(យូអិន)៖ ឯកអគ្គរដ្ឋទូតរងរបស់សហរដ្ឋអាមេរិកប្រចាំអង្គការសហប្រជាជាតិ លោក​ Robert Wood បានប្រាប់ក្រុមប្រឹក្សាសន្តិសុខ កាលពីថ្ងៃព្រហស្បតិ៍ ទី៣១ ខែតុលាថាសហរដ្ឋអាមេរិកទទួលបានព័ត៌មានអាចបញ្ជាក់បានថាមានកងទ័ពកូរ៉េខាងជើង ៨០០០នាក់ កំពុងស្ថិតនៅក្នុងតំបន់ Kursk របស់រុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ បើតាមលោក Robert Wood លោកផ្ទាល់ក៏បានសួរបញ្ជាក់ផងដែរថាតើភាគីរុស្ស៉ីនៅតែប្រកាន់ជំហរថាគ្មានវត្តមានកងទ័ពកូរ៉េខាងជើង នៅលើទឹកដីរុស្ស៉ី ទៀតឬ? ប៉ុន្តែ តំណាងរុស្ស៉ីប្រចាំ UN មិនបានឆ្លើយតបទៅនឹងសំណួររបស់លោក Wood នោះទេ។ រុស្ស៉ី មកទល់នឹងពេលនេះមិនបានប្រកែក ហើយក៏មិន បានទទួលស្គាល់ពីវត្តមានកងទ័ពកូរ៉េខាងជើងនៅលើទឹកដីរបស់ខ្លួននោះដែរ។ ចំណែក កូរ៉េខាងជើងវិញ បន្ទាប់ពីបានប្រកែកអស់ជាច្រើនសប្ដាហ៍ បានចេញមុខការពារការដាក់ពង្រាយកងទ័ពរបស់ខ្លួនទៅកាន់រុស្ស៉ី ថាធ្វើឡើងអនុលោម តាមច្បាប់អន្តរជាតិ។ គួរបញ្ជាក់ថា កាលពីខែសីហាកន្លងទៅនេះ កងទ័ពអ៊ុយក្រែនបានបើកប្រតិបត្តិការវាយលុកថ្មើរជើងចូលក្នុងតំបន់ Kursk ដោយដណ្ដើមកាន់កាប់បានទឹកដី រុស្ស៉ីមួយចំនួនក្នុងតំបន់នេះ។ មន្ទីរបញ្ចកោណបានបង្ហាញការព្រួយបារម្ភថារុស្ស៉ីអាចនឹងប្រើប្រាស់កងទ័ពកូរ៉េខាងជើងនៅក្នុងការប្រយុទ្ធ ឬយ៉ាងហោចដើម្បី គាំទ្រដល់ប្រតិបត្តិការយោធាប្រឆាំងនឹងកងទ័ពអ៊ុយក្រែន ក្នុងតំបន់ Kursk៕ ផ្ដល់សិទ្ធិដោយ៖ Fresh News

(ហាណូយ)៖ អាជ្ញាធរគ្រប់គ្រងគ្រោះមហន្តរាយវៀតណាម បានឱ្យដឹងនាថ្ងៃព្រហស្បតិ៍នេះថា គ្រោះទឹកជំនន់ នៅភាគកណ្តាលប្រទេស បានសម្លាប់មនុស្សយ៉ាងហោច ចំនួន៥នាក់ ព្រមទាំងបង្កការខូចខាតចំពោះលំនៅដ្ឋានរាប់រយខ្នង និងបំផ្លិចបំផ្លាញផលដំណាំជាច្រើន បន្ទាប់ពីព្យុះត្រូពិក Trami បាននាំមកនូវភ្លៀងធ្លាក់ខ្លាំង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ ព្យុះ Trami បានបោកបក់លើភាគកណ្តាលប្រទេសវៀតណាម