(ប៉ារីស)៖ ប្រទេសបារាំង នៅថ្ងៃចន្ទសប្ដាហ៍នេះបាននិយាយថាខ្លួននឹងបណ្ដេញមន្ត្រីទូតរុស្ស៊ី ៣៥នាក់ចេញពីប្រទេស ជាផ្នែកមួយនៃការចូលរួម ជាមួយបណ្ដាប្រទេសអឺរ៉ុបដទៃទៀត ឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី៥ ខែមេសា ឆ្នាំ២០២២។ នៅក្នុងសេចក្ដីថ្លែងការណ៍មួយ ក្រសួងការបរទេសបារាំងបានបញ្ជាក់ដូច្នេះថា «បារាំងបានសម្រេចចិត្តនៅល្ងាចនេះ (ថ្ងៃចន្ទ) ថានឹងបណ្ដេញ មន្ត្រីទូតរុស្ស៊ីមួយចំនួនចេញពីប្រទេស ដោយសារតែសកម្មភាពរបស់ពួកគេបានប្រឆាំងនឹងផលប្រយោជន៍សន្តិសុខរបស់យើង»។ ដោយឡែក បើតាមមន្ត្រីមួយរូបនៃក្រសួងការបរទេសបារាំង បានប្រាប់អ្នកសារព័ត៌មានក្នុងលក្ខខណ្ឌមិនបញ្ចេញឈ្មោះថាមន្ត្រីទូតរុស្ស៊ី ៣៥នាក់នឹងត្រូវបាន បណ្ដេញចេញពីប្រទេស។ គួរបញ្ជាក់ថា ការសម្រេចចិត្តខាងលើរបស់បារាំង ធ្វើឡើងជាការបង្ហាញសាមគ្គីភាពជាមួយបណ្ដាប្រទេសអឺរ៉ុបជាច្រើនផ្សេងទៀត ដែលបាន បណ្ដេញមន្ត្រីទូតរុស្ស៊ីចេញពីប្រទេស ចាប់តាំងពីមូស្គូប្រើកម្លាំងយោធាអ៊ុយក្រែនដែលលោកខាងលិចចាត់ទុកថាជាទង្វើឈ្លានពាន កាលពីថ្ងៃទី២៤ ខែកុម្ភៈមក៕ ផ្តល់សិទ្ធិដោយ៖ freshnews

ថៃ ៖​ កាលពីពេលថ្មីៗកន្លងទៅនេះ សមត្ថកិច្ចថៃបានទទួលសេចក្តីរាយការណ៍ពីអ្នកនេសាទថា បានប្រទះឃើញបុរសមិនស្គាល់អត្តសញ្ញាណនៅលើទូកចែវប្រភេទសប់ ដែលមានប្រវែងប្រមាណ២ម៉ែត្រកន្លះ ដោយសង្កេតឃើញនៅលើទូកមានធុងទឹក និងវ៉ាលីសម្រាប់ធ្វើដំណើរ ដោយបានអណ្តែតលើកណ្តាលសមុទ្រតែម្នាក់ឯង។ ហេតុការណ៍នេះស្ថិតនៅទិសខាងលិចនៃកោះ សុីមីឡាន ប្រមាណជា១៤គីឡូម៉ែត្រ រឺឃ្លាតពីច្រាំងនៃខេត្ត ផាងង៉ា ជាង ៨០គីឡូម៉ែត្រ។ ដោយក្រែងថាបុរសខាងលើនឹងជួបគ្រោះថ្នាក់ ពីរលកនិងខ្យល់បក់ខ្លាំងនៅកណ្តាលសមុទ្រ ព្រោះស្ថិតនៅឆ្ងាយពីច្រាំងខ្លាំង ក្រុមសមត្ថកិច្ចក៏បានធ្វើការទាក់ទងទៅកាន់សមត្ថកិច្ចជំនាញធ្វើការចេញដំណើរចូលទៅត្រួចពិនិត្យនៅទីតាំង ដែលបានរាយការណ៍ នៅម៉ោង ១២៖៤៥នាទី ថ្ងៃទី២៣ ខែមីនា ឆ្នាំ២០២២។ ក្រោយពីបានត្រួតពិនិត្យរួចបានដឹងថា បុរសរូបនោះមានឈ្មោះ លោក HO HOANG HUNG អាយុ ៣៧ឆ្នាំ ជនជាតិវៀតណាម សញ្ជាតិវៀតណាម និយាយអង់គ្លេសមិនសូវបាន នៅលើទូកមានមីកញ្ចប់ប្រមាណជា ១០កញ្ចប់ និង ធុងទឹកផឹក នៅសល់ទឹកតែបន្តិច ដោយបុរសជនជាតិវៀតណាម បានថ្លែងប្រាប់សមត្ថកិច្ចថៃថា រូបលោកបានតាំងចិត្តធ្វើដំណើរទៅរកប្រពន្ធនៅឯម៉ុមបៃ ប្រទេសឥណ្ឌា ដែលរូបលោកបានរៀបការកាលពី២ឆ្នាំមុន ប៉ុន្តែត្រូវឃ្លាតឆ្ងាយដោយសារតែកូវីដ-១៩ ដោយបុរសជនជាតិវៀតណាមបានបញ្ជាក់បន្ថែមថា រូបលោកបានហោះពីសៃង៉ននៃប្រទេសវៀតណាម មកចុះចតនៅឯព្រលានយន្តហោះសុវណ្ណាភូមិនៃទីក្រុងបាងកក កាលពីថ្ងៃទី០២ ខែមីនា ឆ្នាំ២០២២ កន្លងមក។ […]

វិទ្យាស្ថានប៉ាស្ទ័រនៃទីក្រុងញ៉ាត្រាង របស់ប្រទេសវៀតណាម កំពុងជ្រើសរើសអ្នកស្ម័គ្រចិត្តចំនួន ៣,០០០ នាក់ ដែលមានអាយុចាប់ពី ១៨ ឆ្នាំឡើងទៅ ដើម្បីធ្វើការសាកល្បងវ៉ាក់សាំងបង្ការជំងឺ COVID-19 បាញ់តាមច្រមុះ។ លោកស្រី Trinh Thi Bich Thuy នាយកមជ្ឈមណ្ឌលបណ្តុះបណ្តាល គ្រប់គ្រងការស្រាវជ្រាវ និងសហប្រតិបត្តិការអន្តរជាតិ ក្រោមវិទ្យាស្ថានប៉ាស្ទ័រ បាននិយាយកាលពីថ្ងៃសុក្រថា ការជ្រើសរើសនឹងមានរយៈពេលរហូតដល់ចុងខែមេសានេះ។ លោកស្រីបាននិយាយថា វ៉ាក់សាំងដែលនឹងត្រូវយកមកសាកល្បងនេះ គឺជាវ៉ាក់សាំងផលិតនៅក្នុងប្រទេសចិន និងផលិតតាមបច្ចេកវិទ្យា viral vector ដែលជាការប្រើកំណែវីរុស អភិវឌ្ឍឱ្យក្លាយជាវ៉ាក់សាំង ដើម្បីផ្តល់ការបញ្ជូនសំខាន់ៗដល់កោសិកាមនុស្ស។ ម្យ៉ាងទៀត អ្នកស្ម័គ្រចិត្តត្រូវតែជាអ្នកដែលមិនធ្លាប់ឆ្លងជំងឺ COVID-19, មិនមានបញ្ហាជំងឺរ៉ាំរ៉ៃ និងមានសុខភាពល្អ ហើយការចាក់វ៉ាក់សាំងបង្ការ COVID-19 ចុងក្រោយបំផុតរបស់ពួកគេ ត្រូវតែរាប់ឱ្យបានយ៉ាងហោចណាស់ ៣ ខែមុន។ អ្នកស្ម័គ្រចិត្តនឹងត្រូវប្រើវ៉ាក់សាំងបាញ់តាមច្រមុះនេះ ឬ អាចជាការដាក់ថ្នាំ placebo ចំនួន ២ដង នៅចន្លោះពេល ១៤ ថ្ងៃពីគ្នា។ ក្រោយមក ពួកគេនឹងត្រូវត្រួតពិនិត្យសុខភាពរយៈពេលពេញមួយឆ្នាំ តាមរយៈការពិនិត្យសុខភាពចំនួន ៤ […]

(សេអ៊ូល)៖ ប្អូនស្រីមេដឹកនាំកូរ៉េខាងជើង លោក គីម ជុងអ៊ុន គឺអ្នកនាង គីម យូជុង (Kim Yo Jong) បាននិយាយថាកូរ៉េខាងជើងប្រឆាំងជាដាច់ខាត នឹងសង្រ្គាម ប៉ុន្តែប្រសិនបើកូរ៉េខាងត្បូងជ្រើសរើសយកការប្រឈមមុខយោធា ឬក៏បើកការវាយប្រហារណាមួយ នោះកងកម្លាំងនុយក្លេអ៊ែរកូរ៉េខាងជើង នឹងបើកការវាយប្រហារឆ្លើយតបវិញភ្លាមៗ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៥ ខែមេសា ឆ្នាំ២០២២។ ការព្រមានខាងលើរបស់អ្នកនាង គីម យូជុង ធ្វើឡើងតាមរយៈការដកស្រង់សម្ដីដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃអង្គារនេះជាមួយ ការសង្កត់ធ្ងន់ថារដ្ឋមន្ត្រីការពារជាតិកូរ៉េខាងត្បូងបានបង្កកំហុសមួយដ៏ធំ នោះគឺការអត្ថាធិប្បាយថ្មីៗនេះពីការវាយប្រហារលើកូរ៉េខាងជើង។ រដ្ឋមន្ត្រីការពារជាតិកូរ៉េខាងត្បូង លោក ស៊ូស វ៉ុក (Suh Wook) កាលពីថ្ងៃសុក្រសប្ដាហ៍មុនបានលើកឡើងថាយោធានៃប្រទេសរបស់លោកមាន សមត្ថភាពវាយប្រហារលើគោលដៅនានានៅក្នុងប្រទេសកូរ៉េខាងជើង។ ការអត្ថាធិប្បាយបែបនេះបានឱ្យកូរ៉េខាងជើងក្ដៅស្លឹកត្រចៀក រហូតដល់ប្អូនលោក គីម ជុងអ៊ុន ចេញមុខព្រមានប្រើអាវុធនុយក្លេអ៊ែរ។ នៅក្នុងសេចក្ដីថ្លែងការណ៍ចេញផ្សាយដោយ KCNA អ្នកនាង គីម យូជុង បានកត់សម្គាល់ថាកូរ៉េខាងជើងប្រឆាំងនឹងសង្រ្គាមដែលនឹងបង្កការបំផ្លិចបំផ្លាញ ដល់ឧបទ្វីបកូរ៉េ ហើយក៏មិនបានចាត់ទុកកូរ៉េខាងត្បូងជាសត្រូវចម្បងនោះដែរ។ ប៉ុន្តែ ប្រសិនបើកូរ៉េខាងត្បូងបើកការវាយប្រហារណាមួយលើ ឬហ៊ាន […]

(វ៉ាសូវី)៖ នាយករដ្ឋមន្រ្តីប៉ូឡូញ លោក ម៉េតទូស ម៉ូរ៉ាវ៉ីកគី (Mateusz Morawiecki) បាននិយាយនៅក្នុងសន្និសីទសារព័ត៌មាន នាថ្ងៃចន្ទនេះថា «អាល្លឺម៉ង់គឺជារនាំងបាំងផ្លូវធំជាងគេ ក្នុងការឆ្ពោះទៅដាក់ទណ្ឌកម្មកាន់តែតឹងរ៉ឹងបន្ថែមទៀតលើរុស្ស៊ី ខណៈប្រទេសហុងគ្រី មិនបានចូលរួមរារាំងទណ្ឌកម្មទាំងនេះឡើយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃចន្ទ ទី៤ ខែមេសា ឆ្នាំ២០២២។ ការអត្ថាធិប្បាយរបស់លោក ម៉ូរ៉ាវ៉ីកគី ធ្វើឡើងបន្ទាប់ពី នាយករដ្ឋមន្រ្តីហុងគ្រី លោក វ៉ីកទ័រ អ័កបាន (Viktor Orban) បានទទួលជ័យជំនះក្នុងការបោះឆ្នោតសកល កាលពីថ្ងៃអាទិត្យ ក្រោយប្រឈមមុខនឹងការរិះគន់ ជុំវិញជំហរមិនសឹងតឹងរ៉ឹងគ្រប់គ្រាន់ ប្រឆាំងនឹងការឈ្លានពានរបស់រុស្ស៉ីលើអ៊ុយក្រែន។ លោក ម៉ូរ៉ាវ៉ីកគី បានលើកឡើងយ៉ាងដូច្នេះថា «ទោះយើងដោះស្រាយជាមួយហុងគ្រី ដោយរបៀបណាក៏ក្តី យើងត្រូវយល់ថា នេះគឺជាជ័យជម្នះលើកទី ៤ហើយ ដូច្នេះយើងត្រូវតែគោរពការបោះឆ្នោតដោយលទ្ធិប្រជាធិបតេយ្យ។ អាល្លឺម៉ង់ទើបជាឧបសគ្គធំជាងគេ ក្នុងការដាក់ទណ្ឌកម្ម រីឯហុងគ្រីមិនមែនជាបញ្ហានោះទេ»។ គួរបញ្ជាក់ថា ប្រទេសអាល្លឺម៉ង់និងហុងគ្រី គឺជាសមាជិករបស់ EU ហើយក៏ជាសមាជិកអង្គការ NATO ផងដែរ។ ខណៈនេះ ក្រុមមេដឹកនាំអឺរ៉ុបមួយចំនួន […]

