(បាងកក)៖ ក្រសួងសុខាភិបាលថៃ នៅថ្ងៃព្រហស្បតិ៍ ទី២៥ ខែវិច្ឆិកា ឆ្នាំ២០២១នេះ បានរាយការណ៍ពីការរកឃើញករណីឆ្លងជំងឺ COVID-19 ថ្មីៗចំនួន ៦,៣៣៥ករណីបន្ថែមទៀត ក្នុងរយៈពេល ២៤ម៉ោងចុងក្រោយនេះ។ នេះបើតាមការចេញផ្សាយដោយ សារព័ត៌មានថៃ Bangkok Post។ ក្រៅពីការរកឃើញករណីឆ្លងថ្មីៗខាងលើ អ្នកជំងឺចំនួន ៣៧នាក់បន្ថែមទៀត ក៏ត្រូវបានរាយការណ៍ថាស្លាប់ផងដែរ ក្នុងរយៈពេល ២៤ម៉ោងចុងក្រោយដូចគ្នា ខណៈអ្នកជំងឺចំនួន ៧,២១៨នាក់ផ្សេងទៀត ត្រូវបានអនុញ្ញាតឱ្យចាកចេញពីមន្ទីរពេទ្យ ក្រោយជាសះស្បើយ។ គួរបញ្ជាក់ថា រហូតមកទល់ពេលនេះ ប្រទេសថៃបានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសចំនួន ២,០៨៨,៣២៧ករណី ក្នុងនោះមានអ្នកស្លាប់ ២០,៥៧៩នាក់ និងអ្នកជាសះស្បើយឡើងវិញ ១,៩៨៧,០៨៩នាក់។ គិតត្រឹមពេលនេះ ថៃបានចាក់វ៉ាក់សាំងបង្ការជំងឺ COVID-19 សរុប ៩០.២៧លានដូស ក្នុងនោះប្រជាជន ៣៩.៩៦លាននាក់ (៥៧.១២% នៃចំនួនប្រជាជនសរុប) បានទទួលការចាក់គ្រប់ដូស៕ ផ្តល់សិទ្ធិដោយ៖ freshnews

រុស្ស៊ី៖ យោងតាមការចុះផ្សាយនៅក្នុងបណ្តាញសារព័ត៌មាន Reuters បានឲ្យដឹងថា ប្រទេសរុស្ស៊ីគ្រោងនឹងនាំចេញវ៉ាក់សាំងបង្ការជំងឺកូវីដ ១៩ ក្នុងទម្រង់ជាស្រ្ពាយបាញ់តាមរន្ធច្រមុះ ដោយវ៉ាក់សាំងនេះត្រូវបានគេចម្រាញ់ចេញពីវ៉ាក់សាំងប្រភេទ Sputnik V ដែលគេធ្លាប់ប្រើជាថ្នាំចាក់នាពេលកន្លង។ បើតាមលោក Kirill Dmitriev ដែលជាប្រធានមូលនិធិវិនិយោគផ្ទាល់របស់រុស្ស៊ី (RDIF) បានបញ្ជាក់ថា គម្រោងនាំចេញវ៉ាក់សាំងបង្ការជំងឺកូវីដ ១៩ ជាប្រភេទស្រ្ពាយបាញ់តាមរន្ធច្រមុះនេះនឹងត្រូវធ្វើឡើងនៅក្នុងឆ្នាំក្រោយ ហើយវ៉ាក់សាំងប្រភេទថ្មីនេះនឹងក្លាយជាជម្រើសល្អបំផុតមួយនៅក្នុងទីផ្សារវ៉ាក់សាំងនៅលើពិភពលោកផងដែរ។ ប្រភពខាងលើបានបន្តថា បើទោះជាក្នុងអំឡុងពេលនេះវ៉ាក់សាំងប្រភេទ Sputnik V ដែលផលិតឡើងដោយក្រុមអ្នកវិទ្យាសាស្រ្តរុស្ស៊ីនៅមិនទាន់មានការទទួលស្គាល់ជាផ្លូវការដោយអង្គការសុខភាពពិភពលោកនិងទីភ្នាក់ងារឱសថអឺរ៉ុបក៏ដោយ តែវ៉ាក់សាំងនេះត្រូវបានគេប្រើប្រាស់យ៉ាងទូលំទូលាយរួចទៅហើយនៅក្នុងប្រទេសរុស្ស៊ី។ ជាក់ស្តែងកាលពីថ្ងៃពុធ ទី២៤ ខែវិច្ឆិកាម្សិលមិញនេះលោកប្រធានាធិបតីរុស្ស៊ី Vladimir Putin ក៏បានអញ្ជើញទៅវ៉ាក់សាំង Sputnik V សម្រាប់ជាដូសជំរុញរបស់គាត់ផងដែរ ខណៈកាលពី ៦ខែមុនគាត់ធ្លាប់ចាក់វ៉ាក់សាំងប្រភេទចំនួន ២ដូសរួចមកហើយ៕ ដោយ៖ ខ្មែរណូត

