(វ៉ាទីកង់)៖ សម្តេចប៉ាប លីអូ ទី១៤ (Pope Leo XIV) នៅថ្ងៃពុធនេះ បានអំពាវនាវឱ្យបញ្ចប់អរិភាពជាបន្ទាន់ នៅតាមបណ្តោយព្រំដែនកម្ពុជា-ថៃ ជាទីដែលការប៉ះទង្គិចគ្នាថ្មីៗនេះ បានបណ្តាលឱ្យមានអ្នករងគ្រោះ រួមទាំងជនស៊ីវិល និងបង្ខំឱ្យមនុស្សរាប់ពាន់នាក់ភៀសខ្លួនចេញពីផ្ទះសម្បែង។ នេះបើតាមការចេញផ្សាយ ដោយសារព័ត៌មានវ៉ាទីកង់។ ថ្លែងទៅកាន់អ្នកស្មោះស្ម័គ្រនៅក្នុងសវនាការទូទៅ នៅថ្ងៃពុធនេះ សម្តេចប៉ាបបានសម្តែងនូវ «ទុក្ខសោកដ៏ក្រៀមក្រំ» ចំពោះសេចក្តីរាយការណ៍ពីតំបន់នោះ ដោយទ្រង់បានស្នើឱ្យភាគីទាំងពីរ «បញ្ឈប់ការបាញ់គ្នាជាបន្ទាន់ និងចាប់ផ្តើមការសន្ទនាឡើងវិញ»៕ ផ្ដល់សិទ្ធិដោយ៖ Fresh News

(ព្រំដែន)៖ នៅវេលាម៉ោង៩៖៥០នាទី ព្រឹកថ្ងៃទី១១ ខែធ្នូ ឆ្នាំ២០២៥នេះ កងកម្លាំងរបស់កម្ពុជា បានឆ្លើយតបទៅការឈ្លានពានរបស់យោធាថៃ ជាមួយ BM21 នៅសមរភូមិបឹងត្រកួន ទីដែលពួកយោធាថៃរុលសម្រុកចូលមក ចំគោលដៅល្អណាស់។ កម្លាំងជួរមុខរបស់កម្ពុជានៅតែម្ចាស់ការប្រុងប្រយ័ត្នខ្ពស់បំផុត ដើម្បីការពារបូរណភាពទឹកដី និងដែនអធិបតេយ្យជាតិពីការំលោភបំពានម្ដងហើយម្ដងទៀតរបស់ថៃ ដោយការធ្វើការតបតយ៉ាងចាស់ដៃផងដែរ៕ ផ្ដល់សិទ្ធិដោយ៖ ផ្ដល់សិទ្ធិដោយ៖ Fresh News

(យូនីស្កូ)៖ អង្គការ UNESCO បានបង្ហាញការព្រួយបារម្ភខ្លាំងជុំវិញការផ្ទុះឡើងជាថ្មីនូវភាពតានតឹងរវាងកម្ពុជា និងថៃ ក្នុងនោះរួមមានទាំងជម្លោះនៅក្បែរតំបន់ប្រាសាទព្រះវិហាររបស់កម្ពុជា ដែលជាសម្បត្តិ​បេតិកភណ្ឌ​ពិភពលោកមួយរបស់អង្គការ UNESCO។ UNESCO អំពាវនាវឱ្យមានការការពារជាបន្ទាន់សម្បត្តិវប្បធម៌ក្នុងតំបន់នៅគ្រប់ទម្រង់ទាំងអស់។ UNESCO សូមរំឮកដល់គ្រប់ភាគីទាំងអស់អំពីកាតព្វកិច្ចរបស់ពួកគេ និងការប្ដេជ្ញាចិត្តគោរពច្បាប់អន្តរជាតិ ជាពិសេសគឺអនុសញ្ញាទីក្រុងឡាអេឆ្នាំ១៩៥៤ ស្ដីពីការការពារសម្បត្តិវប្បធម៌ ក្នុងគ្រាមានជម្លោះផ្ទុះប្រដាប់អាវុធ និងអនុសញ្ញាឆ្នាំ១៩៧២ ពាក់ព័ន្ធនឹងការការពារវប្បធម៌បេតិភណ្ឌពិភពលោក និងធម្មជាតិ។ អង្គការ UNESCO នឹងបន្តតាមដានស្ថានភាពនៃតំបន់សម្បត្តិ​បេតិកភណ្ឌវប្បធម៌ នៅក្នុងតំបន់ ជាមួយការធានានូវកិច្ចគាំពារ របស់ខ្លួន។ ដូច្នេះ UNESCO បានជូនដំណឹងទៅដល់ភាគីពាក់ព័ន្ធទាំងអស់អំពីកូអរដោណេភូមិសាស្ត្រនៃទីតាំងដែលមានក្នុងបញ្ជីសម្បត្តិបេតិភណ្ឌពិភពលោក ព្រមទាំងទីតាំងសំខាន់ៗរបស់ជាតិ ក្នុងគោលបំណងបញ្ចៀសរាល់ការខូចខាត។ UNESCO ត្រៀមខ្លួនជាស្រេចដើម្បីផ្ដល់ជំនួយបច្ចេកទេសចាំបាច់នានា សំដៅធានាការការពារទ្រព្យសម្បត្តិវប្បធម៌ និងអនុវត្តរាល់វិធានការចាំបាច់នានាដើម្បីថែរក្សាការពារឱ្យបានឆាប់តាមដែលអាចធ្វើទៅបាន៕ ផ្ដល់សិទ្ធិដោយ៖ Fresh News

