(វ៉ាស៉ីនតោន)៖ អ្នកតំណាងពាណិជ្ជកម្មអាមេរិក លោក Jamieson Greer នឹងរាយការណ៍ជូនគណៈកម្មាធិការហិរញ្ញវត្ថុ នៃព្រឹទ្ធសភាអាមេរិក នាថ្ងៃអង្គារ ទី៨ ខែមេសានេះថា ប្រទេសជិត ៥០ បានស្នើមកកាន់រូបលោក ដើម្បីពិភាក្សាអំពីវិធានការពន្ធគយថ្មី ដែលដាក់ចេញដោយលោកប្រធានាធិបតី ដូណាល់ ត្រាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ លោក Greer បានឱ្យដឹងក្នុងសក្ខីកម្មជាលាយលក្ខណ៍អក្សរដែល Reuters ទទួលបានដូច្នេះថា «ប្រទេសជាច្រើនដូចជា អាហ្សង់ទីន វៀតណាម និងអ៉ីស្រាអែល បានលើកជាយោបល់ថាពួកគេនឹងកាត់បន្ថយអត្រាពន្ធ និងរបាំងមិនមែនពន្ធ។ នេះជាបំណងដែលត្រូវបានស្វាគមន៍»។ លោកបន្ថែមថា «ឱនភាពពាណិជ្ជកម្មដ៏ធំរបស់យើង គឺមានរយៈពេលជាង ៣០ឆ្នាំមកហើយ ដូច្នេះមិនអាចដោះស្រាយចេញ ត្រឹមពេលមួយយប់នោះទេ»។ គួរបញ្ជាក់ថា ការដែលមានប្រទេសចង់មកចរចាអំពីលក្ខខណ្ឌថ្មី ដើម្បីដោះស្រាយអត្រាពន្ធគយ អាចត្រូវបានចាត់ទុកថា ជាសញ្ញាវិជ្ជមានមួយសម្រាប់រដ្ឋបាល លោក ត្រាំ។ កាលពីយប់ថ្ងៃចន្ទសប្តាហ៍នេះ លោក ត្រាំ បានគំរាមដំឡើងពន្ធលើចិន ខណៈដែលសហភាពអឺរ៉ុប កំពុងស្វែងការរួបរួមគ្នាដើម្បីប្រឆាំងនឹងពន្ធគយរបស់ លោក ត្រាំ៕ ផ្ដល់សិទ្ធិដោយ៖ Fresh News

(សេអ៊ូល)៖ រដ្ឋាភិបាលកូរ៉េខាងត្បូង នៅថ្ងៃអង្គារ ទី៨ ខែមេសា បានអនុម័តសម្រេចកំណត់យកថ្ងៃទី៣ ខែមិថុនា ជាកាលបរិច្ឆេទរៀបចំការបោះឆ្នោតជ្រើសរើសប្រធានាធិបតីមុនអាណតិ្ត បន្ទាប់ពីលោក Yoon Suk Yeol ត្រូវបានតុលាការធម្មនុញ្ញទម្លាក់ចេញពីតំណែងកាលពីថ្ងៃទី៤ ខែមេសា ជុំវិញការប្រកាសដាក់ឱ្យប្រើច្បាប់អាជ្ញាសឹក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ គណៈរដ្ឋមន្ត្រីកូរ៉េខាងត្បូងបានអនុម័តកំណត់យកកាលបរិច្ឆេទខាងលើ បន្ទាប់ពីបានពិភាក្សាជាមួយគណៈកម្មការជាតិរៀបចំការបោះឆ្នោត។ លោក Yoon Suk Yeol ត្រូវបានតុលាការធម្មនុញ្ញកូរ៉េខាងត្បូង ទម្លាក់ចេញពីតំណែងពីបទរំលោភបំពានរដ្ឋធម្មនុញ្ញ ពាក់ព័ន្ធនឹងការប្រកាសដាក់ឱ្យប្រើច្បាប់អាជ្ញាសឹករយៈពេលខ្លីកាលពីថ្ងៃទី៣ ខែធ្នូ ឆ្នាំ២០២៤ និងបានដាក់ពង្រាយកងទ័ពក្នុងចេតនាបញ្ឈប់ការបោះឆ្នោត របស់សភាជាតិ ដើម្បីលុបចោលច្បាប់អាជ្ញាសឹករបស់លោក។ នាយករដ្ឋមន្ត្រីកូរ៉េខាងត្បូង និងជាប្រធានាធិបតីស្ដីទី លោក Han Duck-soo ក៏បានប្រកាសពីការកំណត់យកកាលបរិច្ឆេទខាងលើផងដែរ ដោយនិយាយថា «រដ្ឋាភិបាលបានកំណត់យកថ្ងៃទី៣ ខែមិថុនា ជាកាលបរិច្ឆេទរៀបចំការបោះឆ្នោតប្រធានាធិបតីរបស់កូរ៉េខាងត្បូងលើកទី២១»។ លោកបន្តថាថ្ងៃបោះឆ្នោតនេះនឹងត្រូវបានកំណត់ជាថ្ងៃឈប់សម្រាកមួយថ្ងៃ ដើម្បីសម្រួលដល់អ្នកបោះឆ្នោត។ គួរបញ្ជាក់ថា បើតាមស្ទង់មតិមួយរបស់ស្ថាប័ន Gallup ចេញផ្សាយកាលពីថ្ងៃទី៤ ខែមេសា អ្នកដែលត្រូវបានសម្ភាសន៍ ៣៤ភាគរយ បាននិយាយថាពួកគេគាំទ្រឱ្យលោក Lee Jae-myung មកពីគណបក្ស ប្រជាធិបតេយ្យដែលជាបក្សប្រឆាំងធំជាងគេនៅកូរ៉េខាងត្បូង ក្លាយជាប្រធានាធិបតីថ្មី ខណៈ៩ភាគរយគាំទ្រ […]

(វ៉ាស៊ីនតោន)៖ ក្រសួងពាណិជ្ជកម្មចិន នៅថ្ងៃអង្គារ ទី៨ ខែមេសា បានប្ដេជ្ញាតស៊ូប្រយុទ្ធប្រឆាំងនឹងការយកពន្ធគយរបស់សហរដ្ឋអាមេរិក រហូតដល់ទីបញ្ចប់ បន្ទាប់ពីប្រធានាធិបតីអាមេរិក លោក ដូណាល់ ត្រាំ គំរាមយកពន្ធបន្ថែមលើទំនិញនាំចូលពីមហាអំណាចសេដ្ឋកិច្ចលេខ២ នៅលើពិភពលោកមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។ នៅក្នុងសេចក្ដីថ្លែងការណ៍មួយ អ្នកនាំពាក្យក្រសួងពាណិជ្ជកម្មចិន បានគូសបញ្ជាក់ថា «ការគំរាមបង្កើនការយកពន្ធរបស់សហរដ្ឋអាមេរិកប្រឆាំងនឹងចិន គឺជាកំហុសមួយបន្ថែមលើកំហុសមួយ ដែល បានបង្ហាញសារជាថ្មីផងដែរឱ្យគេឃើញពីធម្មជាតិចូលចិត្តសម្លុតគំរាមគេឯងរបស់សហរដ្ឋអាមេរិក។ ប៉ុន្តែ ចិននឹងមិនចុះញ៉មចំពោះការសម្លុតគំរាមបែបនេះនោះទេ ហើយប្រសិនបើសហរដ្ឋអាមេរិក នៅតែបន្តធ្វើតាមដូចការសម្លុតគំរាម នោះចិននឹងតស៊ូប្រយុទ្ធរហូតដល់ទីបញ្ចប់»។ អ្នកនាំពាក្យរូបនេះបន្ថែមថា «ប្រសិនបើសហរដ្ឋអាមេរិកបង្កើនការយកពន្ធ នោះចិននឹងចាត់វិធានការវាយបកយ៉ាងម៉ឺងម៉ាត់ ដើម្បីការពារសិទ្ធិ និងផលប្រយោជន៍របស់ខ្លួន»។ តែទោះជាយ៉ាងក៏ដោយ ក្រសួងពាណិជ្ជកម្មចិននៅតែទទូចថាប៉េកាំងមានបំណងស្វែងរកកិច្ចសន្ទនាជាមួយសហរដ្ឋអាមេរិក ហើយថាគ្មាននរណាម្នាក់ឈ្នះនៅក្នុងសង្រ្គាមពាណិជ្ជកម្មមួយនោះទេ។ គួរបញ្ជាក់ថាប្រតិកម្មរបស់ចិន កើតមានឡើងបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានគំរាមដាក់ពន្ធលើប្រទេសចិន ៥០% បន្ថែមទៀត បើទីក្រុងប៉េកាំងមិនព្រមបោះបង់ពន្ធ សងសឹករបស់ខ្លួនលើការនាំចូលទំនិញរបស់សហរដ្ឋអាមេរិក៕ ផ្ដល់ិសិទ្ធិដោយ៖ Fresh News

(វ៉ាស៊ីនតោន)៖ ប្រធានាធិបតីសហរដ្ឋអាមេរិក លោក ដូណាល់ ត្រាំ គំរាមដាក់ពន្ធលើប្រទេសចិន ៥០% បន្ថែមទៀត បើទីក្រុងប៉េកាំងមិនព្រមបោះបង់ពន្ធសងសឹករបស់ខ្លួនលើការនាំចូលទំនិញរបស់សហរដ្ឋអាមេរិក។ នេះបើយោងតាមការបង្ហោះរបស់លោក ត្រាំ នៅលើបណ្តាញសង្គម Truth Social ចេញផ្សាយដោយសារព័ត៌មាន CNN នាយប់ថ្ងៃទី០៧ ខែមេសា ឆ្នាំ២០២៥៕

(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថា រដ្ឋាភិបាលបរទេសនឹងត្រូវចំណាយលុយច្រើនដើម្បីដកពន្ធគយ ដែលប្រៀបបាននឹងការប្រេីប្រាស់ឱសថដេីម្បីព្យាបាលជំងឺយ៉ាងដូច្នោះដែរ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៧ ខែមេសា ឆ្នាំ ២០២៥។ ស្របពេលភាគហ៊ុននៅអាមេរិកបានដាំក្បាលចុះ និងខាតបង់អស់ជិត ៦ពាន់ពាន់លានដុល្លាររួចហេីយ​ ថ្លែងទៅកាន់អ្នកសារព័ត៌មាននៅលើយន្តហោះ Air Force One លោក ត្រាំ និយាយថាលោកមិនបារម្ភពីការខាតបង់នេះទេ។ លោកគូសបញ្ជាក់ថា «ខ្ញុំមិនចង់ឱ្យមានអ្វីខាតបង់ទេ ប៉ុន្តែពេលខ្លះយេីងត្រូវការថ្នាំដើម្បីព្យាបាលអ្វីមួយ»។ ដោយសំដៅទៅលេីក្តីរំពឹងទុកដែលថាមេដឹកនាំមកពីអឺរ៉ុប និងអាស៉ី នឹងមកស្នេីឱ្យលោកបញ្ចុះពន្ធដែលត្រូវចូលជាធរមានក្នុងសប្តាហ៍នេះ លោក ត្រាំ បន្ថែមថា «ពួកគេកំពុងឆ្ពោះមកកាន់តុចរចា។ គេចង់និយាយ ប៉ុន្តែយេីងអត់ មានអ្វីត្រូវនិយាយទេ លុះត្រាតែគេបង់លុយឱ្យយើងច្រើនៗក្នុងមួយឆ្នាំ»។ គួរបញ្ជាក់ថា វិធានការពន្ធជាសកលរបស់ លោក ត្រាំ បាននិងកំពុងធ្វេីឱ្យសេដ្ឋកិច្ចពិភពលោករង្គោះរង្គើ និងបង្កឱ្យមានការសងសឹកពីចិន ការភ័យខ្លាចនៃសង្គ្រាមពាណិជ្ជកម្ម​ និងការធ្លាក់ចុះនៃសេដ្ឋកិច្ច៕ ផ្ដល់សិទ្ធិដោយ៖ Fresh News

