(ភ្នំពេញ)៖ លោកសាស្ដ្រាចារ្យ ម៉ម ប៊ុនហេង សមាជិករដ្ឋសភា បានច្រាលចោលទាំងស្រុង ចំពោះព័ត៌មានក្លែងក្លាយ ដែលបានផ្សព្វផ្សាយតាមបណ្ដាញសង្គមហ្វេសប៊ុក ដែលបង្កើតដោយជនអនាមិកមួយក្រុម ដោយយកឈ្មោះ «មន្ទីរពេទ្យជាតិ តេជោសន្ដិភាព» ហើយកាត់តរូបភាពលោកចូលជាមួយនឹងសម្លេង AI ដើម្បីប្រម៉ូតលក់ផលិតរបស់ខ្លួន បោកប្រាស់ប្រជាពលរដ្ឋ «ពីការប្រើប្រាស់នាឡិកាដៃឆ្លាតវៃម្យ៉ាង ដែលអាចវាស់ជាតិស្ករក្នុងឈាម សម្ពាធឈាម ចង្វាក់បេះដូង អុកស៊ីសែនក្នុងឈាមបាន»។ លោក ម៉ម ប៊ុនហេង បានថ្លែងប្រាប់បណ្ដាញព័ត៌មាន Fresh News នៅព្រឹកថ្ងៃទី៩ ខែកក្កដា ឆ្នាំ២០២៤នេះថា «ខ្ញុំសូមច្រាលចោលទាំងស្រុង ចំពោះព័ត៌មានក្លែងក្លាយទាំងអស់នេះ ដែលបានបង្កើតគណនាហ្វេកប៊ុកក្លែងក្លាយ (Fake account) ហើយផ្សព្វផ្សាយផលិតផលរបស់ខ្លួនបោកប្រាស់ប្រជាជន។ ដូច្នេះសូមអំពាវនាវដល់ប្រជាពលរដ្ឋទាំងអស់ កុំជឿលើការផ្សព្វផ្សាយបោកប្រាស់ទាំងនេះអស់សោះ ហើយមុនប្រើប្រាស់អ្វីមួយត្រូវពិនិត្យមើលឱ្យបានត្រឹមត្រូវ»។ លោកសាស្ដ្រាចារ្យ ម៉ម ប៊ុនហេង បានបន្ដថា «នៅពេលខ្ញុំកំពុងដាក់ពាក្យបណ្ដឹង ដើម្បីស្វែងរកមុខជនអនាមិក ដែលបានបង្កើតគណនេយ្យហ្វេសប៊ុកក្លែងក្លាយ (Fake account) ដោយយកឈ្មោះ មន្ទីរពេទ្យជាតិ តេជោសន្ដិភាព និងផ្សាយព័ត៌មានមិនពិតទាំងនេះ យើងនឹងចាត់វិធានការទៅតាមផ្លូវច្បាប់លើករណីនេះ និងស្នើឱ្យម្ចាស់គណនេយ្យក្លែងក្លាយខាងលើនេះ លុបផេកនេះចេញជាបន្ទាន់ផងដែរ៕

(សៀមរាប)៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា ចាប់ពីខែសីហា ឆ្នាំ២០២៤ ខាងមុខនេះ មន្ត្រីរាជការ មន្ត្រីសាធារណៈ ក៏ដូចជាអង្គភាពនីមួយៗ នឹងអាចចុះឈ្មោះជាសមាជិកបេឡាជាតិសន្តិសុខសង្គម «ប.ស.ស.» ដោយខ្លួនឯងបានតាមរយៈទូរសព្ទដៃ ឬកុំព្យូទ័រដោយពុំចាំបាច់មានវត្តមានមន្ត្រី ប.ស.ស.ទៀតនោះទេ។ ការថ្លែងបែបនេះ បានធ្វើឡើងក្នុងពិធីផ្សព្វផ្សាយស្តីពី «ការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស័្មគ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ» និង «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ» នៅវិទ្យាស្ថានពហុបច្ចេកទេសអង្គរ ក្នុងខេត្តសៀមរាប កាលពីថ្ងៃទី០១ ខែកក្កដា