កាលពីថ្ងៃអាទិត្យចុងសប្តាហ៍មុន បន្ទាប់ពីវាបានវាយប្រហារហ្វីលីពីន និងផ្តាច់ជីវិតមនុស្សរហូតដល់ជាង១០០នាក់ នៅទីនោះ។ នៅវៀតណាម ព្យុះ Trami បានបង្កឱ្យមានការធ្លាក់ភ្លៀងយ៉ាងខ្លាំងក្លា។ មនុស្ស៥នាក់ត្រូវរាយការណ៍ថាស្លាប់ នៅខេត្ត Quang Binh ខណៈ៥នាក់ផ្សេងទៀតបានរងរបួស។ មិនតែប៉ុណ្ណោះ ផ្ទះសម្បែងជាង៣០០ខ្នង និងផ្ទៃដីដាំដុះដំណាំជិត១,៣០០ហិកតា បានរងការខូចខាត។ គួរបញ្ជាក់ថា វៀតណាមស្ថិតក្នុងចំណោមប្រទេស ងាយរងគ្រោះពីការវាយប្រហារនៃព្យុះត្រូពិក ដែលជារឿយៗបង្កឱ្យមានទឹកជំនន់ និងបំណាក់ដី អំឡុងចន្លោះខែមិថុនា ដល់ខែវិច្ឆិកា ជារៀងរាល់ឆ្នាំ។ កាលពីខែកញ្ញាកន្លងទៅ តំបន់ភាគខាងជើងវៀតណាម ត្រូវបានវាយប្រហារ​ដោយព្យុះទីហ្វុង Yagi ដែលបានផ្តាច់ជីវិតមនុស្សសរុប ៣៤៥នាក់ ហើយបង្កការខាតបង់ សេដ្ឋកិច្ចប្រមាណ៣.៣ពាន់លានដុល្លារ៕ ផ្ដលសិទ្ធិដោយ៖ Fresh News

(តៃប៉ិ)៖ ព្យុះទីហ្វុង Kong-rey ដ៏មានឥទ្ធិពល បានបោកបក់លើឆ្នេរភាគខាតកើត នៃកោះតៃវ៉ាន់ នាថ្ងៃព្រហស្បតិ៍ ទី៣១ ខែតុលានេះ នាំឱ្យមានការផ្អាកដំណើរការមួយថ្ងៃ នៅទូទាំងក្រុង-ស្រុក ដូចជាផ្សារហិរញ្ញវត្ថុ រួមទាំងជើងហោះហើររាប់រយ ផងដែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ រដ្ឋបាលឧតុនិយមតៃវ៉ាន់ បានឱ្យដឹងថា ព្យុះដ៏ធំមិនធ្លាប់មានរយៈពេល ៣០ឆ្នាំ បានបោកបក់លើឆ្នេរសមុទ្រភាគខាងកើត ដែលជាតំបន់ភ្នំ និងមានប្រជាជនតិចតួច នៅចន្លោះស្រុក Taitung និង Hualien ជាមួយនិងខ្យល់បក់បោកខ្លាំង ក៏ដូចជាភ្លៀងធ្លាក់ ស្ទើរគ្រប់ទីកន្លែង។ នៅមួយផ្នែក ព្យុះទីហ្វុង Kong-rey បានចុះខ្សោយឥទ្ធិពលបន្តិច កាលពីពេញយប់ថ្ងៃពុធ ប៉ុន្តែនៅតែមានកម្លាំងខ្លាំង ស្មើនិងព្យុះប្រភេទទី ៤ ដែលមានកម្លាំងជាង ២៥០គីឡូម៉ែត្រក្នុងមួយម៉ោង។ តាមអ្នកព្យាករអាកាសធាតុ លោក Gene Huang បន្ទាប់ពីបោកបក់លើឆ្នេរភាគខាងកើត ព្យុះនេះនឹងឆ្ពោះទៅកាន់ ច្រកសមុទ្រតៃវ៉ាន់ ដោយចុះខ្សោយកម្លាំង។ លោកបានជំរុញឱ្យប្រជាជនស្នាក់នៅក្នុងផ្ទះ ដោយសារតែគ្រោះថ្នាក់ នៃខ្យល់បក់ខ្លាំង។ មានការព្រមាន ពីខ្យល់បក់កម្រិតលើសពី ១៦០គីឡូម៉ែត្រក្នុងមួយម៉ោង នៅក្នុងស្រុកភាគខាងកើតនៃទីក្រុង Taitung […]