(បរទេស)៖ សារព័ត៌មាន Bloomberg បានរាយការណ៍មកថា ក្រុមហ៊ុន Apple នឹងនៅរក្សាទុក TikTok ដែលគ្រប់គ្រងដោយក្រុមហ៊ុនចិន ByteDance នៅលើ App Store របស់ខ្លួនយ៉ាងហោចណាស់ ៧៥ថ្ងៃទៀត បន្ទាប់ពីទទួលបានការធានាពីអគ្គមេធាវីលោកស្រី Pam Bondi។ នេះបើយោងតាមការចេញផ្សាយដោយ CNBC នៅថ្ងៃទី០៦ ខែមេសា ឆ្នា២០២៥។ ការសម្រេចនេះ កើតឡើងបន្ទាប់ពីប្រធានាធិបតីអាមេរិកលោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិកាលពីថ្ងៃសុក្រសប្តាហ៍មុន ដើម្បីពន្យាពេលកំណត់ការហាមឃាត់ TikTok ជាលើកទីពីរ។ TikTok នឹងត្រូវបានហាមឃាត់នៅក្នុងសហរដ្ឋអាមេរិក លុះត្រាតែក្រុមហ៊ុន ByteDance របស់ចិនព្រមលក់ប្រតិបត្តិការអាមេរិករបស់ខ្លួនក្រោមច្បាប់សន្តិសុខជាតិដែលបានចុះហត្ថលេខាដោយអតីតប្រធានាធិបតីលោក Joe Biden ក្នុងខែមេសា ឆ្នាំ២០២៤។ យោងតាមប្រភពដែលមិនបញ្ចេញឈ្មោះបានឱ្យដឹងថា លោកស្រី Bondi បានសរសេរនៅក្នុងលិខិតមួយទៅកាន់ Apple ថាក្រុមហ៊ុនគួរតែធ្វើសកម្មភាពស្របតាមការពន្យាពេលកំណត់របស់ ត្រាំ ហើយថា វាមិនត្រូវបានពិន័យសម្រាប់ការធ្វើជាម្ចាស់ផ្ទះវេទិកានោះទេ។ យ៉ាងណា ជុំវិញរបាយការណ៍នេះ Apple មិនមានការឆ្លើយតបនឹងសំណើសុំការអត្ថាធិប្បាយអនុញ្ញាតឱ្យ TikTok បន្តនៅលើ App […]

(សេអ៊ូល)៖ គណៈរដ្ឋមន្ត្រីរបស់កូរ៉េខាងត្បូងត្រូវបានរំពឹងថាអាចនឹងកំណត់យកថ្ងៃទី៣ ខែមិថុនា ជាកាលបរិច្ឆេទសម្រាប់ការរៀបចំការបោះឆ្នោតជ្រើសរើសប្រធានាធិបតីថ្មី បន្ទាប់ពីលោក Yoon Suk Yeol ត្រូវបានតុលាការធម្មនុញ្ញទម្លាក់ចេញពីតំណែងកាលពីសប្ដាហ៍មុន ជុំវិញការប្រកាសដាក់ឱ្យប្រើច្បាប់អាជ្ញាសឹក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ Reuters