អេស្ប៉ាញ៖ អាជ្ញាធរសុខាភិបាលនៃប្រទេសអេស្ប៉ាញបានសម្រេចនៅថ្ងៃសុក្រ ទី៣០​ ខែធ្នូនេះថា នឹងតម្រូវឲ្យអ្នកដំណើរមកពីប្រទេសចិនទាំងអស់ត្រូវតែបង្ហាញលទ្ធផលតេស្តអវិជ្ជមានជំងឺកូវីដ-១៩ ឬបង្ហាញឯកសារថាបានចាក់វ៉ាក់សាំងគ្រប់គ្រាន់ពេលធ្វើដំណើរមកដល់ទឹកដីអេស្ប៉ាញ នេះបើយោងតាមការចុះផ្សាយរបស់បណ្តាញសារព័ត៌មាន The Strait Times។ គួរបញ្ជាក់ជូនថា អេស្ប៉ាញគឺជាប្រទេសទី ៣ហើយ ដែលបានសម្រេចអនុវត្តវិធានការតឹងរឹងចំពោះអ្នកដំណើរមកពីប្រទេសចិន​ ខណៈកាលពីពេលថ្មីៗនេះសហរដ្ឋអាមេរិកនិងប្រទេសកូរ៉េខាងត្បូងទើបតែបានសម្រេចអនុវត្តវិធានការស្រដៀងគ្នានេះផងដែរ។ ប្រភពខាងលើបានបន្តថា ដើម្បីអនុវត្តវិធានការខាងលើនេះឲ្យមានប្រសិទ្ធភាពគឺអាជ្ញាធរអេស្ប៉ាញនឹងដាក់ពង្រាយក្រុមបុគ្គលិកសុខាភិបាលជាច្រើននាក់នៅតាមប្រលានយន្តហោះ ដើម្បីធ្វើការត្រួតពិនិត្យក្រុមអ្នកដំណើរទាំងអស់ដែលបានធ្វើដំណើរចេញមកពីប្រទេសចិន។ គួរបញ្ជាក់ជូនផងដែរថា ហេតុ​ផលដែលប្រទេសជាច្រើនសម្រេចអនុវត្តវិធានការតឹងរឹងចំពោះអ្នកដំណើរមកពីប្រទេសចិននោះក៏ព្រោះថា គេបានទទួលដំណឹងក្រៅផ្លូវការថានៅក្នុងប្រទេសចិនកំពុងមានការរាតត្បាតជំងឺកូវីដ-១៩យ៉ាងខ្លាំង ខណៈនៅពេលនេះអាជ្ញាធរចិនក៏បានសម្រេចលើកលែងការរឹតបន្តឹងប្រទេសថែមទៀត ក្រោយពេលពលរដ្ឋចិនជាច្រើននាក់នាំគ្នាធ្វើបាតុកម្មប្រឆាំងនឹងកងកម្លាំងរបស់អាជ្ញាធរចិន៕ ផ្តល់សិទ្ធិដោយ៖ ខ្មែរណូត

ថៃ៖ តុលាការថៃសម្រេចផ្តន្ទាទោសស្រ្តីម្នាក់ឲ្យជាប់គុករហូតដល់ ២០ឆ្នាំ ក្រោយស្រ្តីរូបនេះបានធ្វើសកម្មភាពលួចយកលុយម្តាយបង្កើតខ្លួនឯងក្នុងអំឡុងពេលដែលស្រ្តីជាម្តាយកំពុងមានជំងឺមិនអាចក្រោករួច។ យោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅថ្ងៃសុក្រ ទី៣០ ខែធ្នូនេះបានឲ្យដឹងថា ហេតុការណ៍នេះបានកើតឡើងនៅក្នុងតំបន់ Phra Khanong នៃទីក្រុងបាងកក ខណៈសកម្មភាពលួចលុយនេះបានកើតឡើងតាំងពីឆ្នាំ ២០១៩ម្ល៉េះ។ ប្រភពខាងលើនេះបានបន្តថា