(វ៉ាស៉ីនតោន)៖ ប្រធានធនាគារពិភពលោក លោក ដេវីដ ម៉ាល់ប៉ាស់ (David Malpass) កាលពីថ្ងៃព្រហស្បតិ៍សប្តាហ៍នេះ បានប្រាប់ថា ការខូចខាតចំពោះសំណង់អគារ និងប្រព័ន្ធហេដ្ឋារចនាសម្ព័ន្ធនៅក្នុងប្រទេសអ៊ុយក្រែន ដែលបណ្តាលមកពីសង្រ្គាមឈ្លានពានរបស់រុស្ស៉ី គឺបានកើនដល់ប្រហែល៦០ពាន់លានដុល្លារ គិតត្រឹមពេលនេះ ហើយវានឹងកើនឡើងថែមទៀត ខណៈសង្រ្គាមនៅតែបន្ត។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃសុក្រ ទី២២ ខែមេសា ឆ្នាំ២០២២។ លោក Malpass បានឱ្យដឹងដូចខាងលើ កំលុងសន្និសីទមួយរបស់ធនាគារពិភពលោកស្តីពី តម្រូវការជំនួយផ្នែកហិរញ្ញវត្ថុរបស់អ៊ុយក្រែន ហើយលោកបានគូសបញ្ជាក់ថា ការប៉ាន់ស្មានជាបឋមនេះ គឺមិនទាន់រាប់បញ្ចូលនូវទំហំសេដ្ឋកិច្ចរបស់អ៊ុយក្រែន ដែលកំពុងទទួលរង ការខាតបង់កាន់តែធ្ងន់ធ្ងរឡើងៗ ដោយសារសង្រ្គាមឡើយ។ បើតាមលោក Malpass ខណៈសង្រ្គាមនៅតែបន្ត ការខាតបង់ទាំងនេះ នឹងបន្តកើនឡើងដូចគ្នា។ គួរបញ្ជាក់ថា តាមរយៈការថ្លែងសារតាមវីដេអូ ទៅកាន់សន្និសីទខាងលើ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានអះអាងថា ប្រទេសរបស់លោក ត្រូវការជំនួយរហូតដល់ ៧ពាន់លានដុល្លារក្នុងមួយខែ ដើម្បីស្តារការខាតបង់សេដ្ឋកិច្ច ដែលបង្កឡើង ដោយការឈ្លានពានរបស់រុស្ស៉ីលើអ៊ុយក្រែន។ ចំណែកនាយករដ្ឋមន្រ្តីអ៊ុយក្រែន លោក […]

ប្រទេសរុស្ស៊ីកាលពីថ្ងៃព្រហស្បតិ៍ ទី២១ ខែមេសា ឆ្នាំ២០២២ បានប្រកាសនឹងហាមប្រាមការចូលបន្ថែមទៀត ចំពោះមន្ត្រីរបស់សហរដ្ឋអាមេរិក ដែលរួមមានអនុប្រធានាធិបតី Kamala Harris, មន្ត្រីអាមេរិកចំនួន ២៨ នាក់, បូករួមទាំងអ្នកជំនួញ និងអ្នកកាសែតផ្សេងទៀត។ បញ្ជីទណ្ឌកម្មដែលចេញផ្សាយដោយក្រសួងការបរទេសរុស្ស៊ី ក៏មានឈ្មោះស្ថាបនិក Facebook លោក Mark Zuckerberg, អនុរដ្ឋមន្ត្រីការពារជាតិ Kathleen Hicks និងអ្នកនាំពាក្យមន្ទីរបញ្ចកោណ លោក John Kirby ផងដែរ។ ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍មួយថា៖«បុគ្គលទាំងនេះ ត្រូវបានបដិសេធមិនឱ្យចូលទៅក្នុងសហព័ន្ធរុស្ស៊ីដោយគ្មានកាលកំណត់»។ នៅថ្ងៃដដែល ក្រសួងការបរទេសរុស្ស៊ីក៏បានដាក់ទណ្ឌកម្មលើមន្ត្រីកាណាដា អ្នកកាសែត និងអ្នកជំនាញយោធាចំនួន ៦១ នាក់ផងដែរ សម្រាប់ការគាំទ្រនូវអ្វីដែលខ្លួនហៅថាជំហរ «ប្រឆាំងរុស្ស៊ី» របស់រដ្ឋបាលកាណាដា។ ក្រសួងបាននិយាយថា បុគ្គលទាំង ៦១នាក់ រួមទាំងមេបញ្ជាការកងកម្លាំងប្រតិបត្តិការពិសេស ឧត្តមសេនីយ៍ទោ Steve Boivin, ទេសាភិបាលធនាគារកណ្តាល Tiff Macklem ព្រមទាំងលោក John Tory និងលោក Jim Watson […]

ប្រេស៊ីល៖ តុលាការប្រេស៊ីលបានបង្គាប់ឲ្យក្រុមហ៊ុន Apple ត្រូវផ្តល់ប្រាក់សំណងចំនួន ៥,០០០ រៀលប្រេស៊ីល ឬស្មើនឹង ១,០៨១ ដុល្លារអាមេរិកសម្រាប់អតិថិជនម្នាក់ ចំពោះសកម្មភាពដែលក្រុមហ៊ុនមិនបានបញ្ចូលឆ្នាំងសាកថ្មទូរស័ព្ទនៅក្នុងប្រអប់ទូរស័ព្ទ iPhone ថ្មី។ បើយោងតាមការចុះផ្សាយរបស់បណ្តាញសារព័ត៌មាន Business Insider បានឲ្យដឹងថា ចៅក្រមរូបនេះមានឈ្មោះថា Vanderlei Caires Pinheiro បច្ចុប្បន្ន កំពុងបម្រើការងារនៅតុលាការស៊ីវិលក្នុងក្រុង Goiânia នៃប្រទេសប្រេស៊ីល ហើយរូបលោកបានអះអាងថា ការដែលក្រុមហ៊ុន Apple តម្រូវឲ្យអតិថិជនខ្លួនមានកាតព្វកិច្ចទិញផលិតទី ២ នៃផលិតផលផ្តាច់មុខមួយរបស់ក្រុមហ៊ុនខ្លួននោះគឺជាការបំពាននិងអនុវត្តដោយខុសពីច្បាប់ពាណិជ្ជកម្មទាំងស្រុងតែម្តង។ ក្រុមហ៊ុន Apple បានឆ្លើយតបការពារចំពោះការចោទប្រកាន់ខាងលើនេះថា ខាងក្រុមហ៊ុនបានផ្តល់ជូនឌុយសម្រាប់ដោតបញ្ចូលថ្មដោយមានក្បាលឌុយប្រភេទ USB-C ដើម្បីអនុញ្ញាតឲ្យអតិថិជនខ្លួនអាចប្រើឌុយនេះជាមួយដុំសាកថ្មរបស់ក្រុមហ៊ុនផ្សេងទៀតបាន ដូចនេះវាមានន័យថា ខាងក្រុមហ៊ុនមិនបានតម្រូវឲ្យអតិថិជនត្រូវតែទិញដុំសាកថ្មរបស់ក្រុមហ៊ុនខ្លួនបន្ថែមទៀតនោះទេ។ យ៉ាងណាក្តី ចៅក្រម Vanderlei Caires Pinheiro នៅតែបដិសេធចំពោះការឆ្លើយតបខាងលើនេះ ដោយបានបញ្ជាក់ថា ឌុយ USB-C របស់ក្រុមហ៊ុន Apple មិនអាចដំណើរការបានយ៉ាងល្អជាមួយដុំសាកថ្មរបស់ក្រុមហ៊ុនផ្សេងក្រៅពីផលិតផលរបស់ក្រុមហ៊ុន Apple ឡើយ។ ចៅក្រមរូបនេះបានបន្ថែមទៀតថា នាពេលកន្លងមកក្រុមហ៊ុន Apple […]

