(វ៉ាស៉ីនតោន)៖ មន្រ្តីអាមេរិកបាននិយាយនៅថ្ងៃព្រហស្បតិ៍សប្តាហ៍នេះថា សហរដ្ឋអាមេរិក កំពុងរៀបចំកញ្ចប់ជំនួយយោធាក្នុងទំហំទឹកប្រាក់ ២៧៥លានដុល្លារ សម្រាប់អ៊ុយក្រែន ដើម្បីពង្រឹងការវាយលុករបស់ខ្លួនប្រឆាំងនឹងកងកម្លាំងរុស្ស៊ី។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី២៨ ខែតុលា ឆ្នាំ២០២២។ កញ្ចប់ជំនួយយោធាថ្មីនេះ ត្រូវបានគេរំពឹងថានឹងរួមបញ្ចូលគ្រាប់រំសេវ និងប្រព័ន្ធបាញ់គ្រាប់រ៉ុក្តែត HIMARS បន្ថែមទៀត ហើយវាអាចត្រូវបានប្រកាសនៅថ្ងៃសុក្រនេះ (ពេលវេលានៅអាមេរិក)។ ដោយឡែកនៅក្នុងបទសម្ភាសន៍ជាមួយទូរទស្សន៍ CNN អ្នកនាំពាក្យសន្តិសុខជាតិរបស់សេតវិមាន លោក ចន ឃឺប៊ី (John Kirby) បានបដិសេធបញ្ជាក់ព័ត៌មានលម្អិតស្តីពីជំនួយនេះ តែបាននិយាយថាឃ្លាំងអាវុធថ្មីសម្រាប់អ៊ុយក្រែន នឹងត្រូវប្រកាសក្នុងពេល «ឆាប់ៗនេះ»។ គួរបញ្ជាក់ថា គិតចាប់តាំងពីរុស្ស៉ីបើកការវាយប្រហារអ៊ុយក្រែន នៅថ្ងៃទី២៤ ខែកុម្ភៈ សហរដ្ឋអាមេរិកបានបញ្ជូនជំនួយសន្តិសុខ ដែលមានតម្លៃប្រហែល ១៧.៦ពាន់លានដុល្លារហើយ ទៅកាន់ទីក្រុងកៀវ។ ក្រុមមន្រ្តីអាមេរិក ក៏បានឲ្យដឹងដែរថា សហរដ្ឋអាមេរិកកំពុងពិចារណា បញ្ជូនឧបករណ៍ការពារដែនអាកាស HAWK ចេញពីឃ្លាំងផ្ទុករបស់ខ្លួនទៅឲ្យអ៊ុយក្រែន ដើម្បីជួយការពារប្រឆាំងនឹងយន្តហោះដ្រូនរបស់រុស្ស៊ី ឬការវាយប្រហារដោយមីស៊ីល៕ ផ្តល់សិទ្ធិដោយ៖ freshnews

ប្រធានាធិបតីលោក Volodymyr Zelensky បាននិយាយថា រុស្ស៊ីបានបើកការវាយប្រហារដោយយន្តហោះគ្មានមនុស្សបើកជាង ៣០ គ្រឿង មកលើអ៊ុយក្រែន ក្នុងរយៈពេលត្រឹមតែ ២ ថ្ងៃប៉ុណ្ណោះ។ លោកបានបន្ថែមថា សរុបមកទីក្រុងមូស្គូ បានធ្វើការវាយប្រហារដោយមីស៊ីលចំនួន ៤ ៥០០ គ្រាប់ និងការវាយប្រហារតាមផ្លូវអាកាសជាង ៨ ០០០ លើក ផងដែរ។ ថ្លែងពីទីក្រុងគៀវ ហើយឈរនៅក្បែរអ្វីដែលមើលទៅដូចជាយន្តហោះគ្មានមនុស្សបើកម៉ាក Shahed របស់អ៊ីរ៉ង់ លោក Zelensky បានសន្យាថា នឹងទប់ស្កាត់កម្លាំងអាកាសរបស់ទីក្រុងម៉ូស្គូ។ ចំណែកមន្ត្រីលោកខាងលិចជឿថា អ៊ីរ៉ង់បានផ្គត់ផ្គង់យន្តហោះគ្មានមនុស្សបើកមួយចំនួនធំដល់រុស្ស៊ី ប៉ុន្តែទីក្រុងមូស្គូ និងក្រុងតេអេរ៉ង់បានបដិសេធ។ វាបានកើតឡើងនៅចំពេលដែលរដ្ឋមន្ត្រីការបរទេសអាមេរិក លោក Antony Blinken បានហៅការប្រើប្រាស់យន្តហោះគ្មានមនុស្សបើកយ៉ាងគឃ្លើនរបស់រុស្ស៊ីថា ជារឿងគួរឱ្យខ្លាច។ លោកបានចោទថា រុស្ស៊ីប្រើប្រាស់ឧបករណ៍ទាំងនេះ ដើម្បីសម្លាប់ជនស៊ីវិលអ៊ុយក្រែន និងបំផ្លាញហេដ្ឋារចនាសម្ព័ន្ធ ដែលពួកគេពឹងផ្អែកលើអគ្គិសនី ទឹក និងកម្ដៅ ក្នុងអំឡុងពេលទស្សនកិច្ចទៅកាន់រដ្ឋធានី Ottawa របស់ប្រទេសកាណាដា។ លោក Blinken បាននិយាយថា៖«កាណាដា និងសហរដ្ឋអាមេរិក នឹងបន្តធ្វើការជាមួយសម្ព័ន្ធមិត្ត […]

អាមេរិក៖ ឪពុកម្តាយជាច្រើនតែងមានការព្រួយបារម្ភនៅពេលដែលឃើញកូនៗរបស់ពួកចំណាយពេលយ៉ាងច្រើនដើម្បីលេងហ្គេម ដោយពួកគាត់គិតថាការលេងហ្គេមច្រើនអាចធ្វើឲ្យក្មេងៗមានបញ្ហាសុខភាពផ្សេងៗដូចជា បញ្ហាភ្នែក បញ្ហាផ្លូវចិត្ត ឡើងទម្ងន់ ឬវក់ខ្លាំងរហូតភ្លេចការរៀនសូត្រជាដើម។ បើទោះជាហ្គេមអាចផ្តល់នូវគុណវិបត្តិខ្លះដូចការព្រួយបារម្ភខាងលើនេះក៏ដោយ តែមានការសិក្សាមួយបានរកឃើញថា វីដេអូហ្គេមក៏បានផ្តល់នូវគុណសម្បត្តិចំពោះកុមារផងដែរ ពោលគឺការលេងហ្គេមបានជួយធ្វើឲ្យខួរក្បាលកុមារលូតលាស់យ៉ាងល្អប្រសើរ ឬនិយាយដោយស្រួលស្តាប់ថា ការលេងហ្គេមបានជួយឲ្យកុមារមានភាពវ័យឆ្លាត។ បើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃសុក្រ ទី២៨ ខែតុលានេះបានបញ្ជាក់ថា ការសិក្សាខាងលើនេះត្រូវបានធ្វើឡើងដោយក្រុមអ្នកជំនាញផ្នែកចិត្តសាស្រ្តនៅសាកលវិទ្យាល័យ Vermont សហរដ្ឋមេរិក និងត្រូវបានចុះផ្សាយសាធារណៈដោយទិនានុប្បវត្តិ JAMA Network Open ។ នៅក្នុងការសិក្សាគេបានស្ទង់មតិកុមារដែលមានអាយុ ៩-១០ឆ្នាំ ប្រមាណជា ២,០០០នាក់ ដោយក្នុងនោះមានទាំងកុមារដែលមានទម្លាប់លេងហ្គេម ៣ម៉ោងឬច្រើនជាង ៣ម៉ោងក្នុងមួយថ្ងៃ និងក្រុមកុមារដែលមិនធ្លាប់លេងហ្គេមទាល់តែសោះ។ លទ្ធផលនៃសិក្សាបានបង្ហាញថា ក្រុមកុមារដែលមានទម្លាប់លេងហ្គេមគឺមានគំនិតច្នៃប្រឌិតនិងភាពវ័យឆ្លាតជាងកុមារដែលមិនធ្លាប់លេងហ្គេមទាល់តែសោះ។ យ៉ាងណាក្តី លោកសាស្រ្តចារ្យ Bader Chaarani ដែលជាអ្នកដឹកនាំការសិក្សាខាងលើនេះបានបញ្ជាក់ថា បើទោះជាហ្គេមអាចជួយឲ្យកុមារមានភាពវ័យឆ្លាតក៏ដោយ តែឪពុកម្តាយត្រូវចេះកំណត់រយៈពេលនៃការលេងរបស់ក្មេងៗឲ្យបានច្បាស់លាស់ ពោលគឺកុំឲ្យពួកគេលេងតាមតែចិត្តឲ្យសោះ ព្រោះពួកគេអាចធ្លាក់ដល់ចំណុចគ្រោះថ្នាក់មួយគឺ “មានជំងឺញៀនហ្គេម”៕ ផ្តល់សិទ្ធិដោយ៖ ខ្មែរណូត

យោធាកូរ៉េខាងត្បូងបាននិយាយថា ប្រទេសកូរ៉េខាងជើងបានបាញ់មីស៊ីលផ្លោងមិនជាក់លាក់មួយទៅកាន់សមុទ្រខាងកើត នៅថ្ងៃសុក្រ ទី២៨ ខែតុលា ឆ្នាំ២០២២ ខណៈដែលសមយុទ្ធយោធាដ៏សំខាន់របស់ទីក្រុងសេអ៊ូលជិតដល់ទីបញ្ចប់។ អគ្គសេនាធិការចម្រុះ (JCS) ជាអ្នកដែលបានប្រកាសពីការបាញ់បង្ហោះនេះ ប៉ុន្តែមិនបានផ្តល់ព័ត៌មានលម្អិតផ្សេងទៀតភ្លាមៗទេ។ ការ​បាញ់​បង្ហោះ​ចុងក្រោយ​នេះ ​បាន​កើត​ឡើង​ខណៈ​ដែល​ប្រទេស​កូរ៉េខាង​ត្បូង ​គ្រោង​នឹង​បញ្ចប់​សមយុទ្ធ Hoguk របស់​ខ្លួន។ យ៉ាងណា ទីក្រុងសេអ៊ូល និងទីក្រុងវ៉ាស៊ីនតោន ក៏កំពុងរៀបចំធ្វើសមយុទ្ធដែនអាកាសរួមគ្នាផ្សេងទៀត ដែលហៅថា «Vigilant Storm» នៅសប្តាហ៍ក្រោយ។ កូរ៉េខាងជើងកាន់តែបង្កើនការបាញ់បង្ហោះមីស៊ីលប៉ុន្មានរយៈចុងក្រោយនេះ ជាក់ស្ដែងកាលពីថ្ងៃទី១៤ ខែតុលា ខ្លួនក៏បានបាញ់មីស៊ីលផ្លោងរយៈចម្ងាយខ្លីផងដែរ៕ ​ផ្តល់សិទ្ធិដោយ៖ ខ្មែរណូត