ឆ្នាំ២០២៤ ដោយមានអ្នកចូលរួមប្រមាណជាង៦០០នាក់។ តាមការបញ្ជាក់របស់ លោករដ្ឋមន្ត្រី ​បានសង្កត់ធ្ងន់ថា យ៉ាងនេះ គឺជាវឌ្ឍនភាពថ្មីមួយទៀតរបស់រាជរដ្ឋាភិបាលក្នុងអាណត្តិទី៧ ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកកម្ពុជា ដែលបានគិតគូរដល់ប្រជាពលរដ្ឋ និងមន្ត្រីរាជការដោយភ្ជាប់នឹងបច្ចេកវិទ្យាទំនើបសម្រាប់ភាពកាន់តែងាយស្រួល៕ ផ្ដល់សិទ្ធិដោយ៖ Fresh News

(តាកែវ)៖ តំណាងអយ្យការអមសាលាដំបូងខេត្តតាកែវ បានសម្រេចចោទប្រកាន់ជនល្មើសជាក្មេងទំនើងចំនួន២នាក់ ដែលជិះម៉ូតូកាន់ដាវជាប់ខ្លួនដោយចោទប្រកាន់ពាក់ព័ន្ធនឹងករណីកាន់កាប់ ឬដឹកជញ្ជូនអាវុធដោយគ្មានការអនុញ្ញាត។ យោងតាមសេចក្ដីប្រកាសរបស់អ្នកនាំពាក្យអយ្យការអមសាលាដំបូងខេត្តតាកែវ បានឲ្យដឹងថា កាលពីថ្ងៃទី៤ ខែកក្កដា ឆ្នាំ២០២៤ កម្លាំងសមត្ថកិច្ចអធិការដ្ឋានស្រុកអង្គបូរី បានឃាត់ខ្លួនក្មេងទំនើងពីរនាក់ ជិះម៉ូតូចំនួនមួយគ្រឿងប្រដាប់ដោយដាវប្រវែង៥៧សង់ទីម៉ែត្រចំនួនមួយដើម នៅចំណុចស្ពានហូរឈាមស្ថិតក្នុងភូមិពួនកក ឃុំបាស្រែ ស្រុកអង្គរបុរី។ ក្នុងករណីនេះសមត្ថកិច្ចបានឃាត់ខ្លួនជនសង្ស័យចំនួនពីរនាក់ឈ្មោះ អ៊ិន ហុងនី អាយុ២៣ឆ្នាំ និងឈ្មោះ ចន វ៉ាន់ អាយុ២០ឆ្នាំ។ សេចក្តីប្រកាសខាងលើ ក្រោយពីបានសាកសួរចម្លើយជនសង្ស័យ និងពិនិត្យភស្តុតាងនានាក្នុងសំណុំរឿងនេះ តំណាងអយ្យការបានសម្រេចចោទប្រកាន់ជនសង្ស័យទាំងពីរនាក់ខាងលើ ពីបទ «កាន់កាប់ឬដឹកជញ្ជូនអាវុធដោយគ្មានការអនុញ្ញាត» ដែលជាបទល្មើសព្រហ្មទណ្ឌដែលមានចែងឲ្យផ្ដន្ទាទោសតាមបញ្ញត្តិមាត្រា៤៩០ នៃក្រមព្រហ្មទណ្ឌ៕ ផ្ដល់សិទ្ធិដោយ៖ Fresh News

(ឧត្តរមានជ័យ)៖ ក្នុងពិធីប្រកាសចូលកាន់មុខតំណែងលោក មាន ចាន់យ៉ាដា ជាអភិបាលខេត្តឧត្តរមានជ័យ ជំនួសលោក ប៉ែន កុសល្យ នាព្រឹកថ្ងៃទី៨ ខែកក្កដា ឆ្នាំ២០២៤ លោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ឱ្យដឹងថា ថ្មីៗនេះ ក្រសួងមហាផ្ទៃ បានបើកប្រតិបត្តិការចុះត្រួតពិនិត្យឆែកឆេរបន្ទប់ឃុំឃាំងតាមពន្ធនាគារ និងមណ្ឌលអប់រំកែប្រែទូទាំងប្រទេស ដោយរកឃើញសម្ភារមិនគប្បីមួយចំនួន ដែលច្បាប់មិនអនុញ្ញាតឱ្យអ្នកជាប់ឃុំប្រើប្រាស់ដូចជា៖ អាវុធ គ្រឿងញៀន ដែកចុងស្រួច ឡាម និងសម្ភារមួយចំនួនទៀត។ អភិសន្តិបណ្ឌិត ឧបនាយករដ្ឋមន្រ្តី បានមានប្រសាសន៍ទៀតថា ការចុះឆែកឆែរតាមបន្ទប់ឃុំឃាំងក្នុងពន្ធនាគារនេះ មានគោលដៅពង្រឹងសន្តិសុខពន្ធនាគារ ស្របតាមគោលការណ៍ ច្បាប់ជាតិ និងអន្តរជាតិ ដោយមិនមែនជាការបំពានសិទ្ធិ អ្នកជាប់ឃុំដូចការលើកឡើងរបស់សង្គមស៊ីវិលមួយចំនួននោះឡើយ។ ការបញ្ជាក់ពីប្រមុខក្រសួងមហាផ្ទៃយ៉ាងដូច្នេះ គឺជាការឆ្លើយតបទៅនឹងការអត្ថាធិប្បាយរបស់សង្គមស៊ីវិល និងអ្នកវិភាគមួយចំនួន ដែលបែរជាយល់ថាចំណាត់ការ របស់ក្រសួងមហាផ្ទៃ ដើម្បីពង្រឹងសន្តិសុខក្នុងពន្ធនាគារនេះ ថាជាការបំពានសិទ្ធិអ្នកជាប់ឃុំទៅវិញ។ ភ្ជាប់នឹងការរម្លឹកជាថ្មីទៀត អំពីបទពិសោធដែលធ្លាប់មានអ្នកជាប់ឃុំលួចប្រើទូរសព្ទ ដើម្បីបញ្ជាទៅគូកននៅខាងក្រៅឱ្យប្រព្រឹត្តបទល្មើសជួញដូរគ្រឿងញៀន អភិសន្តិបណ្ឌិត ស សុខា បានផ្ដល់គោលការណ៍ណែនាំជារួមទៅកាន់ អគ្គនាយកដ្ឋានពន្ធនាគារ អភិបាលរាជធានីខេត្ត រួមទាំងប្រធានពន្ធនាគារ និងមណ្ឌលអប់រំកែប្រែរាជធានី […]

(ភ្នំពេញ)៖ ក្រសួងសុខាភិបាល បានចេញសេចក្តីប្រកាសព័ត៌មាន ស្តីពីករណីជំងឺផ្តាសាយបក្សីលើក្មេងស្រី អាយុ៥ឆ្នាំម្នាក់ថែមទៀត នៅភូមិពោធិ៍ ឃុំព្រះបាទជាន់ជុំ ស្រុកគីរីវង្ស ខេត្ដតាកែវ។ នេះបើតាមសេចក្ដីប្រកាសព័ត៌មាន ដែលបណ្ដាញព័ត៌មាន Fresh News ទទួលបាននៅថ្ងៃទី០៨ ខែកក្កដា ឆ្នាំ២០២៤។ ក្រសួងសុខាភិបាលបានឲ្យដឹងថា មានជំងឺផ្តាសាយបក្សីកើតលើ ក្មេងស្រី អាយុ៥ឆ្នាំ ចំនួន ០១ករណីទៀត និងត្រូវបានបញ្ជាក់ថា វិជ្ជមានវីរុសផ្តាសាយបក្សី ប្រភេទ H5N1 ពីវិទ្យាស្ថានជាតិសុខភាពសាធារណៈ នៅថ្ងៃទី៧ ខែកក្កដា ឆ្នាំ២០២៤ ដែលមានទីលំនៅ ក្នុងភូមិពោធិ៍ ឃុំព្រះបាទជាន់ជុំ ស្រុកគីរីវង្ស ខេត្តតាកែវ។ ក្មេងស្រីនេះ មានគ្រុនក្តៅ និងត្រូវជាបងជីដូនមួយ ក្មេងប្រុសអាយុ៣ឆ្នាំវិជ្ជមានកាលពីថ្ងៃទី៥ ខែកក្កដា ឆ្នាំ២០២៤ ព្រមទាំងរស់នៅផ្ទះជាមួយគ្នា។ បច្ចុប្បន្ន ស្ថានភាពអ្នកជំងឺមានអាការៈស្រាល និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូ ពេទ្យ។ តាមការសាកសួរបង្ហាញថា ប្រហែល១០ថ្ងៃមុនចាប់ផ្តើមឈឺ នៅភូមិមានមាន់ទាងាប់ ហើយនៅផ្ទះ អ្នកជំងឺបានយកមកធ្វើម្ហូបបរិភោគ ក្មេងស្រីបានប៉ះពាល់មាន់ងាប់។ ក្រុមឆ្លើយតបបន្ទាន់របស់ក្រសួងសុខាភិបាលថ្នាក់ជាតិ និងថ្នាក់ក្រោមជាតិ បាននិងកំពុងសហការ ជាមួយក្រុមការងារនៃក្រសួងកសិកម្ម […]

