(ភ្នំពេញ)៖ អ្នកនាំពាក្យអគ្គស្នងការដ្ឋាននគរបាលជាតិ នៅថ្ងៃទី២០ ខែវិច្ឆិកា ឆ្នាំ២០២៥នេះ បានចេញមកទាត់ចោលទាំងស្រុងចំពោះវីដេអូមួយ ដែលបង្ហាញពីសកម្មភាពសមត្ថកិច្ច បានបំពានលើរូបរាងកាយស្រ្តីជាជនសង្ស័យ ក្នុងករណីរំដោះអ្នកទោសចេញពីសាលាដំបូងខេត្តស្វាយរៀង។ អ្នកនាំពាក្យអគ្គស្នងការដ្ឋាននគរបាលជាតិ បានអះអាងថា ផ្អែកតាមការពិនិត្យ និងស្រាវជ្រាវ សមត្ថកិច្ចរកឃើញថា សកម្មភាពនេះ ជាវីដេអូក្លែងក្លាយ បង្កើតឡើងបច្ចេកវិទ្យាបញ្ញាសប្បនិម្មិត (AI) ដែលបង្កើតឡើងដោយប្រទេសជិតខាង ក្នុងចេតនាញុះញង់ វាយប្រហាររាជរដ្ឋាភិបាល និងកិត្តិយសនគរបាលជាតិកម្ពុជា។ ក្នុងន័យនេះ អគ្គស្នងការដ្ឋាននគរបាលជាតិ សូមអំពាវនាវដល់សាធារណជន និងអ្នកប្រើប្រាស់បណ្តាញសង្គម បញ្ឈប់ការចែកចាយវីដេអូខាងលើនេះ ចៀសវាងនាំឲ្យមានការភាន់ច្រឡំ ដែលធ្វើឲ្យប៉ះពាល់កិត្តិយសនគរបាលជាតិកម្ពុជា។ អគ្គស្នងការដ្ឋាននគរបាលជាតិ នឹងចាត់វិធានការផ្លូវច្បាប់ ចំពោះបុគ្គលដែលបន្តការចែកចាយវីដេអូក្លែងក្លាយនេះ៕ ផ្ដល់សិទ្ធិដោយ៖ Fresh News

(ភ្នំំពេញ)៖ ការបង់ពន្ធលើមធ្យោបាយដឹកជញ្ជូនឆ្នាំ២០២៥ នឹងត្រូវបិទបញ្ចប់ នៅថ្ងៃទី៣០ ខែវិច្ឆិកា ឆ្នាំ២០២៥ ខាងមុខនេះ ពោលគឺនៅសល់ពេលតែ១០ថ្ងៃទៀតប៉ុណ្ណោះ។ កាលពីថ្ងៃទី១៧ ខែវិច្ឆិកា ឆ្នាំ២០២៥ អគ្គនាយកដ្ឋានពន្ធដារ បានចេញសេចក្តីជូនដំណឹង ក្រើនរំលឹកជាលើកទី២ ដល់ម្ចាស់យានយន្តទាំងអស់ពីការពន្ធលើមធ្យោបាយដឹកជញ្ជូន ឱ្យទាន់ពេលវេលា។ បើតាមអគ្គនាយកដ្ឋានពន្ធដារ រហូតមកទល់ពេលនេះ ម្ចាស់យានយន្តមួយចំនួន បានប្រកាសបង់ពន្ធរួចរាល់ ខណៈដែលម្ចាស់យានយន្តមួយចំនួនទៀត នៅមិនទាន់បានបង់ពន្ធប្រភេទនេះនៅឡើយ។ ក្នុងន័យនេះ អគ្គនាយដ្ឋានពន្ធដារ សូមក្រើនរំលឹកដល់ម្ចាស់យានយន្តទាំងអស់ ដែលមិនទាន់បានបំពេញកាតព្វកិច្ចបង់ពន្ធ មេត្តារួសរាន់អញ្ជើញមក បង់ពន្ធឱ្យបានទាន់ពេលវេលាត្រឹមថ្ងៃទី៣០ ខែវិច្ឆិកា ឆ្នាំ២០២៥ នៅអគ្គនាយកដ្ឋានពន្ធដារ ឬនៅសាខាពន្ធដារខេត្ត ខណ្ឌ ឬនៅធនាគារដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ។ ម្ចាស់យានយន្តក៏អាច បង់តាមរយៈកម្មវិធី GDT Taxpayer App ដែលអាចទាញយកចេញពី App Store ចំពោះ iOS ឬ Play Store ចំពោះ Android សម្រាប់យានយន្តដែលធ្លាប់បានប្រកាសបង់ពន្ធលើមធ្យោបាយដឹកជញ្ជូនកន្លងមក។ ដោយឡែក យានយន្តដែលជាកម្មសិទ្ធិរបស់ស្ថានទូត ឬស្ថានកុងស៊ុលបរទេស អង្គការអន្តរជាតិ ឬ […]

(ភ្នំពេញ)៖ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ រួមជាមួយលោក វ៉ាង វិនពីង ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិនប្រចាំនៅកម្ពុជា​ នៅថ្ងៃទី១៩ ខែវិច្ឆិកា ឆ្នាំ២០២៥​ បានអញ្ជេីញ​ចូលរួម​កម្មវិធី​តាំងពិព័រណ៍មិនអចិន្ត្រៃយ៍​ «ចំណងប្រវត្តិសាស្ត្រ៖ ទំនាក់ទំនងខ្មែរចិនតាមរយៈវប្បធម៌និងសិល្បៈ»​ នៅ​សារមន្ទីរ​ជាតិ​កម្ពុជា​។ បើតាមការផ្សាយរបស់ក្រសួងវប្បធម៌ ការតាំងពិព័រណ៍មិនអចិន្រៃ្តយ៍នេះ ធ្វើឡើងតាមរយៈកិច្ចសហការរៀបចំរវាងនាយកដ្ឋានសារមន្ទីរជាមួយបណ្ឌិតសភាបេតិកភណ្ឌចិន ដោយមានការចូលរួមពីក្រុមការងាររដ្ឋាភិបាលចិន-កម្ពុជាដើម្បីថែរក្សារមណីយដ្ឋានអង្គរ អាជ្ញាធរជាតិអប្សរា អាជ្ញាធរជាតិព្រះវិហារ ក្រុមការងារស្រាវជ្រាវព្រះខ័នកំពង់ស្វាយ (ដឹកនាំដោយសាស្រ្ដាចារ្យ Mitch Hendrickson) ដោយមានការគាំទ្រពីក្រសួងវប្បធម៌និងវិចិត្រសិល្បៈ និងស្ថានទូតសាធារណរដ្ឋប្រជាមានិតចិនប្រចាំនៅកម្ពុជា។ គោលបំណងនៃការរៀបចំពិព័រណ៍នេះ គឺដើម្បីបង្ហាញពីវត្តមាននៃវត្ថុសិល្បៈ បច្ចេកទេសនានា និងផ្នត់គំនិតផ្សេងៗរបស់ទំនៀមទម្លាប់ប្រពៃណីជនជាតិចិននៅក្នុងសង្គមខ្មែរ និងឆ្លុះបញ្ចាំងអំពីការយល់ឃើញរបស់ប្រជាជនខ្មែរចំពោះប្រជាជនចិន។ ពិព័រណ៍នេះ ក៏នឹងបង្ហាញពីទំនាក់ទាក់ទងផ្នែកវប្បធម៌រវាងប្រជាជនទាំងពីរ ដែលបន្តឥតដាច់តាំងពីសម័យបុរាណរហូតមកដល់ពេលបច្ចុប្បន្នតាមរយៈកិច្ចសហប្រតិបត្តិការក្នុងកិច្ចការគាំពារនិងស្រាវជ្រាវអំពីវប្បធម៌ខ្មែរ៕ ផ្ដល់សិទ្ធិដោយ៖ Fresh News

