(ប៉េកាំង)៖ ប្រព័ន្ធផ្សព្វផ្សាយរដ្ឋចិន នៅថ្ងៃអង្គារនេះបានឲ្យដឹងថា រដ្ឋាភិបាលចិនផ្តល់ថវិកាចំនួន ៤០លានយន់ ឬប្រហែល ៥.៩លានដុល្លារ ជាជំនួយមនុស្សធម៌សង្គ្រោះបន្ទាន់ដល់ប្រទេសតួកគី សម្រាប់កិច្ចខិតខំប្រឹងប្រែងជួយសង្គ្រោះ ក្នុងគ្រោះរញ្ជួយដី។ នេះបើយោងតាមការផ្សាយដោយសារព័ត៌មានរុស្ស៉ី TASS នៅថ្ងៃអង្គារ ទី៧ ខែកុម្ភៈ ឆ្នាំ២០២៣។ ទូរទស្សន៍ចិន CCTV បានរាយការណ៍ថា អាជ្ញាធរចិនបានសម្រេចចិត្តផ្តល់ជំនួយមនុស្សធម៌ជាបន្ទាន់ដល់ប្រទេសស៉ីរី និងតួកគី។ កញ្ចប់ជំនួយដំបូងនេះនឹងរួមបញ្ចូលថវិកា ៥.៩លានដុល្លារ ហើយចិននឹងបញ្ជូនក្រុមជួយសង្គ្រោះ ក្រុមគ្រូពេទ្យទៅកាន់តំបន់រងគ្រោះ ក៏ដូចជាផ្តល់ប្រាក់ដើម្បីជួយជនរងគ្រោះផងដែរ។ ជាមួយគ្នានេះសមាគមកាកបាទក្រហមនៃប្រទេសចិន ក៏នឹងផ្តល់ឲ្យស៉ីរីនិងតួកគី នូវថវិកាចំនួន២០០,០០០ដុល្លារ ក្នុងមួយប្រទេសថែមទៀតផង។ គួរបញ្ជាក់ថា យោងតាមទិន្នន័យចុងក្រោយ អ្នកស្លាប់ដោយសារគ្រោះរញ្ជួយដីកម្រិត ៧.៨រ៉ិចទ័រ បានកើនឡើងដល់ជាង ៤,៨០០នាក់ នៅតួកគី និងស៉ីរី។ ពេលនេះក្រុមសង្រ្គោះកំពុងបន្តស្វែងរកអ្នករស់រានមានជីវិត ក្រោមគំនរបាក់បែកនៃអគាររាប់ពាន់ខ្នងដែលដួលរលំ៕ ផ្តល់សិទ្ធិដោយ៖ freshnews

(កៀវ)៖ សមាជិកសភាជាន់ខ្ពស់អ៊ុយក្រែនមួយរូប បានបង្ហើបឱ្យដឹងកាលពីថ្ងៃចន្ទសប្តាហ៍នេះថា អ៊ុយក្រែនបានដកសៀវភៅសរុបចំនួនខ្ទង់១៩លានក្បាល ចេញពីបណ្ណាល័យនៅទូទាំងប្រទេស គិតត្រឹមខែវិច្ឆិកា ឆ្នាំ២០២២ ខណៈពួកវាគឺជាសៀវភៅជាភាសារុស្ស៉ី ឬមួយក៏បន្សល់ទុកមកតាំងពីសម័យសូវៀត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី៧ ខែកុម្ភៈ ឆ្នាំ២០២៣។ លោកស្រី យេវហេនីយ៉ា ក្រាវឈូក (Yevheniya Kravchuk) អនុប្រធានគណៈកម្មាធិការទទួលបន្ទុក គោលនយោបាយមនុស្សធម៌និងព័ត៌មាននៃសភា​អ៊ុយក្រែន បានអះអាងថា ក្នុងចំណោមសៀវភៅទាំង១៩លានក្បាលនោះ គឺ១១លានក្បាលជាសៀវភៅភាសារុស្ស៉ី។ បើតាមលោកស្រី ក្រាវឈូក