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសស្វាគមន៍ចំពោះការសម្រេចចិត្តដ៏ឈ្លាសវៃរបស់វិនិយោគិនទាំងអស់ ជាពិសេសវិនិយោគិនបារាំង ដែលជ្រើសរើសនិងមានបំណងមកបណ្តាក់ទុននៅកម្ពុជាដោយផ្ទាល់ ឬចាប់ដៃគូជាមួយវិនិយោគិនក្នុងស្រុក។ នៅក្នុងឱកាសអញ្ជើញជាអធិបតីបើកវេទិកាធុរកិច្ចកម្ពុជា-បារាំងជាលើកទី២ នៅព្រឹកថ្ងៃទី៨ ខែកក្កដា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត ក៏បានអញ្ជើញវិនិយោគិនបារាំងទាំងអស់ មកស្វែងយល់ពីសក្ដានុពលវិនិយោគដ៏ធំធេង ស្វែងរកកាលានុវត្តភាពដ៏សម្បូរបែបនិងធ្វើការសម្រេចចិត្តជាយុទ្ធសាស្ត្រ ដើម្បីទាញយកផលប្រយោជន៍ពីទំនាក់ទំនងទ្វេភាគីរបស់កម្ពុជា-បារាំង។ សូមបញ្ជាក់ថា វេទិកាធុរកិច្ចកម្ពុជា-បារាំង បានរៀបចំឡើងក្រោមកិច្ចសហការរវាងសភា​ពាណិជ្ជកម្ម​កម្ពុជា និងឧស្សាហកម្មបារាំង-កម្ពុជា (CCIFC)។ វេទិកាធុរកិច្ចកម្ពុជា-បារាំង បានរៀបចំលើកទី១ នៅថ្ងៃទី១៥ ខែមករា ឆ្នាំ២០២៤ នៅទីក្រុងប៉ារីស ប្រទេសបារាំង ក្នុងពេលសម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចនៅប្រទេសបារាំង។ នៅក្នុងវេទិកាធុរកិច្ចកម្ពុជា-បារាំង ជាលើកទី២នេះ សម្តេចធិបតី ហ៊ុន ម៉ាណែត បានថ្លែងដូចនេះថា «កម្ពុជាខ្លួនជាស្រេចក្នុងការស្វាគមន៍ និងការផ្តល់ការគាំទ្រពេញទំហឹង ក៏ដូចជាការទទួលបដិសណ្ឋារកិច្ចដល់វិនិយោគិន និងធុរជន ខ្ញុំសូមស្វាគមន៍ចំពោះការសម្រេចការសម្រេចចិត្តដ៏ឆ្លាតវៃរបស់វិនិយោគិនទាំងអស់ ជាពិសេសវិនិយោគិនបារាំង ដែលជ្រើសរើស និងមានបំណងមកបណ្តាក់ទុននៅកម្ពុជាដោយផ្ទាល់ ឫចាប់ដៃគូជាមួយវិនិយោគិនក្នុងស្រុក»។ សម្តេចធិបតី ហ៊ុន ម៉ាណែត ក៏បានបង្ហាញសុទិដ្ឋិនិយមថា បន្ទាប់ពីវេទិកាធុរកិច្ចកម្ពុជា-បារាំង ជាលើកទី២នេះរួច […]

(ភ្នំពេញ)៖ អគ្គស្នងការដ្ឋាននគរបាលជាតិ នៅព្រឹកថ្ងៃទី០៨ ខែកក្កដា ឆ្នាំ២០២៤នេះ បានចេញមកច្រានចោលសារសំឡេងក្លែងក្លាយ ដែលប្រឌិតឡើងដោយនារីម្នាក់ ពាក់ព័ន្ធការប្រើប្រាស់ Power Bank ដើម្បីលួចយកទិន្នន័យ ឬលុយពីគណនីធនាគារក្នុងទូរស័ព្ទ។ អគ្គស្នងការដ្ឋាននគរបាលជាតិ សូមធ្វើការអំពាវនាវដល់សាធារណៈជន