ទីភ្នាក់ងារសារព័ត៌មាន រ៉យទ័រ បានរាយការណ៍ថា ការទិញយក Twitter ក្នុងតម្លៃ ៤៤ ពាន់លានដុល្លារ របស់លោក Elon Musk ត្រូវបានបញ្ចប់ជាផ្លូវការហើយ។ មុននេះ អ្នករាយការណ៍ព័ត៌មាន CNBC លោក David Faber បានសរសេរថា៖«ឥឡូវនេះ Elon Musk ជាអ្នកទទួលបន្ទុកនៅ Twitter»។ អ្នកយកព័ត៌មានបានសរសេរថា៖«ខ្ញុំត្រូវបានគេប្រាប់ឱ្យដឹងថា អតីតនាយកប្រតិបត្តិ @paraga និង CFO @nedsegal បានចាកចេញពីទីស្នាក់ការកណ្តាលរបស់ក្រុមហ៊ុន ហើយនឹងមិនត្រឡប់មកវិញទេ នៅពេលដែលយុគសម័យ Musk ចាប់ផ្តើម»។ យ៉ាងណា លោក Musk មិន​ទាន់​ឆ្លើយ​តប​ចំពោះ​រឿង​នេះ​ទេ៕ ផ្តល់សិទ្ធិដោយ៖ ខ្មែរណូត

កាលពីប៉ុន្មានរយៈមុន សហភាពអឺរ៉ុបបានឈានដល់កិច្ចព្រមព្រៀងមួយ ដែលនឹងតម្រូវឱ្យផលិតផលអេឡិចត្រូនិកដែលនាំទៅតំបន់អឺរ៉ុបទាំងអស់ ត្រូវតែងាកមកប្រើប្រាស់រន្ធសាកថ្មស្ដង់ដារធម្មតា ជាពិសេសគឺ USB-C នៅត្រឹមឆ្នាំ២០២៤ ហើយច្បាស់ណាស់ថា ការកំណត់បែបនោះ នឹងប៉ះពាល់ជាងគេដល់ក្រុមហ៊ុន Apple ពិសេសគឺទូរសព្ទ iPhone។ ជាក់ស្ដែងឥឡូវនេះ ក្រុមហ៊ុន Apple បានបញ្ជាក់ហើយថា ទូរសព្ទ iPhone របស់ខ្លួន នឹងត្រូវប្រើប្រាស់រន្ធសាកប្រភេទ USB-C ព្រោះថា វាមិនអាចជៀសរួចនោះទេ។ ថ្លែងនៅក្នុងសន្និសីទ Tech Live របស់កាសែត The Wall Street Journal នៅសប្តាហ៍នេះ អនុប្រធានជាន់ខ្ពស់ផ្នែកទីផ្សារពិភពលោករបស់ Apple គឺលោក Greg Joswiak បានអះអាងថា ក្រុមហ៊ុន Apple នឹងត្រូវតែអនុវត្តតាមការដាក់កំហិតរបស់សមាជិកសភាអឺរ៉ុប។ ច្បាប់ថ្មីនេះត្រូវបានអនុម័តនៅសភាអឺរ៉ុបនាពេលថ្មីៗនេះ ដែលនឹងតម្រូវឱ្យទូរសព្ទចល័ត ថេប្លេត និងកាមេរ៉ាទាំងអស់ ដែលលក់ក្នុងប្រទេសសហភាពអឺរ៉ុប ត្រូវតែប្រើប្រាស់រន្ធសាក USB-C នៅត្រឹមចុងឆ្នាំ២០២៤ ខណៈកុំព្យូទ័រយួរដៃ គឺអាចអូសបន្លាយដល់ពាក់កណ្តាលឆ្នាំ២០២៦។ ការផ្លាស់ប្ដូរនេះ គឺមានគោលបំណងកាត់បន្ថយកាកសំណល់អេឡិចត្រូនិក និងលើកទឹកចិត្តអ្នកប្រើប្រាស់ឱ្យធ្វើការជ្រើសរើសប្រកបដោយនិរន្តរភាព។ ក្រុមហ៊ុនផលិតភាគច្រើនបានផ្លាស់ប្តូររន្ធសាកឧបករណ៍ចល័តរបស់ពួកគេ […]