ដោយផ្អែកលើសេចក្ដីរាយការណ៍របស់ទីភ្នាក់ងារសារព័ត៌មានកូរ៉េខាងត្បូង Yonhap នៅថ្ងៃចន្ទ ទី៧ ខែមេសា បានឱ្យដឹងទៀតថាខណៈការសម្រេចចិត្តខាងលើមិនតម្រូវដោយច្បាប់ ក៏ពិតមែន តែគណៈរដ្ឋមន្ត្រីកូរ៉េខាងត្បូងនឹងធ្វើការសម្រេចចិត្តនៅឯកិច្ចប្រជុំមួយនៅថ្ងៃអង្គារសប្ដាហ៍នេះ ពីព្រោះចាំចាច់ត្រូវកំណត់យកថ្ងៃបោះឆ្នោតជាថ្ងៃឈប់សម្រាក។ លោក Yoon Suk Yeol ត្រូវបានតុលាការធម្មនុញ្ញកូរ៉េខាងត្បូងទម្លាក់ចេញពីតំណែងកាលពីថ្ងៃសុក្រ ទី៤ ខែមេសា ដោយសំអាងថារូបលោកបានបំពានលើច្បាប់រដ្ឋធម្មនុញ្ញតាមរយៈការប្រកាសដាក់ឱ្យ ប្រើច្បាប់អាជ្ញាសឹករយៈពេលខ្លី កាលពីថ្ងៃទី៣ ខែធ្នូ ឆ្នាំ២០២៤។ ក្រោយការទម្លាក់លោក Yoon ចេញពីតំណែង កូរ៉េខាងត្បូងនឹងត្រូវរៀបចំការបោះឆ្នោតជ្រើសរើសប្រធានាធិបតីថ្មី ក្នុងពេល ៦០ថ្ងៃ ឬអាចនៅដើមខែមិថុនាខាងមុខ។ គួរបញ្ជាក់ថា បើតាមមន្ត្រីម្នាក់មកពីគណៈកម្មការរៀបចំការបោះឆ្នោតកូរ៉េខាងត្បូង កាលបរិច្ឆេទរៀបចំការបោះឆ្នោតដែលត្រូវបានរាយការណ៍ដោយប្រព័ន្ធផ្សព្វផ្សាយកូរ៉េខាងត្បូង មិនទាន់ត្រូវកំណត់ យកជាផ្លូវការនៅឡើយទេ ហើយក៏មិនអាចក្លាយជាផ្លូវការនោះដែរ រហូតទាល់តែមានការប្រកាសទទួលស្គាល់ដោយប្រធានាធិបតីស្ដីទី គឺនាយករដ្ឋមន្ត្រី លោក Han Duck-soo ជាមុនសិន៕ ផ្ដល់សិទ្ធិដោយ៖ Fresh News

(ហ្សាកាតា)៖ ប្រទេសឥណ្ឌូនេស៊ី បានប្រកាសនៅថ្ងៃអាទិត្យថា ខ្លួននឹងមិនចាត់វិធានការសងសឹកណាមួយ ដើម្បីឆ្លើយតបទៅនឹងពន្ធពាណិជ្ជកម្ម ៣២% ដែលប្រធានាធិបតីអាមេរិក លោក ដូណាល់ ត្រាំ បានដាក់លើប្រទេសរបស់ខ្លួននោះទេ។ ការប្រកាសនេះគឺជាការឆ្លើយតបជាលើកដំបូងរបស់រដ្ឋាភិបាលឥណ្ឌូនេស៊ីចំពោះការដំឡើងពន្ធសកលរបស់សហរដ្ឋអាមេរិកកាលពីថ្ងៃពុធ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។ រដ្ឋមន្ត្រីក្រសួងសេដ្ឋកិច្ចឥណ្ឌូនេស៊ី លោក Airlangga Hartarto បានបញ្ជាក់នៅក្នុងសេចក្តីថ្លែងការណ៍មួយថា ជំនួសឱ្យការសងសឹក ឥណ្ឌូនេស៊ីនឹងបន្តការទូត