(ភ្នំពេញ)៖ ក្រសួងការពារជាតិ សូមជម្រាបជូននូវស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃបានបើកការបាញ់ ប្រហារមកលើប្រជាពលរដ្ឋស៊ីវិលកម្ពុជា នៅក្នុងភូមិសាស្រ្តយោធភូមិភាគទី៥។ នៅថ្ងៃទី១០ ខែធ្នូ ឆ្នាំ២០២៥ វេលាម៉ោង ១៥:៤៥នាទី យោធាថៃផ្លោងគ្រាប់កាំភ្លើង១៥៥មម ចំនួន ២គ្រាប់ចូលបឋមសិក្សាខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ។ ក្រសួងការពារជាតិ បានចាត់ទុកសកម្មភាពដ៏កំរោលរបស់យោធាថៃនេះ ជាការបើកការបាញ់ប្រហារ ដោយមិនរើសគោលដៅបាញ់ចូលទីប្រជុំជនដែលមានប្រជាពលរដ្ឋស៊ីវិលរស់នៅ ពិសេសជាសាលារៀនរបស់កុមារ។ ក្រសួងការពារជាតិ នៃព្រះរាជាណាចក្រកម្ពុជា សូមប្រកាសថ្កោលទោសយ៉ាងដាច់អហង្ការចំពោះទង្វើ អមនុស្សធម៌ដ៏សាហាវឃោរឃៅនេះ ហើយនេះបង្ហាញយ៉ាងច្បាស់ការណ៍ដែលភាគីថៃបានរំលោភ បំពានលើបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ ដែលភាគី ទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខាដោយនាយករដ្ឋ មន្ត្រីនៃប្រទេសកម្ពុជា និងថៃ ក្រោមសាក្សីរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាម៉េរិក និងឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានអាស៊ាន។ ព័ត៌មានលម្អិតនឹងត្រូវរាយការណ៍ជូនជ្រាបនៅពេលក្រោយ៕ ផ្ដល់សិទ្ធិដោយ៖ Fresh News

(គូឡាឡាំពួ)​៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៊ីម បានបើកកិច្ចសន្ទនាតាមទូរស័ព្ទជាមួយនាយករដ្ឋមន្ត្រីកម្ពុជា និងថៃ ដើម្បីពិភាក្សាពីជម្លោះដែលកំពុងកើតឡើងនៅតំបន់ព្រំដែនរវាងប្រទេសទាំង២។លោក អាន់វ៉ា បានបញ្ជាក់ថា ជំនួបតាមទូរស័ព្ទខាងលើធ្វើឡើងកាលពីថ្ងៃអង្គារ ទី៩​ ខែធ្នូ។ លោក អាន់វ៉ា បានគូសបញ្ជាក់ថា «ខ្ញុំសូមកោតសរសើរចំពោះការបើកចំហ និងឆន្ទៈរបស់មេដឹកនាំនៃប្រទេសទាំង២ ក្នុងការបន្តចរចាសំដៅបន្ធូរបន្ថយភាពតានតឹង និងបញ្ចៀសការយល់ច្រឡំដែលអាចធ្វើឱ្យស្ថានការណ៍កាន់តែអាក្រក់ឡើង»។ ខណៈមិនទាន់ដំណោះស្រាយចុងក្រោយណាមួយត្រូវបានឈានដល់ ការបន្តកិច្ចប្រឹងប្រែងការទូតបានធានាអាចធានា កុំឱ្យឧបទ្ទវហេតុធ្ងន់ធ្ងរកើតឡើងថែមទៀតក្នុងពេលវេលាដ៏សំខាន់នេះ។ លោក អាន់វ៉ា បន្ថែមថា ម៉ាឡេស៊ីនឹងបន្តគាំទ្រដល់កិច្ចសន្ទានា ដំណោះស្រាយឈរលើមូលដ្ឋានច្បាប់អន្តរជាតិ និងកិច្ចសហប្រតិបត្តិការតំបន់ដើម្បីថែរក្សាស្ថិរភាព និងសុវត្ថិភាពនៃតំបន់របស់យើង៕