ទីក្រុងសៀងហៃកាលពីថ្ងៃពុធ បានក្លាយជាទីតាំងដំបូងគេបំផុតនៅក្នុងពិភពលោក ដែលចាប់ផ្តើមការប្រើប្រាស់វ៉ាក់សាំងបង្ការជំងឺ COVID-19 ប្រភេទស្រូបចូលក្នុងមាត់ នេះបើតាមការចុះផ្សាយរបស់សារព័ត៌មាន Associated Press ។ វ៉ាក់សាំងនេះត្រូវបានផ្តល់ក្នុងទម្រង់ ជាចំហាយស្រូបចូលទៅក្នុងមាត់ និងអាចរកបានដោយមិនគិតថ្លៃ សម្រាប់អ្នកដែលរស់នៅក្នុងទីក្រុងសៀងហៃ បើទោះបីជាវ៉ាក់សាំងមួយនេះ ទើបតែត្រូវបានគេប្រើប្រាស់ជាវ៉ាក់សាំងជំរុញ (Booster) សិនប៉ុណ្ណោះ។ មន្ត្រីចិនក៏បានបង្ហោះវីដេអូមួយនៅលើប្រព័ន្ធផ្សព្វផ្សាយសង្គម ដែលបង្ហាញពីដំណើរការនៃការប្រើប្រាស់វ៉ាក់សាំង រួមទាំងអ្វីដែលហាក់ដូចជា ក្រុមមនុស្សកំពុងកាន់កំប៉ុងម៉្យាង ហើយស្រូបវាចូលទៅក្នុងមាត់របស់ពួកគេ។ ដំណើរការនេះប្រើពេលប្រមាណ ២០ វិនាទី ប៉ុណ្ណោះ។ វ៉ាក់សាំងប្រភេទថ្មីនេះ គឺជាផ្នែកមួយនៃការជំរុញដោយមន្ត្រីចិន ដើម្បីការសាកល្បង និងធ្វើឱ្យការចាក់វ៉ាក់សាំង «មិនប្រើប្រាស់ម្ជុល» កាន់តែមានភាពទូលំទូលាយសម្រាប់សាធារណជន។ វាកើតឡើងនៅពេលដែលប្រទេសនេះ នៅតែស្ថិតក្រោមការរឹតត្បឹតដ៏តឹងរ៉ឹងចំពោះជំងឺ COVID-19 ដែលជាផ្នែកមួយនៃគោលនយោបាយ «Zero-COVID» របស់ប្រធានាធិបតីចិនលោក ស៊ី ជីនពីង។ ជម្រាបដែរថា ប្រទេសចិនគឺជាប្រទេសតែមួយគត់ ដែលមានវ៉ាក់សាំងប្រភេទស្រូបចូលមាត់នាពេលបច្ចុប្បន្ននេះ ប៉ុន្តែ AP បាននិយាយថា ម៉ាឡេស៊ីនឹងដាក់ការសាកល្បងព្យាបាលក្នុងពេលឆាប់ៗនេះ ដើម្បីកំណត់ពីប្រសិទ្ធភាពរបស់វា ជាមួយនឹងសក្តានុពលសម្រាប់ប្រទេសផ្សេងទៀតអាចអនុវត្តតាមបាន៕ ផ្តល់សិទ្ធិដោយ៖ ខ្មែរណូត

ក្រុមហ៊ុន​រថយន្ត Ford Motor របស់​សហរដ្ឋ​អាមេរិក ​បាន​ក្លាយ​ជា​ក្រុមហ៊ុន​ផលិត​រថយន្ត​ពិភពលោកថ្មី​ចុងក្រោយ​បង្អស់​ ដែលប្រកាសការចាកចេញ​ពី​ប្រទេស​រុស្ស៊ី​ បន្ទាប់​ពី​ការ​លុកលុយ​របស់​ទីក្រុង​ម៉ូស្គូ​មក​លើ​អ៊ុយក្រែន។ ក្រុមហ៊ុន