អ៊ុយក្រែន៖ កាលពីថ្ងៃសុក្រ ទី២៤ ខែកុម្ភៈម្សិលមិញនេះ​ ប្រទេសអ៊ុយក្រែនបានរៀបចំពិធីកាន់ទុក្ខផ្លូវការមួយដើម្បីឧទ្ទិសដល់វិញ្ញាណក្ខន្ធក្រុមទាហ៊ាននិងក្រុមពលរដ្ឋជាច្រើនដែលបានពលីជីវិតក្នុងបុព្វហេតុការពារជាតិមាតុភូមិក្នុងភ្លើងសង្គ្រាមជាមួយនឹងប្រទេសរុស្ស៊ី។ ពិធីកាន់ទុក្ខនេះត្រូវបានរៀបចំឡើងនៅចំថ្ងៃខួបគំរប់មួយឆ្នាំពេញតែម្តងនៃការកើតមានសង្គ្រាម ព្រោះថាកងទ័ពរុស្ស៊ីបានផ្តើមឈ្លានពានចូលក្នុងទឹកដីអ៊ុយក្រែនដំបូងនៅថ្ងៃទី ២៤ ខែកុម្ភៈ ឆ្នាំ២០២២។ បើយោងតាមការចុះផ្សាយរបស់បណ្តាញសារព័ត៌មាន Strait Time បានបញ្ជាក់ថា ពិធីកាន់ទុក្ខផ្លូវការរបស់ប្រទេសអ៊ុយក្រែនត្រូវបានរៀបចំឡើងនៅឯមជ្ឈមណ្ឌល Sophia Square ក្នុងទីក្រុងគៀវ ក្រោមអធិបតីភាពដ៏ខ្ពស់ខ្ពស់របស់លោកប្រធានាធិបតី Volodymyr Zelensky។ ប្រភពខាងលើបានបន្តថា ស្របពេលអ៊ុយក្រែនកំពុងរៀបចំពិធីដ៏ក្រៀមក្រំនេះ សហរដ្ឋអាមេរិកដែលជាខ្នងបង្អែកដ៏សំខាន់របស់អ៊ុយក្រែននោះបានប្រកាសថា នឹងផ្តល់ជំនួយតម្លៃ ២ពាន់លានដុល្លារបន្ថែមទៀតទៅកាន់អ៊ុយក្រែន ខណៈអាមេរិកនៅតែរក្សាពាក្យសន្យាថា នឹងបន្តជួយគាំទ្រអ៊ុយក្រែនរហូតដល់ភ្លើងសង្គ្រាមត្រូវបានបញ្ចប់៕ ផ្តល់សិទ្ធិដោយ៖ ខ្មែរណូត

(បរទេស)៖ ក្រុមហ៊ុនផ្តល់សេវាកម្ម Steaming ដ៏ល្បីរបស់សហរដ្ឋអាមេរិក Netflix កំពុងរៀបចំបើកការិយាល័យនៅក្នុងប្រទេសវៀតណាមបន្ទាប់ពីការចរចារជាច្រើនឆ្នាំជាមួយអាជ្ញាអធរ និងបញ្ចប់ការវាយតម្លៃហានិភ័យ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី២៥ ខែកុម្ភៈ ឆ្នាំ២០២៣។ យោងតាមខ្លឹមសារចេញផ្សាយបានឱ្យដឹងថា Netflix កំពុងស្ថិតក្នុងដំណាក់កាលដំបូងនៃការរៀបចំផែនការសម្រាប់ការបង្កើតការិយាល័យក្នុងស្រុកក្នុងប្រទេសវៀតណាម បន្ទាប់ពីបញ្ចប់ការវាយតម្លៃបានដោយជោគជ័យកាលពីចុងឆ្នាំ២០២២កន្លងទៅ ទៅលើផ្នែកសន្តិសុខ នយោបាយនៃដំណើរប្រតិបត្តិការការិយាល័យនៅក្នុងប្រទេសវៀតណាម និងការដោះស្រាយទិន្នន័យអ្នកប្រើប្រាស់ រួមជាមួយខ្លឹមសារសើបមួយចំនួន។ តាមរយៈការបង្កើតការិយាល័យក្នុងស្រុកនេះនឹងធ្វើឱ្យក្រុមហ៊ុន Netflix ក្លាយជាក្រុមហ៊ុនបច្ចេកវិទ្យាធំដំបូងគេរបស់សហរដ្ឋអាមេរិកដែលមានវត្តមានដោយផ្ទាល់នៅក្នុងប្រទេសអាស៊ីអាគ្នេយ៍។ ជាមួយគ្នានេះ Netflix ត្រូវបានគេរំពឹងថា នឹងអាចទាញយកអ្នកប្រើប្រាស់បានកាន់តែលឿនរហូតដល់ ១០០លាននាក់ឯណោះ ខណៈបច្ចុប្បន្ននេះវៀតណាមកំពុងក្លាយជាទីតាំងដ៏ពេញនិយមបំផុតសម្រាប់ក្រុមហ៊ុនបច្ចេកវិទ្យាធំៗមកពីជុំវិញពិភពលោក។ តែយ៉ាងណាជុំវិញប្រតិបត្តិការរបស់ Netflix នេះនៅមិនទាន់ទទួលបានរបាយការណ៍លម្អិតនៅឡើយនោះទេថា តើត្រូវចំណាយប៉ុន្មានក្នុងការសាងសង់ការិយាល័យ។ បើយោងតាមប្រភពមិនបញ្ចេញឈ្មោះមួយបានឱ្យដឹងថា ការិយាល័យនេះអាចនឹងរួចរាល់នៅចុងឆ្នាំ២០២៣នេះ ប៉ុន្តែ តម្រូវឱ្យមានដំណើរការបទប្បញ្ញត្តិជាមុនសិន ដូច្នេះអាចនឹងត្រូវចំណាយរយៈពេលយូរជាងនេះបន្ថែមទៀត៕ ផ្តល់សិទ្ធិដោយ៖ freshnews

(កៀវ)៖ សភាអ៊ុយក្រែនកាលពីថ្ងៃព្រហស្បតិ៍សប្តាហ៍នេះ បានសម្រេចដាក់ទណ្ឌកម្មដែលមានសុពលភាពសរុប៥០ឆ្នាំ ទៅលើគ្រឹះស្ថានហិរញ្ញវត្ថុនានារបស់​ប្រទេសរុស្ស៉ី រួមមានទាំងធនាគារកណ្តាល ធនាគារពាណិជ្ជទាំងអស់ ក្រុមហ៊ុនវិនិយោគ ក្រុមហ៊ុនធានារ៉ាប់រង ក៏ដូចជាសហគ្រាសជាច្រើនទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី២៤ ខែកុម្ភៈ ឆ្នាំ២០២៣។ លោក អាន់ឌ្រី ពីស្នី (Andriy Pyshniy) អគ្គទេសាភិបាលធនាគារជាតិអ៊ុយក្រែន បាននិយាយដូច្នេះថា «វាគឺជាការរាំងខ្ទប់ទាំងស្រុងលើគ្រឹះស្ថានហិរញ្ញវត្ថុ​នៃសហព័ន្ធរុស្ស៉ី មិនឱ្យចូលមកក្នុងទីផ្សារឬប្រើប្រាស់ទ្រព្យសកម្មនានា នៅក្នុងប្រទេសអ៊ុយក្រែន។ យើងគួរតែធ្វើឱ្យរុស្ស៉ីចុះទន់ខ្សោយ តាមរយៈមធ្យោបាយ​ផ្សេងៗដែលអាចធ្វើបាន។ វិស័យហិរញ្ញវត្ថុនេះហើយ គឺជាប្រភពផ្គត់ផ្គង់យុទ្ធសាស្រ្តសម្រាប់សង្រ្គាមរុស្ស៉ីនៅអ៊ុយក្រែន»។ រដ្ឋមន្រ្តីសេដ្ឋកិច្ចអ៊ុយក្រែន លោកស្រី យូលៀ ស្វីរីដិនកូ (Yulia Svyrydenko) បានអះអាងថា ទណ្ឌកម្មខាងលើនឹងមានឥទ្ធិពលលើធនាគាររាប់រយ រួមទាំង​គ្រឹះស្ថានហិរញ្ញវត្ថុរាប់ម៉ឺន ដែលចុះបញ្ជីនៅក្នុងប្រទេសរុស្ស៉ី។ សម្រាប់ចំណាត់ការទណ្ឌកម្មគឺរួមមាន បម្រាមលើការទូទាត់ហិរញ្ញវត្ថុជាមួយទ្រព្យសកម្មនានា ដែលកាន់កាប់ដោយគ្រឹះស្ថានហិរញ្ញវត្ថុនៃសហព័ន្ធរុស្ស៉ី, បម្រាមលើការបង្កើតទំនាក់ទំនងផ្នែកធុរកិច្ចជាមួយវិស័យហិរញ្ញវត្ថុរុស្ស៉ី និងបម្រាមលើការទូទាត់ផ្នែក​ហិរញ្ញវត្ថុ ក៏ដូចជាការវិនិយោគពាក់ព័ន្ធគ្រឹះស្ថានហិរញ្ញវត្ថុរបស់រុស្ស៉ី។ គួរបញ្ជាក់ថា កន្លងមកនេះ អ៊ុយក្រែនបានដាក់ទណ្ឌកម្មរួចជាស្រេចទៅលើ មន្រ្តីនិងធុរជនរុស្ស៉ីរាប់រយនាក់, ហាមឃាត់បុគ្គលដែលជាប់ទាក់ទងជាមួយរុស្ស៉ី មិនឱ្យកាន់កាប់ដីធ្លី ឬចូលរួមពាក់ព័ន្ធក្នុងការទិញអាជីវកម្មផ្សេងៗរបស់រដ្ឋាភិបាលអ៊ុយក្រែន ក៏ដូចជាហាមឃាត់ស្ថាប័នរដ្ឋរបស់អ៊ុយក្រែនមិនឱ្យទិញទំនិញ​ឬសេវាកម្មមួយចំនួនរបស់រុស្ស៉ី ព្រមទាំងផ្អាកការផ្ទេរបច្ចេកវិទ្យាទៅកាន់បុគ្គល […]

អង្គការសហប្រជាជាតិបានបោះឆ្នោតក្នុងសំឡេងដ៏ច្រើនលើសលុបដើម្បីទាមទារឲ្យរុស្ស៊ីដកកងទ័ពចេញពីប្រទេសអ៊ុយក្រែនជាបន្ទាន់និងដោយគ្មានលក្ខខណ្ឌ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅរសៀលថ្ងៃសុក្រ ទី២៤ ខែកុម្ភៈនេះ។​ គួរកត់សម្គាល់ថា ការបោះឆ្នោតដ៏មានសារៈសំខាន់ខាងលើនេះគឺត្រូវបានធ្វើឡើងស្របពេលដែលភ្លើងសង្គ្រាមរវាងប្រទេសរុស្សីនិងប្រទេសអ៊ុយក្រែនអូសបន្លាយដល់រយៈពេលមួយឆ្នាំពេញតែម្តង។ ប្រភពខាងលើនេះបានបន្តថា ការបោះឆ្នោតរបស់អង្គការសហប្រជាជាតិខាងលើនេះគឺជាការបោះឆ្នោតនៅក្នុងចំណោមប្រទេសជាសមាជិកដែលមានចំនួនសរុប ១៩៣ប្រទេស។ លទ្ធផលនៅក្នុងការបោះឆ្នោតបានបង្ហាញថា​ មានប្រទេសភាគច្រើនបានបោះឆ្នោតគាំទ្រឲ្យរុស្ស៊ីធ្វើការដកទ័ពចេញពីប្រទេសអ៊ុយក្រែន ប្រទេសចំនួន ៧ បានបោះឆ្នោតមិនគាំទ្រ ខណៈប្រទេសចំនួន ៣២ ក្នុងនោះមានទាំងប្រទេសចិន និងប្រទេសឥណ្ឌាផងនោះ បានបោះឆ្នោតអនុប្បវាទ៕ ផ្តល់សិទ្ធិដោយ៖ ខ្មែរណូត