(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) កាលពីថ្ងៃព្រហស្បតិ៍សប្ដាហ៍នេះ បាននិយាយថា អ៊ុយក្រែនត្រូវការទឹកប្រាក់ចំនួន ៧ពាន់លានដុល្លារអាមេរិកក្នុងមួយខែ ដើម្បីទូទាត់សងសម្រាប់ការខាតបង់សេដ្ឋកិច្ច ដែលបណ្តាលមកពីការឈ្លានពានរបស់រុស្ស៊ីមកលើប្រទេសរបស់លោក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន NDTV នៅថ្ងៃសុក្រ ទី២២ ខែមេសា ឆ្នាំ២០២២។ លោក Volodymyr Zelenskiy បានគូសបញ្ជាក់នៅក្នុងសុន្ទរកថាតាមប្រព័ន្ធអនឡាញ ទៅកាន់វេទិកាធនាគារពិភពលោកយ៉ាងដូច្នេះថា សហគមន៍ពិភពលោក ចាំបាច់ត្រូវដកប្រទេសរុស្ស៊ីចេញពី ស្ថាប័នហិរញ្ញវត្ថុអន្តរជាតិជាបន្ទាន់ ហើយបានជំរុញឱ្យប្រទេសទាំងអស់ ផ្តាច់ទំនាក់ទំនងជាមួយទីក្រុងមូស្គូជាបន្ទាន់ផងដែរ ខណៈការបិទច្រកសមុទ្រខ្មៅដោយរុស្ស៊ី កំពុងរារាំងការនាំចេញរបស់អ៊ុយក្រែន ដែលធ្វើឱ្យប៉ះពាល់យ៉ាងខ្លាំងដល់ សន្តិសុខស្បៀងរបស់ពិភពលោក។ គួរបញ្ជាក់ថា ការឈ្លានពានរបស់រុស្ស៉ីមកលើអ៊ុយក្រែន គឺជាការវាយប្រហារដ៏ធំបំផុតមកលើប្រទេសមួយនៃទ្វីបអឺរ៉ុប គិតចាប់តាំងពីឆ្នាំ១៩៤៥មក ដែលបានធ្វើឱ្យមនុស្សរាប់ពាន់នាក់ស្លាប់ និងរងរបួស ហើយសព្វថ្ងៃនេះមនុស្សជាង ១២លាននាក់កំពុងត្រូវការជំនួយមនុស្សធម៌ នៅក្នុងប្រទេសអ៊ុយក្រែន៕ ផ្តល់សិទ្ធិដោយ៖ freshnews

ការិយាល័យផ្សព្វផ្សាយពាណិជ្ជកម្មបរទេសនៅស្ថានទូតថៃប្រចាំទីក្រុងភ្នំពេញបានរាយការណ៍ថា Siam Makro នឹងបើកផ្សារទំនើប Makro ពីរបន្ថែមទៀតនៅក្នុងប្រទេសកម្ពុជា ដោយបន្ថែមលើផ្សារ Makro ទាំងពីរដែលបានដំណើរការរួចហើយក្នុងនោះមួយនៅទីក្រុងភ្នំពេញ និងមួយទៀតនៅក្នុងខេត្តសៀមរាប។ ការិយាល័យនេះបាននិយាយថា សេដ្ឋកិច្ចរបស់កម្ពុជាកំពុងរីកចម្រើនយ៉ាងឆាប់រហ័ស ដោយសារតែរបៀបរស់នៅរបស់ប្រជាជនកម្ពុជាកំពុងមានការផ្លាស់ប្តូរគួរឱ្យកត់សម្គាល់ ដោយសារអំណាចទិញកាន់តែខ្ពស់។ ការិយាល័យបានបន្តថា ជាផ្នែកនៃការផ្លាស់ប្តូររបៀបរស់នៅ ប្រជាជនកម្ពុជាកាន់តែច្រើនបានទិញទំនិញនៅក្នុងផ្សារទំនើប និងផ្សារទំនើបធំៗ។ លោកស្រី Suchada Ithijarukul នាយកប្រតិបត្តិនៃក្រុមហ៊ុន Makro Group បានបញ្ជាក់ពីគម្រោងសាងសង់ហាងចំនួនពីរបន្ថែមទៀតនៅក្នុងប្រទេសកម្ពុជា។ លោកស្រីបានបន្ថែមថា ហាងទាំងពីរនេះនឹងស្ថិតក្នុងចំណោមហាងបរទេសចំនួនប្រាំ ដែលនឹងបើកដោយ Makro នៅឆ្នាំនេះ ដោយហាង Makro បរទេស​បី​ផ្សេង​ទៀត​នឹង​ត្រូវ​បើក​ក្នុង​ប្រទេស​ឥណ្ឌា។ លោកស្រីក៏បានបន្ថែមផងដែរថា Makro នឹងចំណាយប្រាក់ ១១ពាន់លានដុល្លារ ដើម្បីពង្រីកសាខាចំនួន ៣០នៅឆ្នាំនេះ រួមទាំងហាងនៅបរទេសចំនួន ៥ផងដែរ។ បន្ទាប់ពីការពង្រីកនេះ Makro នឹងមាន ១៨៤សាខា — ១៧២នៅក្នុងប្រទេសថៃ ៤សាខានៅប្រទេសកម្ពុជា ១សាខានៅមីយ៉ាន់ម៉ា ៦សាខានៅឥណ្ឌា និង ១សាខានៅប្រទេសចិន។ គួរឱ្យដឹងថា បើតាមការិយាល័យពាណិជ្ជកម្ម បច្ចុប្បន្នមានផ្សារទំនើបដែលគ្រប់គ្រងដោយជនបរទេសជាច្រើននៅក្នុងរាជធានីភ្នំពេញ […]

ប្រធានាធិបតីរុស្ស៊ីលោក វ្ល៉ាឌីមៀ ពូទីន កំពុងអះអាងជ័យជំនះរបស់ខ្លួន នៅទីក្រុងកំពង់ផែ Mariupol ភាគខាងកើតរបស់ប្រទេសអ៊ុយក្រែន ដោយនិយាយថា ទីក្រុងនោះត្រូវបានរំដោះរួចរាល់ហើយ។ ប៉ុន្តែ​ជាក់ស្ដែង គឺទាហាន​អ៊ុយក្រែន​កំពុង​វាយ​បក​វិញ ខណៈ​ជន​ស៊ីវិល​ជាង ​១០​០,០០០ ​នាក់ ​នៅ​ជាប់​គាំង​ក្នុង​ទីក្រុងនៅឡើយ។ លោក ពូទីន បាននិយាយថា យោធានឹងមិនវាយលុកទីតាំងរឹងមាំចុងក្រោយរបស់អ៊ុយក្រែន ដែលនៅម្ដុំរោងចក្រដែកនោះទេ។ ប៉ុន្តែខ្លួនបានរារាំងពួកគេនៅទីនោះ ដែលសូម្បីតែសត្វរុយក៏មិនអាចហើរចេញបានដែរ។ ជម្រាបដែរថា ទីតាំងរោងចក្រដែកមួយនោះ មាន​ទាហាន​អ៊ុយក្រែន​ជាង ២ ពាន់​នាក់ ​កំពុង​ឈរ​ជើងយ៉ាងស្វិតស្វាញ ដើម្បីទប់ទល់ការវាយប្រហាររបស់រុស្ស៊ី។ កងកម្លាំង​រុស្ស៊ី​ក៏កំពុង​ទាមទារ​ឱ្យ​ភាគីអ៊ុយក្រែនដាក់​អាវុធ និងព្រម​ចុះចាញ់ ប៉ុន្តែ​ប្រជាជន​អ៊ុយក្រែន​មិន​បានបង្ហាញ​សញ្ញា​នៃ​ការ​ដកថយនោះ​ឡើយ។ សង្រ្គាមនៅតែបន្ដ ហើយអភិបាលក្រុង Mariupol បានអំពាវនាវឱ្យមានការជម្លៀសភ្លាមៗ និងពេញលេញ សម្រាប់ជនស៊ីវិលចំនួន ១២០,០០០ នាក់ ដែលជាប់គាំងនៅក្នុងទីក្រុង។ លោក Vadym Boichenko