លោកស្រី Carrie Lam ដែលជាមេដឹកនាំកំពុងកាន់អំណាចរបស់ទីក្រុងហុងកុង បាននិយាយថា លោកស្រីនឹងមិនស្វែងរកអាណត្តិទី២ បន្ថែមទៀតនោះទេ។ រំលឹកដែរថា លោកស្រីគឺជានាយកប្រតិបត្តិរបស់ទីក្រុងហុងកុង នៅពេលដែលការតវ៉ាគាំទ្រលទ្ធិប្រជាធិបតេយ្យដ៏ធំរបស់ទីក្រុងនេះ បាននាំឱ្យប្រទេសចិនចេញច្បាប់សន្តិសុខជាតិយ៉ាងចម្រូងចម្រាស់បំផុត។ លោកស្រី Lam បានប្រាប់អ្នកសារព័ត៌មានថា គាត់សម្រេចចិត្តផ្តោតលើគ្រួសារវិញ ខណៈការ​ប្រកាស​របស់​លោកស្រី ​បានកើត​ឡើង​មួយ​ខែ​មុន​ការ​បោះឆ្នោត​ជ្រើសរើស​មេដឹកនាំ​បន្ទាប់​របស់​ហុងកុង។ រយៈពេលនៃការតែងតាំងបេក្ខភាពនឹងបញ្ចប់នៅថ្ងៃទី១៦ ខែមេសា ខាងមុខនេះ ប៉ុន្តែរហូតមកដល់ពេលនេះ មិនទាន់មានបេក្ខភាពណាមួយនាំមុខគួរឱ្យកត់សម្គាល់នោះទេ។ របាយការណ៍ប្រព័ន្ធផ្សព្វផ្សាយក្នុងស្រុកបានបង្ហាញថា លោក John Lee Ka-chiu ដែលគាំទ្រដោយទីក្រុងប៉េកាំង នឹងឈរឈ្មោះជំនួសលោកស្រី Lam ។ ជម្រាបដែរថា លោក Lee គឺជាមន្ត្រីសន្តិសុខក្នុងអំឡុងពេលការតវ៉ាក្នុងឆ្នាំ២០១៩ ហើយក្រោយមកគាត់ត្រូវបានតែងតាំងជាមន្ត្រីជាន់ខ្ពស់បំផុតទី២ របស់ទីក្រុងនេះ។ នាយកប្រតិបត្តិរបស់ហុងកុង នឹងត្រូវបានជ្រើសរើសដោយគណៈកម្មាធិការបោះឆ្នោត ដែលមានសមាជិក ១,៥០០ នាក់ ដែលភាគច្រើនស្មោះត្រង់នឹងទីក្រុងប៉េកាំង៕ ដោយ៖ ខ្មែរណូត

(កូឡុំបូ)៖ ប្រធានាធិបតីស្រីលង្កា លោក ហ្កោតាបាយ៉ា រ៉ាចាប៉ាកសា (Gotabaya Rajapaksa) នៅថ្ងៃចន្ទនេះ បានអំពាវនាវឱ្យមាន ការចូលរួមជាមួយគ្នាបង្កើតរដ្ឋាភិបាលរួបរួមមួយ ដើម្បីដោះស្រាយវិបត្តិសេដ្ឋកិច្ចដែលប្រទេសកំពុងប្រឈម ស្របពេលដែល គណៈរដ្ឋមន្រ្តីហើយនិងទេសាភិបាលធនាគារកណ្តាល បានដាក់ពាក្យលាលែងពីតំណែង។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃចន្ទ ទី០៤ ខែមេសា ឆ្នាំ២០២២។ ការិយាល័យលោក Rajapaksa បានចេញសេចក្តីថ្លែងការណ៍យ៉ាងដូច្នេះថា «ដោយសារនេះ គឺជាភាពចាំបាច់សម្រាប់ប្រទេសជាតិ វាដល់ពេលហើយដែលយើងត្រូវធ្វើការងារជាមួយគ្នា ដើម្បីប្រជាជនគ្រប់រូបនិងអ្នកជំនាន់ក្រោយ។ លោកប្រធានាធិបតីអញ្ជើញឱ្យ គណបក្សនយោបាយទាំងអស់នៅក្នុងសភា មកចូលរួមក្នុងរដ្ឋាភិបាល ដើម្បីរួមគ្នាស្វែងរកដំណោះស្រាយចំពោះ វិបត្តិដែលប្រទេសកំពុងប្រឈម»។ គួរបញ្ជាក់ថា ស្ថានការណ៍វិវត្តនៅថ្ងៃនេះ កើតមានឡើង បន្ទាប់ពីលោក Rajapaksa បានប្រកាសដាក់ប្រទេសក្នុងភាពអាសន្ន កាលពីថ្ងៃសុក្រសប្តាហ៍កន្លងទៅ ក្រោយប្រជាជនដែលជួបទុក្ខលំបាកខ្លាំង ដោយសារតែវិបត្តិសេដ្ឋកិច្ច បាននាំគ្នាធ្វើបាតុកម្មយ៉ាងកក្រើក៕ ផ្តល់សិទ្ធិដោយ៖ freshnews

ថៃ៖ ក្រសួង​សុខាភិបាល​សាធារណៈថៃ​កាលពី​ថ្ងៃអាទិត្យ ទី៣ ខែមេសា ម្សិលមិញនេះបានចេញមកបញ្ជាក់ប្រាប់ពលរដ្ឋខ្លួនមិនឲ្យមានការព្រួយបារម្ភយ៉ាងខ្លាំងពេកនោះទេចំពោះការរកឃើញមេរោគនៃជំងឺកូវីដ-១៩ បំប្លែងខ្លួនថ្មីប្រភេទ XE។ បើតាមលោក Supakit Sirilak អគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្រ (DMS) បានបញ្ជាក់ថា មេរោគនៃជំងឺកូវីដ-១៩ បំប្លែងខ្លួនថ្មីប្រភេទ XE មិនបានបង្កគ្រោះថ្នាក់ធ្ងន់ធ្ងរដូចមេរោគប្រភេទដែលតាឡើយ ហើយវាជាទម្រង់នៃមេរោគដែលអាជ្ញាធរថៃបានស្គាល់យ៉ាងច្បាស់និងអាចគ្រប់គ្រងលើការរាតត្បាតរបស់វាបានទៀតផង។ ផ្អែកលើការអះអាងខាងលើនេះលោកវេជ្ជបណ្ឌិតរូបនេះបានប្រាប់មិនឲ្យពលរដ្ឋមានការភ័យស្លន់ស្លោរខ្លាំងពេកនោះទេចំពោះវត្តមាននៃមេរោគថ្មីនេះ ពោលគឺគ្រាន់តែចេះប្រុងប្រយ័ត្ននិងការពារខ្លួនតាមការណែនាំរបស់អាជ្ញាធរសុខាភិបាលទៅបានហើយ។ គួរបញ្ជាក់ជូនថា  XE គឺជាមេរោគនៃជំងឺកូវីដ-១៩ ទម្រង់ថ្មីដែលជាការបញ្ចូលគ្នារវាងមេរោគអូមីក្រុងប្រភេទ BA.1  និងប្រភេទ BA.2 ហើយនាពេលកន្លងមកក្រុមអ្នកវិទ្យាសាស្រ្តធ្លាប់បានអះអាងថា មេរោគ XE អាចបង្កគ្រោះថ្នាក់ខ្ពស់ជាងមេរោគអូមីក្រុង BA.2 ១០% ប៉ុណ្ណោះ៕

ស៊ុតសូកូឡាម៉ាក Kinder Surprise ជាច្រើន ត្រូវបានប្រមូលយកមកវិញ នៅក្នុងចក្រភពអង់គ្លេស អៀរឡង់ និងបណ្តាប្រទេសអឺរ៉ុបផ្សេងទៀត ដោយសារតែការផ្ទុះឡើងនៃបាក់តេរី Salmonella ។ ទីភ្នាក់ងារស្ដង់ដារអាហារ (FSA) បាននិយាយថា ខ្លួនកំពុងណែនាំពលរដ្ឋកុំបរិភោគ ផលិតផលមួយចំនួនដែលមានតំណភ្ជាប់សក្តានុពលទៅនឹងបាក់តេរី