បុរសជនជាតិចិនម្នាក់បានធ្វើឱ្យអ្នកលេងបណ្ដាញសង្គម Weibo រាប់លាននាក់ មានការច្រណែននឹងសំណាងរបស់គាត់យ៉ាងខ្លាំង បន្ទាប់ពីបុរសរូបនេះ ចាប់ឆ្នោតទទួលរង្វាន់ឈប់សម្រាកពេញមួយឆ្នាំ នៅក្នុងកម្មវិធីជប់លៀងអាហារពេលល្ងាចប្រចាំឆ្នាំរបស់ក្រុមហ៊ុន ដែលគាត់កំពុងបម្រើការងារ។ ពិធីជប់លៀងមួយនោះ ត្រូវបានធ្វើឡើងកាលពីថ្ងៃទី០៩ ខែមេសា នៅក្នុងខេត្ត Guangdong ភាគខាងត្បូងប្រទេសចិន ហើយវាក៏ជាកម្មវិធីប្រចាំឆ្នាំលើកដំបូងបំផុតក្នុងរយៈពេល ៣ឆ្នាំ ដោយសារការរំខានពីជំងឺ COVID-19។ វាត្រូវបានផ្អាកអស់ជាច្រើនឆ្នាំ ទើបថៅកែក្រុមហ៊ុនបានរៀបចំការចាប់រង្វាន់យ៉ាងច្រើនសន្ធឹកសន្ធាប់ ហើយបុរសរូបនេះក៏បានឈ្នះរង្វាន់ដ៏មហាអស្ចារ្យមួយនេះ។ បុរសម្នាក់នោះត្រូវបានគេស្គាល់ឈ្មោះថា Chen ជាបុគ្គលិកម្នាក់មកពីផ្នែករដ្ឋបាល របស់ក្រុមហ៊ុនមិនបញ្ចេញឈ្មោះមួយកន្លែង។ គាត់បានឈ្នះរង្វាន់ «ឈប់សម្រាក ៣៦៥ថ្ងៃ» នៅក្នុងពិធីជប់លៀងប្រចាំឆ្នាំរបស់ក្រុមហ៊ុន ខណៈអ្នកដទៃទៀតឈ្នះត្រឹមប្រាក់រង្វាន់ធម្មតាៗប៉ុណ្ណោះ។ មិត្តរួមការងាររបស់គាត់ម្នាក់បាននិយាយថា គាត់មិនដែលឃើញរង្វាន់បែបនេះទេ ចាប់តាំងពីគាត់រៀនចប់កាលពី ១៤ឆ្នាំមុន ហើយថៅកែរបស់លោក Chen ក៏មានការភ្ញាក់ផ្អើលយ៉ាងខ្លាំងផងដែរ ដោយសារឱកាសក្នុងការចាប់បានរង្វាន់មួយនេះ គឺមានតិចតួចមែនទែន។ ពោលគឺឱកាស ១ ក្នុងចំណោមរាប់ពាន់ឱកាស។ វីដេអូដែលគាត់បានឈ្នះរង្វាន់ឈប់សម្រាកពេញមួយឆ្នាំ (៣៦៥ថ្ងៃ) ត្រូវបានបង្ហោះលើបណ្ដាញសង្គម Weibo ដោយមានចំនួនចូលមើល ២៥០ លានដង គិតត្រឹមថ្ងៃទី១២ ខែមេសា ឆ្នាំ២០២៣។ ជាមួយគ្នានេះ ក្រុមហ៊ុនក៏បានផ្ដល់ជម្រើសឱ្យគាត់ផងដែរ ដោយទទួលយកច្បាប់សម្រាក ៣៦៥ថ្ងៃ (មានប្រាក់ខែធម្មតា) ឬទទួលយកប្រាក់ខែបូកបន្ថែមពេញមួយឆ្នាំពីលើប្រាក់ឈ្នួលដែលមានស្រាប់ […]

