្តល់ហិរញ្ញប្បទានចំនួន ៣៥០ពាន់លានយន់ ឬស្មើនឹង ៤៧.៩ពាន់លានដុល្លារ សម្រាប់គម្រោង BRI។ ទឹកប្រាក់បន្ថែមចំនួន ៨០ពាន់លានយន់ផ្សេងទៀត នឹងត្រូវចាក់បញ្ចូលទៅក្នុងស្ថាប័នផ្តល់ប្រាក់កម្ចីផ្លូវការនៃគម្រោងនេះ គឺមូលនិធិផ្លូវសូត្រ។ គំនិតផ្តួចផ្តើមខ្សែក្រវាត់និងផ្លូវ ជាសសរស្តម្ភស្នូលនៃផែនការពង្រីកឥទ្ធិលចិនទៅក្រៅប្រទេស របស់លោក ស៉ី ជិនពីង ដោយទីក្រុងប៉េកាំងនិយាយថា ឥឡូវនេះខ្លួនបានចុះហត្ថលេខាលើកិច្ចសន្យា ក្នុងទំហំទឹកប្រាក់ជាង ២ពាន់ពាន់លានដុល្លារហើយ នៅជុំវិញពិភពលោក។ អ្នកគាំទ្រ បានសាទរចំពោះការផ្តល់ធនធាន និងជំរុញកំណើនសេដ្ឋកិច្ចមកកាន់លោកខាងត្បូង។ គួរបញ្ជាក់ថា ចិន បាននិងកំពុងរៀបចំវេទិកាខ្សែក្រវាត់ និងផ្លូវ ដោយមានការចូលរួមពីតំណាងប្រទេសចំនួន ១៣០ […]

(ប៉េកាំង)៖ នៅថ្ងៃពុធនេះ នាយករដ្ឋមន្រ្តីថៃ លោក សេដ្ឋា ថាវីស៉ីន បានឱ្យដឹងថា រូបលោកបានអញ្ជើញប្រធានាធិបតីរុស្ស៉ី លោក វ៉្លាឌីមៀ ពូទីន ឱ្យទៅបំពេញទស្សនកិច្ចផ្លូវការនៅប្រទេសថៃ នាឆ្នាំក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៨ ខែតុលា ឆ្នាំ២០២៣។ លោក សេដ្ឋា និងលោក ពូទីន បានជួបគ្នានៅក្រៅវេទិកាស្តីពីគំនិតផ្តួចផ្តើមខ្សែក្រវាត់និងផ្លូវ កាលពីយប់ថ្ងៃអង្គារសប្តាហ៍នេះ ហើយជជែក​អំពីការជំរុញចំណងទាក់ទង ផ្នែកពាណិជ្ជកម្មនិងវប្បធម៌។ នៅថ្ងៃពុធនេះ លោកនាយករដ្ឋមន្រ្តីថៃ បានឱ្យដឹងយ៉ាងដូច្នេះថា «ខ្ញុំបានអញ្ជើញ​លោក ពូទីន ឱ្យបំពេញទស្សនកិច្ចមកកាន់ប្រទេសថៃ នៅឆ្នាំ២០២៤»។ យោងតាមសេចក្តីថ្លែងការណ៍របស់រដ្ឋាភិបាលថៃ លោក ពូទីន បានទទួលយកការអញ្ជើញនោះ ប៉ុន្តែពុំទាន់មានការកំណត់កាលបរិច្ឆេទច្បាស់លាស់នៅឡើយទេ។ គួរបញ្ជាក់ថា កាលពីខែមីនា ឆ្នាំនេះ តុលាការព្រហ្មទណ្ឌអន្តរជាតិ ICC បានចេញដីកាបង្គាប់ឱ្យចាប់ខ្លួនលោក ពូទីន ជុំវិញការចោទប្រកាន់ ​អំពីឧក្រិដ្ឋកម្មសង្រ្គាមនៅអ៊ុយក្រែន។ កាលពីឆ្នាំមុន ថៃបានចូលរួមជាមួយចិននិងឥណ្ឌា ផ្តល់សំឡេងអនុបវាទនៅក្នុងការបោះឆ្នោតមួយ របស់​មហាសន្និបាតនៃអង្គការសហប្រជាជាតិ ដែលថ្កោលទោសការដែលរុស្ស៉ីប្រកាសកាត់យកទឹកដីរបស់អ៊ុយក្រែន​ ដែលស្ថិតក្រោមការកាន់កាប់របស់កងទ័ពរុស្ស៉ី៕ […]