Ford បានប្រកាសកាលពីថ្ងៃពុធថា ខ្លួនបានលក់ភាគហ៊ុនចំនួន ៤៩% របស់ខ្លួន នៅក្នុងការបណ្តាក់ទុនរួមគ្នាក្នុងស្រុកមួយ ទៅតាមតម្លៃចុះនៅលើប័ណ្ណ (nominal value)។ ជម្រាបដែរថា ប្រតិបត្តិការទាំងអស់នៅក្រុមហ៊ុនត្រូវបានផ្អាកចាប់តាំងពីខែមីនា ប៉ុន្តែក្រុមហ៊ុន Ford បាននិយាយថា ខ្លួននឹងរក្សាជម្រើសក្នុងការទិញភាគហ៊ុនឡើងវិញ ក្នុងរយៈពេល ៥ឆ្នាំ ប្រសិនបើស្ថានភាពពិភពលោកផ្លាស់ប្តូរ។ មុននេះ ក្រុមហ៊ុនរថយន្ត Mercedes-Benz ក៏​បានប្រកាសថា នឹង​ដក​ខ្លួន​ចេញ​ពី​ប្រទេស​រុស្ស៊ី​ផងដែរ។ ទាំង Mercedes-Benz និង Ford សុទ្ធតែដើរតាមគន្លងរបស់ Volkswagen, Toyota, Nissan និង Renault ក្នុងការចាកចេញពីប្រទេសរុស្ស៊ី។ យ៉ាងណា ក្រុមហ៊ុនផលិតរថយន្តដូចជា Mazda និង Hyundai/Kia នៅតែដំណើរការនៅរុស្ស៊ី ប៉ុន្តែក្រុមហ៊ុនទាំង ២នេះ ក៏ត្រូវបានគេនិយាយថា កំពុងព្យាយាមចាកចេញពីប្រទេសនេះផងដែរ។ វា​ជា​ថ្ងៃ​ដ៏​មមាញឹក​សម្រាប់​ក្រុមហ៊ុន Ford ដែល​មុន​នេះ […]

អូស្រ្តាលី៖ រដ្ឋាភិបាលនៃប្រទេសអូស្រ្តាលីនៅថ្ងៃព្រហស្បតិ៍ ទី២៧ ខែតុលានេះបានប្រកាសថា នឹងជួយហ្វឹកហាត់ដល់ទាហានអ៊ុយក្រែន និងផ្តល់ជំនួយបន្ថែមមួយចំនួនទៅកាន់កងទ័ពអ៊ុយក្រែនដើម្បីប្រើប្រាស់ទប់ទល់នឹងការឈ្លានពានរបស់កម្លាំងរុស្ស៊ី។ យោងតាមការចុះផ្សាយរបស់បណ្តាញសារព័ត៌មាន Channel News Asia បានបញ្ជាក់ថា តាមគម្រោងគឺអូស្រ្តាលីនឹងបញ្ជូនទាហ៊ានជំនាញរបស់ខ្លួនចំនួន ៧០នាក់ទៅកាន់ប្រទេសអង់គ្លេស ដើម្បីជួយហ្វឹកហាត់ដល់ទាហ៊ានអ៊ុយក្រែន ដែលពេលនេះកំពុងស្នាក់នៅនិងទទួលការហ្វឹកហាត់នៅក្នុងអង់គ្លេស។ ប្រភពខាងលើបានបន្តថា ចំពោះជំនួយរបស់រដ្ឋាភិបាលអូស្រ្តាលីនៅពេលនេះវិញគឺជារថពាសដែកចំនួន ៣០ ដែលអូស្រ្តាលីនឹងបញ្ជូនទៅកាន់អ៊ុយក្រែនតាមរយៈកប៉ាល់ដឹកទំនិញខ្នាតធំ។ បើតាមលោក Richard Marles ដែលជារដ្ឋមន្ត្រីក្រសួងការពារជាតិអូស្រ្តាលីបានបញ្ជាក់ថា​ ចាប់តាំងរុស្ស៊ីបានផ្តើមឈ្លានពានចូលក្នុងទឹកដីអ៊ុយក្រែនមក រដ្ឋាភិបាលអូស្រ្តាលីបានផ្តល់ជំនួយទៅកាន់អ៊ុយក្រែនក្នុងទំហំទឹកប្រាក់ប្រមាណជា ៦៥៥ដុល្លារអូស្រ្តាលី (៤២៥ លានដុល្លារអាមេរិក) ហើយ ខណៈអូស្រ្តាលីនឹងបន្តគាំទ្រអ៊ុយក្រែនក្នុងរយៈពេលយូរអង្វែងទៀត ពោលគឺរហូតដល់ភ្លើងសង្គ្រាមត្រូវបានបិទបញ្ចប់៕

ចិន៖ ក្មេងស្រីដ៏គួរឲ្យស្រលាញ់និងឆ្លាតវ័យម្នាក់បានធ្វើឲ្យឪពុកម្តាយរបស់នាងហួសចិត្តនិយាយលែងចេញ ក្រោយរូបនាងបានយកកុំព្យូទ័រយួរដៃសម្រាប់ធ្វើការងាររបស់ឪពុកនាងទៅលាងទឹកជាមួយនឹងសាប៊ូ និងបានធ្វើឲ្យកុំព្យូទ័រដ៏ថ្លៃមួយនោះត្រូវខូចបើកលែងចេញតែម្តង។ បើយោងតាមការចុះផ្សាយរបស់បណ្តាញសារព័ត៌មាន South China Morning Post នៅព្រឹកថ្ងៃអង្គារ ទី២៦ ខែតុលានេះបានឲ្យដឹងថា ហេតុការណ៍នេះបានកើតឡើងនៅក្នុងខេត្ត Shandong ភាគខាងត្បូងប្រទេសចិន ខណៈក្មេងស្រីដែលបានធ្វើសកម្មភាពលាងសម្អាតកុំព្យូទ័រជាមួយសាប៊ូនោះមានឈ្មោះថា Duomi និងទើបមានអាយុត្រឹម ២ឆ្នាំប៉ុណ្ណោះ។ បើតាមស្រ្តីជាម្តាយរបស់ក្មេងស្រីរូបនេះបានប្រាប់ឲ្យដឹងថា នៅក្នុងអំឡុងពេលញ៉ាំបាយនៅពេលព្រឹកប្តីរបស់គាត់និយាយថា​ នៅក្នុងកុំព្យូទ័ររបស់គាត់មានសំរាមច្រើនណាស់ដែលគួរតែសម្អាតចោលខ្លះ ខណៈដែលរូបគាត់ចង់និយាយសំដៅថា ក្នុងកុំព្យូទ័រមានផ្ទុកឯកសារអត់ប្រយោជន៍ច្រើនណាស់ តែគាត់មិនទាន់មានពិនិត្យឡើងវិញដើ​ម្បីលុបឯកសារទាំងនោះចោលទេ។ លុះដល់ពេលថ្ងៃត្រង់ក្នុងអំឡុងពេលដែលប្តីរបស់គាត់បានដេកលក់ស្រាប់តែកូនស្រីរបស់គាត់បានយកកុំព្យូទ័រនោះទៅលាងទឹកជាមួយសាប៊ូ និងធ្វើឲ្យវាខូចបើកលេងចេញតែម្តង។ ស្រ្តីជាម្តាយរូបនេះបានបញ្ជាក់ថា​ កុំព្យូរទ័រយួរដៃរបស់ប្តីគាត់នោះគឺជាកុំព្យូរទ័រម៉ាក Apple ដែលប្តីគាត់ទើបនឹងទិញបាន ៣ឆ្នាំប៉ុណ្ណោះក្នុងតម្លៃ ៩,០០០យន់ (១,២០០ ដុល្លារ)៕ ផ្តល់សិទ្ធិដោយ៖ ខ្មែរណូត