(ម៉ាឌ្រីដ)៖ អាជ្ញាធរក្នុងតំបន់ បាននិយាយនៅថ្ងៃពុធ ទី៣១ ខែតុលាថា យ៉ាងហោចណាស់មនុស្សចំនួន ៩៥នាក់បានស្លាប់ ក្នុងគ្រោះទឹកជំនន់ ដែលអាចចាត់ទុកថាបង្កឱ្យមានមនុស្សស្លាប់ច្រើនបំផុត ក្នុងប្រវត្តិសាស្រ្តនៃប្រទេសអេស្ប៉ាញ បន្ទាប់ពីភ្លៀងធ្លាក់យ៉ាងខ្លាំង វាយលុកតំបន់ភាគខាងកើតទីក្រុង Valencia។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ ក្រុមអ្នកឧតុនិយម និយាយថា ភ្លៀងធ្លាក់រយៈពេល ៨ម៉ោងជាប់គ្នាបានមានកើតឡើង នៅផ្នែកខ្លះនៃទីក្រុង Valencia កាលពីថ្ងៃអង្គារ ដោយបណ្តាលឱ្យជន់លិចផ្លូវហាយវ៉េ និងដីចម្ការដាំដុះក្រូចឆ្មារ ប្រហែលពីរភាគបីនៃតម្រូវការ ក្នុងប្រទេសអេស្ប៉ាញ និងជាអ្នកនាំចេញនាំមុខគេលើពិភពលោក។ តាមក្រុមហ៊ុនថាមពល i-DE អតិថិជនប្រហែល ១៥០,០០០នាក់ នៅ Valencia មិនមានអគ្គិសនីប្រើប្រាស់ទេ។ សេវាកម្មសង្រ្គោះបន្ទាន់ នៅតែទទូចឱ្យប្រជាជនចៀសវាង ការធ្វើដំណើរតាមដងផ្លូវ និងស្តាប់សេចក្តីណែនាំបន្ថែមទៀត។ វីដេអូដែលថតដោយសេវាសង្គ្រោះបន្ទាន់ បានបង្ហាញឱ្យឃើញនូវស្ពានបាក់រលំ រថយន្តធុនតូច និងរថយន្តដឹកទំនិញ តំរៀបជួរគ្នានៅលើដងផ្លូវដែលជន់លិចដោយទឹក នៅខាងក្រៅទីក្រុង Valencia។ ក្រុមមន្ត្រីនិយាយថា រថភ្លើងទៅកាន់ទីក្រុងម៉ាឌ្រីដ និងទីក្រុងបាសេឡូណា ត្រូវបានលុបចោលដោយសារតែទឹកជំនន់ ហើយសាលារៀន និងសេវាកម្មសំខាន់ៗផ្សេងទៀតត្រូវបានផ្អាក នៅក្នុងតំបន់ដែលរងគ្រោះខ្លាំង។ រដ្ឋមន្រ្តីការពារជាតិអេស្ប៉ាញ លោកស្រី Margarita Robles […]