(ពោធិ៍សាត់)៖ រដ្ឋបាលខេត្តពោធិ៍សាត់ នាថ្ងៃទី២០ ខែវិច្ឆិកា ឆ្នាំ២០២៥នេះ បានចេញសេចក្តីជូនដំណឹង ស្តីពីស្ថានភាពទឹកជំនន់ក្នុងខេត្ត ដែលកំពុងកើនឡើងជាបន្តបន្ទាប់ ក្នុងកម្រិតប្រកាសអាសន្ន។ នេះបើតាមសេចក្តីជូនដំណឹងរដ្ឋបាលខេត្ត ដែលអង្គភាពព័ត៌មាន Fresh News ទើបនឹងទទួលបាន។ ក្នុងសេចក្តីជូនដំណឹង បានសរសេររៀបរាប់ថា រដ្ឋបាលខេត្តពោធិ៍សាត់ សូមជម្រាបជូនដំណឹងដល់សាធារណជនមេត្តាជ្រាបថា ដោយផ្អែកលើស្ថានភាពបច្ចុប្បន្នស្ទឹងពោធិ៍សាត់ មានកម្រិតកម្ពស់ទឹក ៥,៥ម៉ែត្រ និងមានការកើនឡើងជាបន្តបន្ទាប់ ក្នុងកម្រិតប្រកាសអាសន្ន។ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ សូមប្រជាពលរដ្ឋក្នុងខេត្តពោធិ៍សាត់ទាំងអស់ ជាពិសេសបងប្អូនប្រជាពលរដ្ឋ ដែលរស់នៅតាមដងស្ទឹងពោធិ៍សាត់ មេត្តាបង្កើនការប្រុងប្រយ័ត្នខ្ពស់ ដោយណែនាំកូន ចៅតូចៗ កុំឱ្យលេងទឹក និងត្រូវរៀបចំទុកដាក់សម្ភារៈ ឯកសារសំខាន់ៗឱ្យបានត្រឹមត្រូវ។ ទន្ទឹមនឹងនេះ អាជ្ញាធរមូលដ្ឋានគ្រប់លំដាប់ថ្នាក់ កងកម្លាំងប្រដាប់អាវុធ មន្ទីរអង្គភាព ត្រូវយកចិត្តទុកដាក់ជួយអន្តរាគមន៍សង្គ្រោះប្រជាពលរដ្ឋឱ្យបានទាន់ពេលវេលា ដោយរកទីទួលសុវត្ថិភាព សម្រាប់ជម្លៀសប្រជាពលរដ្ឋដែលងាយរងគ្រោះ ព្រមទាំងធ្វើការផ្សព្វផ្សាយ ឱ្យប្រជាពលរដ្ឋយកចិត្តទុកដាក់ លើសុខភាពអនាម័យ ដើម្បីជៀសវាងពីជំងឺឆ្លងផ្សេងៗ។ ទទួលបានសេចក្តីជូនដំណឹងនេះ សូមអាជ្ញាធរមូលដ្ឋានគ្រប់លំដាប់ថ្នាក់ កងកម្លាំងប្រដាប់អាវុធ មន្ទីរអង្គភាព និងសាធារណជន មេត្តាជ្រាប និងចូលរួមអនុវត្តប្រកបដោយការទទួលខុសត្រូវ៕ ផ្ដល់សិទ្ធិដោយ៖ Fresh News