(បរទេស)៖ ក្រុមហ៊ុនបណ្តាញផ្សព្វផ្សាយសង្គម X (ដែលពីមុនត្រូវបានគេស្គាល់ថាជា Twitter) កំពុងសាកល្បងគំរូជាវថ្មីមួយដែលមានឈ្មោះថា «Not A Bot» ដែលវានឹងតម្រូវឱ្យអ្នកប្រើប្រាស់បង់ថ្លៃ ១ដុល្លារក្នុងមួយឆ្នាំដើម្បីអាចចូលប្រើប្រាស់ជាមួយនឹងជម្រើសមុខងារជាច្រើន ថែមទាំងអាចកាត់បន្ថយសារឥតបានការថែមទៀតផង។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១៨ ខែតុលា ឆ្នាំ២០២៣។ យោងតាមការជូនដំណឹងរបស់ X បានឱ្យដឹងថា «Not A Bot» បច្ចុប្បន្ននេះកំពុងស្ថិតក្នុងដំណាក់កាលសាកល្បងនៅឡើយនៅមិនទាន់អាចប្រើប្រាស់បាននៅឡើយនោះទេ។ ប្រសិនបើមុខងារថ្មីនេះឆ្លងកាត់ការសាកល្បងបានជោគជ័យនោះអ្នកប្រើប្រាស់ទាំងរបស់ X ដែលជាវមុខងារនេះនឹងទទួលបាន Feature ថ្មីៗជាច្រើន រួមទាំងអាចធ្វើការកែសម្រួល (Edit) នៅលើ Post ឬអាចលុប Post បានថែមទៀតផង។ ជុំវិញគោលបំណងដែលបង្កើតមុខងារថ្មីនេះ X បានបញ្ជាក់ថា គឺដើម្បីកាត់បន្ថយចំនួន bots និង spammers នៅលើភ្លេតហ្វមរបស់ខ្លួនក៏ដូចជាបន្ថែមសុវត្ថិភាពដល់អ្នកប្រើប្រាស់ផងដែរ។ គួរបញ្ជាក់ដែរថា «Not A Bot» នឹងត្រូវបាន X ដាក់ឱ្យប្រើប្រាស់ដំបូងគេនៅក្នុងប្រទេស នូវែលសេឡង់ និងហ្វីលីពីន ប្រសិនបើធ្វើតេស្តបានជោគជ័យ ចំណែកឯថ្លៃជាវវិញ […]

(តូក្យូ)៖ រដ្ឋមន្រ្តីការបរទេសជប៉ុន លោកស្រី Yoko Kamikawa នៅថ្ងៃអង្គារនេះបាននិយាយថា ជប៉ុននឹងផ្តល់ជំនួយបន្ទាន់ចំនួន ១០លានដុល្លារអាមេរិក សម្រាប់ប្រជាជនស៉ីវិលប៉ាឡេស្ទីន នៅតំបន់ Gaza Strip ដែលកំពុងរងការទម្លាក់គ្រាប់បែករបស់អ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអង្គារ ទី១៧ ខែតុលា ឆ្នាំ២០២៣។ ជប៉ុនបច្ចុប្បន្នគឺជាប្រធាននៃក្រុមប្រទេសអភិវឌ្ឍន៍ G7 ហើយលោកស្រី Kamikawa បានលើកឡើងថា ទីក្រុងតូក្យូកំពុងតាមឃ្លាំមើល​ស្ថានការណ៍នៅក្នុងតំបន់ Gaza ជាមួយក្តីកង្វល់ ខណៈជប៉ុនរំពឹងថា ស្ថានការណ៍នៅទីនោះនឹងថមថយចុះកម្តៅ ក្នុងពេលឆាប់ៗតាមតែ​អាចធ្វើទៅបាន។ លោកស្រីប្រមុខការទូតជប៉ុន បានបន្ថែមថា លោកស្រីក៏កំពុងធ្វើការងាររៀបចំជំហានចុងក្រោយ សម្រាប់កិច្ចពិភាក្សាគ្នា​ជាមួយសមភាគីអ៉ីរ៉ង់ផងដែរ។ ក្រុមហាម៉ាសដែលគ្រប់គ្រងតំបន់ Gaza មានអ៉ីរ៉ង់ជាខ្នងបង្អែក។ គួរបញ្ជាក់ថា អ៉ីស្រាអែលបានប្តេជ្ញាកម្ទេចក្រុមហាម៉ាសទាំងស្រុង បន្ទាប់ពីក្រុមសកម្មប្រយុទ្ធនេះ បានបញ្ជូនខ្មាន់កាំភ្លើងឱ្យសម្រុកចូលលុកលុយសហគមន៍និង​ទីក្រុងនៅភាគខាងត្បូងប្រទេសអ៉ីស្រាអែល កាលពីថ្ងៃទី៧ ខែតុលា ហើយផ្តាច់ជីវិតមនុស្សជាង១,៤០០នាក់ ព្រមទាំងចាប់ចំណាប់ខ្មាំង​ជាច្រើននាក់ទៀត នៅក្នុងការវាយប្រហារដ៏អាក្រក់មួយលើជនស៉ីវិល ក្នុងប្រវត្តិសាស្រ្តរបស់អ៉ីស្រាអែល។ អ៉ីស្រាអែលបានសងសឹកវិញ តាមរយៈការបើកប្រតិបត្តិការវាយប្រហារតាមផ្លូវអាកាស យ៉ាងខ្លាំងក្លាបំផុត ទៅលើតំបន់ Gaza ដែលមកទល់ពេលនេះ បានសម្លាប់មនុស្ស​ជាង២,៨០០នាក់៕ […]

(បរទេស)៖ នៅថ្ងៃចន្ទសប្តាហ៍នេះ ក្រុមហ៊ុន LinkedIn ដែលជាបុត្រសម្ព័ន្ធរបស់ Microsoft បានប្រកាសបញ្ឈប់បុគ្គលិកចំនួន ៦៦៨នាក់បន្ថែមទៀត ខណៈការបញ្ឈប់នេះនឹងប៉ះពាល់ដល់បុគ្គលិកចំនួន ៣ផ្នែករួមមាន ផ្នែកវិស្វកម្ម ធនធានមនុស្ស និងគណនេយ្យ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១៧ ខែតុលា ឆ្នាំ២០២៣។ នេះគឺជាជុំទីពីរនៃការបញ្ឈប់ការងារសម្រាប់ក្រុមហ៊ុន LinkedIn នៅឆ្នាំនេះ បន្ទាប់ពីការសម្រេចចិត្តកាលពីខែឧសភាក្នុងការកាត់បន្ថយបុគ្គលិកប្រមាណ ៧១៦នាក់។ តាមប្រសាសន៍របស់នាយកប្រតិបត្តិ LinkedIn លោក Ryan Roslansky បាននិយាយនៅក្នុងអនុស្សរណៈមួយទៅកាន់និយោជិតថា ការបញ្ឈប់បុគ្គលិកគឺចាំបាច់ដើម្បី «ធានាថាយើងមានទីតាំងល្អបំផុតសម្រាប់កំណើន និងភាពជោគជ័យរយៈពេលវែង»។ លោកក៏បាននិយាយផងដែរថា ក្រុមហ៊ុននឹង«ពន្យឺតល្បឿននៃការជួលបុគ្គលិកពេញមួយឆ្នាំតែម្តង»។ គួរជម្រាបដែរថា ការបញ្ឈប់ការងារនៅ LinkedIn គឺជាផ្នែកមួយនៃនិន្នាការកាន់តែធំនៅក្នុងឧស្សាហកម្មបច្ចេកវិទ្យា ដោយសារក្រុមហ៊ុនកំពុងដោះស្រាយជាមួយនឹងការធ្លាក់ចុះនៃសេដ្ឋកិច្ច និងអតិផរណាកើនឡើង។ ដោយឡែកក្នុងរយៈពេលប៉ុន្មានខែថ្មីៗនេះក្រៅតែពី LinkedIn នៅមានក្រុមហ៊ុនបច្ចេកវិទ្យាយក្សផ្សេងទៀតដែលបានប្រកាសបញ្ឈប់បុគ្គលិកដែលក្នុងនោះរួមមាន Meta, Twitter និង Netflix ក៏សុទ្ធតែជួបវិបត្តិសេដ្ឋកិច្ចខ្លាំងផងដែរ៕ ផ្តល់សិទ្ធិដោយ៖ freshnews

(CLIVE, Iowa)៖ លោក ដូណាល់ ត្រាំ នៅថ្ងៃចន្ទសប្ដាហ៍នេះ បានសន្យាថាប្រសិនបើជាប់ឆ្នោតជាប្រធានាធិបតីជាថ្មីម្ដងទៀត លោកនឹងហាមឃាត់ជនភៀសខ្លួន ដែល គាំទ្រក្រុមហាម៉ាសចូលក្នុងសហរដ្ឋអាមេរិក ព្រមទាំងបណ្ដេញជនភៀសខ្លួនទាំងឡាយណាដែលបង្ហាញការគាំទ្រជាសាធារណៈដល់ក្រុមសកម្មប្រយុទ្ធប៉ាឡេស្ទីននេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៧ ខែតុលា ឆ្នាំ២០២៣។ លោក ដូណាល់ ត្រាំ ធ្វើការសន្យាបែបនេះ អំឡុងធ្វើយុទ្ធនាការឃោសនាបោះឆ្នោតមួយ ក្នុងរដ្ឋ Iowa និងជាការឆ្លើយតបទៅនឹងការវាយប្រហាររបស់ហាម៉ាស