អង្គការសុខភាពពិភពលោកកាលពីថ្ងៃពុធ ទី២៤ ខែវិច្ឆិកា ឆ្នាំ២០២១ បាននិយាយថា វ៉ាក់សាំងការពារជំងឺ COVID-19 អាចកាត់បន្ថយការឆ្លងនៃជំងឺ COVID-19 វ៉ារ្យ៉ង់ Delta បានប្រហែល ៤០% ហើយមនុស្សកំពុងធ្លាក់ក្នុងការយល់ដឹងមិនពិត អំពីសុវត្ថិភាពទាក់ទងនឹងវ៉ាក់សាំង។ អគ្គនាយកអង្គការសុខភាពពិភពលោក លោក Tedros Adhanom Ghebreyesus បាននិយាយថា មនុស្សដែលបានចាក់ថ្នាំបង្ការជាច្រើនបានគិតខុសថា ការចាក់វ៉ាក់សាំងនេះមានន័យថា ពួកគេលែងត្រូវការការប្រុងប្រយ័ត្នផ្សេងទៀតហើយ ដែលវាគឺជាការយល់ឃើញខុសទាំងស្រុង។ អ្នកដែលមានប្រព័ន្ធការពារពេញលេញ ត្រូវតែប្រកាន់ខ្ជាប់នូវវិធានការដើម្បីជៀសវាងការឆ្លងមេរោគ ហើយបន្តធ្វើវាដដែលៗ។ លោក Tedros បានទទូចអំពីការចម្លងយ៉ាងឆាប់រហ័សរបស់វ៉ារ្យ៉ង់ Delta ដែលមានន័យថា វ៉ាក់សាំងមិនមានប្រសិទ្ធភាពប្រឆាំងនឹងការចម្លងទាំងស្រុងទេ។ លោក Tedros បានប្រាប់អ្នកយកព័ត៌មានថា៖«យើងមានការព្រួយបារម្ភអំពីការយល់ឃើញមិនពិតនៃសុវត្ថិភាព ដែលថាវ៉ាក់សាំងបានបញ្ចប់ជំងឺរាតត្បាត ហើយអ្នកដែលត្រូវបានចាក់ថ្នាំបង្ការមិនត្រូវការការប្រុងប្រយ័ត្នផ្សេងទៀតទេ»។ លោកបន្ថែមថា «វ៉ាក់សាំង​ជួយ​ជីវិត​មនុស្ស ប៉ុន្តែ​មិន​អាច​ការពារ​ការ​ឆ្លង​បាន​ពេញលេញ​ទេ។ តាមទិន្នន័យបានណែនាំថា មុនពេលមកដល់នៃវ៉ារ្យ៉ង់ Delta វ៉ាក់សាំងកាត់បន្ថយការឆ្លងប្រហែល 60% ខណៈជាមួយនឹងការមកដល់របស់ Delta វាបានធ្លាក់ចុះដល់ប្រហែល 40 %»៕ ផ្តល់សិទ្ធិដោយ៖ freshnews

(ដាកា)៖ វ៉ាក់សាំងបង្ការជំងឺ COVID-19 ដែលអភិវឌ្ឍឡើងក្នុងស្រុកដំបូងគេបង្អស់ របស់ប្រទេសបង់ក្លាដែស បានទទួលការអនុម័តឱ្យធ្វើតេស្តលើមនុស្សហើយ។ នេះបើយោងតាមការចេញផ្សាយដោយទីភ្នាក់ងារព័ត៌មានចិនស៉ីនហួរ នៅថ្ងៃពុធ ទី២៤ ខែវិច្ឆិកា ឆ្នាំ២០២១។ វ៉ាក់សាំងបង្ការជំងឺ COVID-19 ដែលអភិវឌ្ឍឡើងដោយក្រុមហ៊ុនផលិតឱសថក្នុងស្រុក