(ភ្នំពេញ)៖ មន្ត្រីជាន់ខ្ពស់រាជរដ្ឋាភិបាលកម្ពុជា បានថ្លែងប្រាប់បណ្តាញព័ត៌មាន Fresh News ឲ្យដឹងនៅថ្ងៃទី១០ ខែធ្នូ ឆ្នាំ២០២៥នេះថា៖ «នៅចំពោះមុខនៃសកម្មភាពឈ្លានពានដោយប្រដាប់អាវុធរបស់យោធាថៃ មកលើអធិបតេយ្យ និងបូរណភាពទឹកដីកម្ពុជា ដែលបានប្រើប្រាស់អាវុធធុនធ្ងន់គ្រប់ប្រភេទ ព្រួមទាំងយន្តហោះទម្លាក់គ្រាប់បែកមកលើទីតាំងស៊ីវិលនៅកម្ពុជា។ សកម្មភាពឈ្លានពានដោយប្រដាប់អាវុធនេះ បានបង្កឱ្យមានការខូចខាតយ៉ាងធ្ងន់ធ្ងរ ដោយគិតត្រឹមថ្ងៃទី១០ ខែធ្នូ ឆ្នាំ២០២៥ នេះ ជនស៊ីវិលស្លាប់ជនស៊ីវិលចំនួន៩នាក់ (ទារក១នាក់) និងរងរបួសជនស្លូតត្រង់ចំនួន៤៦នាក់ និងមានជនភៀសសឹកចំនួន ៣៧,១១៥ គ្រួសារស្មើនឹង ១២៧,១៣៣នាក់ ក្នុងនោះស្ត្រីមាន ៥៨ ៦០៣ នាក់ និងកុមារមានចំនួន ២១,៩៧៤ នាក់ នៅខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ ខេត្តពោធិ៍សាត់ និងខេត្តបាត់ដំបង។ មន្រ្តីជាន់ខ្ពស់រាជរដ្ឋាភិបាលកម្ពុជា បានសង្កត់ធ្ងន់ថា កម្ពុជាបាននិងកំពុងប្រមូលភស្តុតាង ដើម្បីប្តឹងទៅតុលាការព្រហ្មទណ្ឌអន្តរជាតិ ICC ដែលកម្ពុជាជាសមាជិក៕ ផ្ដល់សិទ្ធិដោយ៖ Fresh News