សៀវភៅជា​​ភាសាអ៊ុយក្រែនមួយចំនួន ដែលសល់ពីសម័យសូវៀត ក៏ត្រូវបានដកចេញពីបណ្ណាល័យផងដែរ។ មិនតែប៉ុណ្ណោះ ក៏មានការផ្តល់អនុសាសន៍ឱ្យដកសៀវភៅ ដែលអ្នកនិពន្ធណា បានបង្ហាញការគាំទ្រចំពោះសង្រ្គាមឈ្លានពានរបស់រុស្ស៉ី ថែមទៀតផង។ ដោយឡែក វាមិនច្បាស់ទេថា តើសៀវភៅដែលត្រូវបានដក​ចេញទាំងនោះ នឹងទៅជាយ៉ាងណា។ គួរបញ្ជាក់ថា ប្រហែលជា៤៤ភាគរយនៃសៀវភៅ នៅតាមបណ្ណាល័យរបស់អ៊ុយក្រែន គឺសុទ្ធតែជាភាសារុស្ស៉ី ខណៈប៉ុន្មានទៀតជាភាសាអ៊ុយក្រែន ឬមួយជាភាសារបស់ប្រទេសអឺរ៉ុបដទៃទៀត។ ការស្ទង់មតិមួយកាលពីឆ្នាំ២០១៩ ដោយវិទ្យាស្ថានអន្តរជាតិផ្នែកសង្គមវិទ្យានៃទីក្រុងកៀវ បានបង្ហាញឱ្យឃើញថា ប្រហែលជាពាក់កណ្តាលនៃប្រជាជនអ៊ុយក្រែនទាំងអស់ គឺនិយាយភាសាអ៊ុយក្រែនសុទ្ធ ខណៈ៣០ភាគរយនិយាយរុស្ស៉ីសុទ្ធ។ ភាសាអ៊ុយក្រែននិងរុស្ស៉ី សុទ្ធតែជាប្រភេទភាសាស្លាវិគខាងកើត (East […]

(អង់ការ៉ា)៖ ក្រុមសង្រ្គោះក្នុងប្រទេសតួកគី និងស៉ីរី នៅថ្ងៃអង្គារនេះកំពុងជីកកាយដោយដៃទទេរបស់ពួកគេ ដើម្បីបន្តស្វែងរកអ្នករស់រានមានជីវិត ក្រោមគំនរបាក់បែកនៃអគាររាប់ពាន់ខ្នងដែលដួលរលំ នៅក្នុងការរញ្ជួយដីដ៏ខ្លាំងក្លាជាបន្តបន្ទាប់។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី៧ ខែកុម្ភៈ ឆ្នាំ២០២៣។ ចំនួនអ្នកស្លាប់ដែលត្រូវបានបញ្ជាក់នៅទូទាំងប្រទេសទាំងពីរ បានកើនឡើងលើសពីចំនួន ៤,៣០០នាក់។ ក្រុមឆ្លើយតបគ្រោះមហន្តរាយរបស់ប្រទេសតួកគី និងស៉ីរី បានរាយការណ៍ថា អគារជាង ៥,៦០០ បានរង្គោះរង្គើនៅទូទាំងទីក្រុងជាច្រើន រួមទាំងប្លុកផ្ទះល្វែងច្រើនជាន់ដែលពោរពេញទៅដោយមនុស្សស្នាក់នៅ។ ទោះបីជាមានសីតុណ្ហភាពត្រជាក់នៅខាងក្រៅក៏ដោយ អ្នកស្រុកដែលភ័យខ្លាចបានចំណាយពេលពេញមួយយប់ស្នាក់នៅតាមដងផ្លូវ។ គួរបញ្ជាក់ថា ការរញ្ជួយដីនៅជិតព្រំដែនតួកគី-ស៊ីរី ក្នុងកម្រិត៧.៨រ៉ិចទ័រ ជាចំនួនដ៏ធំបំផុតមួយ។ ការបំផ្លិចបំផ្លាញដ៏ធ្ងន់ធ្ងរបំផុតមួយចំនួនបានកើតឡើង នៅជិតចំណុចកណ្តាលនៃការរញ្ជួយដីរវាងទីក្រុងការ៉ាម៉ាន់ម៉ារ៉ាស់ និងទីក្រុងហ្កាហ្សៀនតិប ស្ថិតនៅក្នុងគំនរបាក់បែក និងព្រិលធ្លាក់៕ ផ្តល់សិទ្ធិដោយ៖ FRESH NEWS

