(ភ្នំពេញ)៖ ជាមួយនឹងការបើកប្រទេសកាន់តែទូលំទូលាយរបស់បណ្តាប្រទេសនានាលើសកលលោក សម្រាប់កម្ពុជាចំនួនអ្នកទេសចរណ៍នឹងរំពឹងថា មានការកើនឡើងក្នុងឆ្នាំ២០២៣នេះ មានចំនួនប្រមាណ ៤,៦លាននាក់ ធៀបនឹង ២,២លាននាក់ ក្នុងឆ្នាំ២០២២ តាមរយៈការព្យាករណ៍អ្នកដំណើរ របស់ក្រុមហ៊ុនសម្បទានព្រលានយន្តហោះ SCA នៅក្នុងកិច្ចប្រជុំបូកសរុបការងារប្រចាំឆ្នាំ២០២២ របស់គណៈកម្មការតាមដាន និងត្រួតពិនិត្យលើការសាងសង់អាកាសយានដ្ឋានអន្តរជាតិភ្នំពេញ ការសាងសង់អាកាសយានដ្ឋានអន្តរជាតិសៀមរាប និងការសាងសង់អាកាសយានដ្ឋានដទៃទៀត នៅក្នុងព្រះរាជាណាចក្រកម្ពុជា ដែលដឹកនាំដោយលោក តឹករ៉េត សំរេច រដ្ឋមន្រ្តីអមនាយករដ្ឋមន្រ្តី រដ្ឋលេខាធិការទីស្តីការគណៈរដ្ឋមន្រ្តី និងជាប្រធានគណៈកម្មការ នៅព្រឹកថ្ងៃទី២៦ ខែមករា ឆ្នាំ២០២៣ នេះ។ បន្ថែមពីលើការព្យាករណ៍យ៉ាងសុទិដ្ឋិនិយមសម្រាប់ឆ្នាំ២០២២ គណៈកម្មការក៏បានជំរុញក្រុមហ៊ុនសម្បទាន ព្រលានយន្តហោះ SCA ក្នុងការវិនិយោគផ្សេងៗ ដើម្បីត្រៀមលក្ខណៈរួចរាល់របស់អាកាសយានដ្ឋានទាំងបី សំដៅធានាបាននូវសុវត្ថិភាព សន្តិសុខ និងសេវាកម្មប្រកបដោយផាសុខភាព ក្នុងការបម្រើដល់អ្នកទេសចរណ៍ដែលនឹងមកដល់កម្ពុជាជាបន្តបន្ទាប់នៅឆ្នាំ២០២៣នេះ៕ ផ្តល់សិទ្ធិដោយ៖ FRESH NEWS

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២៦ ខែមករា ឆ្នាំ២០២៣នេះ បានស្នើឱ្យបញ្ចប់រឿងជម្លោះពាក់ព័ន្ធអ្នកសារព័ត៌មាន និងអ្នកជួយលើកម៉ូតូក្នុងគ្រោះថ្នាក់ចរាចរណ៍មួយលើស្ពានជ្រោយចង្វារ ដែលកើតឡើងកាលពីពេលថ្មីៗកន្លងទៅនេះ។ សម្តេចតេជោលើកឡើងថា សំដីរបស់អ្នកសារព័ត៌មានរូបនោះ មកលើបុរសដែលខិតខំជួយលើកម៉ូតូជនរងគ្រោះ មិនសមហេតុផលទាល់តែសោះ អ្វីដែលត្រូវធ្វើ គឺត្រូវជួយសង្គ្រោះគ្នាសិន ហើយមិនត្រូវលើស្ពានស្ទះចរាចរណ៍ជាដាច់ខាត។ ជាមួយគ្នានេះ សម្តេចតេជោ ហ៊ុន សែន បានថ្លែងនូវការងឿងឆ្ងល់ថា តើអ្នកសារព័ត៌មានដែល Live មានសិទ្ធិអី បានឱ្យគេសុំទោស? ពេលគេសុំទោសបែរជានិយាយថា មិនមែនសុំទោសចេញពីចិត្តទៀត។ សម្តេចបន្ថែមថា បើសុំទោសគួរតែសុំទោសនគរបាល តែបែរជាសុំទោសអ្នកសារព័ត៌មានទៅវិញ។ ការលើកឡើងរបស់សម្តេចតេជោ ធ្វើឡើងក្នុងឱកាសអញ្ជើញជាអធិបតីភាព ក្នុងពិធីប្រគល់សញ្ញាបត្រ ជូននិស្សិតជ័យលាភីសាកលវិទ្យាល័យវេស្ទើន ជាង៣ពាន់នាក់ នាព្រឹកថ្ងៃទី២៦ ខែមករា ឆ្នាំ២០២៣។ សម្តេចតេជោ ហ៊ុន សែន បានថ្លែងយ៉ាងដូច្នេះថា «រឿងនេះវាអត់ត្រូវអីទាល់តែសោះ ដំបូងបំផុតចាំបាច់ត្រូវជួយគ្នាសិន។ រឿងវាអត់សមហេតុសមផលទេ នូវការប្រើពាក្យសំដីបែបនេះ បើខ្លួនជាប៉ូលិសខ្ញុំមិនថាទេ ប៉ុន្តែគ្រាន់តែមានទូរស័ព្ទមួយ Live ហើយប្រើសំដីមិនសមបែបនេះ។ តែអ្នកខ្លះក៏រាងជ្រុលបន្តិចដែរថាគួរតែដកអាជ្ញាប័ណ្ណ អ្នកខ្លះរហូតដល់ថា ធ្វើឱ្យព្រះរាជអាជ្ញាធ្វើការចោទប្រកាន់ […]

សម្តេចតេជោ ហ៊ុន សែន បានមានប្រសាសន៍សម្តែងការហួសចិត្តចំពោះរឿងជម្លោះរវាងអ្នកសារព័ត៌មាន និងអ្នកជួយលើកម៉ូតូនៅលើស្ពានជ្រោយចង្វារ ហើយសម្តេចស្នើឱ្យបញ្ចប់ការវែកញែករឿងនេះផងដែរ។ សម្តេចបានថ្លែងនៅក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រជូននិស្សិតជ័យលាភីនៃសាកលវិទ្យាល័យវេស្ទើន សរុបចំនួន៣២៣២នាក់ នៅព្រឹកថ្ងៃទី២៦ ខែមករា ឆ្នាំ២០២៣នេះ។ សម្ដេចតេជោ ហ៊ុន សែន មានប្រសាសន៍ថា៖ «រឿងជ្រោយចង្វានេះគួរបញ្ឈប់ហើយ ក៏ឈប់វាទៅ កុំបន្តទៅទៀត ប៉ុន្តែអ្វីជាការហួសចិត្ត ខ្ញុំអត់យល់..ខុសត្រូវយ៉ាងណាគឺជារឿងមួយ តែស្ទះចរាចរណ៍លើស្ពាន វាមិនគួរឱ្យកើតមានទេ ការជួយគ្នាគឺជារឿងចាំបាច់ អ្វីដែលជារឿងឆ្គងគឺត្រង់ថា អ្នកសុំទោស មិនបានសុំទោសប៉ូលិសឯណា..ទៅសុំទោសអ្នកកាសែត តើកាសែតហ្នឹង មានសិទ្ធអី។ ខ្ញុំអត់ដឹងថា តើអ្នកកាសែតមានសិទ្ធិអីទៅគំរាមកំហែងគេរបៀបហ្នឹង រឿងហ្នឹងវាអត់ត្រូវអីទាល់តែសោះ ដំបូងបំផុតចាំបាច់ត្រូវតែជួយគ្នាសិន រឿងយ៉ាងណាក៏ដោយ តែរឿងអត់សមហេតុសមផលទេ នូវការប្រើពាក្យសម្ដីបែបនេះ បើខ្លួនជាប៉ូលិសខ្ញុំមិនថាទេ»។ សម្តេចតេជោ ហ៊ុន សែន ក៏បានស្នើឱ្យ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានហៅក្រុមអ្នកសារព័ត៌មានអនឡាញទៅអប់រំបន្ថែមរឿងក្រមសីលធម៌វិជ្ជាជីវៈផងដែរ៕