ស្រ្តីជាជនជាប់ចោទមានឈ្មោះថា Mawadee Sriwirat អាយុ ៥៦ឆ្នាំ ខណៈភាគីខាងដើមចោទគឺជាម្តាយបង្កើតរបស់គាត់តែម្តង ដែលមានឈ្មោះថា Huay អាយុ ៨៥ឆ្នាំ។ នៅក្នុងពាក្យបណ្តឹងរបស់ស្រី Huay បានបញ្ជាក់ថា កូនស្រីរបស់គាត់បានលួចលុយរបស់គាត់ជាង ២៥០លានបាត (ជាង ៧,២លានដុល្លារ) ខណៈដែលគាត់កំពុងតែដេកឈឺក្រោកមិនរួច។ យ៉ាងណាក្តី​ ក្រោយពេលដែលគាត់បានជាសះស្បើយពីជំងឺរូបគាត់ក៏សម្រេចដាក់បណ្តឹងតែម្តង ហើយយោងទៅតាមទំហំទឹកប្រាក់ដ៏ច្រើននេះខាងតុលាបានសម្រេចធ្វើការផ្តន្ទទោសអ្នកស្រី Mawadee Sriwirat ឲ្យជាប់គុករហូតដល់ ២០ឆ្នាំ៕ ផ្តល់សិទ្ធិដោយ៖ ខ្មែរណូត

(វ៉ាស៉ីនតោន)៖ សេតវិមានបានចេញសេចក្តីថ្លែងការណ៍ឱ្យដឹងថា កាលពីថ្ងៃព្រហស្បតិ៍ ប្រធានាធិបតីអាមេរិក លោក ចូ បៃដិន បានចុះហត្ថលេខារួចរាល់ហើយ លើសេចក្តីព្រាងកញ្ចប់ថវិកាទំហំរហូតដល់១.៦៦ទ្រីលានដុល្លារ (ពាន់ពាន់លាន) ដែលសម្រាប់ឱ្យ រដ្ឋាភិបាលអាមេរិកប្រើប្រាស់ក្នុងការចំណាយ សម្រាប់ឆ្នាំសារពើពន្ធ២០២៣។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៣០ ខែធ្នូ ឆ្នាំ២០២២។ លោក បៃដិន បានចុះហត្ថលេខាលើសេចក្តីព្រាងកញ្ចប់ថវិកាជាតិនេះ ដែលត្រូវបានសភាអនុម័តកាលពីសប្តាហ៍មុន ខណៈដែលលោកកំពុងសម្រាកវិស្សមកាលចុងឆ្នាំ នៅឯដែនកោះសាំងគ្រ័រ (St. Croix) នៃតំបន់សមុទ្រការីបង់។ ក្នុងកញ្ចប់ថវិកាដ៏ច្រើនមហិមានោះ រួមមានទាំងថវិកាជាកំណត់ត្រាសម្រាប់វិស័យយោធា, ជំនួយបន្ទាន់សម្រាប់អ៊ុយក្រែន, ការជួយឧបត្ថម្ភដល់និស្សិតនិងជនពិការ, ការផ្តល់មូលនិធិនិងធនធានបន្ថែមដើម្បីការពារសិទ្ធិកម្មករ និងសម្រាប់ការបណ្តុះបណ្តាលការងារ ព្រមទាំងការផ្តល់ផ្ទះសម្បែងក្នុងតម្លៃ​សមរម្យ សម្រាប់គ្រួសារ អតីតជនយុទ្ធជន និងអ្នកដែលរត់គេចពីអំពើហិង្សាក្នុងគ្រួសារ។ គួរបញ្ជាក់ថា កញ្ចប់ថវិកាខាងលើ ដែលមានជាង៤,០០០ទំព័រ ត្រូវបានអនុម័តដោយព្រឹទ្ធសភាអាមេរិក ក្នុងសំឡេងគាំទ្រ៦៨ ទល់នឹងសំឡេងជំទាស់២៩ ខណៈសមាជិកព្រឹទ្ធសភានៃបក្សសាធារណរដ្ឋចំនួន១៨នាក់ ក្នុងចំណោម៥០នាក់ បានចូលរួមគាំទ្រ។ ចំណែកនៅសភាតំណាងរាស្រ្តអាមេរិក វាត្រូវបានអនុម័តក្នុងសំឡេង២២៥គាំទ្រ ទល់នឹង២០១ជំទាស់៕ ផ្តល់សិទ្ធិដោយ៖ freshnews

