(អាមេរិក)៖ អ្នកទិញទំនិញនៅសហរដ្ឋអាមេរិកបានចំណាយប្រាក់ ៩.១២ពាន់លានដុល្លារទិញទំនិញលើអ៊ីនធឺណិត ក្នុងថ្ងៃ Black Friday នេះ របាយការណ៍មួយបានបង្ហាញកាលពីថ្ងៃសៅរ៍ ខណៈដែលអ្នកប្រើប្រាស់បានទប់ទល់នឹងការធ្លាក់ចុះនៃអតិផរណាខ្ពស់ និងបានចាប់យកការបញ្ចុះតម្លៃយ៉ាងសន្ធឹកសន្ធាប់។ នេះបើយោងតាមការចុះផ្សាយរបស់ Reuters នៅថ្ងៃទី២៧ ខែវិច្ឆិកា ឆ្នាំ២០២២។ ការបញ្ជាទិញលើអ៊ីនធឺណិតបានកើនឡើង ២.៣ភាគរយនៅថ្ងៃ Black Friday។ អ្នកប្រើប្រាស់ត្រូវបានគេរំពឹងថានឹងសម្រុកទៅទិញទំនិញនៅហាង បន្ទាប់ពីជំងឺរាតត្បាតបានដាក់សម្ពាធលើការទិញទំនិញនៅក្នុងហាងក្នុងរយៈពេល ២ឆ្នាំមុន ប៉ុន្តែព្រឹកថ្ងៃ Black Friday បានឃើញហាងទាក់ទាញចរាចរណ៍តិចជាងធម្មតាដោយមានភ្លៀងធ្លាក់ជាបន្តបន្ទាប់នៅតាមផ្នែកខ្លះនៃប្រទេស។ ជនជាតិអាមេរិកបានងាកមកប្រើស្មាតហ្វូនដើម្បីធ្វើការទិញថ្ងៃឈប់សម្រាករបស់ពួកគេ ដោយទិន្នន័យពី Adobe បង្ហាញពីការទិញទំនិញតាមទូរស័ព្ទតំណាងឱ្យ ៣៨ភាគរយនៃការលក់ឌីជីថល Black Friday ទាំងអស់៕ ផ្តល់សិទ្ធិដោយ៖ ខ្មែរណូត

(សេអ៊ូល)៖ កុមារកម្ពុជាដែលមានជំងឺបេះដូងពីកំណើត ដែលទើបតែបានជួបជាមួយជំទាវទី១កូរ៉េខាងត្បូង ត្រូវបានរំពឹងថានឹងទទួលការវះកាត់នៅទីក្រុងសេអ៊ូល យោងតាមការិយាល័យប្រធានាធិបតីកាលពីថ្ងៃអាទិត្យ។ នេះបើយោងតាមការចុះផ្សាយរបស់សារព័ត៌មាន Korea Time នៅថ្ងៃទី២៨ ខែវិច្ឆិកា ឆ្នាំ២០២២។ ការិយាល័យប្រធានាធិបតី បានប្រាប់ទីភ្នាក់ងារព័ត៌មាន Yonhap ថា កុមារកម្ពុជារូបនេះត្រូវបានគេរំពឹងថានឹងត្រូវនាំមកកាន់ប្រទេសកូរ៉េខាងត្បូង ដើម្បីធ្វើការវះកាត់ នៅមជ្ឈមណ្ឌលវេជ្ជសាស្ត្រអាសាន ក្នុងទីក្រុងសេអ៊ូល។ ប្រភពដដែលក៏បានឱ្យដឹងថា រាល់ការចំណាយចាំបាច់សម្រាប់ការធ្វើដំណើរទៅកាន់កូរ៉េខាងត្បូង និងការវះកាត់ ត្រូវបានគេរៀបចំរួចជាស្រេចជាមួយនឹងការបរិច្ចាគ។ សូមរំលឹកថាលោកជំទាវ Kim Keon-hee បានចុះសួរសុខទុក្ខកុមារកម្ពុជាដែលមានអាយុ១៤ឆ្នាំកាលពីដើមខែនេះក្នុងទីក្រុងភ្នំពេញ ក្នុងអំឡុងពេលលោកជំទាវអមដំណើរលោកប្រធានាធិបតី Yoon Suk-yeol ជាស្វាមីមកចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅកម្ពុជា៕​ ផ្តល់សិទ្ធិដោយ៖ ខ្មែរណូត

ប្រទេសអ៊ីតាលីបានប្រកាសដាក់ភាពអាសន្ននៅលើកោះ Ischia ភាគខាងត្បូង កាលពីថ្ងៃអាទិត្យ ទី២៧ ខែវិច្ឆិកា បន្ទាប់ពីការរអិលបាក់ដីដ៏អាក្រក់ ដែលបានសម្លាប់មនុស្សយ៉ាងហោចណាស់ ៧ នាក់ និងបានធ្វើឱ្យមនុស្សជាច្រើននាក់ផ្សេងទៀតបាត់ខ្លួន នេះបើតាមអភិបាលក្រុង Naples លោក Claudio Palomba បានប្រកាសកាលពីល្ងាចថ្ងៃអាទិត្យ។ ប្រព័ន្ធផ្សព្វផ្សាយក្នុងស្រុក និងសេវាសង្គ្រោះបន្ទាន់បាននិយាយថា រលកភក់ និងកំទេចកំទី បានវាយលុកពេញទីក្រុងតូចមួយនៃទីប្រជុំជន Casamicciola Terme កាលពីព្រឹកថ្ងៃសៅរ៍ ដោយបានលេបត្របាក់ផ្ទះមួយខ្នង និងរថយន្តជាច្រើនគ្រឿងចុះទៅសមុទ្រ។ រដ្ឋមន្ត្រីការពារជនស៊ីវិលលោក Nello Musumeci បាននិយាយថា ថវិកាជំនួយដំបូងចំនួន ២ លានអឺរ៉ូ (២ លានដុល្លារអាមេរិក) ត្រូវបានចេញផ្សាយនៅចុងបញ្ចប់នៃកិច្ចប្រជុំគណៈរដ្ឋមន្ត្រីសង្គ្រោះបន្ទាន់ ដែលបានសម្រេចការប្រកាសភាពអាសន្ននេះ។ ប្រព័ន្ធ​ផ្សព្វផ្សាយ​អ៊ីតាលី​បាន​រាយការណ៍​មុន​នេះ​ថា សាកសព ៤​នាក់ ​ត្រូវ​បាន​រក​ឃើញ​នៅ​រសៀល​ថ្ងៃ​អាទិត្យ ហើយអ្នកជួយសង្គ្រោះជាង ២០០ នាក់ នៅតែកំពុងស្វែងរកអ្នកបាត់ខ្លួន ខណៈដែលអ្នកស្ម័គ្រចិត្តរាប់រយនាក់ ក៏កំពុងមមាញឹកសម្អាតផ្លូវក្នុងទីក្រុង។ កិច្ចខិតខំប្រឹងប្រែងជួយសង្គ្រោះត្រូវបានរារាំងដោយភ្លៀង និងខ្យល់បក់ខ្លាំង ដែលបានពន្យាពេលសាឡាងដែលនាំយកឧបករណ៍សង្គ្រោះពីដីគោក៕ ផ្តល់សិទ្ធិដោយ៖ ខ្មែរណូត