(ម៉ាឌ្រីដ)៖ កម្មវិធីប្រកួតបាល់ទាត់នានាក្នុងក្របខណ្ឌលីគ La Liga ជាពិសេសនៅទីក្រុង Valencia នឹងត្រូវបានពន្យារពេល ដោយសារអេស្ប៉ាញជួបគ្រោះធម្មជាតិទឹកជំនន់នាពេលថ្មីៗនេះ។ ពីគេហទំព័រកីឡា BBC បានចេញផ្សាយថា ការប្រកួតជាច្រើនដែលត្រូវបានលើកពេល ក៏មានជំនួបរវាងក្រុមការពារតំណែងជើងឯក Real Madrid ប៉ះម្ចាស់ផ្ទះ Valencia ផងដែរ នារាត្រីថ្ងៃសៅរ៍ចុងសប្តាហ៍នេះ។ កងកម្លាំងប្រមាណជាង ១ពាន់នាក់ត្រូវបានបញ្ជាឱ្យចូលរួមក្នុងប្រតិបត្តិការជួយសង្រ្គោះនេះ ដ្បិតយ៉ាងហោចណាស់មានប្រជាជន ៩៥នាក់បានស្លាប់បាត់បង់ជីវិត ក្រោយពេលរងឥទ្ធិពលភ្លៀងធ្លាក់ខ្លាំងនៅទូទាំងប្រទេសអេស្ប៉ាញ ជាមួយនឹងទីក្រុង Chiva នៅជិត Valencia ក៏ធ្លាប់លិចខ្លាំងជាងគេជាង ១ឆ្នាំមកនេះ នៅពេលភ្លៀងធ្លាក់ខ្លាំងក្នុងរយៈពេល ៨ម៉ោង។ ភ្លាមៗនោះដែរ សហព័ន្ធបាល់ទាត់អេស្ប៉ាញ (RFEF) ក៏បានទទួលសំណើ និងឯកភាពពី La Liga ក្នុងការសុំពន្យារពេលប្រកួតលីគ ជាបណ្តោះអាសន្នសិន សម្រាប់ក្របខណ្ឌទី១ និងទី២ ដែលរងផលប៉ះពាល់ខ្លាំងជាងគេ។ គួរបញ្ជាក់ផងថា ការស្មឹងស្មាធ ១នាទី នឹងត្រូវរៀបចំឡើងនៅគ្រប់មុនការប្រកួតទាំងអស់ សម្រាប់ ២សប្តាហ៍ខាងមុខ ដើម្បីឧទ្ទិសដល់វិញ្ញាណក្ខន្ធដល់អ្នកដែលបានចែកឋានក្នុងគ្រោះធម្មជាតិនេះ៕ ផ្ដល់សិទ្ធិដោយ៖ Fresh News

(ម៉ាឌ្រីដ)៖ ចំនួនមនុស្សស្លាប់បានកើនដល់យ៉ាងហោច ៥១នាក់ បន្ទាប់ពីតំបន់ភាគអាគ្នេយ៍នៃប្រទេសអេស៉្បាញ បានទទួលរងការវាយប្រហារ ដោយសារគ្រោះទឹកជំនន់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី៣០ ខែតុលា ឆ្នាំ២០២៤។ ភ្លៀងធ្លាក់យ៉ាងខ្លាំងក្លា កាលពីថ្ងៃអង្គារសប្តាហ៍នេះ បានបង្កគ្រោះទឹកជំនន់ធ្ងន់ធ្ងរ នៅតំបន់ Valencia ភាគអាគ្នេយ៍ប្រទេសអេស៉្បាញ ដែលជាហេតុបណ្តាលឱ្យទីប្រជុំជន និងផ្លូវថ្នល់ ត្រូវជន់លិចនៅក្រោមផ្ទៃទឹក។ ក្នុងចំណោមអ្នកបាត់បង់ជីវិត រួមមានទាំងកុមារ។ ផ្ទះសម្បែង និងអគារជាច្រើន បានរងការខូចខាត ខណៈរថភ្លើងមួយខ្សែ ដឹកអ្នកដំណើរជិត៣០០នាក់ ក៏បានរអិលធ្លាក់ចេញពីផ្លូវផងដែរ ប៉ុន្តែសំណាងល្អ មិនមានអ្នករងរបួសទេ។ ឧទ្ធម្ភាគចក្រ ត្រូវបានប្រើប្រាស់ ដើម្បីជួយសង្រ្គោះជនរងគ្រោះមួយចំនួន