ហ្ក្លូប បាយអូថិច (Globe Biotech) ដែលមានឈ្មោះសម្គាល់ថា បង់ហ្កាវ៉ាក់ (Bangavax) នៅថ្ងៃអង្គារសប្ដាហ៍នេះ បានទទួលការអនុម័តពី ក្រុមប្រឹក្សាស្រាវជ្រាវវេជ្ជសាស្ត្របង់ក្លាដែស (BMRC) ដើម្បីឆ្ពោះទៅរកធ្វើតេស្តលើមនុស្សហើយ បន្ទាប់ពី BMRC បានពិនិត្យល្អិតល្អន់លើឯកសារទាំងអស់ ស្តីពីដំណាក់កាលធ្វើតេស្តលើសត្វ។ លោក ម៉ូហាំម៉ាត់ ម៉ូហៃយីដឌីន (Mohammad Mohiuddin) មន្ត្រីជាន់ខ្ពស់នៅក្រុមហ៊ុន Globe Biotech បានគូសបញ្ជាក់ប្រាប់អ្នកសារព័ត៌មានថា «យើងបានទទួលការអនុម័តពីក្រុមប្រឹក្សា BMRC សម្រាប់ការធ្វើតេស្តលើមនុស្សពេញវ័យ ដែលមានសុខភាពល្អរហូតដល់ ៦៤នាក់ហើយ»។ លោក ម៉ូហៃយីដឌីន បានបន្ថែមថា BMRC បានជូនដំណឹងដល់ក្រុមហ៊ុនថា ពួកគេនឹងផ្តល់ការអនុម័ត សម្រាប់ការប្រើប្រាស់ទូលំទូលាយ ប្រសិនបើការធ្វើតេស្តលើមនុស្ស ដំណាក់កាលទី២ និងដំណាក់កាលទី៣ នៃវ៉ាក់សាំងរបស់ខ្លួន […]

(សិង្ហបុរី)៖ ប្រទេសសិង្ហបុរីបានរាយការណ៍ពីករណីឆ្លងកូវីដ១៩ ថ្មីៗចំនួន២,០៧៩ករណីបន្ថែមទៀត គិតត្រឹមថ្ងៃត្រង់ថ្ងៃពុធ ទី២៤ ខែវិច្ឆិកា ឆ្នាំ២០២១។ នេះបើយោងតាមការចេញផ្សាយដោយសារព័ត៌មាន CNA។ សម្រាប់រយៈពេលដូចគ្នានេះ ប្រទេសអាស៊ានមួយនេះក៏បានរកឃើញអ្នកស្លាប់ថ្មី ដោយសារជំងឺដ៏កាចសាហាវនេះចំនួន០៦នាក់បន្ថែមទៀតផងដែរ ដែលនាំចំនួនអ្នកស្លាប់សរុបនៅទូទាំប្រទេសកើនដល់៦៧៨នាក់ ខណៈករណីឆ្លងកូវីដ១៩នៅទូទាំងប្រទេសកើនដល់ ២៥៧,៥១០ករណី។ ករណីឆ្លងថ្មីប្រចាំថ្ងៃនៅថ្ងៃនេះគឺមានការកើនឡើងបន្តិចទៀត បើប្រៀបធៀបនឹងតួលេខឆ្លងប្រចាំថ្ងៃដែលបានរាយការណ៍ កាលពីថ្ងៃអង្គារម្សិលមិញដែលមានចំនួន១,៧៨២ករណី។ សូមជំរាបថា ស្ថានការណ៍កូវីដ១៩ នៅក្នុងប្រទេសសិង្ហបុរីមួយរយៈចុងក្រោយនេះ កំពុងប្រឈមនឹងរលកឆ្លងថ្មី ដែលមានសភាពធ្ងន់ធ្ងរជាងពេលមុនៗ៕ ផ្តល់សិទ្ធិដោយ៖ freshnews