ក្រសួងពាណិជ្ជកម្មថៃ បានចាប់ផ្ដើមយុទ្ធការអំពាវនាវពលរដ្ឋវ័យក្មេងៗ ញ៉ាំបាយឱ្យច្រើនៗ បន្ទាប់ពីការសិក្សាថ្មីៗនេះបានបង្ហាញថា ការប្រើប្រាស់អង្ករនៅក្នុងប្រទេសថៃបានធ្លាក់ចុះ។ លោក Udom Srisomsong អគ្គនាយករងនៃនាយកដ្ឋានពាណិជ្ជកម្មផ្ទៃក្នុង បានមានប្រសាសន៍ថា “ក្នុងឆ្នាំ២០១៨ អត្រានៃការប្រើប្រាស់អង្ករក្នុងចំណោមប្រជាជនថៃ ជាពិសេសក្មេងជំនាន់ក្រោយបានធ្លាក់ចុះពី ១០០ គីឡូក្រាមមក ៧២គីឡូក្រាម សម្រាប់មនុស្សម្នាក់ក្នុងមួយឆ្នាំ”។ ជាមួយគ្នានេះ នៅទីក្រុងបាងកក អត្រានៃការប្រើប្រាស់អង្ករបានធ្លាក់ចុះមកត្រឹមតែ ៥០ គីឡូក្រាមសម្រាប់មនុស្សម្នាក់ក្នុងមួយឆ្នាំ។ ដើម្បីទប់ទល់នឹងបញ្ហា នាយកដ្ឋាន​បានបង្កើតកម្មវិធីមួយឈ្មោះថា “Thai Kids Enjoy Thai Rice” ផ្សព្វផ្សាយនៅតាមសាលារៀនចំនួន ១០ ក្នុងក្រុងបាងកក ព្រម​ទាំង​ទៅ​ផ្សារ Chatuchak និង Ramintra ចុង​សប្តាហ៍។ លោក Somkiat Makkayathorn ប្រធាន​កិត្តិយស​នៃ​សមាគម​សហគ្រិន​អង្ករ​ថៃ​បាន​ថ្លែង​ថា​៖ «​អង្ករ​ថៃ​ត្រូវបានទទួលស្គាល់​ជា​អន្តរជាតិ​»។ លោកបានបន្តថា វាជារឿងសំខាន់សម្រាប់យុវជនជំនាន់ក្រោយក្នុងការទទួលទានអង្ករថៃ ព្រោះមិនត្រឹមតែមានរសជាតិឆ្ងាញ់ប៉ុណ្ណោះទេ ប៉ុន្តែថែមទាំងជួយរក្សាវប្បធម៌អង្ករថៃសម្រាប់មនុស្សជំនាន់ក្រោយផងដែរ៕ ផ្តល់សិទ្ធិដោយ៖ ខ្មែរណូត

(កៀវ)៖ ធនាគារកណ្តាលនៃប្រទេសអ៊ុយក្រែន កាលពីថ្ងៃព្រហស្បតិ៍សប្តាហ៍នេះបានបញ្ចេញក្រដាសប្រាក់២០រីវញៀ (hryvnia) គំរូថ្មី សម្រាប់ឱកាសគម្រប់ខួបមួយឆ្នាំ នៃសង្រ្គាមឈ្លានពានរបស់រុស្ស៉ីនៅក្នុងប្រទេសអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី២៤ ខែកុម្ភៈ ឆ្នាំ២០២៣។ នៅលើក្រដាសប្រាក់អ៊ុយក្រែនគំរូថ្មីនោះ គឺម្ខាងមានបង្ហាញរូបភាពទាហាន៣នាក់ រួមគ្នាលើកទង់ជាតិរបស់អ៊ុយក្រែន ខណៈនៅចំហៀងម្ខាងទៀត គឺរួមមាន​រូបភាពដៃពីរត្រូវបានចងដោយស្កុត ដែលហាក់ចំសំដៅលើការប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន ដែលទីក្រុងកៀវបានចោទប្រកាន់ទៅលើកងកម្លាំងរុស្ស៉ី ប៉ុន្តែទីក្រុងមូស្គូបានចេញមុខបដិសេធ។ នៅថ្ងៃសុក្រនេះគឺត្រូវជាខួបរយៈពេល១ឆ្នាំគត់ គិតចាប់តាំងពីរុស្ស៉ីបានបើកការឈ្លានពានលើអ៊ុយក្រែន កាលពីថ្ងៃទី​២៤ ខែកុម្ភៈ ឆ្នាំ២០២២។ ចាប់តាំងពីពេលនោះមក ធនាគារកណ្តាលអ៊ុយក្រែន បានខិតខំធ្វើការយ៉ាងខ្លាំង ដើម្បីទប់កុំឱ្យសេដ្ឋកិច្ចលិចលង់ ហើយរក្សាស្ថិរភាព។ គួរបញ្ជាក់ថា បើតាមលោក អាន់ឌ្រី ពីស្នី (Andriy Pyshniy) អគ្គទេសាភិបាលធនាគារកណ្តាលអ៊ុយក្រែន ក្រដាសប្រាក់២០រីវញៀគំរូថ្មីខាងលើ នឹងត្រូវដាក់​ឱ្យធ្វើចរាចរណ៍ ក្នុងចំនួន៣០០,០០០សន្លឹក។ ក្រុមមន្រ្តីធនាគារកណ្តាលអ៊ុយក្រែន បានប្រាប់ថា ធនាគារបានចំណាយពេលប្រហែលជា៨ខែ ដើម្បីរចនានិងបោះពុម្ព​​ក្រដាសប្រាក់នេះ ហើយធនាគារក៏គ្រោងរចនានិងផលិតក្រដាសប្រាក់គំរូថ្មីៗទៀត ដើម្បីផ្តល់នូវកំណត់ហេតុនៃទិដ្ឋភាពសង្រ្គាមផងដែរ៕ ផ្តល់សិទ្ធិដោយ៖ freshnews

(វ៉ាស៊ីនតោន)៖ សហរដ្ឋអាមេរិក នឹងបញ្ជូនកញ្ចប់ជំនួយយោធាថ្មីមួយមានទំហំទឹកប្រាក់ ២ពាន់លានដុល្លារសម្រាប់អ៊ុយក្រែន ខណៈសង្រ្គាមឈ្លានពានរបស់រុស្ស៉ីបានឈានចូល គម្រប់ខួបមួយឆ្នាំ នៅថ្ងៃសុក្រនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី២៤ ខែកុម្ភៈ ឆ្នាំ២០២៣។ ការប្រកាសពីផ្ដល់កញ្ចប់ជំនួយយោធាថ្មីខាងលើ ធ្វើឡើងដោយទីប្រឹក្សាសន្តិសុខជាតិសេតវិមាន​ លោក Jake Sullivan នៅក្នុងបទសម្ភាសន៍មួយជាមួយទូរទស្សន៍ CNN។ ថ្លែងនាឱកាសនោះ លោក Jake Sullivan បានគូសបញ្ជាក់ដូច្នេះថា «នៅថ្ងៃនេះ (ថ្ងៃព្រហស្បតិ៍, ម៉ោងនៅវ៉ាស៊ីនតោន) សហរដ្ឋអាមេរិកបានប្រកាសផ្ដល់កញ្ចប់ជំនួយយោធា ថ្មី ទំហំ២ពាន់លានដុល្លារសម្រាប់អ៊ុយក្រែន»។ ប៉ុន្តែ លោក Sullivan មិនបានបញ្ជាក់អ្វីលម្អិតបន្ថែមពីប្រភេទអាវុធដែលស្ថិតនៅក្នុងកញ្ចប់ជំនួយយោធាថ្មីនេះទេ។ គួរបញ្ជាក់ថា សង្រ្គាមអ៊ុយក្រែនបានឈានចូលគម្រប់ខួបមួយឆ្នាំហើយ នៅថ្ងៃទី២៤ ខែកុម្ភៈនេះ ហើយមហាសន្និបាតអង្គការសហប្រជាជាតិក៏បានអនុម័តដំណោះស្រាយ ថ្កោលទោស និងទាមទារឱ្យរុស្ស៉ីដកកងទ័ពចេញពីអ៊ុយក្រែនផងដែរ៕ ផ្តល់សិទ្ធិដោយ៖ freshnews