Salmonella ខណៈក៏មានការរាយការណ៍មួយចំនួន ទាក់ទងនឹងករណីពុលជាមួយនឹងបាត់តេរីមួយនេះ។ ការព្រមាននេះអនុវត្តចំពោះផលិតផលដូចជា ស៊ុតសូកូឡា Kinder Surprise ទម្ងន់ ២០ក្រាម ដែលមានបរិមាណ ១ គ្រាប់ និង Kinder Surprise ទម្ងន់ ២០ក្រាម ដែលមានបរិមាណ ៣ គ្រាប់ ដែលកាលបរិច្ឆេទចន្លោះ ថ្ងៃទី១១ ខែកក្កដា ឆ្នាំ២០២២ និងថ្ងៃទី០៧ ខែតុលា ឆ្នាំ២០២២។ ក្រុមហ៊ុន Ferrero ដែលជាម្ចាស់ម៉ាកយីហោ Kinder បានបញ្ជាក់ថា ដើម្បីបង្កើនការប្រុងប្រយ័ត្នបន្ថែម ខ្លួនបានប្រមូលមកវិញនូវផលិតផលរបស់ខ្លួន ដែលផលិតនៅក្នុងប្រទេសបែលហ្សិក (ដោយសារតែ Kinder Surprise ដែលមានកាលបរិច្ឆេទដូចរៀបរាប់ខាងលើ គឺត្រូវបានផលិតនៅប្រទេសបែលហ្សិក) ហើយថា ខ្លួនមិនទាន់បានទទួលការតវ៉ាណាមួយពីអតិថិជននៅឡើយទេ។ […]

(កូឡុំបូ)៖ គណៈរដ្ឋមន្ត្រីទាំងមូលនៃប្រទេសស្រីលង្កា បានលាលែងចេញពីតំណែងហើយ នៅចំពោះមុខបាតុកម្មតវ៉ាប្រឆាំងនឹងការដោះស្រាយ វិបត្តិសេដ្ឋកិច្ចមិនបានល្អ ពីសំណាក់រដ្ឋាភិបាលរបស់ប្រធានាធិបតី លោក ហ្កូតាបាយ៉ា រ៉ាចាប៉ាស្កា (Gotabaya Rajapaksa)។ នេះបើតាម ការចេញផ្សាយដោយសារព័ត៌មាន BBC នៅថ្ងៃចន្ទ ទី៤ ខែមេសា ឆ្នាំ២០២២។ រដ្ឋមន្ត្រីទាំងអស់ចំនួន ២៦រូប ក្នុងនោះរួមមានទាំងរដ្ឋមន្ត្រីហិរញ្ញវត្ថុ, រដ្ឋមន្ត្រីកសិកម្ម និងរដ្ឋមន្ត្រីកីឡា បានដាក់លិខិតលាលែងពីតំណែង កាលពី ថ្ងៃអាទិត្យចុងសប្ដាហ៍កន្លងទៅនេះ។ ប៉ុន្តែ លោក Gotabaya Rajapaksa និងបងប្រុសរបស់លោក គឺលោកនាយករដ្ឋមន្ត្រី ម៉ាហ៊ីនដា រ៉ាចាប៉ាស្កា (Mahinda Rajapaksa) នៅតែបន្តកាន់តំណែងដដែល ហើយការជ្រើសរើសគណៈរដ្ឋមន្ត្រីថ្មីគ្រោងនឹងធ្វើឡើងនៅថ្ងៃចន្ទដើមសប្ដាហ៍នេះ។ គួរបញ្ជាក់ថា ប្រទេសស្រីលង្កា កំពុងប្រឈមមុខនឹងវិបត្តិសេដ្ឋកិច្ចដ៏ធ្ងន់ធ្ងរ ដោយអាជ្ញាធរត្រូវបង្ខំចិត្តកាត់ផ្ដាច់ចរន្តអគ្គិសនីដល់ទៅ ១៣ម៉ោង ក្នុងមួយថ្ងៃ។ ប្រឈមមុខនឹងស្ថានភាពបែបនេះ ប្រជាជនស្រីលង្កា ជាពិសេសក្នុងរដ្ឋធានីកូឡុំបូ បាននាំគ្នាធ្វើបាតុកម្មតវ៉ាទាមទារឱ្យលោក Gotabaya Rajapaksa ចុះចេញពីតំណែង ខណៈអាជ្ញាធរសម្រេចចិត្តបិទបណ្ដាញទំនាក់ទំនងសង្គម៕ ផ្តល់សិទ្ធិដោយ៖ freshnews