ចំនួនអ្នកឆ្លងជំងឺ COVID-19 ប្រចាំថ្ងៃរបស់ប្រទេសកូរ៉េខាងត្បូង បានកើនឡើងដល់ ៤,០០០ នាក់ ជាលើកដំបូងបំផុត ជាមួយនឹងករណីថ្មីចំនួន ៤,១១៦ ករណី កាលពីថ្ងៃអង្គារ ខណៈនាយករដ្ឋមន្ត្រីលោក Kim Boo-kyum បានទាមទារឱ្យមានការរឹតបន្ដឹងជាងមុន ហើយការដាក់រដ្ឋក្នុងគ្រាអាសន្នជាថ្មី អាចនឹងត្រូវបានធ្វើឡើងដើម្បីទប់ស្កាត់ការឆ្លងបន្ថែមទៀត។ តួលេខនេះគឺខ្ពស់ជាងកំណត់ត្រាមុនចំនួន ៨០០ ករណី ដែលត្រូវបានកត់ត្រា កាលពីថ្ងៃទី១៧ ខែវិច្ឆិកា ហើយចំនួន​អ្នក​ជំងឺ​ធ្ងន់ធ្ងរ​ក៏​ឡើង​ដល់​កម្រិត​ខ្ពស់ផងដែរ ​គឺមាន ​៥៨៦​នាក់​។ អត្រាអ្នកជំងឺ​ COVID-19 នៅតាមបន្ទប់ ICU នៅមន្ទីរពេទ្យ បានកើនលើស ៨០% នៅក្នុងរដ្ឋធានីសេអ៊ូល និងតំបន់ជុំវិញដែលការឆ្លងត្រូវបានប្រមូលផ្តុំ។ ជម្រាបដែរថា ប្រជាជនកូរ៉េខាងត្បូងបានចាប់ផ្តើមសកម្មភាពប្រចាំថ្ងៃឡើងវិញនៅដើមខែនេះ នៅពេលដែលរដ្ឋាភិបាលបានបន្ធូរបន្ថយការរឹតបន្តឹងប្រឆាំងនឹងជំងឺឆ្លង។ អ្នកជំនាញបាននិយាយថា ករណីថ្មីៗដែលត្រូវបានរាយការណ៍ ភាគច្រើនជាមនុស្សចាស់ និងកុមារ ដែលទំនងជាមិនទាន់មានចាក់វ៉ាក់សាំងនៅដំណាក់កាលដំបូងៗ៕ ដោយ៖ ខ្មែរណូត

រដ្ឋាភិបាលជប៉ុនបានសម្រេចចិត្តបញ្ចេញប្រេងបម្រុងរបស់រដ្ឋជាលើកដំបូង បន្ទាប់ពីសហរដ្ឋអាមេរិកបានប្រកាសវិធានការដូចគ្នាដើម្បីជួយទប់ស្កាត់ការកើនឡើងនៃតម្លៃប្រេងឆៅ នេះបើយោងតាមការចុះផ្សាយរបស់សារព័ត៌មានជប៉ុន NHK។ ប្រភពដដែលបានឱ្យដឹងថា រដ្ឋាភិបាលស្តុកទុកប្រេងឱ្យបានគ្រប់គ្រាន់សម្រាប់រយៈពេលប្រហែល ១៤០ថ្ងៃនៃការប្រើប្រាស់ក្នុងស្រុក តែបច្ចុប្បន្នកំពុងពិចារណាលើការបញ្ចេញផ្នែកខ្លះនៃប្រេងដែលទុនបំរុងទាំងនោះ។ ជាមួយគ្នានេះដែរ នៅពេលនេះមន្ត្រីរដ្ឋាភិបាល មានគម្រោងផ្តល់ប្រេងដែលបំរុងទុកដល់ទីផ្សារដែលមានតម្លៃសម្រាប់ប្រើប្រាស់រយៈពេលជាច្រើនថ្ងៃ ហើយក៏កំពុងសិក្សាថាតើត្រូវបញ្ចេញបន្ថែមទៀតដែរឬទេ។ គួរឱ្យដឹងថា ក្រៅពីប្រទេសជប៉ុន កាលពីថ្ងៃអង្គារប្រទេសឥណ្ឌាក៏បានប្រកាសថា ខ្លួននឹងបញ្ចេញប្រេងចំនួនប្រាំលានបារ៉ែលពីទុនបម្រុងរបស់ខ្លួនផងដែរ ដើម្បីសម្រួលដល់តម្លៃប្រេង៕ ផ្តល់សិទ្ធិដោយ៖ freshnews