ស្នងការដ្ឋាននគរបាលរាជធានីភ្នំពេញ បានសម្រេចអនុវត្តវិន័យកងកម្លាំង និងបន្ថយឋានន្តរសក្តិមួយថ្នាក់លើមន្ត្រីចរាចរណ៍ម្នាក់ជិះម៉ូតូតាមឃាត់រថយន្តម៉ោង២យប់។ បើយោងតាមសេចក្តីបកស្រាយបំភ្លឺព័ត៌មាន របស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ មន្ត្រីរូបនោះត្រូវបានអនុវត្តវិន័យកងកម្លាំង ផ្ទេរចេញពីការិយាល័យចរាចរណ៍ ទៅកងអន្តរាគមន៍ ជាពិសេសបានស្នេីសុំទៅថ្នាក់ដឹកនាំដេីម្បីបន្ថយឋានន្តរសក្តិមួយថ្នាក់ពី អនុសេនីយ៍ទោ មកត្រឹមអនុសេនីយ៍ត្រី។ ដោយកាលពីថ្ងៃទី១៩ ខែមករា ឆ្នាំ២០២៣ វេលាម៉ោងប្រហែល ០២:០០ រំលងអាធ្រាត លោកអនុសេនីយ៍ទោ ជឹម សាលីន អត្តលេខ ៧៨៦៦៥ មន្រ្តីចំណុះការិយាល័យចរាចរណ៍ផ្លូវគោក បានធ្វើដំណើរចេញពីផ្ទះ ក្នុងគោលបំណងទៅប្រជុំជួរនៅស្នងការដ្ឋាននគរបាលរាជធានីភ្នំពេញ។ ពេលជិះមកដល់ស្ដុបចំការមន ក៏ឃើញរថយន្ត ០១គ្រឿង ម៉ាក Range Rover ពណ៌ខ្មៅ បើកបរក្នុងល្បឿនលឿន ពេលនោះលោកអនុសេនីយ៍ទោ ជឹម សាលីន បានជិះម៉ូតូតាមដល់ស្ដុបក្រសួងមហាផ្ទៃ ក៏ជិះទៅក្បែររថយន្ត ហើយអ្នករួមដំណើរក្នុងរថយន្ត សួរ តើខ្ញុំខុសអី ? ហើយលោកអនុសេនីយ៍ទោ ជឹម សាលីន តបថាបងស្រីអត់ពាក់ខ្សែរក្រវ៉ាត់សុវត្ថិភាព និងកុំថតអី សម្រួលបានអត់ ក្នុងន័យកុំឲ្យថតប៉ុណ្ណោះ។ ស្នងការដ្ឋាននគរបាលរាជធានីភ្នំពេញ បានឱ្យដឹងថាទៀតថា ជាក់ស្តែងការចុះអនុវត្តនេះមិនមានគោលការណ៍ ឬបទបញ្ជាពីប្រធានអង្គភាពនោះទេ […]

(ភ្នំពេញ)៖ គិតត្រឹមបំណាច់ឆ្នាំ២០២២ កម្ពុជាមានបំណុលសាធារណៈចំនួន ៩ ៩៧២.៥៩លានដុល្លារ ក្នុងនោះបំណុលក្រៅប្រទេស ៩ ៩៥៥.០៨លានដុល្លារ និងបំណុលក្នុងស្រុក តាមរយៈការលក់មូលបត្របំណុលមានជិត ២០លានដុល្លារ។ បំណុលសាធារណៈនេះ ត្រូវបានមន្ត្រីជាន់ខ្ពស់រាជរដ្ឋាភិបាលកម្ពុជា អះអាងថាមានកម្រិតទាប ត្រឹមតែប្រមាណ ៣៤% នៃផលិតផលក្នុងស្រុកសរុប (GDP) ហើយបើប្រៀបធៀបជាមួយបណ្តាប្រទេសនៅអាស៊ាន គឺកម្ពុជាមានបំណុលសាធារណៈតិចជាងគេបង្អស់ បន្ទាប់ពីប្រទេសប្រុយណេ ដែលជាប្រទេសមិនមានខ្ចីបំណុលពីបរទេសឡើយ។ ថ្លែងក្នុងវេទិកាសាធារណៈ ស្តីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ២០២៣» នៅព្រឹកថ្ងៃទី២៥ ខែមករា ឆ្នាំ២០២៣នេះ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ បានថ្លែងថា «ទិដ្ឋភាពរួមនៃការគ្រប់គ្រងថវិកាសេដ្ឋកិច្ច