ប្រជាជននៅទីក្រុងប៉េកាំង សៀងហៃ និងផ្នែកផ្សេងទៀតនៃប្រទេសចិន បានចេញមកតាមផ្លូវដើម្បីតវ៉ាចំពោះវិធានការប្រឆាំងនឹងជំងឺ COVID-19 របស់រដ្ឋាភិបាល។ ការតវ៉ាបានផ្ទុះឡើងនៅក្នុងរដ្ឋធានីរបស់ប្រទេសចិនកាលពីយប់ថ្ងៃអាទិត្យ ដើម្បីប្រឆាំងនឹងគោលនយោបាយ «zero-COVID» ដែលពាក់ព័ន្ធនឹងការរឹតបន្តឹងយ៉ាងតឹងរ៉ឹងលើចលនារបស់ប្រជាជន។ បាតុករបានស្រែកថា «យើងចង់បានសេរីភាព» ហើយពួកគេ​ក៏​បាន​កាន់​ក្រដាស​ស​ទទេ ដើម្បី​បង្ហាញ​ពី​ការ​ប្រឆាំង​នឹង​ការ​ទប់ស្កាត់​ការ​បញ្ចេញ​មតិ​ដោយ​សេរី។ ការតវ៉ាក៏បានផ្ទុះឡើងនៅក្នុងទីក្រុងសៀងហៃ ដែលជាមជ្ឈមណ្ឌលសេដ្ឋកិច្ចរបស់ប្រទេសកាលពីថ្ងៃសៅរ៍ និងថ្ងៃអាទិត្យ ខណៈប៉ូលិស​ក៏បាន​ឃាត់​ខ្លួន​បាតុករ​មួយ​ចំនួន។ ការប្រមូលផ្តុំស្រដៀងគ្នានេះបានផ្ទុះឡើងនៅក្នុងទីក្រុង Guangzhou ក្នុងខេត្ត Guangdong ភាគខាងត្បូង និងទីក្រុង Wuhan ក្នុងខេត្ត Hubei ក៏ដូចជានៅតាមបរិវេណសាកលវិទ្យាល័យក្នុងទីក្រុងប៉េកាំង និងណានជីង។ ជម្រាបផងដែរថា អាជ្ញាធរចិនរក្សាការគ្រប់គ្រងយ៉ាងតឹងរ៉ឹងលើសេរីភាពនៃការបញ្ចេញមតិ នៅក្រោមការគ្រប់គ្រងដោយបក្សកុម្មុយនិស្ត ហើយវាពិតជាកម្រមានណាស់ សម្រាប់ការតវ៉ាប្រឆាំងនឹងគណបក្ស ឬរដ្ឋាភិបាលដែលធ្វើឡើងក្នុងពេលដំណាលគ្នានៅក្នុងទីក្រុងជាច្រើន។ មន្ត្រីរដ្ឋាភិបាលនិយាយថា គោលនយោបាយ zero-COVID មានប្រសិទ្ធភាពក្នុងការទប់ស្កាត់ការរីករាលដាលនៃជំងឺ COVID-19។ ប៉ុន្តែ​ឥឡូវ​គេ​ជឿ​ថា ក្រុម​បាតុករ​កំពុងដាក់​ការ​រិះគន់​របស់​ពួកគេ​ចំពោះ​គោលនយោបាយនេះ ​ដោយមើលឃើញថា វា​ជា​របៀប​ដែល​គណបក្ស​គ្រប់គ្រង​ប្រទេស​ចិន៕ ផ្តល់សិទ្ធិដោយ៖ ខ្មែរណូត