(បាងកក)៖ អាជ្ញាធរសុខាភិបាលថៃនៅថ្ងៃព្រហស្បតិ៍នេះ បានឱ្យដឹងថា ប្រជាជនសរុបកើនដល់ប្រហែល២.៤លាននាក់ បាននាំគ្នាទៅស្វែងរក​ការព្យាបាលនៅមន្ទីរពេទ្យ ក្រោយជួបបញ្ហាសុខភាព ដែលជាប់ពាក់ព័ន្ធទៅនឹងបញ្ហានៃការបំពុលខ្យល់អាកាស គិតចាប់តាំងពីដើមឆ្នាំនេះ ខណៈដែល​​ផ្នែកនៃប្រទេសថៃ បាននិងកំពុងបន្តគ្របដណ្តប់ដោយ ផ្សែងនិងអ័ព្ទពោរពេញដោយសារធាតុពុល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី២០ ខែមេសា ឆ្នាំ២០២៣។ យោងតាមកម្មវិធីតាមដានគុណភាពខ្យល់អន្តរជាតិ IQAir នៅព្រឹកថ្ងៃព្រហស្បតិ៍នេះ រាជធានីបាងកកនិងទីក្រុងឆៀងម៉ៃ (Chiang Mai) នៅ​ភាគខាងជើងប្រទេស ស្ថិតក្នុងចំណោមទីក្រុងដែលរងការបំពុលខ្យល់ខ្លាំងក្លាជាងគេបំផុត នៅលើពិភពលោក។ មន្រ្តីជាន់ខ្ពស់ម្នាក់របស់​ក្រសួងសុខាភិបាលថៃបានឱ្យដឹងថា ការធ្លាក់ចុះដុនដាបនៃគុណភាពខ្យល់ បានបង្ខំឱ្យមនុស្សសរុប២.៤លាននាក់ហើយ ត្រូវទៅស្វែងរក​ការព្យាបាលពីគ្រូពេទ្យ គិតចាប់តាំងពីដើមឆ្នាំ២០២៣ ខណៈក្នុងសប្តាហ៍នេះតែឯងប៉ុណ្ណោះ គឺមានអ្នកចូលមន្ទីរពេទ្យដល់ទៅ ១៨៤,៤៦៥នាក់។ បញ្ហាទាក់ទងនឹងផ្លូវដង្ហើម រួមជាមួយបញ្ហារលាកស្បែក ក្រហាយផ្នែក និងឈឺបំពង់ក គឺសុទ្ធតែស្ថិតក្នុងចំណោមបញ្ហាសុខភាពទូទៅបំផុត ដែលអ្នកជំងឺទាំងនោះបានប្រឈម ដោយសារការបំពុលខ្យល់ក្នុងប្រទេសថៃ។ ខាងអាជ្ញាធរថៃបានណែនាំឱ្យប្រជាជនប្រើប្រាស់ម៉ាស N95 ដែលមានគុណភាពខ្ពស់ដើម្បីទប់ទល់ការបំពុល ហើយកុំបើកចំហទ្វារ-បង្អួច ក៏ដូចជាកាត់បន្ថយការចំណាយពេលនៅខាងក្រៅ បើមិនមានភាពចាំបាច់។ គួរបញ្ជាក់ថា យោងតាមក្រុមអ្នកជំនាញ ការបំពុលខ្យល់នៅតាមផ្នែកនៃប្រទេសថៃ គឺជាចម្បងបណ្តាលមកពីផ្សែងកើតចេញពីភ្លើងឆេះព្រៃ និងការដុតកាកសំណល់កសិកម្ម។ ប្រទេសថៃមានប្រជាជនរស់នៅសរុបជាង៧០លាននាក់ ហើយបញ្ហាគុណភាពខ្យល់អាកាសបាន​ក្លាយជាបញ្ហាក្តៅមួយ […]

អាមេរិក៖ ក្រុមហ៊ុន Meta គ្រោងនឹងធ្វើការកាត់បន្ថយបុគ្គលិកទ្រង់ទ្រាយធំមួយសម្រាប់ផែនការនៅក្នុងឆ្នាំ ២០២៣នេះ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃព្រហស្បតិ៍ ទី២០​ ខែមេសានេះ។ បើតាមលោក Mark Zuckerberg ដែលជាស្ថាបនិក