កុំបន្ដចែកចាយព័ត៌មានប្រឌិត តាមរយៈសារសំឡេងរបស់នារីដែលជាជនអនាមិកម្នាក់នោះ។ ខណៈការសិក្សាលក្ខណៈបច្ចេកទេសរបស់មន្ដ្រីជំនាញ គឺមិនអាចប្រើប្រាស់ Power Bank ដើម្បីលួចយកទិន្នន័យបាននោះឡើយ។ ជាមួយគ្នានេះ អគ្គស្នងការដ្ឋាននគរបាលជាតិ កំពុងបើកការស្រាវជ្រាវយ៉ាងយកចិត្តទុកដាក់ ដើម្បីចាត់វិធានការតាមផ្លូវច្បាប់ចំពោះជនអនាមិកដែលប្រឌិតព័ត៌មានបំពុល នាំឲ្យប៉ះពាល់សន្ដិសុខជាតិបែបនេះ៕ ផ្ដល់សិទ្ធិដោយ៖ Fresh News

(បាត់ដំបង)៖ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានបញ្ជាឲ្យបន្ដធ្វើការស្រាវជ្រាវ ដើម្បីវែកមុខអ្នកមានអំណាចនៅពីក្រោយការជួញដូរគ្រឿងញៀនប្រមាណ២០គីឡូក្រាម ដែលនាំចូលដោយជនជាតិនីហ្សរីយ៉ា ហើយត្រូវកម្លាំងសមត្ថកិច្ចបង្ក្រាបនៅព្រំដែនកម្ពុជា-វៀតណាម ស្ថិតក្នុងខេត្តស្វាយរៀង។ ការបង្ហើបរឿងអ្នកនៅពីក្រោយ ជាមួយនឹងបទបញ្ជារបស់ឧបនាយករដ្ឋមន្ដ្រី ស សុខា ធ្វើឡើងក្នុងឱកាសអញ្ជើញជួបសំណេះសំណាលជាមួយថ្នាក់ដឹកនាំបុគ្គលិក ជនរងគ្រោះដោយសារគ្រឿងញៀន និងបិទបញ្ចប់វគ្គបណ្តុះបណ្តាលជំនាញវិជ្ជាជីវៈផ្នែកទ្រឹស្តី និងអនុវត្តផ្ទាល់ដល់អ្នកញៀនគ្រឿងញៀនលើកទី៤ ជូនជនរងគ្រោះដោយសារគ្រឿងញៀន ដែលកំពុងស្នាក់នៅ ក្នុងមជ្ឈមណ្ឌលបន្សាបព្យាបាល និងស្តារនីតិសម្បទា អ្នកញៀនគ្រឿងញៀន កែ ស៊ីនួន បាត់ដំបង អ្នកញៀនគ្រឿងញៀន កែ ស៊ីនួន ស្ថិតក្នុងភូមិស្តៅ ឃុំស្តៅស្រុករតនមណ្ឌល ខេត្តបាត់ដំបង។ ក្នុងពិធីនៅថ្ងៃទី០៤ ខែកក្កដា ឆ្នាំ២០២៤កន្លងទៅនេះ លោកអភិសន្ដិបណ្ឌិត ស សុខា បានឲ្យដឹងថា ប្រតិបត្តិការបង្ក្រាបគ្រឿងញៀនជាង២០គីឡូក្រាម ដោយឧក្រិដ្ឋជនជាជនជាតិនីហ្សេរីយ៉ានេះ កម្លាំងជំនាញស្រាវជ្រាវរកឃើញថា មានអ្នកមានអំណាចនៅពីក្រោយ ហើយក៏មានការបញ្ជាទិញច្បាស់លាស់ពីទីតាំងក្លឹបកម្សាន្ដមួយចំនួន និងបណ្ដាញមួយចំនួនទៀត មាននៅរាជធានីភ្នំពេញតែម្ដង។ ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងយ៉ាងដូច្នេះថា «នៅព្រំដែនកម្ពុជា-វៀតណាម មានជនជាតិស្បែកខ្មៅនីហ្សេរីយ៉ាម្នាក់ នាំគ្រឿងញៀនប្រមាណជាង២០គីឡូក្រាមចូលកម្ពុជា។ អ៊ីចឹងយើងបានស្រាវជ្រាវទៅ ទី១៖ មានការទំនាក់ទំនងនៅភ្នំពេញ, ទី២៖ […]