បាននិយាយថា៖«វាជារឿងសំខាន់ដែលត្រូវយល់ សម្រាប់ប្រជាជនដែលនៅទីនោះ ជីវិតរបស់ពួកគេគឺនៅក្នុងដៃរបស់មនុស្សតែម្នាក់ – Vladimir Putin»។ ចំណែកឯប្រធានាធិបតីអ៊ុយក្រែនលោក Volodymyr Zelenskyy ក៏កំពុងអំពាវនាវឱ្យប្រទេសលោកខាងលិចបញ្ជូនអាវុធបន្ថែមទៀត និងដាក់ទណ្ឌកម្មកាន់តែតឹងរ៉ឹងលើទីក្រុងម៉ូស្គូ៕ ផ្តល់សិទ្ធិដោយ៖ […]

(វ៉ាស៊ីនតោន)៖ ក្រុមមន្ត្រីជាន់ខ្ពស់នៃរដ្ឋបាលប្រធានាធិបតីអាមេរិក លោក ចូ បៃដិន ជឿជាក់ថាក្នុងរយៈពេល ៤សប្ដាហ៍ខាងមុខ នឹងកំណត់ជោគជ័យនៃសង្រ្គាមរបស់រុស្ស៉ីនៅអ៊ុយក្រែន ព្រមទាំងផែនទីអឺរ៉ុប ក្នុងរយៈពេលជាច្រើនទសវត្សរ៍ខាងមុខ។ នេះបើតាម ការដកស្រង់ចេញផ្សាយពីសារព័ត៌មាន New York Times នៅថ្ងៃសុក្រ ទី២២ ខែមេសា ឆ្នាំ២០២២។ បើតាមក្រុមមន្ត្រីអាមេរិកជាន់ខ្ពស់ខាងលើ បច្ចុប្បន្ន គឺជាពេលដ៏សំខាន់ដែលត្រូវប្រញាប់បញ្ជូនអាវុធបន្ថែមដល់អ៊ុយក្រែន ឱ្យបានកាន់តែ ច្រើនតាមដែលអាចធ្វើទៅបាន ជាពិសេសគឺប្រភេទអាវុធធុនធ្ងន់ ដូចជាកាំភ្លើងបាញ់រយៈចម្ងាយឆ្ងាយ និងប្រព័ន្ធរ៉ាដាប្រឆាំងកាំភ្លើងធំ។ ដោយឡែក ពាក់ព័ន្ធនឹងការបញ្ជូនអាវុធនេះដែរ, ប្រធានាធិបតីអាមេរិក លោក ចូ បៃដិនកាលពីថ្ងៃព្រហស្បតិ៍សប្ដាហ៍នេះ បានប្រកាសផ្ដល់ ជំនួយយោធា ៨០០លានដុល្លារបន្ថែមឱ្យអ៊ុយក្រែន ដែលជាកញ្ចប់ជំនួយយោធាទី២ ក្នុងរយៈពេលមួយសប្ដាហ៍។ បន្ថែមពីលើនេះ លោក បៃដិន ក៏បានសង្កត់ធ្ងន់ដែរថាជំនួយយោធារបស់អាមេរិក គឺជាសារមួយបញ្ជូនទៅកាន់ប្រធានាធិបតីរុស្ស៉ី លោក វ្ល៉ាឌីមៀ ពូទីន ឱ្យដឹងថា រុស្ស៉ីនឹងមិនអាចទទួលជោគជ័យក្នុងការគ្រប់គ្រងអ៊ុយក្រែនទាំងមូលឡើយ។ គួរបញ្ជាក់ថា ក្រុមមន្ត្រីជាន់ខ្ពស់មកពីក្រសួងការពារជាតិអាមេរិក កាលពីពេលថ្មីៗនេះក៏បានព្រមានដែរថា សម្រាប់លោក ពូទីន មិនមែន ត្រឹមចង់បានតែតំបន់ដុនបាស់ប៉ុណ្ណោះទេ […]