បំណុលរបស់កម្ពុជានៅតិចជាងគេទាំងអស់ នៅអាស៊ាននេះបំណុលសាធារណៈរបស់យើង [កម្ពុជា] តិចជាងគេ បន្ទាប់ពីប្រុយណេ ព្រោះប្រុយណេ អត់មានខ្ចីលុយគេចាយទេ ប៉ុន្តែដកប្រុយណេចេញ ខ្មែរបំណុលទាបជាងគេទាំងអស់ […] បំណុលសម្រាប់ពលរដ្ឋម្នាក់ៗក៏ទាបដែរ ប្រជាជនយើងម្នាក់ជំពាក់ប្រមាណ ៦០០ដុល្លារ តែសម្រាប់អាមេរិកវិញ បំណុលអាមេរិកមានជាង១២០% នៃ GDP […]

(សៀមរាប)៖ ចាប់តាំងពីអំឡុងខែវិច្ឆិកា ឆ្នាំ២០២២មក អាជ្ញាធរជាតិអប្សរា បានចាប់ផ្តើមដំណើរការរៀបចំធ្វើកម្រាលផ្លូវដើរ នៅមុខប្រាសាទអង្គរវត្ត ក្នុងគោលដៅ កាត់បន្ថយភាពសឹករិចរឹលរបស់ថ្ម នឹងគ្រប់គ្រងលំហូររបស់ភ្ញៀវទេសចរចូលមកទស្សនាក្នុងប្រាសាទ ឱ្យមានភាពល្អប្រសើរ។ លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ នៃអាជ្ញាធរជាតិអប្សរា មានប្រសាសន៍ថា គោលដៅចម្បង នៃការរៀបចំកម្រាលផ្លូវដើរ នៅបរិវេណប្រាសាទអង្គរវត្តនេះ ដើម្បីកាត់បន្ថយភាពសឹករិចរឹលនៃថ្មប្រាសាទ ដោយសារកន្លងមក ជាពិសេសរដូវវស្សាមានភ្លៀងធ្លាក់ បណ្តាលឱ្យមានភក់ជាប់មកជាមួយនូវបាតស្បែកជើង ជាហេតុនាំយកដី ទាំងនោះទៅកកិតជាមួយនឹងថ្ម។ ម្យ៉ាងទៀតគឺដើម្បីគ្រប់គ្រងលំហូររបស់ភ្ញៀវទេសចរឱ្យសមរម្យ ចៀសវាងការដើរនៅលើស្មៅ និងលើដី រក្សាបានរបៀបរៀបរយ និងរួមចំណែកលើកកម្ពស់សោភណ្ឌភាពប្រាសាទអង្គរវត្ត ឱ្យមានភាពបៃតងគ្រប់រដូវកាល។ លោកបន្តទៀតថា គម្រោងរៀបចំកម្រាលផ្លូវដើរនៅប្រាសាទអង្គរវត្ត ត្រូវបានអនុវត្តចំនួន៣ដំណាក់កាល ដោយដំណាក់កាលទី១នេះ អាជ្ញាធរជាតិអប្សរាទទួលបានថវិកាឧបត្ថម្ភពីមូលនិធិរបស់GIZ ក្រោមការសម្រួលរបស់អង្គការយូណេស្កូប្រចាំប្រទេសកម្ពុជា សម្រាប់រៀបចំកម្រាលផ្លូវដើរមានប្រវែងសរុប៤៧៦ម៉ែត្រ។ ជំហានដំបូង ដំណើរការរៀបចំកម្រាល សម្រេចលទ្ធផលប្រមាណ៦០ភាគរយហើយ មកដល់ពាក់កណ្តាលខែមករានេះ ដោយរំពឹងថា នឹងអាចរួចរាល់ជាស្ថាពរនៅចុងខែមករា ឬដើមខែកុម្ភៈ ឆ្នាំ២០២៣ខាងមុខ។ លោកបានបន្តទៀតថា កម្រាលផ្លូវដើរថ្មី ដែលអាជ្ញាធរជាតិអប្សរា ធ្វើការរៀបចំនេះ មានចំនួន៤កន្លែងផ្សេងគ្នា ចំណែកកម្រាលឈើចាស់ ក៏នៅរក្សាទុកដដែល។ អាជ្ញាធរជាតិអប្សរា […]