និងជានាយកប្រតិ​បត្តិនៃក្រុមហ៊ុនបណ្តាញសង្គមខ្នាតយក្សមួយនេះបានបញ្ជាក់ថា បុគ្គលិកដែលស្ថិតនៅក្នុងគម្រោងកាត់បន្ថយនេះគឺជាក្រុមបុគ្គលិកនៅក្នុងផ្នែកវិស្វករ និងបច្ចេកវិទ្យា។ នាយកប្រតិបត្តិវ័យ ៣៨ឆ្នាំរូបនេះបានបន្តថា គម្រោងបញ្ឈប់បុគ្គលិកខាងលើនេះនឹងត្រូវធ្វើឡើងជា ៣ដំណាក់កាល សម្រាប់បុគ្គលិក ៣ក្រុមផ្សេងគ្នា និងត្រូវប្រើពេលប្រហែលជា ៣-៤ខែ ដោយគិតចាប់ពីពេលជូនដំណឹងនេះតទៅ ខណៈគម្រោងបញ្ឈប់បុគ្គលិកនៅពេលនេះអាចនឹងប៉ះពាល់ដល់បុគ្គលិកសរុបប្រមាណជា ១០,០០០នាក់។ ចំពោះហេតុផលនៃការអនុវត្តគម្រោងខាងលើនេះវិញគឺត្រូវបានធ្វើឡើងដើម្បីឆ្លើយតបទៅនឹងស្ថានភាពហិរញ្ញវត្ថុរបស់ក្រុមហ៊ុន ពោលគឺជាគោលការណ៍រក្សាតុល្យភាពរវាងប្រាក់ចំណូលនិងការចំណាយជាក់ស្តែងរបស់ក្រុមហ៊ុន៕ ផ្តល់សិទ្ធិដោយ៖ ខ្មែរណូត

(ប៊ែន)៖ កាលពីថ្ងៃអង្គារសប្តាហ៍នេះ គ្រោងឆ្អឹងសត្វដាយណូស័រ T-Rex ដ៏ធំមួយ ដែលជាអម្បូរសត្វធ្លាប់រស់នៅលើផែនដីយើង កាលពី៦៧លានឆ្នាំមុន ត្រូវបានលក់ក្នុងតម្លៃ៥.៥លានហ្រ្វង់ស្វីស (Swiss francs) ឬស្មើនឹង៦.១៣លានដុល្លារអាមេរិក ក្នុងការដាក់លក់ដេញថ្លៃមួយ នៅឯទីក្រុងហ៊្សូរិច (Zurich) ខណៈចំនួនទឹកប្រាក់នោះ គឺតិចជាងការរំពឹងទុក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៩ ខែមេសា ឆ្នាំ២០២៣។ ដោយមានកម្ពស់ប្រវែង៣.៩ម៉ែត្រ និងបណ្តោយប្រវែង១១.៦ម៉ែត្រ ដាយណូស័រខាងលើដែលមានឈ្មោះសម្គាល់ថា TRX-293 TRINITY គឺជាគ្រោងឆ្អឹងផ្សំឡើងពី បំណែកឆ្អឺងសរុបចំនួន២៩៣បំណែក បានមកពី T-Rex ៣ក្បាលផ្សេងគ្នា ដែលត្រូវបានរកឃើញ​កាលពីចន្លោះឆ្នាំ២០០៨-២០២៣ នៅរដ្ឋម៉ុនតាណា (Montana) និងរដ្ឋវីយ៉ូមីង (Wyoming) របស់សហរដ្ឋអាមេរិក។ អ្នកទិញម្នាក់ដែលមិនត្រូវបានបញ្ចេញអត្តសញ្ញាណ បានដាក់ដេញថ្លៃក្នុងទឹកប្រាក់ចំនួន៤.៨លានហ្រ្វង់ស្វីស ដែលជាចំនួនច្រើនជាងគេ ប៉ុន្តែវាតិចជាងទឹកប្រាក់ចន្លោះ៥-៨លានហ្វ្រង់ស្វីស ដែលត្រូវបានរំពឹងទុក។ តម្លៃលក់ចុងក្រោយនៃគ្រោងឆ្អឹងដាយណូស័រនោះ បានកើនដល់៥.៥លានហ្រ្វង់ស្វីស ក្រោយបូកបន្ថែមនូវថ្លៃបន្ទាប់បន្សំផ្សេងៗ។ គួរ​បញ្ជាក់ថា វាគឺជាលើកដំបូងបំផុតនៅអឺរ៉ុប និងជាលើកទី៣នៅលើពិភពលោក ដែលគ្រោងឆ្អឹងដាយណូស័រ T-Rex មួយទាំងមូល ហើយស្ថិតក្នុងគុណភាពយ៉ាងល្អឥតខ្ចោះ ត្រូវបានដាក់លក់ដេញថ្លៃបែបនេះ។ […]