សកម្មភាពរបស់ពលរដ្ឋជប៉ុនដែលជាអ្នកគាំទ្រក្រុមបាល់ទាត់ជម្រើសជាតិនៃប្រទេសជប៉ុននៅក្នុងព្រឹត្តិការណ៍បាល់ទាត់ពិភពលោក World Cup ២០២២​ នៅក្នុងប្រទេសកាតា កំពុងទទួលបានការចាប់អារម្មណ៍យ៉ាងខ្លាំងពីសំណាក់ក្រុមអ្នកសារព័ត៌មាននៅជុំវិញពិភពលោក ដ្បិតពួកគេតែងនាំគ្នាប្រមូលសំរាមដើម្បីសម្អាតកីឡដ្ឋានបាល់ទាត់ក្រោយពួកគេបានទស្សនាការប្រកួតបាល់ទាត់រួច។ អ្វីដែលគួរឲ្យកត់សម្គាល់ទៀតនោះគឺសកម្មភាពនេះតែងកើតមានឡើងមិនថាក្រុមបាល់ទាត់ជម្រើសជាតិនៃប្រទេសជប៉ុនបានទទួលជ័យជំនះឬចាញ់នៅក្នុងការប្រកួតនោះទេ។ បើយោងតាមការចុះផ្សាយរបស់បណ្តាញសារព័ត៌មាន Unilad បានបញ្ជាក់ថា សកម្មភាពដ៏គួរឲ្យគោរពរបស់ក្រុមពលរដ្ឋជប៉ុនទាំងអស់នេះគឺបានកើតឡើងក្រោមហេតុផលមួយចំនួ​នដែលជាផ្នត់គំនិតផ្ទាល់របស់ពលរដ្ឋជប៉ុន។ អ្នកគាំទ្រជប៉ុនម្នាក់បាននិយាយថា៖ ការរក្សាអនាម័យសាធារណៈឲ្យស្អាតគឺជាមេរៀនដ៏សំខាន់មួយ ដែលឪពុកម្តាយនិងប្រព័ន្ធអប់រំនៅក្នុងប្រទេសជប៉ុនបានបង្រៀនមកពួកយើងតាំងពីពួកយើងនៅក្មេងម្លេះ។ អ្នកគាំទ្រម្នាក់ទៀតបានរៀបរាប់ថា៖ នៅពេលដែលមានជនជាតិជប៉ុនណាម្នាក់កាន់ថង់ប្លាស្ទិកចូលមកក្នុងកីឡដ្ឋានគឺយើងមានអារម្មណ៍ភ្លាមថា ការសម្អាតថង់បា្លស្ទិកនោះគឺជាកាតព្វកិច្ចរបស់ពួកយើងគ្រប់គ្នា ព្រោះភាពកខ្វក់នៅកន្លែងដែលពួកយើងអង្គុយគឺប៉ះពាល់ដល់កិត្តិយសនៃប្រជាជននិងប្រទេសជប៉ុនទាំង​មូលផងដែរ។ អ្នកគ្រាំទ្រម្នាក់ផ្សេងទៀតបានបង្ហាញចំណាប់អារម្មណ៍ថា៖ បេះដូងរបស់ពួកយើងគឺស្អាតស្អំ ដូចនេះកន្លែងអង្គុយរបស់ពួកយើងក៏ត្រូវតែស្អាតជានិច្ចដែរ ហើយភាពស្អាតស្អំគឺជាធម្មជាតិ​និងជាភាពប្រាកដនិយមរបស់ពលរដ្ឋជប៉ុនគ្រប់រូបផងដែរ៕ ផ្តល់សិទ្ធិដោយ៖ ខ្មែរណូត

ថៃ៖ យោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅថ្ងៃសុក្រ ទី២៥ ខែវិច្ឆិកានេះបានឲ្យដឹងថា អាជ្ញាធរថៃបានណែនាំឲ្យប្រជាពលរដ្ឋខ្លួននាំគ្នាពាក់ម៉ាស់ឡើងវិញដើម្បីការពារការចម្លងមេរោគ ក្រោយជំងឺកូវីដ-១៩ ហាក់កំពុងផ្តើមរាតត្បាតជាថ្មីម្តងទៀត។ សេចក្តីណែនាំខាងលើនេះត្រូវបានធ្វើឡើងក្រោយពេលដែលអាជ្ញាធរសុខាភិបាលថៃបានរកឃើញថា