(ប៊ែកឡាំង)៖ បុគ្គលិកដែលធ្វើការឱ្យគណៈកម្មការអឺរ៉ុប ត្រូវបានបញ្ជាឱ្យលុបចោលកម្មវិធី TikTok ចេញពីទូរស័ព្ទ និងឧបករណ៍របស់ក្រុមហ៊ុនដទៃទៀត។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២៣ ខែកុម្ភៈ ឆ្នាំ២០២៣។ គណៈកម្មការនេះបាននិយាយថា ការធ្វើបែបនេះគឺជាការអនុវត្តវិធានការដើម្បីការពារទិន្នន័យ និងបង្កើនសន្តិសុខតាមអ៊ីនធឺណិត។ កម្មវិធី TikTok ដែលជាកម្មសិទ្ធិរបស់ក្រុមហ៊ុនចិន ByteDance បានប្រឈមមុខនឹងការចោទប្រកាន់ថា បានប្រមូលទិន្នន័យរបស់អ្នកប្រើប្រាស់ ហើយប្រគល់វាទៅរដ្ឋាភិបាលចិន ខណៈដែលក្រុមហ៊ុននេះចេញបដិសេធម្តងជាពីរដងថា កម្មវិធីរបស់ខ្លួនមិនដំណើរការខុសពីប្រព័ន្ធផ្សព្វផ្សាយសង្គមដទៃទៀតនោះទេ។ ការហាមឃាត់នេះក៏មានន័យថា បុគ្គលិកគណៈកម្មការអឺរ៉ុបមិនអាចប្រើប្រាស់ កម្មវិធី TikTok នៅលើឧបករណ៍ផ្ទាល់ខ្លួនផងដែរ។ គណៈកម្មការនេះនិយាយថា ខ្លួនមានបុគ្គលិកអចិន្ត្រៃយ៍ និងជាប់កិច្ចសន្យាប្រមាណ ៣២,០០០នាក់។ វិធានការនេះគឺតម្រូវឲ្យបុគ្គលិករបស់គណៈកម្មារអឺរ៉ុប លុបកម្មវិធី TikTok ពីទូរសព្ទដៃ ឬឧបករណ៍ផ្សេងៗឲ្យបានឆាប់តាមដែលអាចធ្វើបាន និងមិនលើសពីថ្ងៃទី១៥ ខែមីនានោះទេ។ ក្រុមហុន TikTok បាននិយាយថា ការសម្រេចចិត្តរបស់គណៈកម្មាធិការគឺផ្អែកលើការយល់ខុសអំពីវេទិការបស់ខ្លួន៕ ផ្តល់សិទ្ធិដោយ៖ FRESH NEWS

ថៃ៖ ការបញ្ជាទិញអីវ៉ាន់តាមប្រព័ន្ធ Online បានក្លាយជាជម្រើសដ៏ពេញនិយមមួយនាពេលបច្ចុប្បន្ននេះ ត្បិតវាបានផ្តល់ភាពងាយស្រួលយ៉ាងខ្លាំងសម្រាប់អ្នកទិញ និងអាចជួយសន្សំសំចៃពេលវេលាបានច្រើនផងដែរ។ អ្វីដែលជាចំណុចពិសេសមួយនេះទៀតនោះ គឺគេអាចផ្ញើអីវ៉ាន់ដែលបានបញ្ជាទិញរួចហើយនោះទៅកាន់អ្នកណាម្នាក់ផ្សេងទៀតក៏បាន ដោយគ្រាន់តែចំណាយប្រាក់លើសេវាកម្មដឹកបញ្ជូនបន្តិចបន្តួចតែប៉ុណ្ណោះ។ យ៉ាងណាក្តី ពេលខ្លះភាពងាយស្រួលខាងលើនេះ ក៏អាចធ្វើឲ្យម្ចាស់ទំនិញមួយចំនួនក្លាយជាជនរងគ្រោះផងដែរ។ ជាក់ស្តែងយោងតាមការចុះផ្សាយរបស់បណ្តាញសារព័ត៌មាន Strait