(សេអ៊ូល)៖​ ប្រធានាធិបតីកូរ៉េខាងត្បូង លោក យូន ស៊ុកយុល (Yoon Suk Yeol) បាននិយាយថាទីក្រុងសេអ៊ូលអាចនឹងផ្ដល់ជំនួយគាំទ្រសម្រាប់អ៊ុយក្រែន លើសពី ជំនួយមនុស្សធម៌ និងសេដ្ឋកិច្ច ប្រសិនបើមានការវាយប្រហារ ឬការសម្លាប់រង្គាលលើជនស៊ីវិលកើតឡើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៩ ខែមេសា ឆ្នាំ២០២៣។ ការកត់សម្គាប់ខាងលើរបស់លោក យូន ធ្វើឡើងក្នុងបទសម្ភាសន៍ផ្ដាច់មុខជាមួយទីភ្នាក់ងារសារព័ត៌មាន Reuters នៅមុនត្រូវបំពេញទស្សនកិច្ចទៅកាន់សហរដ្ឋអាមេរិក នៅសប្ដាហ៍ក្រោយ។ បើតាមលោក យូន រដ្ឋាភិបាលរបស់លោក ​បាន និងកំពុងស្វែងរកមធ្យោបាយជួយការពារ និងការកសាងអ៊ុយក្រែនឡើងវិញ ដូចគ្នាទៅនឹងអ្វីដែល កូរ៉េខាងត្បូងធ្លាប់ទទួលបានជំនួយពីសហគមន៍អន្តរជាតិ អំឡុងសម័យសង្រ្គាមកូរ៉េឆ្នាំ១៩៥០ ដល់ឆ្នាំ១៩៥៣។ ប្រធានាធិបតីកូរ៉េខាងត្បូងរូបនេះ បានគូសបញ្ជាក់បន្ថែមដូច្នេះថា «ប្រសិនបើមានស្ថានការណ៍មួយដែលសហគមន៍អន្តរជាតិមិនអាចអត់ឱនឱ្យបាន ក្នុងនោះរួមមាន ដូចជាការវាយប្រហារទ្រង់ទ្រាយធំលើជនស៊ីវិល ការសម្លាប់រង្គាល ឬក៏ការបំពានច្បាប់សង្រ្គាមធ្ងន់ធ្ងរ នោះវានឹងពិបាកណាស់សម្រាប់ពួកយើងក្នុងការទទូចបន្តផ្ដល់ត្រឹម តែជំនួយមនុស្សធម៌ ឬហរិញ្ញវត្ថុ»។ នេះគឺជាលើកដំបូងបំផុតហើយដែលកូរ៉េខាងត្បូង លើកឡើងពីបំណងបញ្ជូនអាវុធឱ្យអ៊ុយក្រែន ខណៈទីក្រុងបានប្រកាន់ជំហរ មិនព្រម​ផ្ដល់អាវុធអាចសម្លាប់ជីវិតមនុស្ស ចាប់តាំងពីសង្រ្គាមអ៊ុយក្រែនផ្ទុះឡើងមក។ គួរបញ្ជាក់ថា លោក យូន ស៊ុកយុល […]