ដែល បានសម្លាប់ជនជាតិអ៉ីស្រាអែលជាង ១,៤០០នាក់ ខណៈការវាយប្រហារសងសឹករបស់អ៉ីស្រាអែលបានសម្លាប់ជនជាតិប៉ាឡេស្ទីន ក្នុងតំបន់ហ្កាហ្សាជាង ២,៨០០នាក់។ លោក ត្រាំ ដែលធ្លាប់កាន់តំណែងជាប្រធានាធិបតីអាមេរិកពីឆ្នាំ២០១៧ ដល់ឆ្នាំ២០២១ បាននិយាយថាប្រសិនបើលោកជាប់ឆ្នោតជាលើកទី២ លោកនឹងហាមឃាត់ អ្នកទាំងឡាយណាដែលមិនជឿថាអ៉ីស្រាអែលជាប្រទេស ចូលក្នុងសហរដ្ឋអាមេរិក ហើយលុបចោលទិដ្ឋាការរបស់និស្សិតបរទេសដែលមានគំនិតប្រឆាំងជនជាតិជ្វីហ្វ។ លោក ត្រាំ បានគូសបញ្ជាក់ដូច្នេះថា «ប្រសិនបើអ្នកចង់លុបបំបាត់រដ្ឋអ៉ីស្រាអែល អ្នកនឹងត្រូវបានហាមឃាត់ ប្រសិនបើអ្នកគាំទ្រហាម៉ាស ឬមនោគមន៍វិជ្ជារបស់ហាម៉ាស អ្នកនឹងត្រូវបានហាមឃាត់ ហើយប្រសិនបើអ្នកជាកុម្មុយនិស្ដ ម៉ាកនិយម ឬក៏ហា្វស៊ីស អ្នកនឹងត្រូវបានហាមឃាត់»។ គួរបញ្ជាក់ថា អំឡុងកាន់តំណែងជាប្រធានាធិបតីអាមេរិក លោក […]

(ហ៊្សេរុយសាឡិម)៖ នៅរសៀលថ្ងៃចន្ទនេះ ក្រសួងសុខាភិបាលនៃតំបន់ Gaza Strip បានឱ្យដឹងថា តួលេខអ្នកស្លាប់ដោយសារ ការទម្លាក់​គ្រាប់បែករបស់អ៉ីស្រាអែល បានកើនដល់ខ្ទង់ ២,៧៥០នាក់ហើយ ក្នុងរយៈពេលប្រមាណ១០ថ្ងៃមកនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី១៦ ខែតុលា ឆ្នាំ២០២៣។ ក្រសួងសុខាភិបាលតំបន់ Gaza ដែលគ្រប់គ្រងដោយក្រុម Hamas បាននិយាយថា គិតចាប់តាំងពីថ្ងៃទី៧ ខែតុលាមក មនុស្សសរុបបន្ត​កើនដល់២,៧៥០នាក់ហើយ ដែលបានបាត់បង់ជីវិត និងប្រហែល៩,៧០០នាក់ទៀតបានរងរបួស ក្រោមការវាយប្រហារតាមផ្លូវអាកាសឥត​ឈប់ឈររបស់អ៉ីស្រាអែល ដែលជាការសងសឹកទៅលើក្រុម Hamas សម្រាប់សកម្មភាពឆ្មក់វាយប្រហារទ្រង់ទ្រាយធំរបស់ពួកគេ ចូលទៅ​កាន់ភាគខាងត្បូងអ៉ីស្រាអែល ហើយបានផ្តាច់ជីវិតមនុស្សជាង១,៣០០នាក់ និងចាប់មនុស្សជាង១៥០នាក់ យកទៅតំបន់ Gaza ដើម្បីធ្វើ​ជាចំណាប់ខ្មាំង។ គួរបញ្ជាក់ថា ក្រៅពីអ្នកស្លាប់និងរបួស ប្រជាជនប៉ាឡេស្ទីន១លាននាក់ ក៏បានភៀសខ្លួនចេញពីផ្ទះសម្បែងរបស់ពួកគេផងដែរនៅ Gaza​ ខណៈអ៉ីស្រាអែលកំពុងត្រៀមធ្វើសង្រ្គាមតាមជើងគោកវិញម្តង បន្ទាប់ពីបានផ្តោតវាយប្រហារតែតាមផ្លូវអាកាស។ ប្រតិបត្តិការវាយលុក​ជើងគោករបស់អ៉ីស្រាអែល ត្រូវបានគេព្រួយបារម្ភថា អាចនឹងបង្កហានិភ័យនៃការផ្ទុះជម្លោះរីករាលដាលធំទូទាំងតំបន់ ហើយបណ្តាលឱ្យមានផលវិបាកកាន់តែខ្លាំងធ្ងន់ធ្ងរ ជាងពេលនេះទៅទៀត៕ ផ្តល់សិទ្ធិដោយ៖ freshnews