ក្រុមហ៊ុន Alphabet ដែលជាក្រុមហ៊ុនមេរបស់ Google កាលពីថ្ងៃទី២០ ខែមករា បានប្រកាសថា ខ្លួននឹងកាត់បន្ថយបុគ្គលិកចំនួន ១២,០០០នាក់ នាំឱ្យក្លាយជាក្រុមហ៊ុនបច្ចេកវិទ្យាចុងក្រោយបង្អស់នៅក្នុងសហរដ្ឋអាមេរិកដែលមានការកាត់បន្ថយបុគ្គលិកជាទ្រង់ទ្រាយធំ។ ការសម្រេចចិត្តនេះបានកើតឡើងតែប៉ុន្មានថ្ងៃបន្ទាប់ពីក្រុមហ៊ុន Microsoft បានប្រកាសថាខ្លួននឹងបញ្ឈប់បុគ្គលិកចំនួន ១០,០០០នាក់។ ក្នុងចំណោមបុគ្គលិក ១២,០០០នាក់ដែលត្រូវបានបញ្ឈប់ពីការងារ លោក Justin Moore ដែលជាអ្នកគ្រប់គ្រងបច្ចេកទេស ធ្វើការរយៈពេល១៦ឆ្នាំ ក៏ស្ថិតនៅក្នុងបញ្ជីដែលត្រូវ Google បញ្ឈប់ពីការងារ ដោយលោកទទួលអ៉ីម៉ែលពីក្រុមហ៊ុននៅម៉ោង៣ទាបភ្លឺ។ ក្នុងអំឡុងពេលរបស់គាត់នៅ Google លោក Justin Moore បានកាន់តំណែងជាអ្នកគ្រប់គ្រងបច្ចេកទេស ហើយមានការលះបង់ច្រើនជាង១៦ឆ្នាំសម្រាប់ក្រុមហ៊ុន តែមិនអាចជួយគាត់ឱ្យរួចផុតពីបញ្ជីបុគ្គលិកដែលមិនមានសំណាងចំនួន ១២,០០០នាក់ដែរ។ នៅលើគណនី Linkedin បុគ្គលិករូបនេះបានពណ៌នាពេលវេលាដែលគាត់បានចំណាយជាមួយក្រុមហ៊ុនបច្ចេកវិទ្យាយក្សថា ពេលវេលាដ៏អស្ចារ្យ បានធ្វើអ្វីដែលគាត់ស្រលាញ់ និងជួយអ្នកប្រើប្រាស់ជាច្រើន។ លោកបានបន្តថា «នេះធ្វើឱ្យអ្នកយល់ថាការងារមិនមែនជាអ្វីគ្រប់យ៉ាងនោះទេ សម្រាប់ Google បុគ្គលិកគ្រប់រូបអាចត្រូវបានជំនួស ដោយមិនគិតពីមុខតំណែងអ្វីនោះទេ»។ រូបលោកបានចាប់ផ្តើមជា software engineer ជាន់ខ្ពស់នៅក្រុមហ៊ុនក្នុងឆ្នាំ២០០៦ ហើយបានឡើងមុខតំណែងជាអ្នកគ្រប់គ្រងផ្នែកsoftware-engineering នៅ Google ក្នុងឆ្នាំ ២០១៩ […]

(ភ្នំពេញ)៖ ក្រសួងទេសចរណ៍ នៅថ្ងៃទី២៥ ខែមករា ឆ្នាំ២០២៣នេះ បានឱ្យដឹងថា នាឱកាសពិធីបុណ្យចូលឆ្នាំចិន រយៈពេល៤ថ្ងៃ (២១-២៤ ខែមករា ២០២៣) ភ្ញៀវទេសចរបានចេញដើរកម្សាន្ត្រទូទាំងប្រទេសសរុប ១,០៤៩,២២២នាក់ ក្នុងនោះភ្ញៀវជាតិ១,០០៧,១៦៦នាក់ និងភ្ញៀវបរទេស៤២,០៥៦នាក់។ គោលដៅទេសចរណ៍សំខាន់ៗរយៈពេល៤ថ្ងៃនេះ រួមមាន ខេត្តព្រះសីហនុ ២៩៦,០២៨នាក់, ខេត្តសៀមរាប ១០៥,៤៨១នាក់, ខេត្តបាត់ដំបង ១០២,៧៧៨នាក់, ខេត្តកំពត ៨២,១៩៩នាក់, ខេត្តប៉ៃលិន ៨១,៥០០នាក់, ខេត្តកំពង់ចាម ៦៧,៩១៤នាក់ និង ខេត្តកែប ៦៧,០៣០នាក់។ ដោយសារចូលឆ្នាំចិនឆ្នាំនេះប៉ះចំចុងសប្តាហ៍ ដូច្នេះយើងសង្កេតឃើញថាចរន្តភ្ញៀវទេសចរ និងការធ្វើដំណើរកម្សាន្តរបស់ប្រជាពលរដ្ឋទៅកាន់គោលដៅទេសចរណ៍នានាមានសភាពផុសផុលច្រើន ខណៈដែលប្រជាពលរដ្ឋមួយចំនួនបានចាប់ផ្តើមធ្វើដំណើរទៅស្រុកកំណើតតាំងពីល្ងាចថ្ងៃសុក្រដើម្បីរៀបចំសែនតាមប្រពៃណីចិន។ ប្រជាជនមួយចំនួនបានត្រឡប់ចូលរាជធានីភ្នំពេញកាលពីថ្ងៃចន្ទ ហើយខ្លះទៀតបានត្រលប់ចូលវិញនាល្ងាចម្សិលម៉ិញ ខណៈដែលអាជីវករនៅតាមផ្សារ និងលក់ដូរនៅតាមផ្ទះបានបិទតូប និងហាងជាបណ្តោះអាសន្នក្នុងរយៈពេលចូលឆ្នាំនេះ ដើម្បីជួបជុំគ្រួសារ និងដើរកម្សាន្ត ស្របពេលអង្គភាព និងស្ថាប័នមួយចំនួនបានអនុញ្ញាតឱ្យបុគ្គលិកឈប់សម្រាក ដោយដាក់ជាកម្មវិធីប្រជុំបូកសរុបប្រចាំឆ្នាំជាដើម។ គោលដៅទេសចរណ៍ទូទាំងប្រទេសសុទ្ធតែទទួលបានចំនួនភ្ញៀវទេសចរកកកុញ ខណៈប្រជាពលរដ្ឋភាគច្រើនដើរកម្សាន្តជាលក្ខណៈក្រុមគ្រួសារ ហើយខ្លះទៀតដើរកម្សាន្តច្រើនគោលដៅ។ ដោយឡែក សម្រាប់ខេត្តព្រះសីហនុភ្ញៀវទេសចរភាគច្រើនទៅព្រឹកមកវិញល្ងាចជាមួយការធ្វើដំណើរតាមផ្លូវល្បឿនលឿន។ ទន្ទឹមនឹងនេះ ប្រជាពលរដ្ឋមួយចំនួនបានយកតាមខ្លួននូវម្ហូបអាហារដែលបានសែនរួច ទៅបរិភោគដើម្បីកាត់បន្ថយចំណាយមួយចំនួនផងដែរ។ ចំពោះការគ្រប់គ្រងសន្តិសុខ […]

ក្រោយរងការរិះគន់ពីសំណាក់មហាជន ទៅនឹងសកម្មភាពគ្រូចុះអនុវត្តវិន័យដើរឈូសសក់សិស្សប្រុសរហូតឆក នៅសាលាវិទ្យាល័យសំពៅលូន មន្ទីរអប់រំ យុវជននិងកីឡា ខេត្តបាត់ដំបង ក៏បានធ្វើការបកស្រាយទៅកាន់សាធារណជនភ្លាមៗផងដែរ។ យោងតាមការបង្ហោះរបស់ទំព័រហ្វេសប៊ុកផេក មន្ទីរអប់រំ យុវជននិងកីឡា ខេត្តបាត់ដំបង បានបកស្រាយថា ៖ «ការចុះអនុវត្តវិន័យ របស់លោកគ្រូអ្នកគ្រូនឹងក្រុមប្រឹក្សាយុវជន… ថ្ងៃច័ន្ទ ២ កើត ខែមាឃ ឆ្នាំខាល ចត្វាស័ក ពស ២៥៦៦ ត្រូវនឹងថ្ងៃទី២៣ ខែមករា ឆ្នាំ២០២៣។ វិទ្យាល័យសម្ដេចតេជោហ៊ុនសែនសំពៅលូន ដោយមានការលើកឡើងក៏ដូចជាមានមតិរិះគន់មួយចំនួនបានកើតឡើងចំពោះសកម្មភាពគណៈគ្រប់គ្រងលោកគ្រូអ្នកគ្រូនៃវិទ្យាល័យសម្ដេចតេជោហ៊ុនសែនសំពៅលូន។យើងខ្ញុំសូមធ្វើការបកស្រាយដូចតទៅ៖ ចំពោះគោលបំណងនៃការរឹតបន្ដឹងវិន័យសាលាបានដាក់ចេញនូវគោលការមួយចំនួនក្នុងនោះក៏មានលក្ខខណ្ឌសម្រាប់សិស្សប្រុសត្រូវកាត់សក់ឱ្យខ្លី។ សាលាបានជូនដំណឹងក៏ដូចជាមានការឯកភាពពីសាមីសិស្សផងដែរហើយសាលាបានកំណត់ពេលសមស្របសម្រាប់ការអនុវត្តរបស់សិស្សផងដែរ។ ចំពោះមួយចំនួនដែលគណៈគ្រប់គ្រងក៏ដូចជាលោកគ្រូអ្នកគ្រូបានអនុវត្តនូវកម្រិតវិន័យនោះដោយសារសិស្សទាំងនោះមិនបានអនុវត្តតាមការណែនាំក៏ដូចជាគោលដែលខ្លួនបានព្រមព្រៀង។ ដូច្នេះសូមសាធារណជនទាំងអស់កុំមានការលើកលើកឡើងឬបកស្រាយផ្សេងៗប៉ះពាល់ពាល់ដល់ស្ថាប័នក៏ដូចជាថ្នាក់ដឹកនាំទៀត។ សូមអរគុណ!»៕

ឯកឧត្តម ជុំ កុសល រដ្ឋលេខាធិការក្រសួងព័ត៌មាន នៅរសៀលថ្ងៃទី២៤ ខែមករា ឆ្នាំ២០២៣ បានលើកឡើងនូវករណីមួយដែលកំពុងតែមានការជជែកវែកញែក ក្រោយមានករណីបុរសម្នាក់ បានឃើញគេដួលម៉ូតូ​នៅស្ពានជ្រោយចង្វារ ក៏បានទៅជួយលេីកម៉ូតូគេ ប៉ុន្តែបែរត្រូវរកការស្តីបន្ទោស​ សម្លុត​ស្រែកគំហក​ ពីសំណាក់សមត្ថកិច្ច ជាពិសេសគឺអ្នកសារព័ត៌មានល្បីឈ្មោះម្នាក់។ ឯកឧត្តមបានលើកឡើងថា បុរសរូបនោះមានចិត្តសង្រ្គោះ ឃើញគ្រោះថ្នាក់នៅចំពោះមុខក៏ចុះជួយ ជាកាយវិការគួរឲ្យកោតសរសើរ ប៉ុន្តែបែរជាគាត់ត្រូវបានទទួលរងនូវការស្តីបន្ទោសពីអ្នកសារព័ត៌មាន និងសមត្ថកិច្ចនគរបាល។ ឯកឧត្តមបានសរសេររៀបរាប់ថា៖ «ឃើញហើយទើសចិត្តពេក! មនុស្សមានចិត្តសង្រ្គោះ ឃើញគ្រោះថ្នាក់នៅចំពោះមុខក៏ចុះជួយ។ នេះគឺជាកាយវិការគួរឲ្យកោតសរសើរចំពោះគាត់! ចុះហេតុអីបានជារូបគាត់ត្រូវបានទទួលរងនូវការស្តីបន្ទោសពីអ្នកសារព័ត៌មាន និងសមត្ថកិច្ចនគរបាលទៅវិញ?។ ករណីលើកម៉ូតូចេញ មិនមែនជារឿងខុសច្បាប់អីនោះទេ គ្រាន់តែបាត់ដានដែលជាហេតុនាំឲ្យសមត្ថកិច្ចនគរបាលចរាចរណ៍ពិបាកក្នុងការវាស់វែងតែប៉ុណ្ណោះ ប៉ុន្តែបុរសនោះគាត់បានលើកដៃសុំទោសហើយ ដោយសារតែគ្នាមិនដឹង។ គួរណាស់តែអស់លោកដែលដឹងនិយាយពន្យល់ប្រាប់គាត់ដោយសំដីទន់ភ្លន់ ចាំបាច់ស្រែកគំហកដាក់គ្នា?។ កាយវិការ និងពាក្យសំដីរបស់អ្នកសារព័ត៌មានបែបនេះគឺជាការបំបាក់ទឹកចិត្តដល់អ្នកក្រោយៗទៀត ដែលជួបរឿងបែបនេះខ្លាចមិនហ៊ានជួយទេ។ សូមគិតឡើងវិញ កុំប្រើតួនាទីជ្រុលចេញឆ្ងាយពីតួនាទីស្នូលរបស់ខ្លួនពេក វានាំឲ្យបាត់តម្លៃ»៕