(កំពង់ធំ)៖ រថយន្ដក្រុងដឹកអ្នកដំណើរពេលយប់មួយគ្រឿង ផ្ទុកមនុស្ស៣៧នាក់ បានក្រឡាប់ធ្លាក់ចូលទឹកនៅវេលាម៉ោង៣ទាបភ្លឺ ថ្ងៃទី២០ ខែវិច្ឆិកា ឆ្នាំ២០២៥ ចំណុចស្ពានអូរប្រសាទ ភូមិជ័យជំនះ ឃុំកកោះ ស្រុកសន្ទុក ខេត្តកំពង់ធំ។ ស្នងការនគរបាលខេត្តកំពង់ធំ លោកឧត្តមសេនីយ៍ទោ ហេង សុផល បានប្រាប់បណ្ដាញព័ត៌មាន Fresh News ឲ្យដឹងថា មកទល់ព្រឹកនេះ សមត្ថកិច្ចបានស្ទួចយកឡានចេញពីទឹក និងរកឃើញមនុស្សស្លាប់ចំនួន១៣នាក់ ស្រី៨នាក់ និងអ្នករបួស២៤នាក់។ ផ្អែកតាមការសន្និដ្ឋានរបស់សមត្ថកិច្ចជំហ៊ានដំបូង គ្រោះថ្នាក់ចរាចរណ៍នេះបណ្ដាលមកពីអ្នកបើកស្ថិតក្នុងស្ថានភាពងងុយដេក។ ដោយឡែក សាកសពក្រោយស្រង់ពីទឹកសមត្ថកិច្ចបានយកទៅតម្កល់នៅវត្តកកោះ ឃុំកកោះ ស្រុកសន្ទុក ដើម្បីស្រាវជ្រាវរកអត្តសញ្ញាណ និងក្រុមគ្រួសារ៕ ផ្ដល់សិទ្ធិដោយ៖ Fresh News

(ពោធិ៍សាត់)៖ ស្ថានភាពជំនន់ទឹកភ្លៀងតាមដងស្ទឹងពោធិ៍សាត់ ដែលសម្រុកបុកពីក្បាលស្ទឹងទាំងបី នៅប៉ែកខាងលើ នៃស្រុកភ្នំក្រវាញ និងស្រុកវាលវែង រួមមានស្ទឹងអារ៉ៃ ស្ទឹងព្រៃខ្លុង និងស្ទឹងពោធិ៍សាត់ បាននឹងកំពុងដាក់សម្ពាធ នៅក្រុងពោធិ៍សាត់ និងស្រុកកណ្តៀង ពិសេសចំណុចព្រៃញី ក្បាលហុង និងលលកស។ ជាក់ស្តែងនាវេលាម៉ោង ០២ និង៤៥នាទីទៀបភ្លឺ ឈានចូលថ្ងៃទី២០ ខែវិច្ឆិកា ឆ្នាំ២០២៥នេះ ក្រោមការយកចិត្តទុកដាក់ខ្ពស់, លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានចុះអន្តរាគមន៍ជួយទប់ទឹក និងជម្លៀសប្រជាពលរដ្ឋដែលប្រឈមខ្លាំង ឱ្យមកកាន់ទីទួលសុវត្ថិភាព។ ជុំវិញគ្រោះធម្មជាតិ ជំនន់ទឹកភ្លៀងនេះ លោកអភិបាលខេត្ត បានបញ្ជាក់អំពីស្ថានភាពទឹក អាចបន្តជន់លិចចន្លោះពី២ថ្ងៃ និងអាចបែកវាលស្រកចុះទៅវិញជាបន្តបន្ទាប់ ប្រសិនបើស្ថានភាពក្បាលស្ទឹងធំទាំងបី នៅប៉ែកខាងលើ គ្មានភ្លៀងធ្លាក់។ ក្នុងឱកាសនោះ លោកក៏បានអំពាវនាវដល់បងប្អូនពុកម៉ែប្រជាពលរដ្ឋ ដែលរស់នៅតាមដងស្ទឹង ជាពិសេសនៅស្រុកកណ្តៀង និងក្រុងពោធិ៍សាត់ សូមមេត្តាប្រុងប្រយ័ត្នខ្ពស់ និងយកចិត្តទុកដាក់គ្រប់គ្រងកូនចៅ ទ្រព្យសម្បត្តិមានតម្លៃ ក៏ដូចជាសត្វពាហនៈ ដែលអាចបង្កគ្រោះថ្នាក់ ឬបាត់បង់ជាយថាហេតុ។ ជាមួយគ្នានោះ អាជ្ញាធរខេត្តបានត្រៀមទីទួលសុវត្ថិភាព សម្រាប់ជម្លៀសប្រជាពលរដ្ឋ នៅទីស្នាក់ការគណបក្សខេត្ត ស្ថិតក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ផងដែរ៕ […]