ថែមទៀតផង។ គួរបញ្ជាក់ថា បើតាមការព្យាកររបស់ទីភ្នាក់ងារឧតុនិយមអេស៉្បាញ ព្យុះភ្លៀងទំនងជានឹងបន្ត រហូតដល់ថ្ងៃព្រហស្បតិ៍សប្តាហ៍នេះ។ ក្រុមអ្នកវិទ្យាសាស្រ្ត ធ្លាប់បានព្រមានថា ការកើនឡើងកាន់តែញឹកញាប់ និងកាន់តែធ្ងន់ធ្ងរ នៃបាតុភូតអាកាសធាតុអាក្រក់ៗ ដូចជា​គ្រោះទឹកជំនន់ និងភ្លើងឆេះព្រៃ ជាដើម នៅក្នុងទ្វីបអឺរ៉ុប គឺមានជាប់ពាក់ព័ន្ធជាមួយ ការប្រែប្រួលអាកាសធាតុ ដែលជំរុញដោយ​សកម្មភាពមនុស្ស៕ ផ្ដល់សិទ្ធិដោយ៖ Fresh News

(បរទេស)៖ ក្រុមហ៊ុនបច្ចេកវិទ្យាយក្ស Apple បានបង្កើនប្រតិបត្តិការផលិត និងនាំចេញរបស់ខ្លួនកាន់តែខ្លាំងឡើងនៅក្នុងប្រទេសឥណ្ឌា ដោយថ្មីៗនេះបានរាយការណ៍ពីការនាំចេញ iPhone មានតម្លៃខ្ទង់ ៦ពាន់លានដុល្លារក្នុងរយៈពេលប្រាំមួយចុងក្រោយ គិតត្រឹមខែកញ្ញា ឆ្នាំ២០២៤។ តួរលេខនេះ តំណាងឱ្យការកើនឡើងប្រមាណ មួយភាគបី ពោលគឺ ប្រហែល ៣៣ភាគរយនៃការនាំចេញ បើបៀបធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមការចេញផ្សាយដោយ GSMArena។ ប្រិយមិត្តបា្រកដជាបានជ្រាបរួចមកហើយ ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនបច្ចេកវិទ្យាយក្ស​ Apple បាននឹងកំពុងកាត់បន្ថយការពឹងផ្អែករបស់ខ្លួនលើខ្សែសង្វាក់ផលិតកម្មនៅក្នុងប្រទេសចិន ចំពេលមានភាពតានតឹងផ្នែកភូមិសាស្ត្រនយោបាយ ហើយបានប្តូរទិសដៅទៅផលិតនៅក្នុងប្រទេសឥណ្ឌាជំនួសវិញ។ ផ្អែកតាមរបាយការណ៍ផលិត និងនាំចេញកន្លងមកឃើញថា កំណើន Apple នៅក្នុងប្រទេសឥណ្ឌាហាក់រីកចម្រើនយ៉ាងឆាប់រហ័ស ទាំងនេះក៏ដោយសារតែ ការឧបត្ថម្ភធនក្នុងស្រុក កម្លាំងពលកម្មជំនាញ និងសមត្ថភាពបច្ចេកវិទ្យារបស់ប្រទេសនេះផងដែរ នេះបើតាមការលើកឡើងរបស់សារព័ត៌មាន Bloomberg។ ប្រភពដដែលនេះបានឱ្យដឹងទៀតថា​ ការនាំចេញប្រចាំឆ្នាំ២០២៤ របស់ Apple នឹងកើនឡើងបន្ថែមទៀតឈានដល់ ១០ពាន់លានដុល្លារឯណោះ។ គួរជម្រាបថា ទីផ្សារឥណ្ឌាកំពុងក្លាយជាទីចាប់អារម្មណ៍របស់ក្រុមហ៊ុនផលិតស្មាតហ្វូនធំៗជាច្រើន​ មិនត្រឹមតែប៉ុណ្ណោះក៏ជាទីផ្សារដ៏ធំបំផុតដែលគ្រប់គ្រងដោយម៉ាកយីហោចិនដូចជា Xiaomi, Oppo និង Vivo ខណៈ iPhone មានត្រឹមតែជាង ៧ភាគរយនៃការលក់ស្មាតហ្វូននៅទីនោះ៕ ផ្ដល់សិទ្ធិដោយ៖ […]