ចំនួនអ្នកឆ្លងជំងឺកូវីដ-១៩នៅក្នុងប្រទេសបានបន្តកើនឡើងគួរឲ្យកត់សម្គាល់ក្នុងរយៈពេលជាច្រើនសប្តាហ៍ចុងក្រោយនេះ ហើយបើធ្វើការប្រៀបធៀបទៅនឹងរយៈពេលកន្លងមកគឺតួលេខអ្នកឆ្លងកូវីដ-១៩ថ្មីបានកើនឡើងក្នុងចន្លោះពី ១០-២០ %។ បើតាមលោកវេជ្ជបណ្ឌិត Opas Karnkawinpong ដែលជាលេខាធិការអចិន្ត្រៃយ៍នៃក្រសួងសុខាភិបាលថៃបានបញ្ជាក់ថា នៅចំពោះមុខស្ថានភាពនាពេលបច្ចុប្បន្ននេះការពាក់ម៉ាស់នៅក្នុងចំណោមហ្វូងមនុស្សច្រើននិងការរក្សាអនាម័យនៅតាមទីសាធារណៈគឺជារឿងដ៏ចាំបាច់បំផុត ដែលពលរដ្ឋគ្រប់រូបត្រូវអនុវត្តឲ្យខ្ជាប់ខ្ជួនឡើងវិញ បើមិនដូចនេះទេពួកគេអាចប្រឈមនឹងការឆ្លងជំងឺកូវីដ-១៩ខ្ពស់ខ្លាំងណាស់។ លោកវេជ្ជបណ្ឌិតរូបនេះបានបន្ថែមផងដែរថា ដើម្បីបង្កើតភាពស៊ាំទៅនឹងមេរោគនៅក្នុងសហគមន៍ឲ្យបានខ្ពស់នោះគឺទាមទារឲ្យមានការចូលរួមពីប្រជាពលរដ្ឋគ្រប់រូប ពោលគឺពលរដ្ឋម្នាក់ៗត្រូវមកទទួលយកវ៉ាក់សាំងបង្ការជំងឺកូវីដ-១៩ ដែលជាដូសជម្រុញឲ្យបានគ្រប់ៗគ្នានៅតាមមណ្ឌលសុខភាព មន្ទីរពេទ្យ និងមជ្ឈមណ្ឌលកូវីដ-១៩ ដែលនៅជិតពួកគេបំផុតដោយមិនគិតថ្លៃ៕ ផ្តល់សិទ្ធិដោយ៖ ខ្មែរណូត

(បរទេស)៖ ក្រុមហ៊ុនផលិតរថយន្តអាមេរិក Tesla កំពុងប្រកាសប្រមូលរថយន្តបន្ថែមទៀតនៅក្នុងទីផ្សារប្រទេសចិន សរុបជាង ៨០,០០០គ្រឿងដែលផលិតតំាងពីដើមឆ្នាំ២០១៣ ជុំវិញបញ្ហាផ្នែក Software និងខ្សែក្រវ៉ាត់កៅអីរថយន្ត។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៥ ខែវិច្ឆិកា ឆ្នាំ២០២២។ បើយោងតាមសេចក្តីថ្លែងការណ៍របស់និយតករទីផ្សារចិនបានឱ្យដឹងថា ក្រុមហ៊ុនផលិតរថយន្តអគ្គិសនី Tesla បានប្រកាសប្រមូលឡើងវិញនូវរថយន្ត Model S និង Model X ចំនួន ៦៧,៦៩៨គ្រឿងដែលបាននាំចូលទៅកាន់ប្រទេសចិននៅចន្លោះថ្ងៃទី២៥ ខែកញ្ញា ឆ្នាំ២០១៣ ដល់ថ្ងៃទី២១ ខែវិច្ឆិកា ឆ្នាំ២០២០។ ខណៈការប្រមូលត្រឡប់មកវិញនេះត្រូវបានគេគូសបញ្ជាក់ថា