Time នៅព្រឹកថ្ងៃព្រហស្បតិ៍ ទី២៣ ខែកុម្ភៈនេះបានឲ្យដឹងថា មានអ្នកដឹកបញ្ជូនម្នាក់នៅក្នុងប្រទេសថៃបានស៊ីដាច់ទំនិញរបស់ភ្ញៀវដែលមានតម្លៃជាង ២ពាន់ដុល្លារ និងបានរត់គេចខ្លួនបាត់ដោយសុវត្ថិភាព។ ប្រភពខាងបានបន្តថា ជនរងគ្រោះនៅក្នុងករណីខាងលើនេះ គឺអ្នកនាង Sunitra Boonyaem ដែលបានទិញបាច់ផ្កាអមដោយក្រដាសប្រាក់ចំនួន ៥៣,០០០បាត ប្រមាណជា ១,៥២៩ដុល្លារអាមេរិក សម្រាប់ផ្ញើទៅកាន់មិត្តប្រុសរបស់គាត់ ដើម្បីអបអរនៅក្នុងថ្ងៃបញ្ចប់ការសិក្សាថ្នាក់មហាវិទ្យាល័យ។ អ្នកនាង Sunitra Boonyaem មិនបានប្រាប់មិត្តប្រុសរបស់គាត់ឲ្យបានដឹងរឿងនេះមុនទេ ព្រោះដើម្បីទុកឲ្យមិត្តប្រុសរបស់គាត់មានអារម្មណ៍ភ្ញាក់ផ្អើលពេលបានឃើញបាច់ផ្កា។ យ៉ាងណាក្តី បាច់ផ្កានោះមិនបានទៅដល់ដៃមិត្តប្រុសរបស់ស្រ្តីរងគ្រោះឡើយ តែវាត្រូវបានអ្នកដឹកជញ្ជូនលួចយកទៅបាត់តែម្តង៕ ផ្តល់សិទ្ធិដោយ៖ ខ្មែរណូត

ចិន៖ អាជ្ញាធរចិនសម្រេចបិទសាលារៀនជាច្រើនកន្លែងនៅក្នុងសប្តាហ៍នេះដើម្បីឆ្លើយតបនឹងការរាតត្បាតជាថ្មីម្តងទៀតនៃជំងឺកូវីដ-១៩។ យោងតាមការចុះផ្សាយរបស់បណ្តាញសារព័ត៌មាន Strait Time នៅព្រឹកថ្ងៃព្រហស្បតិ៍ ទី២៣ ខែកុម្ភៈនេះបានបញ្ជាក់ថា សាលារៀនជាច្រើនកន្លែងដែលត្រូវបានបិទទ្វារជាបណ្តោះអាសន្ននោះគឺភាគច្រើនស្ថិតនៅក្នុងខេត្ត Hangzhou ភាគខាងត្បូងនៃ​ប្រទេសចិន ខណៈខេត្តមួយនេះគឺជាខេត្តសេដ្ឋកិច្ចដ៏សំខាន់មួយរបស់ចិនផងដែរ។ ប្រភពខាងលើបានបន្តថា ការរាតត្បាតជំងឺកូវីដ-១៩នៅក្នុងប្រទេសចិននៅពេលនេះគឺបានកើតឡើងនៅក្នុងចំណោមក្មេងតូចៗ ដែលមិនធ្លាប់បានឆ្លងជំងឺកូវីដ-១៩ ពីមុនមកនោះទេ។ យ៉ាងណាក្តី អាជ្ញាធរចិនមិនបានបញ្ជាក់ទេថា មានកុមារប៉ុន្មាននាក់ដែលបានឆ្លងជំងឺកូវីដ-១៩ នោះ ហើយគេក៏មិនបានដឹងដែរថា ក្មេងៗទាំងនោះបានចាក់វ៉ាក់ស៊ាំងរួចហើយឬក៏អត់នោះទេ។ សូមបញ្ជាក់ជូនថា ក្រៅតែពីត្រូវប្រឈមជាមួយនឹងកូវីដ-១៩ គឺនៅក្នុងពេលនេះជំងឺផ្តាសាយបក្សីក៏កំពុងផ្តើមរាតត្បាតនៅក្នុងប្រទេសចិនផងដែរ៕ ផ្តល់សិទ្ធិដោយ៖ ខ្មែរណូត