(BELEM, ប្រេស៉ីល)៖ មន្រ្តីរដ្ឋាភិបាលទីក្រុងកៀវបានប្រាប់ Reuters ថាអ៊ុយក្រែនគ្រោងទាមទារសំណងចំនួន ៤៤ពាន់លានដុល្លារពីរុស្ស៉ី សម្រាប់ការបំផ្លិចបំផ្លាញទាក់ទងនឹងការបំភាយឧស្ម័ន អំឡុងពេលនៃសង្រ្គាមដែលកំពុងបន្ត។ នេះបើយោងតាមការចេញផ្សាយនៅថ្ងៃពុធ ទី១៩ ខែវិច្ឆិកា ឆ្នាំ ២០២៥។ លោក Pavlo Kartashov អនុរដ្ឋមន្ត្រីក្រសួងសេដ្ឋកិច្ច បរិស្ថាន និងកសិកម្មអ៊ុយក្រែន គូសបញ្ជាក់ថា «មានការខូចខាតច្រើន ទៅលើទឹក ដី ព្រៃឈើ»។ នៅខាងក្រៅកិច្ចប្រជុំកំពូលស្តីពីអាកាសធាតុ ក្នុងប្រទេសប្រេស៉ីល លោក Kartashov បាននិយាយទៀតថា «កាបូនឌីអុកស៉ីត និងឧស្ម័នផ្ទះកញ្ចក់ ត្រូវបានបំភាយចេញក្នុងបរិមាណច្រើន»។ តាមអ្នកជំនាញហូឡង់ សង្រ្គាមបានបង្កើតការបញ្ចេញកាបូនឌីអុកស៉ីតបន្ថែមប្រហែល ២៣៧លានតោន ចាប់តាំងពីរុស្ស៉ីចូលឈ្លានពានអ៊ុយក្រែន ក្នុងខែកុម្ភៈ ឆ្នាំ ២០២២ ដែលស្ទើរតែស្មើនឹងការបំភាយប្រចាំឆ្នាំ ចេញពីប្រទេសអៀរឡង់ បែលហ្សិក និងអូទ្រីសរួមបញ្ចូលគ្នា៕ ផ្ដល់សិទ្ធិដោយ៖ Fresh News

(ភ្នំពេញ)៖ លោក កែវ រ៉េមី ទេសរដ្ឋមន្ត្រី ទទួលបន្ទុកបេសកកម្មពិសេស ប្រធានគណៈកម្មាធិការសិទ្ធិមនុស្សកម្ពុជា នៅថ្ងៃទី១៩ ខែវិច្ឆិកា ឆ្នាំ២០២៥នេះ បានឆ្លើយតប និងព្រលះអ្នកនាំពាក្យកងទ័ពជើងគោកថៃលោក Winthai Suvari ជុំវិញបំភ្លឺករណីទាហានថៃ បៀតបៀនផ្លូវភេទលើពលករកម្ពុជា ដោយអះអាងជាព័ត៌មានក្លែងក្លាយ។ ទេសរដ្ឋមន្ត្រី កែវ រ៉េមី បានគូសបញ្ជាក់ថា ការបង្ហាញវត្តមានស្ត្រីរងគ្រោះខ្មែរ ជាសាធារណៈ ចំពោះការរំលោភបូកពីទាហានតិរិច្ឆានឈុតខ្មៅថៃចំនួន ៧នាក់នេះ គឺជាការឈឺចាប់បំផុត និងបានលះបង់កេរ្តិ៍ឈ្មោះយ៉ាងសំខាន់ ដែលចាំបាច់ត្រូវតែប្រាប់ពីការពិតជាសាធារណៈ ដើម្បីទាមទាររកយុត្តិធម៌។ ទេសរដ្ឋមន្ត្រី កែវ រ៉េមី