(សេអ៊ូល)៖ ដោយផ្អែកលើប្រភពចារកម្មយោធាកូរ៉េខាងត្បូង សមាជិកសភាកូរ៉េខាងត្បូង បាននិយាយនៅថ្ងៃពុធនេះថា កូរ៉េខាងជើង បានផ្លាស់ទីជើងទម្រចល័តមួយគ្រឿង ទៅដាក់នៅកន្លែងកំណត់ បន្ទាប់ពីបានបញ្ចប់ការត្រៀមលក្ខណៈ ដើម្បីបាញ់មីស៉ីលបាលិស្ទីគអន្តរទ្វីប (ICBM) មួយគ្រាប់ ហើយការបាញ់តេស្តនោះ ប្រហែលនឹងប្រព្រឹត្តទៅ ក្នុងខែវិច្ឆិកា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី៣០ ខែតុលា ឆ្នាំ២០២៤។ សមាជិកសភាកូរ៉េខាងត្បូង លោក Lee Seong-kweun បាននិយាយថា ជើងទម្រចល័តមួយគ្រឿង ត្រូវបានដាក់ពង្រាយ​នៅកន្លែងមួយ ដែលទំនងជាសម្រាប់ការបាញ់តេស្តមីស៉ីល ICBM ហើយវាអាចនឹងប្រព្រឹត្តក្បែរៗ ឬចំថ្ងៃបោះឆ្នោតប្រធានាធិបតី ​នៅសហរដ្ឋអាមេរិក នាថ្ងៃទី៥ ខែវិច្ឆិកា។ លោក Lee បានប្រាប់ដូចខាងលើ ទៅកាន់ក្រុមអ្នកសារព័ត៌មាន ក្រោយទទួលបានរបាយការណ៍ពី ទីភ្នាក់ងារចារកម្មការពារជាតិ DIA។ រីឯសមាជិកសភាកូរ៉េខាងត្បូងម្នាក់ទៀត គឺលោក Park Sun-won បាននិយាយថា ទីភ្នាក់ងារ DIA មិនជឿជាក់ថា មីស៉ីលបាលិស្ទីគ ត្រូវបានដំឡើងលើជើងទម្រសម្រាប់បាញ់ នៅឡើយទេ។ គួរបញ្ជាក់ថា កន្លងមក ក្រុមមន្រ្តីកូរ៉េខាងត្បូង […]

(តៃប៉ិ)៖ កោះតៃវ៉ាន់រំពឹងថា ព្យុះទីហ្វុងឈ្មោះ កង្រី នឹងធ្វើដំណើរទៅដល់ នាថ្ងៃព្រហស្បតិ៍សប្តាហ៍នេះ និងបានចេញសារព្រមានជាមុន ឱ្យប្រជាជនបង្កើនការប្រុងប្រយ័ត្ន ចំពោះភ្លៀងធ្លាក់ និងខ្យល់បោកបក់ខ្លាំង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី៣០ ខែតុលា ឆ្នាំ២០២៤។ ព្យុះកង្រី បានកើនឡើងថាមពលដល់កម្រិតជា ព្យុះស៊ូភើទីហ្វុង ជាមួយកម្លាំងខ្យល់បក់អតិបរមា ជិត៣០០គីឡូម៉ែត្រក្នុង១ម៉ោង ហើយត្រូវបានរំពឹងថា