តុលាការយោធាមីយ៉ាន់ម៉ាបានកាត់ទោសលោកស្រី Aung San Suu Kyi ឱ្យជាប់ពន្ធនាគាររយៈពេល ៧ ឆ្នាំបន្ថែមទៀត ដែលនាំឱ្យការជាប់ពន្ធនាគាររបស់គាត់មានសរុប ៣៣ ឆ្នាំ។ អតីត​មេដឹកនាំ​​ប្រជាធិបតេយ្យ​របស់​ប្រទេស​នេះ ​ត្រូវ​បាន​ឃុំ​ខ្លួន​ក្នុង​ផ្ទះ​ចាប់​តាំង​ពី​យោធា​បាន​ទម្លាក់​រដ្ឋាភិបាល​របស់​គាត់ ​ក្នុង​រដ្ឋប្រហារ​កាលពីខែ​កុម្ភៈឆ្នាំ​២០២១។ ចាប់​តាំង​ពី​ពេល​នោះ​មក លោកស្រី​ត្រូវ​ប្រឈម​មុខ​នឹង​ការ​កាត់​ក្ដី​អស់រយៈពេល ១៨ខែ កន្លងមកនេះ លើបទ​ចោទ​ប្រកាន់​ចំនួន ១៩។ ក្រុមប្រឹក្សាសន្តិសុខអង្គការសហប្រជាជាតិ ក៏បានអំពាវនាវឱ្យមានការដោះលែងលោកស្រីកាលពីសប្តាហ៍មុនផងដែរ។ នៅ​ថ្ងៃ​សុក្រនេះ លោកស្រី​ត្រូវ​បាន​កាត់​ទោស​លើ​បទ​ចោទប្រកាន់ចំនួន ៥​ ចុង​ក្រោយ ​ដែល​គាត់​បាន​ប្រឈម​មុខ។ តុលាការ​បាន​រក​ឃើញ​ថា ​គាត់​មាន​ទោស​ពី​បទ​ពុក​រលួយ ដោយ​សារ​តែ​គាត់​មិន​បាន​អនុវត្ត​តាម​បទប្បញ្ញត្តិ​ ក្នុង​ការ​ជួល​ឧទ្ធម្ភាគចក្រ​សម្រាប់​រដ្ឋមន្ត្រី​រដ្ឋាភិបាល។ គាត់ត្រូវបានកាត់ទោសពីបទឧក្រិដ្ឋកម្មចំនួន ១៤ ករណីផ្សេងៗគ្នា រួមទាំងការបំពានច្បាប់សុវត្ថិភាពសាធារណៈពាក់ព័ន្ធនឹងជំងឺ COVID-19 ការនាំចូលឧបករណ៍អាយកូម និងបំពានរឿងសម្ងាត់ផ្លូវការ។ គាត់ត្រូវបានគេកាត់ក្ដីបិទទ្វារ ដោយគ្មានសាធារណជន និងប្រព័ន្ធផ្សព្វផ្សាយ ហើយមេធាវីរបស់គាត់ ក៏ត្រូវបានហាមឃាត់មិនឱ្យនិយាយជាមួយអ្នកកាសែតផងដែរ៕ ផ្តល់សិទ្ធិដោយ៖ ខ្មែរណូត

អាមេរិក៖ សហរដ្ឋអាមេរិកកំពុងពិចារណាអំពីជម្រើសនៃការអនុវត្តវិធានការដ៏តឹងរឹងមួយដើម្បីទប់ស្កាត់ការនាំចូលមេរោគនៃជំងឺកូវីដ-១៩ពីក្រៅប្រទេស ដោយអាជ្ញាធរអាមេរិកគ្រោងនឹងធ្វើតេស្តរកជំងឺកូវីដ-១៩ចំពោះកាកសំណល់ទឹកទាំងអស់ដែលមាននៅលើយន្តហោះដឹកអ្នកដំណើរ។ បើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃសុក្រ​ ទី៣០ ខែធ្នូនេះបានបញ្ជាក់ថា គម្រោងអនុវត្តវិធានការរបស់អាជ្ញាធរអាមេរិកដូចបានជម្រាបជូនខាងលើនេះគឺបានកើតឡើងក្រោយពេលដែលមានប្រភពក្រៅផ្លូវការជាច្រើនសុទ្ធតែបានអះអាងថា នៅក្នុងប្រទេសចិនកំពុងតែផ្ទុះការរាតត្បាតជំងឺកូវីដ-១៩យ៉ាងខ្លាំង។ គួរបញ្ជាក់ជូនថា បើយោងទៅតាមរបាយការណ៍ផ្លូវការរបស់អាជ្ញាធរចិនបានបង្ហាញថា តួលេខអ្នកឆ្លងជំងឺកូវីដ-១៩នៅក្នុងប្រទេសចិនមានចំនួនមិនច្រើនគួរឲ្យព្រួយបារម្ភនោះទេ ពោលគឺស្ថិតនៅក្នុងកម្រិតមួយដែលអាជ្ញាធរអាចគ្រប់គ្រងបាន។ យ៉ាងណាក្តី បើយោងតាមក្រុមអ្នកជំនាញជាច្រើនសុទ្ធតែបានអះអាងថា ចិនកំពុងប្រឈមនឹងការរាតត្បាតជំងឺកូវីដ-១៩យ៉ាងខ្លាំង ពោលគឺចំនួនអ្នកឆ្លងជំងឺកូវីដ-១៩ថ្មីអាចមានដល់ខ្ទង់ ២៥០លាននាក់ដោយគិតត្រឹម ២០ថ្ងៃដំបូងនៃខែធ្នូនេះ។ អ្វីដែលធ្វើឲ្យក្រុមអ្នកជំនាញផ្នែកជំងឺឆ្លងព្រួយបារម្ភអំពីស្ថានភាពរាតត្បាតជំងឺកូវីដ-១៩នៅក្នុងប្រទេសចិនយ៉ាងខ្លាំងនោះ គឺដោយហេតុថា ចិនមានប្រជាពលរដ្ឋច្រើនណាស់ពោលគឺប្រមាណជា ១,៤ពាន់លាននាក់ ហើយភាគច្រើននៃប្រជាពលរដ្ឋទាំងអស់នោះមិនបានទៅចាក់វ៉ាក់សាំងឲ្យបានគ្រប់គ្រាន់តាមការណែនាំនោះទេ៕ ផ្តល់សិទ្ធិដោយ៖ ខ្មែរណូត

ការ​ប្រកាស​អាសន្ន​ចំពោះការ​វាយ​ប្រហារ​ផ្លូវ​អាកាស​ត្រូវ​បានដាក់​ចេញ​នៅ​ទូទាំង​ប្រទេស ខណៈ​​រលក​ថ្មី​នៃ​មីស៊ីលរុស្ស៊ី​ បាន​តម្រង់​គោលដៅ​មកលើ​ទីក្រុង​ធំៗរបស់​អ៊ុយក្រែន។ ទីប្រឹក្សាប្រធានាធិបតីលោក Mykhailo Podolyak បាននិយាយថា មីស៊ីលជាង ១២០ គ្រាប់ ត្រូវបានបាញ់បង្ហោះទៅកាន់ប្រជាជន និងហេដ្ឋារចនាសម្ព័ន្ធស៊ីវិល។ អភិបាលក្រុងលោក Vitaliy Klitschko បាននិយាយថា យ៉ាងហោចណាស់មនុស្ស ៣ នាក់ រួមទាំងក្មេងស្រីអាយុ ១៤ ឆ្នាំម្នាក់ ត្រូវបានបញ្ជូនទៅកាន់មន្ទីរពេទ្យ បន្ទាប់ពីការបាញ់បង្ហោះបានវាយប្រហាររដ្ឋធានីគៀវ។ សំឡេងផ្ទុះ​ក៏​ត្រូវ​បាន​គេ​ឮ​នៅ​ក្នុង​ទីក្រុង Kharkiv, Odesa, Lviv និង Zhytomyr ផងដែរ។ កងទ័ពអាកាសអ៊ុយក្រែនបាននិយាយថា រុស្ស៊ីកំពុងវាយប្រហារប្រទេសនេះពីទិសដៅផ្សេងៗគ្នា ជាមួយនឹងមីស៊ីលធ្វើដំណើរតាមអាកាស និងតាមសមុទ្រ។ វាបានបន្ថែមថា យន្តហោះគ្មានមនុស្សបើក Kamikaze មួយចំនួនក៏ត្រូវបានប្រើប្រាស់ផងដែរ។ ការជូនដំណឹងអំពីការវាយឆ្មក់តាមអាកាស បានបន្លឺឡើងនៅគ្រប់តំបន់នៃប្រទេសនៅព្រឹកថ្ងៃព្រហស្បតិ៍។ ទីប្រឹក្សាប្រធានាធិបតីលោក Oleksiy Arestovych បានជំរុញឱ្យជនស៊ីវិលស្វែងរកទីជម្រក ហើយបាននិយាយថា ការការពារដែនអាកាសរបស់ប្រទេសកំពុងដំណើរការ។ នៅក្នុងទីក្រុងគៀវផ្ទះចំនួន ២ បានរងការខូចខាតដោយសារកំទេចកំទីពីមីស៊ីលស្ទាក់ចាប់ នេះបើយោងតាមរដ្ឋបាលយោធាទីក្រុង៕ ផ្តល់សិទ្ធិដោយ៖ ខ្មែរណូត

ស្តេចបាល់ទាត់របស់ប្រេស៊ីល Pelé បានទទួលមរណភាពក្នុងអាយុ ៨២ឆ្នាំ នៅមន្ទីពេទ្យ Albert Einstein ក្នុងទីក្រុង Sao Paulo ប្រទេសប្រេហ្ស៊ីល ថ្ងៃទី៣០ ខែធ្នូ បន្ទាប់ពីប្រយុទ្ធជាមួយជំងឺមហារីកយ៉ាងយូរ នេះបើយោងតាមការបញ្ជាក់របស់ ក្រុមគ្រួសាររបស់គាត់។ លោក Pelé ដែលជាកីឡាករតែម្នាក់គត់ដែលឈ្នះពាន World Cup បីដងនោះ បានចូលសម្រាកនៅមន្ទីរពេទ្យតាំងពីខែវិច្ឆិកាមកម្ល៉េះ។ Pelé កើតនៅថ្ងៃទី២៣ ខែតុលា ឆ្នាំ១៩៤០។ ក្នុងអាជីពរយៈពេល២១ឆ្នាំរបស់គាត់ Pelé លោកស៊ុតបញ្ចូលទីបាន ១,២៨៣ គ្រាប់ក្នុងការប្រកួត ១,៣៦៧ រួមទាំង ៧៧គ្រាប់សម្រាប់ក្រុមជម្រើសជាតិប្រេស៊ីល។ ហើយជាកីឡាករតែមួយគត់ដែលបានឈ្នះ World Cup បីដងក្នុងឆ្នាំ ១៩៥៨, ១៩៦២ និង១៩៧០៕ ផ្តល់សិទ្ធិដោយ៖ ខ្មែរណូត

ក្រសួងសុខភាពសាធារណៈរបស់អ៊ុយរូហ្គាយបាននិយាយថា អ្នកជំនាញរបស់ពួកគេបានរកឃើញវត្តមាននៃជំងឺ COVID-19 វ៉ារ្យ៉ងអូមីក្រុង ក្នុងទម្រង់ថ្មីចំនួន ២ ចំពេលមានរលកនៃការឆ្លងថ្មីៗជាបន្ដបន្ទាប់។ ក្រសួងបាននិយាយនៅក្នុងសេចក្តីថ្លែងការណ៍មួយថា អូមីក្រុងទម្រង់ថ្មីទាំង ២ ត្រូវបានគេហៅថា