ក្រុមហ៊ុនបច្ចេកវិទ្យាដ៏ធំរបស់ពិភពលោកគឺក្រុមហ៊ុន Dell បានសម្រេចកាត់បន្ថយការងារប្រមាណជា ៦,៦៥០កន្លែង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia កាលពីយប់ថ្ងៃចន្ទ ទី៦ ខែកុម្ភៈម្សិលមិញនេះ។ ការសម្រេចកាត់បន្ថយបុគ្គលិកក្នុងចំនួនដ៏ច្រើននេះត្រូវបានធ្វើឡើងក្រោមហេតុផលថា ទីផ្សារនៃការលក់ម៉ាស៊ីនកំព្យូរទ័រម៉ាក Dell បានធ្លាក់ចុះយ៉ាងខ្លាំងនៅជុំវិញពិភពលោក។ ហេតុផលបន្ថែមមួយទៀតនោះគឺការកាត់បន្ថយបុគ្គលិកនៅពេលនេះក៏ត្រូវបានធ្វើឡើងដោយផ្អែកទៅតាមស្ថានភាពសេដ្ឋកិច្ចពិភពលោក ដែលគេបានមើលឃើញថា នឹងបន្តធ្លាក់ចុះគួរឲ្យកត់សម្គាល់នៅពេលអនាគតផងដែរ។ គួរបញ្ជាក់ថា ក្រុមហ៊ុន Dell មានបុគ្គលិកនៅជុំវិញពិភពលោកប្រមាណជា ១៣៣,០០០នាក់ ហើយនៅក្នុងនោះមានបុគ្គលិកជាង ៣០%កំពុងបំពេញការងារនៅសហរដ្ឋអាមេរិក ខណៈការកាត់បន្ថយបុគ្គលិកខាងលើនេះនឹងធ្វើឲ្យប៉ះពាល់ដល់កម្លាំងពលកម្មសកលរបស់ក្រុមហ៊ុនប្រមាណជា ៥%៕ ផ្តល់សិទ្ធិដោយ៖ ខ្មែរណូត

តម្លៃទុរេននៅវៀតណាម បានកើនឡើង ៣ដងរហូតដល់ជាង ៦ ទៅជាង ៨ដុល្លារ ក្នុងមួយគីឡូក្រាមនៅកសិដ្ឋានភាគខាងត្បូងដោយសារតម្រូវការពីប្រទេសចិនបានកើនឡើង។ អាជីវករលក់ទុរេននៅភាគខាងត្បូងទីក្រុង Can Tho បាននិយាយថា គាត់មិនមានលទ្ធភាពទិញទុរេនក្នុងបរិមាណគ្រប់គ្រាន់ដើម្បីលក់ឱ្យអតិថិជនក្នុងស្រុកឡើយ ដោយសារកសិករទុកលក់ឱ្យឈ្មួញនាំចេញព្រោះបានតម្លៃខ្ពស់។ ជាមួយគ្នានេះ កសិករក្នុងតំបន់ជាច្រើនទៀត បានលើកឡើងថា ដោយសារតម្រូវការពីប្រទេសចិនបានកើនឡើងច្រើនដងធៀបនឹងឆ្នាំមុន​ដូ ឈ្មួញត្រូវប្រមូលរាប់រយតោនក្នុងមួយថ្ងៃដើម្បីចែកចាយទៅប្រទេសចិន ប៉ុន្តែការផ្គត់ផ្គង់អាចបំពេញតម្រូវការបានត្រឹមតែ ៣០% ទៅ ៥០% ប៉ុណ្ណោះ។ ជាមួយគ្នានេះ សមាគមន៍បន្លែ និងផ្លែឈើវៀតណាមបាននិយាយថា ទុរេនវៀតណាមល្អជាងផ្លែទុរេនដែលដាំដុះនៅប្រទេសថៃ និងហ្វីលីពីនសម្រាប់នាំចេញទៅប្រទេសចិន គួរបញ្ជាក់ផងដែរថា កាល​ពី​ខែ​កញ្ញា ឆ្នាំ​មុន ផ្លែ​ទុរេន​ស្រស់​របស់វៀតណាម​ត្រូវ​បាន​បញ្ជូន​ទៅ​ប្រទេស​ចិន​ជាលើកដំបូងក្រោម​កូតា​ផ្លូវការ ខណៈ​ប្រទេស​ទាំង​ពីរ​បាន​ព្រមព្រៀង​លើ​ពិធីសារ​ដែល​អនុញ្ញាត​ឱ្យ​កសិករ​វៀតណាម​ដាំ​ទុរេន​ក្រោម​ស្តង់ដារ​ចិន៕ ផ្តល់សិទ្ធិដោយ៖ ខ្មែរណូត

(បរទេស)៖ នាយកប្រតិបត្តិក្រុមហ៊ុន SpaceX លោក Elon Musk បានឱ្យដឹងនៅពេលថ្មីៗនេះថា SpaceX គ្រោងបាញ់បង្ហោះប្រព័ន្ធរ៉ុក្កែត-យានអវកាស Starship ធុនធ្ងន់ជាលើកដំបូងក្នុងអំឡុងខែមីនា ខាងមុខនេះ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៦ ខែកុម្ភៈ ឆ្នាំ២០២៣។ ឆ្លើយតបទៅនឹងសំណួរជាច្រើនរបស់អ្នកប្រើប្រាស់នៅលើបណ្តាញសង្គម Twitter អំពីការប្រើប្រាស់ Starship លោក Musk បានបង្ហោះថា «ប្រសិនបើការធ្វើតេស្តចុងក្រោយដែលនៅសល់ដំណើរការល្អ យើងនឹងព្យាយាមដាក់ឱ្យដំណើរការ Starship នៅខែក្រោយនេះតែម្តង»។ ជុំវិញការចោទសួរជាច្រើននេះបន្ទាប់ពី Musk បានបង្ហោះ Twitter នៅប៉ុន្មានខែមុនថា លោកត្រៀមនឹងបាញ់បង្ហោះរ៉ុក្កែត Starship ធុនធ្ងន់ដែលមានកម្ពស់ប្រមាណ ១២០ម៉ែត្រ (កម្ពស់របស់យាន្តអវកាស) ជាលើកដំបូង ខណៈពេលវេលាបាញ់បង្ហោះយ៉ាងលឿនអាចក្នុងខែកុម្ភៈ ឬយ៉ាងយូរនៅខែមីនាខាងមុខនេះ។ គួរបញ្ជាក់ដែរថា បេសកកម្មបាញ់បង្ហោះយានអវកាស Starship របស់កំពូលមហាសេដ្ឋី Elon Musk នេះគឺស្ថិតនៅក្រោមកិច្ចសន្យាតម្លៃប្រមាណជា ៣ពាន់លានដុល្លារ ជាមួយនឹងអង្គការ NASA ដើម្បីនាំយកមនុស្សទៅកាន់ផ្ទៃឋានព្រះចន្ទ នៅខ្ទង់ឆ្នាំ២០២៥ ដែលនឹងជាលើកដំបូងបំផុត គិតចាប់តាំងពីឆ្នាំ១៩៧២មក។ […]