បណ្តាលមកពីបញ្ហាបច្ចេកទេសផ្នែក Software ដែលប៉ះពាល់ដល់ប្រព័ន្ធគ្រប់គ្រងអាគុយនៅក្នុងរថយន្ត។ បន្ថែមពីនេះទៅទៀត Tesla បានគូសបញ្ជាក់ថា សម្រាប់រថយន្ត Model 3 ដែលបាននាំចូលចំនួន ២,៧៣៦គ្រឿងដែលផលិតនៅចន្លោះខែមករា ដល់ខែវិច្ឆិកា ឆ្នាំ២០១៩ និងរថយន្តម៉ូដែលដូចគ្នាដែលផលិតនៅប្រទេសចិនចំនួន ១០,១២៧គ្រឿង ដែលផលិតនៅចន្លោះថ្ងៃទី១៤ ខែតុលា ឆ្នាំ២០១៩ ដល់ថ្ងៃទី២៦ ខែកញ្ញា ឆ្នាំ២០២២ ក៏ត្រូវបានប្រមូលត្រឡប់មកជួសជុលឡើងវិញផងដែរ។ ទាំងនេះក៏ដោយសារតែមូលហេតុបញ្ហា ខ្សែក្រវ៉ាត់សុវត្ថិភាព […]

(ដូហា)៖ ខ្សែប្រយុទ្ធដ៏កំពូលគឺ Neymar ត្រូវ​បាន​សម្រេចដកឈ្មោះចេញ​ពី​ការ​ប្រកួត​របស់​ប្រេស៉ីល​ទល់​នឹង​ស្វីស ដោយសារ​របួស​កជើងធ្ងន់ធ្ងរ។ នេះបើតាមការផ្សាយរបស់ The Athletic នៅយប់ថ្ងៃសុក្រ ទី២៥ ខែវិច្ឆិកានេះ។ ខ្សែ​ប្រយុទ្ធ​រូប​នេះ​ បាន​បញ្ហាយ៉ាង​ខ្លាំង​បន្ទាប់​ពី​ឈ្នះ​ក្នុង​ការ​ប្រកួត​បើក​ឆាក​ជាមួយ​នឹង​ក្រុម​ជម្រើសជាតិស៊ែប៊ី។ វេជ្ជបណ្ឌិតប្រេស៉ីល លោក Rodrigo Lasmar បានបញ្ជាក់ថា Neymar នឹងខកខានការប្រកួត World Cup ជាលើកទីពីរជាមួយស្វីសនៅថ្ងៃចន្ទខាងមុខនេះ។ លោកបាននិយាយថា «Neymar បានចាប់ផ្តើមព្យាបាលកាលពីម្សិលមិញ (ថ្ងៃព្រហស្បតិ៍) ភ្លាមៗបន្ទាប់ពីការប្រកួតរបស់យើង។ ថ្ងៃនេះ (ថ្ងៃសុក្រ) នៅពេលព្រឹក ពួកគេត្រូវបានវាយតម្លៃឡើងវិញ ហើយដូចដែលយើងបានផ្តល់ព័ត៌មានរួចហើយនៅក្នុងការសម្ភាសកាលពីម្សិលមិញ តាមរយៈការវាយតម្លៃរាងកាយថ្ងៃនេះ យើងបានគិតថាវាមានសារៈសំខាន់ក្នុងការតាមដានបន្ថែមទៀតអំពីការវិវត្តនៃកីឡាករ»។ លោកបន្តថា «ការស្កែន​បាន​បង្ហាញ​ពី​របួស​សរសៃពួរ​ចំហៀង​ទៅ​កជើង​ស្តាំ​របស់ Neymar រួម​នឹង​ការ​ហើម​ឆ្អឹង​តូច។ កីឡាករ នៅតែស្ថិតក្នុងការព្យាបាល។ វាមានសារៈសំខាន់ខ្លាំងណាស់សម្រាប់យើងក្នុងការស្ងប់ស្ងាត់ ហើយការវាយតម្លៃនេះនឹងត្រូវបានអនុវត្តជារៀងរាល់ថ្ងៃដើម្បីឱ្យយើងមានព័ត៌មាន និងធ្វើការសម្រេចចិត្តល្អបំផុតដោយផ្អែកលើនោះ»។ Neymar ដែលជាខ្សែប្រយុទ្ធឆ្នើម របស់ជម្រើសជាតិប្រេស៉ីល បានស្រក់ទឹកភ្នែក ដោយសាររបួសកជើងធ្ងន់ធ្ងរ ដែលបង្កដោយខ្សែការពារស៊ែប៊ី ក្នុងការប្រកួតនៅព្រឹត្តិការណ៍ World Cup 2022 ។ […]

(កៀវ)៖ ប្រព័ន្ធផ្សព្វផ្សាយក្នុងស្រុករបស់អ៊ុយក្រែន បានឲ្យដឹងថា ទីក្រុងកៀវបានទទួលថវិកាជិត៣៥០លានដុល្លារ ពីប្រទេសកាណាដា ដើម្បីបំពេញមូលដ្ឋានផ្ទុកឧស្ម័នក្រោមដីរបស់ខ្លួន សម្រាប់ប្រើប្រាស់កំលុងរដូវរងា។ នេះបើយោងតាមការចុះផ្សាយដោយ សារព័ត៌មានរុស្ស៉ី RT នៅថ្ងៃសុក្រ ទី២៥ ខែវិច្ឆិកា ឆ្នាំ២០២២។ ដោយដកស្រង់សម្តីរបស់នាយករដ្ឋមន្រ្តីអ៊ុយក្រែន លោក ដេនីស ស្មីហែល (Denis Shmygal) ប្រព័ន្ធផ្សព្វផ្សាយអ៊ុយក្រែន បានឲ្យដឹងទៀតថា រដ្ឋាភិបាលទីក្រុងអូតាវ៉ា បានផ្ទេរប្រាក់ចំនួន ៣៤៤លានដុល្លារអាមេរិក ទៅឲ្យក្រុមហ៊ុនឧស្ម័នរដ្ឋរបស់អ៊ុយក្រែន ឈ្មោះ ណាហ្វតូហ្គាស (Naftogaz) កាលពីពេលថ្មីៗនេះ។ លោកនាយករដ្ឋមន្ត្រីអ៊ុយក្រែន បានបន្ថែមថា ក្នុងសប្តាហ៍នេះ ក្រុងកៀវក៏បានទទួលប្រាក់ចំនួន ២០៨លានដុល្លារ ពីប្រទេសន័រវែស សម្រាប់គោលបំណងដូចគ្នានេះដែរ ហើយក៏កំពុងរង់ចាំថវិកាជាង ៣០០លានដុល្លារទៀត ដែលនឹងត្រូវផ្ទេរមកពីធនាគារអ៊ឺរ៉ុប សម្រាប់ការកសាងនិងអភិវឌ្ឍន៍ឡើងវិញ ក្រោមកិច្ចព្រមព្រៀងដែលសម្រេចបានកន្លងមក។ គួរបញ្ជាក់ថា​ ការផ្តល់មូលនិធិរបស់កាណាដាសម្រាប់អ៊ុយក្រែនាពេលនេះ កើតឡើងចំពេលដែលពលរដ្ឋនៅក្នុងប្រទេសរបស់ខ្លួន ក៏ដូចជានៅសហភាពអឺរ៉ុប កំពុងប្រឈមមុខនឹងអតិផរណាផ្នែកថាមពលដែលមិនធ្លាប់មានពីមុនមក និងវិបត្តិតម្លៃនៃការរស់នៅ ដោយប្រជាជនរាប់ពាន់គ្រួសារ កំពុងជួបទុក្ខលំបាកក្នុងការទូទាត់ថ្លៃចំណាយប្រចាំថ្ងៃ៕ ផ្តល់សិទ្ធិដោយ៖ freshnews