បានឆ្លើយតបយ៉ាងដូច្នេះថា៖ «អ្នកនាំពាក្យទាហានថៃម្នាក់នេះ បានបំភ្លឺករណីទាហានថៃបៀតបៀនផ្លូវភេទលើពលករកម្ពុជា ដោយអះអាងជាព័ត៌មានក្លែងក្លាយ»។ ក្រោយពីអ្នកនាំពាក្យកងទ័ពថៃ ចាត់ទុកថា ករណីយោធាថៃ៧នាក់ ប្រព្រឹត្តិទង្វើសាហាវព្រៃផ្សៃរំលោភបូកមកលើស្ត្រីខ្មែរវ័យ១៨ឆ្នាំថា ជាព័ត៌មានក្លែងក្លាយ ត្រូវបានមេសិទ្ធិមនុស្សកម្ពុជា ចោទសួរទៅអ្នកនាំពាក្យកងទ័ពថា លោកឯងមុននិយាយថា ជាព័ត៌មានមិនពិត ត្រូវស្វែងយល់ពីប្រពៃណីទំនៀមទម្លាប់ និងវប្បធម៌របស់ខ្មែរឱ្យបានច្បាស់ជាមុនសិន។ រឿងស្រ្តីដែលជាជនរងគ្រោះ ដោយការរំលោភសេពសន្ថវៈ គឺជារឿងអាម៉ាស់កេរ្តិ៍ឈ្មោះបំផុតរបស់ស្ត្រី និងរងការអាម៉ាស់បំផុតនៅក្នុងគ្រួសារ។ «ស្រ្តីដែលជាជនរងគ្រោះប៉ះពាល់ នូវផ្លួវចិត្តធំណាស់ ប៉ះពាល់នួវកិត្តិយស ហើយអាចប្រឈមនឹងគ្មានគូស្រករទៅថ្ងៃក្រោយ។ យ៉ាងណាមិញ, ការបង្ហាញវត្តមានស្ត្រីរងគ្រោះខ្មែរ […]

(ហាណូយ)៖ គ្រោះទឹកជំនន់ និងបំណាក់ដី ដោយសារតែភ្លៀងធ្លាក់ខ្លាំង បានវាយប្រហារភាគកណ្តាលប្រទេសវៀតណាមសាជាថ្មី គិតចាប់តាំងពីថ្ងៃចុងសប្តាហ៍មុនមក បណ្តាលឱ្យមនុស្សចំនួន ៨នាក់បាត់បង់ជីវិត ខណៈ​ដែលក្រុមអ្នករកស៉ីលើវិស័យកាហ្វេ ​ព្រមាន​ថា​វា​អាច​រារាំង​ដល់​ការ​ប្រមូល​ផល​ដំណាំកាហ្វេ​ដែល​កំពុង​បន្ត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៩ ខែវិច្ឆិកា ឆ្នាំ ២០២៥។ តាំងពីថ្ងៃសៅរ៍មុន ភ្លៀងធ្លាក់កម្រិត ១ ១០០មីលីម៉ែត្រ បានកើតឡើងនៅផ្នែកខ្លះនៃភាគកណ្តាលប្រទេសវៀតណាម។ តំបន់នេះគឺជម្រុកនៃផលិតកម្មកាហ្វេ និងជាទីដែលមានឆ្នេរសមុទ្រដ៏ពេញនិយមបំផុតមួយរបស់វៀណាម ប៉ុន្តែតែងជួបប្រទះនឹងព្យុះ និងទឹកជំនន់។ ក្រុមអ្នករកស៉ីលើវិស័យកាហ្វេ ក្នុងខេត្ត Dak Lak និយាយថា កសិដ្ឋានកាហ្វេមួយចំនួននៅតំបន់ទំនាបនៃខេត្ត គឺមានទឹកជន់លិច ហើយភ្លៀងធ្លាក់កំពុងបន្ត និងបានធ្វើឱ្យការប្រមូលផលកាហ្វេមានភាពយឺតយាវ។ តាមទីភ្នាក់ងារសារព័ត៌មានវៀតណាម ប្រជាពលរដ្ឋរាប់រយគ្រួសារ ត្រូវបានជម្លៀសចេញពីផ្ទះដែលរងនូវការជន់លិច កាលពីយប់មិញ។ ចំណែកខេត្ត Gia Lai ដែលនៅក្បែរនោះ សាលារៀនក៏ត្រូវបានបង្ខំចិត្តបិទទ្វារសម្រាកផងដែរ នាថ្ងៃពុធនេះ ប៉ះពាល់ដល់សិស្សចំនួន ២៦ ០០០នាក់៕ ផ្ដល់សិទ្ធិដោយ៖ Fresh News