អង្គការសុខភាពពិភពលោក (WHO) កាលពីថ្ងៃអង្គារ ទី១៨ ខែមេសា បានព្រមានថា ជំងឺរាតត្បាត COVID-19 នៅតែមានការប្រែប្រួលយ៉ាងរហ័ស ដោយនិយាយថា វាអាចមានបញ្ហាបន្ថែមទៀត មុនពេលដែលមេរោគនេះទៅជាមេរោគដែលអាចព្យាករណ៍បាន។ ក្នុងរយៈពេល ២៨ ថ្ងៃចុងក្រោយនេះ ការស្លាប់ជាង ២៣,០០០ នាក់ និងករណីថ្មីចំនួន ៣ លានករណី ត្រូវបានរាយការណ៍ទៅ WHO នៅក្នុងបរិបទដែលការធ្វើតេស្តត្រូវបានកាត់បន្ថយច្រើន។ ពោលគឺចំនួនករណីកំពុងថយចុះ ស្របពេលដែលមនុស្សជាច្រើនបានស្លាប់ និងធ្លាក់ខ្លួនឈឺ នេះបើតាមការឱ្យដឹងរបស់នាយកផ្នែកសង្គ្រោះបន្ទាន់ WHO លោក Michael Ryan។ លោក Ryan បាននិយាយថា មេរោគផ្លូវដង្ហើមមិនបានបាត់ទៅណានោះទេ គ្រាន់តែវាចុះថយសកម្មភាពនៃការឆ្លងរបស់វាមកកម្រិតទាប នៅពេលដែលវាឆ្លងផុតកម្រិតកំពូលរួចហើយនោះ។ លោកបាននិយាយថា វាដូចជាជំងឺគ្រុនផ្តាសាយ វានៅតែបង្កឱ្យមានជំងឺផ្លូវដង្ហើមសំខាន់ៗចំពោះមនុស្សដែលងាយរងគ្រោះ។ លោកបាននិយាយថា ប្រទេសមួយចំនួនសម្បូរប្រជាជនដែលងាយរងគ្រោះខ្លាំងដោយសារពួកគាត់មិនបានចាក់វ៉ាក់សាំង ខណៈដែលប្រទេសខ្លះទៀតជំងឺ COVID-19 មិនមែនជាព្រឹត្តិការណ៍បន្ទាន់ទៀតទេ។ មានន័យថា បើទោះបីជាមានករណីតិចឬច្រើន ប៉ុន្តែមេរោគនឹងនៅតែមានសកម្មភាព មិនទៅណានោះឡើយ៕ ផ្តល់សិទ្ធិដោយ៖ ខ្មែរណូត

មហាសេដ្ឋីលោក Elon Musk បាននិយាយថា លោកនឹងបើកដំណើរការប្រព័ន្ធឆ្លាតវៃសិប្បនិម្មិត AI «TruthGPT» ដើម្បីមកប្រកួតប្រជែងជាមួយ ChatGPT ដែលជាកម្មវិធីគាំទ្រដោយក្រុមហ៊ុន Microsoft និង Google។ មហាសេដ្ឋីរូបនេះ បានរិះគន់ដោយចំៗ ទៅលើក្រុមហ៊ុន OpenAI ដែលជាក្រុមហ៊ុននៅពីក្រោយ chatbot របស់ ChatGPT ថាបានបណ្តុះបណ្តាល AI ឱ្យចេះកុហក ហើយបាននិយាយថា OpenAI បានក្លាយជាអង្គភាពរកប្រាក់ចំណេញ, កូដ​បិទ​ជិត closed source និងជាសម្ព័ន្ធមិត្តយ៉ាងជិតស្និទ្ធជាមួយ Microsoft។ គាត់ក៏បានចោទប្រកាន់លោក Larry Page ដែលជាសហស្ថាបនិក Google ថា មិនបានយកចិត្តទុកដាក់លើសុវត្ថិភាពពាក់ព័ន្ធនឹង AI ផងដែរ។ លោក Musk បាននិយាយនៅក្នុងបទសម្ភាសន៍ជាមួយ Tucker Carlson របស់ទូរទស្សន៍ Fox News Channel ថា៖«ខ្ញុំនឹងចាប់ផ្តើមអ្វីមួយ ដែលខ្ញុំហៅថា TruthGPT ឬ AI ស្វែងរកការពិត ដែលព្យាយាមយល់ពីធម្មជាតិនៃសកលលោក»។ […]