(ឥណ្ឌា)៖ ពិតជាអស្ចារ្យខ្លាំងណាស់! វិស័យបវរកញ្ញាកម្ពុជា មិនអាចមើលរំលងដូចមុនទៀតឡើយ ក្រោយពីយុវតី លី មួយលាង ដែលជា «Miss Teen Cambodia» តំណាងឲ្យប្រទេសកម្ពុជា បានឈ្នះការប្រកួតប្រជែងយ៉ាងស្វិតស្វាញ គ្រងមកុដ «Miss Teen International 2024» នៅប្រទេសឥណ្ឌា កាលពីរាត្រីថ្ងៃទី០៧ ខែកក្កដា ឆ្នាំ២០២៤យប់មិញនេះ បន្ទាប់ពីផ្ទួលបេក្ខភាពឆ្នើមៗជាច្រើនរូប មកពីជុំវិញពិភពលោក។ យុវតី លី មួយលាង គឺជាបវរកញ្ញាខ្មែរដំបូងគេបំផុត ដែលបានឈ្នះមកុដ ក្នុងកម្មវិធីប្រកួតដ៏ធំបំផុតរបស់ពិភពលោកមួយនេះ។ កម្មវិធីនេះមានអ្នកចូលរួមប្រកួតរហូតដល់ទៅ ២៨ប្រទេស និងមានអ្នក Followers ក្នុង instagram និង Facebook រហូតដល់ជាង ១០០K នៅជុំវិញពិភពលោក។ ការឈ្នះមកុដលំដាប់ពិភពលោកមួយនេះ ពិតជាធ្វើឲ្យប្រជាជនខ្មែរសាទរជាខ្លាំង ដោយពួកគេនិយាយថា កម្ពុជាមិនអាចមើលរំលងបានទៀតទេ លើវិស័យបវរកញ្ញា ជាពិសេសគឺបវរកញ្ញាក្មេងៗរបស់កម្ពុជាតែម្ដង ដែលពោរពេញដោយសមត្ថភាព គួរឲ្យកោតសរសើរ។ ស្រីស្អាត លី មួយលាង ដែលជា Miss Teen Cambodia […]

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅថ្ងៃទី០៨ ខែកក្កដា ឆ្នាំ២០២៤នេះ បានគូសបញ្ជាក់ថា បារាំងនៅតែជាដៃគូពាណិជ្ជកម្ម និងវិនិយោគធំជាងគេមួយនៅកម្ពុជា ក្នុងចំណោមប្រទេសអឺរ៉ុប ខណៈរយៈពេល៥ខែដំបូង នៃឆ្នាំ២០២៤ ពាណិជ្ជកម្មទ្វេភាគី កម្ពុជា-បារាំង មានទំហំទឹកប្រាក់ ២០៦,៤១ លានដុល្លារអាម៉េរិក។ ការគូសបញ្ជាក់បែបនេះ ធ្វើឡើងក្នុងឱកាសដែល សម្តេចធិបតី ហ៊ុន ម៉ាណែត អញ្ជើញជាអធិបតី បើកវេទិកាធុរកិច្ច កម្ពុជា-បារាំង ជាលើកទី២ ដែលរៀបចំឡើង ក្រោមកិច្ចសហការរវាងសភាពាណិជ្ជកម្មកម្ពុជា និងឧស្សាហកម្មបារាំង-កម្ពុជា (CCIFC) នាព្រឹកថ្ងៃទី០៨ ខែកក្កដា ឆ្នាំ២០២៤។ សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «បារាំងនៅតែជាដៃគូពាណិជ្ជកម្ម និងវិនិយោគធំជាងគេមួយនៅកម្ពុជា ក្នុងចំណោមប្រទេសអឺរ៉ុប, ពាណិជ្ជកម្មទ្វេភាគី កម្ពុជា-បារាំង បានកើនឡើងជាលំដាប់ ដែលមានទំហំទឹកប្រាក់ ៥១៥,២១ លានដុល្លារអាម៉េរិក ក្នុងឆ្នាំ២០២៣ និង២០៦,៤១ លានដុល្លារអាម៉េរិក ក្នុងរយៈពេល៥ខែដំបូងនៃឆ្នាំ២០២៤»។ សម្តេចធិបតី ហ៊ុន ម៉ាណែត បានថ្លែងថា ក្រុមហ៊ុនបារាំងជាច្រើន […]