XBB.1 និង DL.1 ហើយវាត្រូវបានរកឃើញដោយ នាយកដ្ឋានមន្ទីរពិសោធន៍សុខភាពសាធារណៈផ្នែករោគរាតត្បាត។ គិតមកទល់ពេលនេះ អូមីក្រុងនៅតែជាវ៉ារ្យ៉ង់ឈានមុខគេ ហើយទម្រង់របស់វាបានផ្លាស់ប្តូរទៅតាមពេលវេលា។ ក្រសួង​បន្ត​ថា សាធារណជន​គួរ​បន្ត​អនុវត្ត​ការ​បង្ការ និង​ចាក់​វ៉ាក់សាំង។ រដ្ឋមន្ត្រីសុខាភិបាលសាធារណៈលោក Daniel Salinas កាលពីថ្ងៃពុធក៏បានបញ្ជាក់តាមរយៈប្រព័ន្ធផ្សព្វផ្សាយសង្គមដែរថា នៅក្នុងចំណោមជំងឺ COVID-19 ក្នុងទម្រង់ផ្សេងគ្នា ដែលកំពុងមានស្រាប់នៅអ៊ុយរូហ្គាយ ក្រុមមន្ត្រីកំពុងរាប់បញ្ចូល XBB.1 និង DL.1 ជាផ្នែកមួយនៃការកើនឡើងនៃករណីបច្ចុប្បន្ននេះ។ កាលពីថ្ងៃចន្ទ ក្រសួងសុខាភិបាលបាននិយាយថា ចំនួនអ្នកឆ្លងជំងឺ COVID-19 ថ្មីចំនួន ៨,២១៦ នាក់ ត្រូវបានចុះបញ្ជីនៅក្នុងប្រទេសនេះ ក្នុងអំឡុងថ្ងៃទី១៨ ដល់ថ្ងៃទី២៤ ខែធ្នូ ដែលជាការកើនឡើង ៦% ពីសប្តាហ៍មុនមួយទៀត ខណៈមាន​អ្នក​ស្លាប់​ ១០​នាក់ កាលពីសប្ដាហ៍មុន៕ ផ្តល់សិទ្ធិដោយ៖ ខ្មែរណូត

អ៊ូសបេគីស្ថាន៖ ក្រសួងសុខាភិបាលនៃប្រទេសអ៊ូសបេគីស្ថានបានអះអាងថា បានរកឃើញករណីមានកូនក្មេងចំនួន ១៨នាក់បានស្លាប់បាត់បង់ជីវិតក្រោយពេលញ៉ាំទឹកស៊ីរ៉ូ ដែលជាប្រភេទថ្នាំបំបាត់ក្អកនិងផ្តាសាយផលិតនៅក្នុងប្រទេសឥណ្ឌា។ បើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃព្រហស្បតិ៍ ទី២៩ ខែធ្នូនេះបានបញ្ជាក់ថា ទឹកស៊ីរ៉ូដែលកំពុងជាប់ពាក់ព័ន្ធក្នុងករណីចម្រូងចម្រាស់នេះគឺទឹកស៊ីរ៉ូម៉ាក Doc-1 Max ផលិតឡើងដោយក្រុមហ៊ុន Marion Biotech ដែលមានមូលដ្ឋាននៅក្នុងប្រទេសឥណ្ឌា។ ប្រភពខាងលើបានបន្តថា ក្រោយញ៉ាំទឹកស៊ីរ៉ូដូចបានជម្រាបជូនខាងលើនេះរួចគឺមានកូនក្មេងចំនួន ២១នាក់បានរងប្រតិកម្មយ៉ាងខ្លាំង ពោលគឺមានបញ្ហាថប់ដង្ហើមយ៉ាងធ្ងន់ធ្ងរបំផុតនិងត្រូវបញ្ជូនទៅសង្គ្រោះបន្ទាន់ភ្លាមៗផងដែរ។ ​យ៉ាងណាក្តី មានកូនក្មេងត្រឹមតែ ៣នាក់ប៉ុណ្ណោះដែលគេអាចជួយសង្គ្រោះជីវិតបានទាន់ពេលវេលា