នឹងបន្តប្រមូលផ្តុំកម្លាំងថែមទៀត មុនពេលវាទៅដល់តំបន់ Taitung របស់តៃវ៉ាន់។ បើតាមការព្យាករ ព្យុះកង្រី បន្ទាប់មក នឹងឆ្លងកាត់កោះតៃវ៉ាន់ ចូលទៅកាន់ច្រកសមុទ្រតៃវ៉ាន់ ហើយឆ្ពោះទៅរកប្រទេសចិន។ មេដឹកនាំតៃវ៉ាន់ លោក Lai Ching-te បានទទូច​ឱ្យប្រជាជន នៅឱ្យឆ្ងាយពីតំបន់ភ្នំនិងឆ្នេរសមុទ្រ ខណៈក្រសួងការពារជាតិតៃវ៉ាន់ បាននិយាយថា ខ្លួនបានត្រៀម កងកម្លាំងយោធាប្រហែល ៣៦,០០០នាក់ នៅទូទាំងដែនកោះនេះ ដើម្បីឆ្លើយតបផលប៉ះពាល់ ដែលបង្កឡើងដោយព្យុះកង្រី។ គួរបញ្ជាក់ថា កោះតៃវ៉ាន់ តែងរងការវាយប្រហារពីព្យុះទីហ្វុង ជារឿយៗ។ ចុងក្រោយគេ គឺព្យុះទីហ្វុង Krathon ដែលបានសម្លាប់​មនុស្ស៤នាក់ កាលពីដើមខែតុលានេះ […]

(ហ្ស៊េរុយសាឡិម)៖ រដ្ឋមន្ត្រីការពារជាតិអ៉ីស្រាអែល លោក Yoav Gallant កាលថ្ងៃអង្គារ ទី២៩ ខែតុលា បានព្រមានមេដឹកនាំថ្មីរបស់ហេសបូឡា លោក Naim Qassem ថាការតែងតាំង របស់លោកគ្រាន់តែជារឿងបណ្ដោះអាសន្នតែប៉ុណ្ណោះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។ នៅក្នុងការបង្ហោះមួយលើបណ្ដាញទំនាក់ទំនងសង្គម X អមជាមួយរូបភាពលោក Qassem ដែលទើបតែត្រូវបានហេសបូឡាតែងតាំងជាមេដឹកនាំថ្មីរបស់ខ្លួន កាលពីថ្ងៃអង្គារម្សិលមិញ ជំនួសលោក Hassan Nasrallah ដែលត្រូវបានអ៉ីស្រាអែលសម្លាប់កាលពីខែកញ្ញាកន្លងទៅ លោក Gallant បានគូសបញ្ជាក់ដូច្នេះថា «នេះគ្រាន់តែជាការតែងតាំងបណ្ដោះអាសន្ន មិនអាចយូរអង្វែងឡើយ»។ នៅក្នុងសារបង្ហោះជាភាសា Hebrew ដាច់ដោយឡែកមួយទៀត ប្រមុខការពារជាតិអ៉ីស្រាអែលរូបនេះ ក៏បាននិយាយដែរថា «ការរាប់ថយក្រោយបានចាប់ផ្ដើម»។ គួរបញ្ជាក់ថា លោក Gallant ដែលបានធ្វើទស្សនកិច្ចទៅកាន់ទីបញ្ជាការភូមិភាគខាងជើងរបស់អ៉ីស្រាអែល កាលពីថ្ងៃអង្គារដែរនោះ បានអះអាងក្រោយការបង្ហោះសាររបស់លោកថា លោកផ្ទាល់វាយតម្លៃថាឃ្លាំងរ៉ុក្កែតរបស់ហេសបូឡាមួយភាគធំត្រូវបានបំផ្លាញដោយការវាយប្រហាររបស់អ៉ីស្រាអែល៕ ផ្ដល់សិទ្ធិដោយ៖ Fresh News