(បាងកក)៖ នាយករដ្ឋមន្ត្រីថៃ លោក អនុទីន កំពុងប្រើប្រាស់ជម្លោះព្រំដែនជាមួយកម្ពុជា ដើម្បីដុតបញ្ឆេះគំនិតជាតិនិយមនៅក្នុងស្រុក មុនការបោះឆ្នោតសកលមកដល់។ តែដើម្បីធ្វើដូច្នេះ លោក Anutin ក៏កំពុងប្រថុយបង្កការខឹងសម្បាដល់ ប្រធានាធិបតីអាមេរិក លោក ដូណាល់ ត្រាំ ដែលបានអួតពីការបិទបញ្ចប់សង្រ្គាមជាច្រើនក្នុងនោះរួមមានទាំងជម្លោះរវាងកម្ពុជា និងថៃ។ នេះគឺជាផ្លូវដ៏លំបាកមួយដែលលោក Anutin បានជ្រើសរើសដើរជាមួយការទទូចថាជម្លោះជាមួយកម្ពុជា គឺដាច់ដោយឡែកពីកិច្ចចរចាពន្ធគយ ជាមួយសហរដ្ឋអាមេរិក។ ប៉ុន្តែលោក ត្រាំធ្លាប់បានលើកឡើងថា លោកបានប្រើការសម្លុតគំរាមពន្ធគយដើម្បីបញ្ចុះបញ្ចូលឱ្យកម្ពុជា និងថៃចុះកិច្ចព្រមព្រៀងសន្តិភាព។ នៅឯពិធីចុះហត្ថលេខាលើកិច្ចព្រមព្រៀងសន្តិភាពកាលពីខែតុលាកន្លងទៅ ក្នុងទីក្រុងគូឡាឡាំពួ លោក ត្រាំ បាននិយាយថា «យើងបានធ្វើរឿងដែលមនុស្សជាច្រើននិយាយថាមិនអាចទៅរួច ហើយយើងបានសង្រ្គោះជីវិតមនុស្សរាប់លាននាក់»។ កាលពីខែវិច្ឆិកា ជាថ្មីម្ដងទៀត លោក ដូណាល់ ត្រាំ បានអំពាវនាវឱ្យមេដឹកនាំកម្ពុជា និងថៃគោរពអនុវត្តតាមកិច្ចព្រមព្រៀងសន្តិភាព បន្ទាប់ពីទីក្រុងបាងកកបានព្យួរការអនុវត្ត តាមកិច្ចព្រមព្រៀងនេះដោយឯកតោភាគី។ កាលពីថ្ងៃអង្គារ ទី៩ ខែធ្នូនេះដែរលោកបានអះអាងថារូបលោកនឹងហៅ ទូរស័ព្ទទៅកាន់មេដឹកនាំកម្ពុជា និងថៃនៅថ្ងៃពុធសប្ដាហ៍នេះ (ម៉ោងនៅសហរដ្ឋអាមេរិក) ដើម្បីបញ្ចប់ជម្លោះ។ តាមក្រុមអ្នកវិភាគ ក្នុងពេលបច្ចុប្បន្ន លោក អនុទីន កំពុងផ្តោតយ៉ាងខ្លាំងលើការបង្កើនប្រជាប្រិយភាពនៅក្នុងស្រុកមុនការបោះឆ្នោតសកល។ លោកបានឡើងកាន់តំណែងជានាយករដ្ឋមន្ត្រីថៃកាលពីប៉ុន្មានខែមុន ជាមួយការសន្យាជាមួយបក្សប្រឆាំងថានឹងរំលាយរដ្ឋសភា រៀបចំការបោះឆ្នោតមុនអាណត្តិដែលត្រូវបានរំពឹងថា […]

(ភ្នំពេញ)៖ ស្ថានទូតសហរដ្ឋអាមេរិកប្រចាំនៅកម្ពុជា នៅថ្ងៃទី១០ ខែធ្នូ ឆ្នាំ២០២៥នេះ បានចេញសេចក្តីថ្លែងការណ៍ សម្ដែងការព្រួយបារម្ភចំពោះការប្រយុទ្ធជាបន្ត ដែលបង្កគ្រោះថា្នក់ និងការបាត់បង់ជីវិតនៅតាមកន្លែងជាច្រើនតាមបណ្តោយព្រំដែនប្រទេសកម្ពុជា-ថៃ។ ស្ថានទូតអាមេរិកបានបញ្ជាក់បន្ថែមថា «យើងទទូចជាខ្លាំង ឱ្យបញ្ឈប់ជាបន្ទាន់នូវអរិភាពនេះ និងការការពារជនស៊ីវិល ព្រមទាំងស្នើភាគីទាំងពីរ ឱ្យវិលត្រឡប់ទៅគោរពវិធានក្នុងការកាត់បន្ថយភាពតានតឹង ដែលមានចែងក្នុងកិច្ចព្រមព្រៀងសន្តិភាពនៅទីក្រុងកូឡាឡំពួរ ថ្ងៃទី ២៦ ខែតុលា ដែលបានចុះហត្ថលេខាដោយ លោកនាយករដ្ឋមន្ត្រី ប្រទេសកម្ពុជា និងថៃ និងបានធ្វើជាសាក្សីដោយលោកប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អានវ៉ា អ៊ីប្រាហ៊ីម»៕ ផ្ដល់សិទ្ធិដោយ៖ Fresh News