(បរទេស)៖ កាលពីថ្ងៃពុធមានការតវ៉ាមួយបានផ្ទុះឡើងនៅរោងចក្រផ្គត់ផ្គង់ការផលិត iPhone ដ៏ធំរបស់ពិភពលោក ពីសំណាក់បុគ្គលិកនៅក្នុងទីក្រុង Zhengzhou ប្រទេសចិន។ នេះបើយោងតាមការចេញផ្សាយរបស់សារព័ត៌មាន MacRumors នៅថ្ងៃទី២៤ ខែវិច្ឆិកា ឆ្នាំ២០២២។ យោងតាមវីដេអូដែលត្រូវបានចែកចាយពេញបណ្តាញផ្សព្វផ្សាយសង្គមចិនកាលពីល្ងាចថ្ងៃពុធម្សិលមិញនេះ បានបង្ហាញពីបុគ្គលិកក្រុមហ៊ុន Foxconn រាប់រយនាក់បានដើរដង្ហែគ្នាជាក្បួនតវ៉ា ដែលបណ្តាលឱ្យមានការភ្ញាក់ផ្អើលពេញទីក្រុង Zhengzhou។ ដោយឡែកក្នុងវីដេអូនោះបុគ្គលិកជាច្រើនហាក់មានការខឹងសម្បារជាខ្លាំង ដែលឈានដល់ការតដៃជាមួយកម្លាំងសមត្ថកិច្ច និងខ្លះទៀតមានការឈ្លោះប្រកែកគ្នាជាមួយក្រុមមនុស្សដែលស្លៀកឈុត hazmat។ មូលហេតុដែលឈានដល់ការធ្វើកុប្បកម្មនៅពាសពេញរោងចក្រ Foxconn នោះបើតាមវីដេអូបានបង្ហាញពីសកម្មភាពបុគ្គលិកត្អូញត្អែរអំពីអាហារដែលពួកគេមិនត្រូវបានផ្តល់ដោយក្រុមហ៊ុន ខណៈដែលក្រុមបុគ្គលិកផ្សេងទៀតបានតវ៉ាថាពួកគេមិនបានទទួលបា្រក់រង្វាន់តាមការសន្យា។ បើយោងតាមប្រភពដដែលបានឱ្យដឹងថា ការផ្ទុះកំហឹងនេះក៏ដោយសារតែគោលនយោបាយ Zero-COVID របស់ប្រទេសចិន ដែលតម្រូវឱ្យទីក្រុងនានាត្រូវតែទប់ស្កាត់ការរីករាលដាលតាមរយៈការរឹតបន្តឹងទៅលើក្រុមហ៊ុននានា។ ហើយជាមួយនឹងការរីករាលដាលនៃមេរោគ COVID-19 នៅក្នុងទីក្រុង Zhengzhou បានបណ្តាលឱ្យ Foxconn ត្រូវឈានដល់បិទរោងចក្រ ដែលជាហេតុបង្ករឱ្យបុគ្គលិកជាច្រើនទាមទារចង់ត្រឡប់ទៅផ្ទះរបស់ពួកគេវិញ ដើម្បីជៀសវាងការជាប់គាំងនៅក្នុងរោងចក្រ ប្រសិនបើមានការដាក់កំហិតតឹងរឹងជាងនេះ។ គួរបញ្ជាក់ដែរថា ទីក្រុង Zhengzhou គឺជាម្រកដ៏ធំបំផុតរបស់ Foxconn ដែលជាកន្លែងផ្គត់ផ្គង់ការផលិត iPhone ខ្ទង់ ៧០ភាគរយរបស់ Apple និងមានបុគ្គលិកប្រមាណ ២០០,០០០នាក់នៅក្នុងនោះ៕ ផ្តល់សិទ្ធិដោយ៖ freshnews