(ភ្នំពេញ)៖ គម្ពីរព្រះត្រៃបិដក គឺជាទីប្រជុំចុះនៃពុទ្ធវចនៈដែលពុទ្ធសាសនិកសិក្សាស្រាវជ្រាវ យកមកបដិបត្តិក្នុងវិថីជីវិតប្រចាំថ្ងៃ។ ដើម្បីអភិរក្សរក្សាពុទ្ធវចនៈ ឱ្យមានតម្លៃស្ថិតស្ថេរគង់វង្សយូរអង្វែង គណៈសង្ឃថ្នាក់ជាតិ នឹងរៀបចំសូត្រស្វាធ្យាយព្រះត្រៃបិដករៀងរាល់ ៥ឆ្នាំម្តង (ក្នុង៥ឆ្នាំម្តង) រយៈពេល៣ថ្ងៃ។ នេះបើយោងតាមសង្ឃប្រកាស​ អនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣៣​ នៃគណៈសង្ឃព្រះពុទ្ធសាសនា​រដ្ឋ​នៃព្រះរាជាណាចក្រកម្ពុជា​ នៅថ្ងៃទី១៩ ខែវិច្ឆិកា ឆ្នាំ២០២៥។ សង្ឃប្រកាស បានបញ្ជាក់យ៉ាងដូច្នេះថា គណៈសង្ឃនាយកនៃព្រះរាជាណាចក្រកម្ពុជា សហការជាមួយក្រសួងធម្មការនិងសាសនារៀបចំ ដូច្នេះដើម្បីអភិរក្សរក្សាពុទ្ធវចនៈឱ្យមានតម្លៃស្ថិតស្ថេរគង់វង្សយូរអង្វែង កាលបរិច្ឆេទនៃការសូត្រស្វាធ្យាយព្រះត្រៃបិដកដូចខាងក្រោម៖ *ក៖ គណៈសង្ឃថ្នាក់ជាតិរៀបចំសូត្រស្វាធ្យាយព្រះត្រៃបិដករៀងរាល់ ៥ឆ្នាំម្តង (ក្នុង៥ឆ្នាំម្តង) រយៈពេល៣ថ្ងៃ ដោយកំណត់ទីតាំងណាមួយសមស្រប សម្រាប់សូត្រស្វាធ្យាយព្រះត្រៃបិដក។ *ខ៖ គណៈសង្ឃថ្នាក់ជាតិប្រគល់សិទ្ធិ និងតួនាទីជូនដល់គណៈសង្ឃថ្នាក់មូលដ្ឋាននិងមន្ទីរធម្មការនិងសាសនារាជធានី-ខេត្ត សូត្រស្វាធ្យាយព្រះត្រៃបិដករៀងរាល់ឆ្នាំ (ក្នុង១ឆ្នាំម្តង) រយៈពេល៣ថ្ងៃ ដោយប្រមូលផ្តុំ៥ខេត្តសម្រាប់មួយក្រុម ដើម្បីទ្រទ្រង់ដំណើរការនៃការសូត្រស្វាធ្យាយព្រះត្រៃបិដកនេះ ឱ្យបានជោគជ័យនិងប្រសិទ្ធភាព។ ចំពោះទីតាំងនៃការសូត្រស្វាធ្យាយរៀងរាល់ឆ្នាំ អាស្រ័យទៅលើការសម្រេចរបស់ខេត្តទាំង៥ ព្រមព្រៀងគ្នាប្រកបដោយមហាកុសលខ្ពស់៕ ផ្ដល់សិទ្ធិដោយ៖ Fresh News