និងការចរចាដើម្បីស្វែងរកដំណោះស្រាយដ៏ល្អបំផុតដែលអាចផ្តល់ផលប្រយោជន៍ទៅវិញទៅមកសម្រាប់ភាគីទាំងពីរ។ លោក Airlangga បានពន្យល់ថា វិធីសាស្រ្តនេះត្រូវបានជ្រើសរើសដោយសារតែការពិចារណាលើផលប្រយោជន៍រយៈពេលវែងនៃទំនាក់ទំនងពាណិជ្ជកម្មទ្វេភាគី ក៏ដូចជាការប្តេជ្ញាចិត្តក្នុងការរក្សាបរិយាកាសវិនិយោគអំណោយផល និងស្ថិរភាពសេដ្ឋកិច្ចជាតិ។ លោកបានបន្ថែមទៀតថា រដ្ឋាភិបាលឥណ្ឌូនេស៊ីនឹងផ្តល់ការគាំទ្រដល់វិស័យដែលអាចរងផលប៉ះពាល់ដោយសារពន្ធថ្មីនេះ ដូចជាឧស្សាហកម្មសម្លៀកបំពាក់ និងស្បែកជើងជាដើម។ លោក Airlangga ក៏បាននិយាយផងដែរថា រដ្ឋាភិបាលឥណ្ឌូនេស៊ីគ្រោងនឹងប្រមូលធាតុចូលពីផ្នែកធុរកិច្ចនានានៅថ្ងៃចន្ទ ដើម្បីជួយរៀបចំយុទ្ធសាស្ត្រជាក់លាក់សម្រាប់ដោះស្រាយបញ្ហាពន្ធរបស់សហរដ្ឋអាមេរិក។ លើសពីនេះ ឥណ្ឌូនេស៊ីក៏នឹងស្វែងរកមធ្យោបាយដើម្បីពង្រីកពាណិជ្ជកម្មជាមួយបណ្តាប្រទេសនៅទ្វីបអឺរ៉ុប​ ជាជម្រើសមួយក្រៅពីសហរដ្ឋអាមេរិក និងចិន។ គួរបញ្ជាក់ថា កាលពីឆ្នាំមុន ឥណ្ឌូនេស៊ីបានកត់ត្រាអតិរេកពាណិជ្ជកម្មចំនួន ១៦,៨ ពាន់លានដុល្លារជាមួយសហរដ្ឋអាមេរិក ដែលជាទីផ្សារនាំចេញធំទី ៣ របស់ខ្លួន ដោយមានទំហំនៃការនាំចេញសរុបចំនួន ២៦,៣ ពាន់លានដុល្លារក្នុងឆ្នាំ ២០២៤។ ទំនិញសំខាន់ៗដែលឥណ្ឌូនេស៊ីនាំចេញទៅអាមេរិករួមមាន គ្រឿងអេឡិចត្រូនិក សម្លៀកបំពាក់ […]

(ញូវដែលី)៖ មន្ត្រីរដ្ឋាភិបាលឥណ្ឌាម្នាក់បាននិយាយថា ប្រទេសឥណ្ឌាមិនមានគម្រោងសងសឹកប្រឆាំងនឹងពន្ធ ២៦% របស់ប្រធានាធិបតីអាមេរិក លោក ដូណាល់ ត្រាំ លើការនាំចូលពីប្រទេសអាស៊ីមួយនេះទេ ដោយលើកឡើងពីការពិភាក្សាដែលកំពុងបន្តសម្រាប់កិច្ចព្រមព្រៀងរវាងប្រទេសទាំងពីរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី៦ ខែមេសា ឆ្នាំ ២០២៥។ មន្ត្រីដែលសុំមិនបញ្ចេញឈ្មោះបាននិយាយថា រដ្ឋបាលរបស់នាយករដ្ឋមន្ត្រី Narendra Modi បានពិនិត្យមើលឃ្លាមួយ នៃបទបញ្ជាពន្ធរបស់លោក ត្រាំ ដែលផ្តល់នូវការបន្ធូរបន្ថយដែលអាចកើតមានសម្រាប់ដៃគូពាណិជ្ជកម្មដែល «ចាត់វិធានការសំខាន់ៗដើម្បីដោះស្រាយពាណិជ្ជកម្មដែលមិនមានភាពស៊ីសង្វាក់គ្នាទៅវិញទៅមក»។ គួរបញ្ជាក់ថា ឥណ្ឌាមើលឃើញអត្ថប្រយោជន៍ ក្នុងការចរចាលើកិច្ចព្រមព្រៀងពាណិជ្ជកម្មជាមួយអាមេរិកមុន ប្រទេសអាស៊ីផ្សេងទៀតដូចជា ចិន វៀតណាម និងឥណ្ឌូនេស៊ី ដែលត្រូវបានអាមេរិកដំឡើងពន្ធខ្ពស់រួចទៅហើយ។ ការសម្រេចចិត្តរបស់ឥណ្ឌាមិនដាក់ពន្ធសងសឹកនេះ​ ធ្វើឡើងស្របពេលដែលប្រទេសផ្សេងទៀតដូចជាសហភាពអឺរ៉ុបកំពុងរៀបចំដាក់ពន្ធបន្ថែមលើទំនិញអាមេរិក។ ឥណ្ឌា និងអាមេរិកបានព្រមព្រៀងគ្នាកាលពីខែកុម្ភៈ ក្នុងការបញ្ចប់កិច្ចព្រមព្រៀងពាណិជ្ជកម្មដំបូងនៅរដូវស្លឹកឈើជ្រុះឆ្នាំ ២០២៥ ដើម្បីដោះស្រាយបញ្ហាពន្ធគយ៕ ផ្ដល់សិទ្ធិដោយ៖ Fresh News

(អឺរ៉ុប)៖ កាលពីថ្ងៃសៅរ៍ ទី៥ ខែមេសា ក្រៅពីការធ្វើបាតុកម្មតវ៉ាទ្រង់ទ្រាយធំនៅសហរដ្ឋអាមេរិកផ្ទាល់ សំដៅប្រឆាំងគោលនយោបាយ​របស់ប្រធានាធិបតី លោក ដូណាល់ ត្រាំ នៅតាមទីក្រុងនានារបស់អឺរ៉ុប ក៏មានសកម្មភាពតវ៉ាដូចគ្នាដែរ ប្រឆាំងនឹងលោក ត្រាំ ព្រមទាំងទីប្រឹក្សាជំនិតរបស់លោក គឺមហាសេដ្ឋីអាមេរិក លោក Elon Musk បន្ទាប់ពីទីផ្សារហិរញ្ញវត្ថុអន្តរជាតិ បានរងភាពរង្គោះរង្គើជាខ្លាំង ក្រោយលោក ត្រាំ ប្រកាសវិធានការយកពន្ធគយជាសកលដ៏ចម្រូងចម្រាស។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ មនុស្សរាប់រយនាក់ ដែលភាគច្រើនជាពលរដ្ឋអាមេរិករស់នៅក្រៅប្រទេស និងគាំទ្រគណបក្សប្រជាធិបតេយ្យ បាននាំគ្នាប្រមូលផ្តុំ នៅតាមទីក្រុងធំៗរបស់អឺរ៉ុប រួមមានដូចជា Frankfurt និង Berlin នៃប្រទេសអាល្លឺម៉ង់, Paris នៃប្រទេសបារាំង, London នៃចក្រភពអង់គ្លេស និង Lisbon នៃប្រទេសព័រទុយហ្កាល់ ក្នុងចំណោមទីក្រុងផ្សេងៗទៀត។ ក្រុមអ្នកតវ៉ាបានទាមទារឱ្យ លោក ត្រាំ ដែលមកពីគណបក្សសាធារណរដ្ឋ ចុះចេញពីតំណែង, ប្រឆាំងជនប្រើអំណាចផ្តាច់ការ, គោរពនីតិរដ្ឋ, ស្រោចស្រង់ប្រជាធិបតេយ្យឡើងវិញ និងបិទបញ្ចប់​ភាពវឹកវរ នៅសហរដ្ឋអាមេរិក។ សម្រាប់នៅទីក្រុង Berlin […]