Larry Ellison ដណ្ដើមបានតំណែងជាអ្នកមានបំផុតនៅលើពិភពលោក ពី Elon Musk

(បរទេស)៖ យោងតាមទីភ្នាក់ងារសារព័ត៌មាន Bloomberg បានឱ្យដឹងថាទ្រព្យសម្បត្តិរបស់លោក Larry Ellison សហស្ថាបនិកក្រុមហ៊ុន Oracle បានកើនឡើងបន្ថែមទៀតចំនួន ៨៩ ពាន់លាន​ដុល្លារ ដោយបានរុញច្រានទ្រព្យសម្បត្តិសរុបរបស់លោកកើនឡើងដល់ ៣៨៣,២ ពាន់លានដុល្លារ នៅថ្ងៃពុធម្សិលមិញនេះ បន្ទាប់ពី Oracle បានរបាយការណ៍ប្រាក់ចំណូលដ៏អស្ចារ្យកាលពីថ្ងៃអង្គារ។ ការកើនឡើងនេះបានធ្វើឲ្យលោក Ellison ក្លាយជាអ្នកមានបំផុតនៅលើពិភពលោក (គ្រង់តំណែងបានតែប៉ុន្មានម៉ោងប៉ុណ្ណោះ) កាលពីថ្ងៃពុធ ដោយបានវ៉ាដាច់ទ្រព្យសម្បត្តិរបស់លោក Elon Musk ។

ក្រុមហ៊ុន Oracle បានរាយការណ៍ពីតម្រូវការកើនឡើងខ្លាំងសម្រាប់មជ្ឈមណ្ឌលផ្ទុកទិន្នន័យរបស់ខ្លួនពីអតិថិជនប្រើប្រាស់បច្ចេកវិទ្យា AI ដែលបានជំរុញឲ្យតម្លៃភាគហ៊ុនរបស់ក្រុមហ៊ុនកើនឡើងយ៉ាង​គំហុក។ តម្លៃភាគហ៊ុនបានកើនឡើងរហូតដល់ ៤៣% មុនពេលបិទទីផ្សារ ដោយបានកើនឡើងប្រហែល ៣៦% កាលពីថ្ងៃពុធ ដែលជាការកើនឡើងប្រចាំថ្ងៃដ៏ធំបំផុតរបស់ភាគហ៊ុននេះចាប់តាំងពីឆ្នាំ ១៩៩២ មក។

លោក Ellison គឺជាម្ចាស់ភាគហ៊ុនបុគ្គលដ៏ធំបំផុតរបស់ក្រុមហ៊ុន Oracle ។ ទោះបីជាយ៉ាងណា នៅពេលបិទទីផ្សារកាលពីថ្ងៃពុធ ទ្រព្យសម្បត្តិរបស់លោក Musk មានចំនួន ៣៨៤,២ ពាន់លានដុល្លារ ដោយបានវ៉ាដាច់លោក Ellison វិញចំនួន ១ ពាន់លានដុល្លារ។

នាយកប្រតិបត្តិក្រុមហ៊ុន Oracle លោកស្រី Safra Catz បានប្រកាសកាលពីថ្ងៃអង្គារ បន្ទាប់ពីទីផ្សារភាគហ៊ុនបិទថា ក្រុមហ៊ុនបានចុះកិច្ចសន្យាចំនួន ៤ ដែលមានតម្លៃរាប់ពាន់លានដុល្លារជាមួយ​អតិថិជន​ក្នុងត្រីមាសនេះ ហើយលោកស្រីរំពឹងថានឹងចុះហត្ថលេខាបន្ថែមទៀតក្នុងរយៈពេលប៉ុន្មានខែខាងមុខ។

ការព្យាករណ៍ដ៏អស្ចារ្យនេះបានកើតឡើងដោយសារតែក្រុមហ៊ុន Oracle បានក្លាយជាអ្នកផ្ដល់ហេដ្ឋារចនាសម្ព័ន្ធដ៏សំខាន់សម្រាប់ក្រុមហ៊ុន AI ដែលមានតម្រូវការដ៏ធំសម្បើមលើថាមពលកុំព្យូទ័រ ដែលជាចំណុចខ្លាំងរបស់ Oracle ក្នុងនាមជាអ្នកផ្ដល់សេវាកម្ម Cloud និងកម្មវិធីទិន្នន័យ។ កាលពីខែកក្កដា ក្រុមហ៊ុន Oracle បានប្រកាសកិច្ចព្រមព្រៀងដើម្បីផ្ដល់អគ្គិសនីចំនួន ៤,៥ ជីហ្គាវ៉ាត់ ដល់ក្រុមហ៊ុនមេរបស់ ChatGPT គឺ OpenAI ដើម្បីដំណើរការកម្មវិធី AI របស់ខ្លួន៕ ផ្ដល់សិទ្ធិដោយ៖ Fresh News