ហុងកុង៖ ក្រោយបិទខ្ទប់ប្រទេសព្រោះវិបត្តិនៃជំងឺកូវីដ-១៩ អស់រយៈពេលជាច្រើនឆ្នាំមក អាជ្ញាធរហុងកុងគ្រោងនឹងចែកសំបុត្រយ​ន្តហោះ ៥០០,០០០ សន្លឹកដោយមិនគិតថ្លៃ ដើម្បីទាក់ទាញភ្ញៀវទេសចរណ៍ឲ្យទៅដើរកំសាន្តក្នុងដែនដីរបស់ខ្លួនឡើងវិញ។ តាមគម្រោងគឺសំបុត្រទាំង ៥០០,០០០សន្លឹកនោះនឹងត្រូវប្រគល់ជូនក្រុមហ៊ុនអាកាសចរណ៍ធំៗចំនួន ៣គឺក្រុមហ៊ុន Cathay Pacific​ ក្រុមហ៊ុន HK Express និងក្រុមហ៊ុន Hongkong Airlines ដើម្បីរៀបចំកម្មវិធីប្រគល់ជូនទៅកាន់អ្នកដំណើរ។ បើយោងតាមការចុះផ្សាយរបស់បណ្តាញសារព័ត៌មាន World of Buzz បានបញ្ជាក់ថា ការផ្តល់ជូនសំបុត្រយន្តហោះដោយមិនគិតថ្លៃនេះនឹងត្រូវធ្វើឡើងដោយមានលក្ខខណ្ឌមួយចំនួនដូចជា អ្នកដំណើរទាំងអស់ត្រូវចូលទៅបំពេញឈ្មោះក្នុងគេហទំព័ររបស់ក្រុមហ៊ុនអាកាសចរណ៍ទាំង ៣ខាងលើ ហើយខាងក្រុមហ៊ុននឹងធ្វើការជ្រើសរើសឈ្មោះអ្នកដំណើរទាំងអស់នោះដោយចៃដន្យទៅតាមចំនួនដែលបានកំណត់។ ចំពោះកាលបរិច្ឆេទចូលទៅចុះឈ្មោះវិញ គឺត្រូវបានបែងចែកជា ៣ដំណាក់កាល ដោយដំណាក់កាលទី ១គឺចាប់ផ្តើមពីថ្ងៃទី ១ ខែមីនាសម្រាប់ពលរដ្ឋនៅតំបន់អាស៊ីអាគ្នេយ៍ ដំណាក់កាលពីទី ២ គឺចាប់ផ្តើមពីថ្ងៃទី ១ខែមេសា សម្រាប់ពលរដ្ឋចិន និងដំណាក់កាលទី ៣គឺចាប់ផ្តើមពីថ្ងៃទី ១ខែឧសភា សម្រាប់ពលរដ្ឋហុងកុងផ្ទាល់តែម្តង៕ ផ្តល់សិទ្ធិដោយ៖ ខ្មែរណូត

(កូឡុំបូ)៖ មន្ត្រីការទូតជាន់ខ្ពស់អាមេរិកបានឱ្យដឹងនៅថ្ងៃពុធថា សហរដ្ឋអាមេរិកចង់ឱ្យប្រទេសចិនផ្តល់ការធានាដ៏គួរឱ្យទុកចិត្ត និងជាក់លាក់ដល់មូលនិធិរូបិយវត្ថុអន្តរជាតិ (IMF) រួមជាមួយនឹងម្ចាស់បំណុលផ្សេងទៀត ដើម្បីជួយប្រទេសស្រីលង្កាឱ្យទទួលបានថវិកាសង្គ្រោះចំនួន ២,៩ពាន់លានដុល្លារ។ នេះបើយោងតាមទីភ្នាក់ងារព័ត៌មានរ៉យទ័រ។ ប្រទេសស្រីលង្កាបានចុះកិច្ចព្រមព្រៀងកម្រិតបុគ្គលិកជាមួយនឹងមូលនិធិ IMF កាលពីខែកញ្ញាឆ្នាំមុន ប៉ុន្តែត្រូវការការធានាផ្នែកហិរញ្ញប្បទានពីអ្នកផ្តល់កម្ចីទ្វេភាគីធំៗដូចជាប្រទេសចិន និងជប៉ុនមុនពេលការបញ្ចេញប្រាក់កម្ចីអាចធ្វើទៅបាន។ ប្រទេសឥណ្ឌា ដែលជាម្ចាស់បំណុលធំទីបី បានផ្តល់ជូនការធានាហិរញ្ញវត្ថុរបស់ខ្លួនទៅកាន់មូលនិធិ IMF រួចហើយកាលពីខែមុន។ ទីភ្នាក់ងារព័ត៌មានរ៉យទ័របានរាយការណ៍ដោយដកស្រង់សំដីលោកស្រី Victoria Nuland អនុរដ្ឋមន្ត្រីក្រសួងការបរទេសអាមេរិកទទួលបន្ទុកកិច្ចការនយោបាយ ខណៈថ្លែងទៅកាន់អ្នកយកព័ត៌មានថា៖ «អ្វីដែលចិនបានផ្តល់មកដល់ពេលនេះមិនគ្រប់គ្រាន់ទេ។ យើងត្រូវមើលឃើញការធានាដ៏គួរឱ្យទុកចិត្ត និងជាក់លាក់ថា ពួកគេនឹងបំពេញតាមស្តង់ដារ IMF ស្តីពីការបន្ធូរបន្ថយបំណុល»។ លោកស្រីមានប្រសាសន៍ថា៖ «យើង (សហរដ្ឋអាមេរិក) ត្រៀមខ្លួនដើម្បីបំពេញតួនាទីរបស់យើង។ ដៃគូក្លឹបប៉ារីសរបស់យើងត្រៀមខ្លួនរួចរាល់ហើយដើម្បីបំពេញតួនាទីរបស់ពួកគេ។ ឥណ្ឌាបានធ្វើការប្តេជ្ញាចិត្តយ៉ាងមុតមាំថា ប្រទេសនេះនឹងផ្តល់នូវការធានាគួរឱ្យទុកចិត្តដែល IMF កំពុងចង់បាន»។ ធនាគារ Export-Import Bank of China បានផ្តល់ជូនការផ្អាកសងបំណុលរយៈពេលពីរឆ្នាំដល់ស្រីលង្កា ហើយធនាគារនេះបានឱ្យដឹងថា ខ្លួននឹងគាំទ្រដល់កិច្ចប្រឹងប្រែងរបស់ប្រទេសស្ថិតនៅតំបន់អាស៊ីខាងត្បូងមួយនេះដើម្បីទទួលបានកម្ចីពីមូលនិធិ IMF។ នេះបើយោងតាមទីភ្នាក់ងារព័ត៌មានរ៉យទ័រ៕ ផ្តល់សិទ្ធិដោយ៖ freshnews

ហ្វីលីពីន៖ ហាងលក់ទំនិញមួយកន្លែងនៅក្នុងប្រទេសហ្វីលីពីនបានសម្រេចអនុញ្ញាតឲ្យអតិថិជនរបស់ខ្លួនអាចធ្វើការទូទាត់រាល់ការចំណាយដោយប្រើប្រាស់ខ្ទឹមក្រហមជំនួសលុយសុទ្ធបាន នេះបើយោងតាមការចុះផ្សាយរបស់បណ្តាញសារព័ត៌មាន Next Shark កាលពីថ្ងៃទី ៣ ខែកុម្ភៈម្សិលមិញនេះ។ ហាងលក់ទំនិញមួយកន្លែងនេះមានឈ្មោះថា Japan Home Centre ជាហាងលក់សម្ភារៈសម្រាប់ប្រើប្រាស់នៅក្នុងផ្ទះ ដែលជាផលិតផលនាំចូលមកពីប្រទេសជប៉ុន។ យោងតាមសេចក្តីជូនដំណឹងរបស់ហាងខាងលើនេះបានបញ្ជាក់ថា ហាងនឹងទទួលទូរទាត់រាល់ការចំណាយលើការទិញទំនិញមួយចំនួនតាមរយៈ សាច់ប្រាក់ កាក់​ និងខ្ទឹមក្រហម​ ខណៈរបៀបនៃការទូទាត់ការចំណាយថ្មីនេះទទួលបានការចាប់អារម្មណ៍យ៉ាងខ្លាំងក្នុងចំណោមអ្នកប្រើប្រាស់បណ្តាញសង្គមនៅហ្វីលីពីន។ គួរបញ្ជាក់ជូនថា មួយរយៈចុងក្រោយនេះការនាំខ្ទឹមក្រហមចូលទៅក្នុងប្រទេសហ្វីលីពីនកំពុងមានបញ្ហា ហើយកត្តានេះបានធ្វើឲ្យតម្លៃខ្ទឹមក្រហមនៅក្នុងទីផ្សារនៃប្រទេសហ្វីលីពីនត្រូវកើនឡើងរហូតដល់ ៦០០ ប៉េសូ (ជាង ១១ដុល្លារ) ក្នុងមួយគីឡូក្រាម ខណៈអត្រាកំណើតនេះគឺមានការកើនឡើងប្រមាណជា ៦០០% បើធៀបទៅនឹងតម្លៃធម្មតានាពេលកន្លងមក៕ ផ្តល់សិទ្ធិដោយ៖ ខ្មែរណូត

(ប៉េកាំង)៖ កាលពីថ្ងៃសុក្រសប្តាហ៍នេះ ក្រសួងការបរទេសចិន​ បានសម្តែងការសោកស្តាយចំពោះអ្វីដែលខ្លួនអះអាងថា​ជា បាឡុងស៉ីវិលមួយ ដែលត្រូវខ្យល់បោកបក់ទៅដល់ ក្នុងដែនអាកាសរបស់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី៤ ខែកុម្ភៈ ឆ្នាំ២០២៣។ ក្រសួងការបរទេសចិន បាននិយាយក្នុងសេចក្តីថ្លែងការណ៍របស់ខ្លួនថា បាឡុងខ្យល់ដែលសហរដ្ឋអាមេរិកសង្ស័យជាបាឡុងស៉ើបការណ៍ តាមពិតគឺជាបាឡុងខ្យល់ស៉ីវិលមួយ ដែលត្រូវបានប្រើប្រាស់សម្រាប់ការងារស្រាវជ្រាវ ជាចម្បងនោះគឺសម្រាប់គោលដៅផ្នែកឧតុនិយម។ ទីក្រុងប៉េកាំងបានអះអាងថា បាឡុងខ្យល់នោះមិនសូវមានលទ្ធភាពខ្ពស់ ក្នុងការបង្វែរផ្លូវធ្វើដំណើររបស់វាឡើយ ហើយក៏រសាត់ចេញពី​គន្លងផ្លូវដែលបានគ្រោងទុក ដោយសារតែខ្យល់។ គួរបញ្ជាក់ថា កាលពីថ្ងៃព្រហស្បតិ៍ មន្ទីរប​ញ្ចកោណបានឱ្យដឹងថា ខ្លួនកំពុងតាមឃ្លាំមើលបាឡុងស៉ើបការណ៍មួយ ដែលទំនងជារបស់ចិន និងស្ថិតនៅលើសហរដ្ឋអាមេរិក រយៈពេលប៉ុន្មានថ្ងៃមកហើយ។ ក្រុមថ្នាក់ដឹកនាំយោធាអាមេរិក បានសម្រេចផ្តល់យោបល់មិនឱ្យបាញ់ទម្លាក់​បាឡុងខាងលើ ព្រោះខ្លាចកម្ទេចកម្ទីរបស់វាបង្កគ្រោះថ្នាក់ ដល់មនុស្សនៅខាងក្រោម។ មន្រ្តីយោធាអាមេរិកបាននិយាយថា ទីតាំងមួយដែល​បាឡុងនោះបានហោះកាត់ គឺរដ្ឋម៉ុនតាណា (Montona) ជាទីដែលមូលដ្ឋានទ័ពអាកាសអាមេរិក ម៉ាលស្រ្តូម (Malmstrom) ស្ថិតនៅ ខណៈ​មូលដ្ឋានយោធានេះ ជាទីតាំងផ្ទុកកន្លែងបាញ់មីស៉ីលនុយក្លេអ៊ែររាប់រយគ្រាប់៕ ផ្តល់សិទ្ធិដោយ៖ freshnews