ថៃ៖ ស្រ្តីដែលជាបេក្ខជនប្រលងក្នុងកម្មវិធី Miss Universe តំណាងឲ្យប្រទេសថៃម្នាក់​ត្រូវបានប៉ូលិសជំនាញថៃចោទប្រកាន់ថា បានបំពានលើទង់ជាតិនៃប្រទេសថៃយ៉ាងខ្លាំង នេះបើយោងតាមការចុះផ្សាយនៅក្នុងបណ្តាញសារព័ត៌មាន បាងកកប៉ុស្តិ៍ នៅក្នុងថ្ងៃពុធ ទី២៤​ ខែវិច្ឆិកានេះ។ ការសម្រេចចោទប្រកាន់និងចាត់វិធានការទៅតាមផ្លូវច្បាប់ចំពោះបេក្ខភាពបវរកញ្ញាចក្រវាលរូបនេះត្រូវបានធ្វើឡើងភ្លាមៗ ក្រោយអាជ្ញាធរថៃបានប្រទះឃើញរូបថតមួយសន្លឹកដែលបានបង្ហាញនាងបានឈរនៅលើផ្ទាំងធំមួយដែលមានពណ៌ដូចគ្នាទៅនឹងទង់ជាតិនៃប្រទេសថៃ។ គួរបញ្ជាក់ថា បេក្ខភាពបវរកញ្ញាចក្រវាលតំណាងឲ្យប្រទេសថៃរូបនេះមានឈ្មោះ Anchilee Scott-Kemmis ហើយអំឡុងពេលនេះនាងកំពុងស្ថិតនៅក្រៅប្រទេសដើម្បីចូលរួមប្រកួតក្នុងកម្មវិធី Miss Universe ខណៈវគ្គផ្តាច់ព្រ័ត្រនៃកម្មវិធីលំដាប់ពិភពលោក​មួយនេះនឹងត្រូវរៀបចំឡើងនៅក្នុងថ្ងៃទី ១២ ខែធ្នូ ក្នុងប្រទេសអ៊ីស្រាអែល។ បើតាមឧត្តមសេនីយ៍ឯក Samran Nuanma ស្នងការក្រុងបាងកកបានបញ្ជាក់ថា សកម្មភាពរបស់កញ្ញា Anchilee Scott-Kemmis បានធ្វើឲ្យប៉ះពាល់យ៉ាងខ្លាំងចំពោះតម្លៃនៃទង់ជាតិថៃ ហើយយោងទៅតាមច្បាប់ជនដែលបានប្រព្រឹត្តិសកម្មភាពខុសឆ្គងនេះគឺត្រូវប្រឈមនឹងការជាប់គុករហូតដល់ ២ឆ្នាំ ឬពិនិយជាប្រាក់ចំនួន ៤០,០០០បាត (១,២០៣ ដុល្លារអាមមេរិក) ឬទទួលទោសទាំងជាប់គុកនិងពិន័យជាប្រាក់រួមគ្នាតែម្តង។ យ៉ាងណាក្តី លោកស្នងការរូបនេះបានបញ្ជាក់ អាជ្ញាធរថៃនឹងមិនដាក់ទោសឲ្យកញ្ញា Anchilee Scott-Kemmis ជាប់គុកនោះទេ តែអាជ្ញាធរត្រូវឲ្យនាងដឹងថានាងបានប្រព្រឹត្តកំហុសហើយត្រូវកែតម្រូវជាបន្ទាន់ដើម្បីកុំឲ្យសកម្មភាពរបស់នាងក្លាយជាគំរូអាក្រក់សម្រាប់យុវវ័យជំនាន់ក្រោយ៕ ដោយ៖ ខ្មែរណូត

(ប៊ែរឡាំង)៖ ស្វាមីរបស់អធិការបតីអាល្លឺម៉ង់លោកស្រី Angela Merkel គឺលោក ចូជីម សៅអឺ (Joachim Sauer) បានហៅពលរដ្ឋអាល្លឺម៉ង់ដែលមិនទាន់បានចាក់ វ៉ាក់សាំងបង្ការ COVID-19 ថាជា «មនុស្សកម្ជិល» ជាមួយការអំពាវនាវឱ្យរដ្ឋាភិបាលទីក្រុងប៊ែរឡាំងគិតគូរពិចារណាពីកាតព្វកិច្ចចាក់វ៉ាក់សាំង ដើម្បីទប់ស្កាត់រលកឆ្លង ថ្មីនៃជំងឺដ៏កាចសាហាវមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២៤ ខែវិច្ឆិកា ឆ្នាំ២០២១។ លោក Joachim Sauer ធ្វើការកត់សម្គាល់ខាងលើនៅក្នុងបទសម្ភាសន៍ជាមួយកាសែតអ៉ីតាលី La Repubblica នៅថ្ងៃអង្គារសប្ដាហ៍នេះ និងចំពេលករណីឆ្លង COVID-19 នៅក្នុងប្រទេសអាល្លឺម៉ង់ និងតំបន់អឺរ៉ុបខាងលិចទាំងមូលស្ទុះងើបឡើងវិញ។ ថ្លែងនាឱកាសនោះ លោក Joachim Sauer បានសង្កត់ធ្ងន់ដូច្នេះថា «ជារឿង ដ៏ភ្ញាក់ផ្អើលដែលប្រជាជន ១ភាគ៣ មិនបានគោរពតាមរបកគំហើញវិទ្យាសាស្ត្រ… ហើយការកើនឡើងករណីឆ្លងជាថ្មីមានមួយផ្នែកគឺដោយសារតែពលរដ្ឋអាល្លឺម៉ង់ ជាមនុស្សកម្ជិលមួយចំនួន»។ គួរបញ្ជាក់ថា ការកើនឡើងជាថ្មីនូវករណីឆ្លង COVID-19 នៅក្នុងប្រទេសអាល្លឺម៉ង់ មានមួយផ្នែកគឺដោយសារតែអត្រាចាក់វ៉ាក់សាំងបង្ការនៅមានកម្រិតទាប បើធៀប ទៅនឹងបណ្ដាប្រទេសអឺរ៉ុបខាងលិចដទៃដូចជាបារាំង អ៉ីតាលី ឬអេស្ប៉ាញ ដោយគិតមកទល់នឹងពេលនេះ […]

កាលពីថ្ងៃអង្គារ ទី២៣ ខែវិច្ឆិកា ម្សិលមិញនេះ អង្គការសុខភាពពិភពលោក (WHO) បានព្យាករណ៍ថា នៅត្រឹមដើមខែមីនា ឆ្នាំ២០២២ ខាងមុខនេះជំងឺកូវីដ ១៩ នឹងឆកយកជីវិតពលរដ្ឋនៅតំបន់អឺរ៉ុបចំនួន ៧០០,០០០ នាក់បន្ថែមទៀត ហើយធ្វើឲ្យតួលេខអ្នកស្លាប់ដោយជំងឺកូវីដ ១៩ សរុបនៅក្នុងតំបន់អឺរ៉ុបកើនដល់ ២,២ លាននាក់។ គួរបញ្ជាក់ថា នៅក្នុងតំបន់អឺរ៉ុបមានប្រទេសសរុបចំនួន ៥៣ប្រទេស ហើយគិតត្រឹមពេលនេះតួលេខអ្នកស្លាប់ដោយជំងឺកូវីដ ១៩ សរុបនៅក្នុងតំបន់មួយនេះមានចំនួន ១,៥លាននាក់រួចទៅហើយ ខណៈបើគិតជាមធ្យមគឺតំបន់អឺរ៉ុបមានតួលេខអ្នកស្លាប់ដោយជំងឺកូវីដ ១៩ ប្រចាំថ្ងៃចំនួន ៤,២០០នាក់ក្នុងមួយថ្ងៃ។ បើតាមលោក Hans Kluge ដែលជានាយកនៃអង្គការសុខភាពពិភពលោកប្រចាំតំបន់អឺរ៉ុបបានបញ្ជាក់ថា ក្នុងចំណោមប្រទេសទាំង ៥៣ក្នុងតំបន់អឺរ៉ុបនឹងមានប្រទេសចំនួន ៤៩ ដែលត្រូវប្រឈមខ្លាំងនឹងការប្រើប្រាស់សេវាសង្គ្រោះបន្ទាន់ដើម្បីជួយអ្នកជំងឺកូវីដ ១៩ ហើយក្នុងចំណោមប្រទេសទាំងនោះក៏មានប្រទេសបារាំង អេស្ប៉ាញ និងហុងគ្រីផងដែរ។ ទន្ទឹមនឹងការចេញផ្សាយនូវការព្យាករណ៍នេះ លោក Hans Kluge ក៏បានអំពាវនាវឲ្យពលរដ្ឋនៅក្នុងតំបន់អឺរ៉ុបត្រូវប្រញាប់ទៅចាក់វ៉ាក់សាំងឲ្យបានគ្រប់ៗគ្នា ហើយចំពោះអ្នកទទួលបានវ៉ាក់សាំងចំនួន ២ដូសរួចហើយក៏ត្រូវទៅចាក់វ៉ាក់សាំងដូសជំរុញបន្ថែមទៀតផងដែរ ទើបពួកគេមានសុវត្ថិភាពគ្រប់គ្រាន់ពីជំងឺកូវីដ ១៩៕ ដោយ៖ ខ្មែរណូត