ខណៈក្មេងចំនួន ១៨នាក់ផ្សេងទៀតបានស្លាប់យ៉ាងអាណោធអាធ័មជាទីបំផុត។ ក្រោយពេលកើតហេតុក្រុមអ្នកជំនាញអ៊ូសបេគីស្ថានបានរកឃើញថា នៅក្នុងទឹកស៊ីរ៉ូមានផ្ទុកនូវសារធាតុ Ethylene Glycol ដែលជាប្រភេ​ទសារធាតុពុលផងដែរ។ យ៉ាងណាក្តី រហូតមកទល់នឹងពេលនេះគេនៅទាន់ទទួលបានការឆ្លើយតបយ៉ាងណានោះទេពីសំណាក់ភាគីខាងប្រទេសឥណ្ឌា ហើយចំពោះករណីស្លាប់នេះទៀតសោធក៏គេនៅទាន់រកឃើញច្បាស់ថា ក្មេងៗបានស្លាប់ព្រោះតែសារធាតុពុលនៅក្នុងទឹកស៊ីរ៉ូ ឬស្លាប់ព្រោះតែញ៉ាំទឹកស៊ីរ៉ូលើសបរិមាណកំណត់ ឬក៏សា្លប់ដោយសារតែហេតុផលទាំង ២នេះបូកបញ្ចូលគ្នា៕ ផ្តល់សិទ្ធិដោយ៖ ខ្មែរណូត

ទីភ្នាក់ងារសារព័ត៌មានកាតាបានបញ្ជាក់ថា បន្ទប់សម្រាករួមគ្នារបស់កំពូលកីឡាករ Lionel Messi និង Sergio Aguero នៅក្នុងព្រឹត្តិការណ៍ World Cup នឹងលែងទទួលភ្ញៀវទៀតហើយ។ ផ្ទុយទៅវិញតំបន់នោះនឹងក្លាយជាសារមន្ទីរខ្នាតតូចមួយ ខណៈដែលប្រដាប់ប្រដាដែលកីឡាកររបស់ក្លឹប Paris Saint-Germain រូបនេះបានប្រើប្រាស់នៅទីនោះ ក៏នឹងត្រូវរក្សាទុកឱ្យនៅដូចដើម ដើម្បីសិស្សានុសិស្ស និងអ្នកផ្សេងទៀតអាចចូលទស្សនាបាន នេះបើតាមការចុះផ្សាយដោយ GOAL ។ លោក Hitmi al Hitmi នាយកផ្នែកទំនាក់ទំនង និងទំនាក់ទំនងសាធារណៈនៅសាកលវិទ្យាល័យកាតា បានប្រាប់កាសែតកាតា Al Sharq ថា៖«បន្ទប់របស់កីឡាករជម្រើសជាតិអាហ្សង់ទីន Lionel Messi នឹងមិនផ្លាស់ប្តូរទៅណា ហើយសម្រាប់បើកឱ្យទស្សនាប៉ុណ្ណោះ មិនមែនសម្រាប់ស្នាក់នៅទៀតទេ។ បន្ទប់របស់ Messi នឹងក្លាយជាមរតកសម្រាប់សិស្សានុសិស្ស និងមនុស្សជំនាន់ក្រោយ និងជាសក្ខី​ភាពចំពោះសមិទ្ធិផលដ៏អស្ចារ្យ ដែល Messi ទទួលបានក្នុងអំឡុងការប្រកួត World Cup»។ ជម្រាបផងដែរថា ជ័យជម្នះមិនអាចបំភ្លេចបានរបស់អាហ្សង់ទីនលើបារាំង ក្នុងវគ្គផ្តាច់ព្រ័ត្រនៃព្រឹត្តិការណ៍ឆ្នាំ២០២២ បានធ្វើឱ្យវាក្លាយជាពានទី៣ សម្រាប់អាហ្សង់ទីន និងជាលើកទីមួយរបស់ Messi ក្នុងអាជីពរបស់គាត់៕ ផ្តល់សិទ្ធិដោយ៖ […]