ជប៉ុនទាញសញ្ញាអាសន្នអំពីការកើតមានរលកយក្សស៊ូណាមិ ក្រោយរងការវាយប្រហារដោយគ្រោះរញ្ជួយដីកម្រិត ៧,១រ៉ិចទ័រ

ជប៉ុន៖ ប្រទេសជប៉ុនបានរងការវាយប្រហារដោយគ្រោះរញ្ជួយដីកម្រិត ៧,១រ៉ិចទ័រ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងរសៀលថ្ងៃទី២៨ ខែកក្កដា។ តំបន់ដែលបានរងការវាយប្រហារដោយគ្រោះធម្មជាតិនេះគឺ ទីក្រុង Kumamoto ដែលស្ថិតនៅកោះ Kyushu ភាគខាងត្បូង នៃប្រទេសជប៉ុន។

បើតាមទីភ្នាក់ងារឧតុនិយមជប៉ុនបានបញ្ជាក់ថា គ្រោះរញ្ជួយដីបានបង្កើតឱ្យមានរំញ័រនៅក្នុងផ្ទៃដីជម្រៅរហូតដល់ ១០គីឡូម៉ែត្រ ប៉ុន្តែពុំទាន់មានរបាយការណ៍បង្ហាញថាមានជនរងគ្រោះ ឬការខូចខាតអ្វីធំដុំនៅឡើយទេរហូតមកទល់នឹងពេលនេះ។ យ៉ាងណាក្តី ទីភ្នាក់ងារឧតុនិយមជប៉ុន បានទាញសញ្ញាអាសន្នមួយអំពីលទ្ធភាពនៃការកើតមានរលកយក្សស៊ូណាមិកម្ពស់ ១ម៉ែត្រ បន្ថែមទៀត នៅពេលល្ងាចនេះ៕

អត្ថបទ៖ ភក្តី

ប្រភព៖Channel News Asia