(ប្រាទីស្លាវ៉ា)៖ ក្រសួងការពារជាតិស្លូវ៉ាគីកាលពីថ្ងៃចន្ទសប្តាហ៍នេះ បានប្រកាសឱ្យដឹងថា ស្លូវ៉ាគីបានប្រគល់យន្តហោះចម្បាំង MiG-29 ទាំង១៣គ្រឿង ឱ្យដល់ដៃអ៊ុយក្រែន តាមពាក្យសន្យាហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៨ ខែមេសា ឆ្នាំ២០២៣។ កាលពីថ្ងៃ២៣ ខែមីនា ស្លូវ៉ាគីបានប្រកាសឱ្យដឹងថា យន្តហោះ MiG-29 ចំនួន៤គ្រឿងដំបូង ដែលខ្លួនបានសន្យាផ្តល់ឱ្យទីក្រុងកៀវ គឺបានទៅដល់អ៊ុយក្រែន។ នាពេលនោះ ស្លូវ៉ាគីបាននិយាយថា ប៉ុន្មានគ្រឿងទៀតដែលនៅសល់ នឹងទៅដល់ជាបន្តបន្ទាប់ក្នុងពេល​ប៉ុន្មានសប្តាហ៍ខាងមុខ។ ស្លូវ៉ាគីបានចូលរួមជាមួយប៉ូឡូញ ក្នុងការប្រកាសផ្តល់ យន្តហោះចម្បាំងឱ្យអ៊ុយក្រែន កាលពីខែមីនា។ គួរបញ្ជាក់ថា កាលពីសប្តាហ៍មុន ក្រសួងការពារជាតិអាល្លឺម៉ង់ បានអនុញ្ញាតសំណើប៉ូឡូញ ស្តីពីការបញ្ជូនយន្តហោះចម្បាំង MiG-29 ចំនួន៥គ្រឿងទៅកាន់អ៊ុយក្រែន។ ប៉ូឡូញត្រូវការការយល់ព្រមានពីអាល្លឺម៉ង់ ទើបអាចបញ្ជូនយន្តហោះ MiG-29 របស់ខ្លួន ទៅកាន់​ប្រទេសទី៣បាន ដោយសារទីក្រុងវ៉ាសូវីទទួលបានពួកវាពីទីក្រុងបែរឡាំង កាលពីឆ្នាំ២០០៤៕ ផ្តល់សិទ្ធិដោយ៖ freshnews

ឥណ្ឌា៖ រលកកម្តៅបានផ្តាច់យកជីវិតពលរដ្ឋឥណ្ឌាចំនួន ១១នាក់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃចន្ទ ទី១៧ ខែមេសានេះ។ ហេតុការណ៍អកុសលនេះបានកើតនៅក្នុងអំឡុងពេលដែលរដ្ឋាភិបាលឥណ្ឌាបានរៀបចំវេទិកាសាធារណៈមួយនៅតំបន់ភាគខាងលិចទីក្រុងបុមបៃ ខណៈកម្មវិធីនោះមានការចូលរួមពីសំណាក់ប្រជាពលរដ្ឋប្រមាណជា ១លាននាក់។ វេទិកាសាធារណៈនោះត្រូវបានរៀបចំឡើងដោយតម្រូវឲ្យពលរដ្ឋត្រូវអង្គុយនៅក្រោយកម្តៅថ្ងៃដែលមានកម្រិតសីតុណ្ហភាពរហូតដល់ ៣៨អង្សាសេ ហើយពលរដ្ឋត្រូវអង្គុយក្នុងរយៈពេលយ៉ាងយូរ ដើម្បីរង់ចាំទទួលប្រាក់រង្វាន់នៅចុងបញ្ចប់នៃកម្មវិធី។ ប្រភពខាងលើបានបន្តថា ក្រៅតែពីបានរកឃើញអ្នកស្លាប់ភ្លាមៗនៅកន្លែងកើតហេតុ គឺមានពលរដ្ឋចំនួន ២០នាក់ផ្សេងទៀតបានដួលសន្លប់និងត្រូវបញ្ជូនទៅសង្គ្រោះនៅមន្ទីរពេទ្យជាបន្ទាន់ ខណៈពលរដ្ឋប្រមាណជា ៣០០នាក់បានធ្លាក់ខ្លួនឈឺ។ គួរបញ្ជាក់ជូនថា គិតចាប់តាំងពីឆ្នាំ ២០១០មក គឺមានពលរដ្ឋឥណ្ឌាប្រមាណជា ៦,៥០០នាក់ហើយ​ ដែលបានស្លាប់ព្រោះតែរលកកម្តៅ៕ ផ្តល់សិទ្ធិដោយ៖ ខ្មែរណូត  

(ការូអ៉ីហ្សាវ៉ា, ជប៉ុន)៖ រដ្ឋមន្ត្រីការបរទេសនៃក្រុមប្រទេស G7 នៅថ្ងៃអង្គារសប្ដាហ៍នេះបានស្នើឱ្យកូរ៉េខាងជើង បញ្ឈប់ការធ្វើតេស្ដអាវុធនុយក្លេអ៊ែរ និងមីស៊ីលបាលិស្ទីគ តទៅទៀត តែក៏បានព្រមានចាត់វិធានការឆ្លើយតបយ៉ាងម៉ឺងម៉ាត់ដែរ ក្រោយជួបប្រជុំគ្នាក្នុងប្រទេសជប៉ុន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី១៨ ខែមេសា ឆ្នាំ២០២៣។ ការស្នើអមជាមួយការព្រមានខាងលើ កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីទីក្រុងព្យុងយ៉ាងបានអះអាងពីការធ្វើតេស្ដដោយជោគជ័យនូវមីស៊ីលបាលិស្ទីគអន្តរទ្វីប ICBM ប្រើប្រាស់បច្ចេកវិទ្យាឥន្ធនៈរឹង ដែលជារបកគំហើញថ្មីមួយសម្រាប់ការអភិវឌ្ឍសមត្ថភាពវាយបកដោយអាវុធនុយក្លេអ៊ែររបស់កូរ៉េខាងជើង។ នៅក្នុងសេចក្ដីថ្លែងការណ៍មួយ ក្រុមរដ្ឋមន្ត្រីការបរទេស G7 បានគូសបញ្ជាក់ដូច្នេះថា «យើងស្នើឱ្យកូរ៉េខាងជើងបញ្ឈប់រាល់ការធ្វើសកម្មភាពបង្កអស្ថិរភាព ឬបង្កហេតុទាំងឡាយ ក្នុងនោះរួមមានទាំងការធ្វើ តេស្ដអាវុធនុយក្លេអ៊ែរ ឬមីស៊ីលបាលិស្ទីគ»។ សេចក្ដីថ្លែងការណ៍ដដែលបន្ថែមថា «សកម្មភាពរបៀបនេះនឹងត្រូវទទួលរងវិធានការឆ្លើយតបយ៉ាងម៉ឺងម៉ាត់ពីសហគមន៍អន្តរជាតិ រួមទាំងចំណាត់ការពីក្រុមប្រឹក្សាសន្តិសុខ UN»។​ គួរបញ្ជាក់ថា មីស៊ីលបាលិស្ទីគប្រើបច្ចេកវិទ្យាឥន្ធនៈរឹង គឺជាគោលដៅកំពូលមួយរបស់មេដឹកនាំកូរ៉េខាងជើង លោក គីម ជុងអ៊ុន ដោយមីស៊ីលប្រភេទនេះងាយស្រួលក្នុងការ ស្ដុកទុក និងដឹកជញ្ជូន ព្រមទាំងងាយស្រួលសម្រាប់ការរៀបចំបាញ់ចេញ ហើយប្រព័ន្ធការពារមីស៊ីលពិបាកស្ទាក់ចាប់៕ ផ្តល់សិទ្ធិដោយ៖ freshnews