(ភ្នំពេញ)៖ ព្រះករុណា ជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យ ប្រោសព្រះរាជទាន ព្រះរាជទ្រព្យជូនដល់រាជរដ្ឋាភិបាល ចំនួន១០០,០០០ដុល្លារអាមេរិក (១០ម៉ឺនដុល្លារ) សម្រាប់ជាព្រះរាជូបត្ថម្ភដ៏ឧត្តុង្គឧត្តម ជួយដល់កងទ័ពសមរភូមិជួរមុខ ព្រំដែនកម្ពុជា-ថៃ។ នេះបើតាមលិខិត របស់សម្ដេចមហាមន្ដ្រី គុយ សុផល ឧបនាយករដ្ឋមន្ដ្រី និងជារដ្ឋមន្ដ្រីក្រសួងព្រះបរមរាជរាំង ផ្ញើជូនសម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានក្រុមឧត្ដមប្រឹក្សាផ្ទាល់ ព្រះមហាក្សត្រ ដែលបណ្តាញព័ត៌មាន Fresh News ទទួលបាននៅថ្ងៃទី១០ ខែធ្នូ ឆ្នាំ២០២៥៕ ផ្ដល់សិទ្ធដោយ៖ Fresh News

(បាងកក)៖ សាស្រ្តាចារ្យថៃមួយរូប នាថ្ងៃចន្ទ ទី៨ ខែធ្នូ ឆ្នាំ២០២៥នេះ បានលើកឡើងថា វាមិនទាន់ហួសពេលនៅឡើយទេ ក្នុងការវិលត្រឡប់ទៅរក កិច្ចព្រមព្រៀងសន្តិភាពទីក្រុងគូឡាឡាំពួវិញ បន្ទាប់ពីយោធាថៃបានបើកការវាយប្រហារលើប្រទេសកម្ពុជា។ នេះបើតាមការចេញផ្សាយដោយ សារព័ត៌មានថៃ Khaosod។ លោកស្រី Paungthong Pawakapan ដែលជាសាស្រ្តាចារ្យមួយរូបផ្នែកវិទ្យាសាស្រ្តនយោបាយ នៃសាកលវិទ្យាល័យ Chulalongkorn បានបង្ហោះសារនៅលើ Facebook អំពីការផ្ទុះជម្លោះសាជាថ្មីនៅព្រំដែនថៃ-កម្ពុជា។ លោកស្រីបានសរសេរថា ដើម្បីចាកចេញពីជម្លោះបច្ចុប្បន្ន លោកស្រីជឿជាក់ថា ប្រទេសទាំងពីរចាំបាច់ត្រូវវិលត្រឡប់ទៅរក កិច្ចព្រមព្រៀងសន្តិភាពគូឡាឡាំពួវិញ ហើយវាមិនទាន់យឺតពេលទេ។ លោកស្រី Paungthong បាននិយាយថា ថៃនិងកម្ពុជាបានឈានដល់ចំណុចមួយ ដែលប្រទេសទាំងពីរ ហាក់មិនអាចដោះស្រាយបញ្ហារបស់ពួកគេ ដោយទ្វេភាគីនោះទេ។ ការចរចាកន្លងមកបានទទួលបរាជ័យម្តងហើយម្តងទៀត ហើយយោធាប្រទេសទាំងពីរ ក៏ដឹងច្បាស់ដែរថា គ្មានភាគីណាអាចយកឈ្នះភាគីម្ខាងទៀតដោយប្រើកម្លាំងឡើយ ព្រោះយន្តការអន្តរជាតិ តែងតែត្រៀមជាស្រេចដើម្បីធ្វើអន្តរាគមន៍ ជាពិសេស ភាគីកម្ពុជាមានឆន្ទៈជានិច្ច ដើម្បីប្រើប្រាស់យន្តការទាំងនោះ។ ជាចុងក្រោយ លោកស្រីសាស្រ្តាចារ្យ បានអំពាវនាវទៅកាន់ប្រជាពលរដ្ឋថៃទាំងឡាយ ដែលកំពុងទទូចចង់ឱ្យមានសង្រ្គាម យល់ឱ្យច្បាស់ថា ជំនឿដែលថាថៃជាប្រទេសធំជាង ខ្លាំងជាង ហើយមានសមត្ថភាពយកឈ្នះលើ​ប្រទេសកម្ពុជា ដោយប្រើប្រាស់កម្លាំងយោធានោះ នឹងមិនអាចក្លាយជាការពិតទេ។ ផ្ទុយទៅវិញ […]