ថៃ៖ យោងតាមសារព័ត៌មាន khaosod បានអោយដឹងថា សន្តិសុខក្នុងបុរីមួយកន្លែងនៅប្រទេសថៃ ទទួលបានប្រាក់លើកទឹកចិត្តជិត ១ម៉ឺនដុល្លារក្រោយបានជួយរកឆ្មាដែលចេញពីផ្ទះមកឱ្យម្ចាស់វិញ។ ប្រភពដដែលបានឱ្យដឹងថា ម្ចាស់ឆ្មាបានប្រកាសស្វែងរកឆ្មាជាទីស្រឡាញ់ដែលមានឈ្មោះថា ណងម៉ុន្នី ភេទញី ដោយបានបាត់ពីផ្ទះបុរីម្តុំ ថាវអុិនថាវ ព្រមទាំងបានលើកឡើងថា ប្រសិនបើមានបងប្អូនណាជួយអោយរកឃើញ នឹងប្រគល់រង្វាន់ថ្លៃលើកទឹកចិត្តចំនួន ៣សែនបាត ឬ ជិត១មុឺនដុល្លារ។ ការប្រកាសនេះ បានក្លាយទៅជាព័ត៌មានល្បី ហើយនាំអោយបងប្អូនជាច្រើនជួយតាមរក លុះបន្ទាប់មកមានសន្តិសុខរបស់បុរីដែលម្ចាស់ឆ្មាបានរស់នៅបាននាំឆ្មាប្រគល់ជូនម្ចាស់វិញ ហើយថែមទាំងប្រាប់ថា ឃើញឆ្មា «ណងម៉ុន្នី» ដោយឆ្មាបានដើរត្រឡប់មកកាន់បុរីវិញដោយខ្លួនឯង។ យ៉ាងណាមិញ ក្រោយពីបានរកឃើញឆ្មាជាទីស្រឡាញ់រួច ក៏មិនភ្លេចពាក្យសន្យា ដោយនាថ្ងៃទី២១ ខែមេសា ឆ្នាំ២០២២ ម្ចាស់ឆ្មាបានប្រគល់រង្វាន់លើកទឹកចិត្តចំពោះសន្តិសុខបុរីដែលមានឈ្មោះថា នាយពិយ៉ាក់ ចំនួន ជិត១មុឺនដុល្លារ។ ចំណែកលោក ពិយ៉ាក់ដែលជាសន្តិសុខបុរី បានផុសសារលើបណ្តាហ្វេស បុ៊កថា «អរគុណគុណម្តាយដែលផ្តល់អោយកូន ក្នុងនោះលោកបានបញ្ជាក់ប្រាប់ថា ម្តាយរបស់លោកមានឈ្មោះពិតថា ម៉ុន្នី ចំណែកឆ្មាដែលបានបាត់ទៅក៏មានឈ្មោះម៉ុន្នីផងដែរ»។ ដោយកុសលផលបុណ្យដែលលោកបានទទួលក៏ដោយសារតែលោកបានទៅធ្វើបុណ្យរួចសុំពរជ័យពីឪកម្តាយ ទើបកុសលផលបុណ្យនោះបកត្រឡប់មករកគាត់វិញ ចុងក្រោយសន្តិសុខរូបនេះបានពោលថា៖«ធ្វើល្អពិតជាបានល្អមែនបងប្អូនជឿចុះ» ហើយរូបលោកនឹងយកថវិការមួយចំនួនទៅធ្វើបុណ្យផងដែរ៕ ផ្តល់សិទ្ធិដោយ៖ ខ្មែរណូត

លោក វ្ល៉ាឌីមៀ ពូទីន បានចុះហត្ថលេខាលើក្រឹត្យថ្មីមួយកាលពីថ្ងៃទី១៦ ខែមេសា ដែលតម្រូវឱ្យរុស្ស៊ីដកការចុះបញ្ជីរបស់ពួកគេចេញពីផ្សារហ៊ុនក្រៅប្រទេស។ ការចុះហត្ថលេខានេះ បង្កផលប៉ះពាល់យ៉ាងខ្លាំងដល់មហាសេដ្ឋីរបស់ប្រទេស ហើយឥឡូវនេះមហាសេដ្ឋី នឹងមិនអាចប្រមូលភាគលាភរូបិយប័ណ្ណបរទេស ពីកម្មវិធីបង្កាន់ដៃដាក់ប្រាក់បញ្ញើបានទេ។ ជាមួយគ្នានេះសារព័ត៌មាន Bloomberg បានរាយការណ៍ថា លោក Vladimir Potanin ដែលជាមហាសេដ្ឋីមានបំផុតរបស់រុស្ស៊ី ឥឡូវនេះនឹងត្រូវកែសម្រួលរចនាសម្ព័ន្ធកម្មសិទ្ធិនៃអាជីវកម្មរបស់ពួកគេ។ ដោយឡែកការជួញដូរបង្កាន់ដៃប្រាក់បញ្ញើលើការប្តូរប្រាក់បរទេស ក៏ត្រូវតែបញ្ឈប់ក្នុងរយៈពេលប៉ុន្មានថ្ងៃដែរ ទោះបីជាផ្សារហ៊ុនញូវយ៉ក ណាសដាក ផ្សារហ៊ុនទីក្រុងឡុងដ៍ និងផ្សារហ៊ុនអន្តរជាតិកំពូលផ្សេងទៀត បានបង្កកភាគហ៊ុនរុស្ស៊ីរួចហើយក៏ដោយក្ដី បន្ទាប់ពីលោកពូទីនបានចាប់ផ្តើមសង្រ្គាមរបស់គាត់លើអ៊ុយក្រែនក្នុងខែកុម្ភៈ។ គួរបញ្ជាក់ថា ការហាមប្រាមលើការចុះបញ្ជីនៅក្រៅប្រទេស គឺជាការវាយប្រហារចុងក្រោយបំផុតសម្រាប់មហាសេដ្ឋីរុស្ស៊ី ដែលត្រូវបានគេរងទុក្ខរួចមកហើយដោយទណ្ឌកម្មរបស់លោកខាងលិច ក៏ដូចជាការគ្រប់គ្រងមូលធនផ្ទាល់របស់ទីក្រុងម៉ូស្គូ ដែលដាក់កម្រិតលើលទ្ធភាពផ្ទេរប្រាក់ទៅក្រៅប្រទេស៕ ផ្តល់សិទ្ធិដោយ៖ ខ្មែរណូត

(វ៉ាស៊ីនតោន)៖ ក្រសួងការបរទេសអាមេរិក បាននិយាយថាការប្រកាសពីជ័យជម្នះរបស់ប្រធានាធិបតីរុស្ស៉ី លោក វ្ល៉ាឌីមៀ ពូទីន ក្នុងការរំដោះទីក្រុង Mariupol គឺជា «ព័ត៌មានក្លែងក្លាយ» ខណៈរដ្ឋបាលលោក ចូ បៃដិន ប្រកាសផ្ដល់ជំនួយយោធាបន្ថែមដល់អ៊ុយក្រែន ដែលកំពុងតស៊ូប្រយុទ្ធជាមួយកងទ័ពរុស្ស៉ី ជាពិសេសនៅតំបន់ដុនបាស់ ស្ថិតនៅភាគខាងកើតនៃប្រទេស។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២២ ខែមេសា ឆ្នាំ២០២២។ លោក វ្ល៉ាឌីមៀ ពូទីន កាលពីថ្ងៃព្រហស្បតិ៍សប្ដាហ៍នេះ បានអះអាងពីជ័យជម្នះរបស់កងទ័ពរុស្ស៉ីនៅក្នុងទីក្រុង Mariupol ក្រោយការឡោមព័ទ្ធអស់ជិត ២ខែមកនេះ។ ប៉ុន្តែ កងទ័ពអ៊ុយក្រែនក្នុងរោចក្រដែកថែប Azovstal នៅតែមិនព្រមទម្លាក់អាវុធសុំចុះចាញ់ ឡើយ ហើយលោក ពូទីន ក៏បានសម្រេចចិត្តលុបចោលផែនការវាយសង្រ្គប់ចូលរោងចក្រនេះផងដែរ ដោយបញ្ជាឱ្យកងទ័ពរុស្ស៉ី បន្តឡោមព័ទ្ធ សូម្បីតែ «សត្វរុយមួយក្បាល» ក៏មិនអាចឱ្យចេញក្រៅបានជាដាច់ខាត។ យ៉ាងណាក៏ដោយ ក្រសួងការបរទេសអាមេរិក បានឱ្យដឹងថាកងទ័ពអ៊ុយក្រែននៅតែបន្តស្ថិតនៅក្នុងទីក្រុង Mariupol ហើយបានហៅ ការអះអាងជ័យជម្នះរបស់លោក ពូទីន គ្រាន់តែជាព័ត៌មានក្លែងក្លាយប៉ុណ្ណោះ។ គួរបញ្ជាក់ថា ខណៈកងទ័ពរុស្ស៉ីកំពុងបង្កើនការវាយលុកលើតំបន់ភាគខាងកើតនៃប្រទេសអ៊ុយក្រែន, […]