នាយករដ្ឋមន្រ្តីកាណាដា ថាបានសុំទោសលោក ត្រាំ ដោយផ្ទាល់ បន្ទាប់ពីធ្វើឱ្យលោកប្រធានាធិបតីអាមេរិកខឹង

(កូរ៉េខាងត្បូង)៖ កាលពីថ្ងៃសៅរ៍សប្តាហ៍នេះ នាយករដ្ឋមន្រ្តីកាណាដា លោក Mark Carney បានប្រាប់ថា រូបលោកបានសុំទោសលោក ដូណាល់ ត្រាំ ដោយផ្ទាល់ បន្ទាប់ពីលោកប្រធានាធិបតីអាមេរិក មានការមិនពេញចិត្តជាខ្លាំង ជុំវិញការផ្សាយពាណិជ្ជកម្មនយោបាយ ធ្វើឡើងដោយខេត្ត Ontario របស់កាណាដា ដែលមានខ្លឹមសាររិះគន់ចំណាត់ការពន្ធគយ​របស់លោក ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី២ ខែវិច្ឆិកា ឆ្នាំ២០២៥។

ថ្លែងប្រាប់ក្រុមអ្នកសារព័ត៌មាន ក្រោយចូលរួមកិច្ចប្រជុំកំពូល APEC នៅប្រទេសកូរ៉េខាងត្បូង លោក Carney បាននិយាយថា រូបលោកបានសុំទោសលោក ត្រាំ ដោយផ្ទាល់ នៅពេលអ្នកទាំងពីរ ចូលរួមពិធីជប់លៀងទទួលទានអាហារពេលល្ងាច រៀបចំដោយ​ប្រធានាធិបតីកូរ៉េខាងត្បូង កាលពីថ្ងៃពុធសប្តាហ៍នេះ។

កន្លងមកនេះ ខេត្ត Ontario បានចេញផ្សាយពាណិជ្ជកម្មមួយ ដែលបានដកស្រង់សម្តីអតីតប្រធានាធិបតីអាមេរិក លោក Ronald Reagan និយាយថា ពន្ធគយបង្កឱ្យមានសង្រ្គាមពាណិជ្ជកម្មនិងមហន្តរាយសេដ្ឋកិច្ច។ ជាការឆ្លើយតប លោក ត្រាំ បានប្រកាសថា រូបលោកនឹងដំឡើងពន្ធបន្ថែមទៀតប្រឆាំងទំនិញនាំចូលពីកាណាដា និងផ្អាកកិច្ចចរចាពាណិជ្ជកម្មទាំងអស់ជាមួយកាណាដា។ លោក Carney បានអះអាងថា តាមពិតទៅ រូបលោកបានជំទាស់ចំពោះការផ្សាយពាណិជ្ជកម្មនេះ ប៉ុន្តែអភិបាលខេត្ត Ontario មិនព្រមស្តាប់តាម។

គួរបញ្ជាក់ថា នៅពេលចាកចេញពីប្រទេសកូរ៉េខាងត្បូង ក្នុងសប្តាហ៍នេះ លោក ត្រាំ បាននិយាយថា លោកមានកិច្ចសន្ទនាយ៉ាងល្អ​ជាមួយលោក Carney អំឡុងពិធីជប់លៀងទទួលទានអាហារពេលល្ងាចនោះ ប៉ុន្តែមិនបានរៀបរាប់លម្អិតទេ។ រីឯកាលពីថ្ងៃសុក្រ លោក ត្រាំ នៅតែនិយាយថា សហរដ្ឋអាមេរិកនិងកាណាដា នឹងមិនចាប់ផ្តើមកិច្ចពិភាក្សាពាណិជ្ជកម្មឡើងវិញឡើយ៕ ផ្ដល់សិទ្ធិដោយ៖ Freshnews