(ហ្សាការតា)៖ អាជ្ញាធរឥណ្ឌូណេស៉ី បាននិយាយថា នាថ្ងៃអង្គារ ទី៧ ខែតុលា កិច្ចប្រឹងប្រែងស្វែងរកជនគ្រោះ ក្នុងករណីបាក់ស្រុតអគារសាលារៀន កាលពីសប្តាហ៍កន្លងទៅ គឺបានបិទបញ្ចប់ហើយ ជាមួយតួលេខអ្នកស្លាប់ផ្លូវការចុងក្រោយ ៦៧នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ ប្រធានទីភ្នាក់ងារជាតិរុករកនិងជួយសង្រ្គោះរបស់ឥណ្ឌូណេស៉ី លោក Mohammad Syafii បានថ្លែងក្នុងសន្និសីទសារព័ត៌មានយ៉ាងដូច្នេះថា «ឈានចូលដល់ថ្ងៃទី៩ យើងបានសម្រេចបិទបញ្ចប់ប្រតិបត្តិការរុករក និងសង្រ្គោះសម្រាប់ជនរងគ្រោះ»។ នាយកផ្នែកប្រតិបត្តិការ​របស់ទីភ្នាក់ងារ លោក Yudhi Bramantyo បាននិយាយថា ក្រុមសង្រ្គោះនាថ្ងៃអង្គារនេះ បានរុះរើគំនរបាក់បែកចេញអស់ហើយ នៅកន្លែងដួលរលំអគារ និងបានពិនិត្យមើលទីតាំងស្រុង ហើយសន្មត់ថា ទំនងជានឹងមិនមានសាកសពបន្ថែមទៀត ដែលនឹងត្រូវរក​ឃើញនោះទេ។ គួរបញ្ជាក់ថា អគារសាលារៀនខាងលើ ដែលជាសាលាអ៉ីស្លាម និងមានច្រើនជាន់ ស្រាប់តែបានបាក់ស្រុតភ្លាមៗនៅកោះជ្វា កាលពីថ្ងៃចន្ទដើមសប្តាហ៍មុន ស្របពេលដែលសិស្សកំពុងជួបជុំគ្នា ដើម្បីធ្វើការថ្វាយបង្គំប្រចាំថ្ងៃ។ បើតាមលោក Yudhi មានជនរងគ្រោះសរុបប្រហែល១៧០នាក់ ស្ថិតក្នុងហេតុការណ៍នោះ ដោយ៦៧នាក់បានបាត់បង់ជីវិត ក្នុងនោះរួមមានទាំង​បំណែកសាកសព៨ផ្នែក ខណៈមនុស្ស១០៤នាក់ បានរួចរស់ជីវិត៕ ផ្ដល់សិទ្ធិដោយ៖ Fresh News

(ហាណូយ)៖ ភ្លៀងធ្លាក់ខ្លាំងដោយសារតែឥទ្ធិពលព្យុះ Matmo បង្កឱ្យមានទឹកជំនន់តាមផ្នែកខ្លះនៃទីក្រុងហាណូយ នៅថ្ងៃអង្គារ ទី៧ ខែតុលា ដែលជាការជន់លិចថ្មីទៀត បន្ទាប់ពីជំនន់ទឹកភ្លៀងកើតឡើងជាបន្តបន្ទាប់ ក្នុងរដ្ឋធានីរបស់វៀតណាមមួយនេះ ក្នុងរយៈពេលមួយខែ ខណៈដែលមានព្យុះបោកបក់ពាសពេញតំបន់ភាគខាងជើង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ ភ្លៀងខ្លាំងបានជន់លិចផ្លូវសំខាន់ៗ ធ្វើឱ្យម៉ូតូ និងរថយន្តជាប់គាំង បង្ខំឱ្យពលរដ្ឋធ្វើដំណើរឆ្លងកាត់ទឹកជម្រៅត្រឹមកំភួនជើង។ ខណ្ឌនានាខាងក្នុងទីក្រុងហាណូយ រងផលប៉ះពាល់ជាងគេ ដោយប្រព័ន្ធបង្ហូរទឹកពិបាកទប់ទល់នឹងបរិមាណទឹកភ្លៀង។ សាលារៀនមួយចំនួនត្រូវបានបិទជាបណ្តោះអាសន្ន ឬប្តូរទៅរៀនតាមអនឡាញ រីឯជើងហោះហើរចេញ-ចូលជាច្រើននៅអាកាសយានដ្ឋានអន្តរជាតិ Noi Bai ត្រូវពន្យារពេល ឬកំណត់កាលវិភាគឡើងវិញ។ គួរបញ្ជាក់ថា កាលពីសប្តាហ៍មុន ព្យុះទីហ្វុង Bualoi បាននាំឱ្យមានទឹកជំនន់ក្នុងទីក្រុងហាណូយ ឆក់យកជីវិតមនុស្ស ៥១នាក់ និងបង្កការខូចខាតគិតជាទឹកប្រាក់ ៦០០លានដុល្លារ។ ប្រជាជនខ្លះទើបនឹងបោសសម្អាតកម្ទេចកម្ទីក្រោយព្យុះ មុនការមកដល់ថ្មីនៃព្យុះ Matmo៕ ផ្ដល់សិទ្ធិដោយ៖ Fresh News

(ប៉ារីស)៖ នាថ្ងៃចន្ទ ទី៦ ខែតុលា ប្រធានាធិបតីបារាំង លោក Emmanuel Macron បានទទួលយកការលាលែងពីតំណែង​របស់នាយករដ្ឋមន្រ្តី លោក Sebastien Lecornu បន្ទាប់ពីលោក Lecornu ទើបតែត្រូវបានតែងតាំងឱ្យកាន់តួនាទីនេះ កាលពី​ពេលថ្មីៗកន្លងទៅប៉ុណ្ណោះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ ប្រការនេះនាំឱ្យបារាំងធ្លាក់ចូលវិបត្តិជាប់គាំងផ្នែកនយោបាយបន្ថែមទៀត។ លោក Macron បានតែងតាំងលោក Lecornu ជា​នាយករដ្ឋមន្រ្តីកាលពីដើមខែកញ្ញា ប៉ុន្តែសមាសភាពគណៈរដ្ឋមន្រ្តី ដែលលោកប្រធានាធិបតីបារាំង បានប្រកាសកាលពីយប់ថ្ងៃអាទិត្យ បានទទួលរងការរិះគន់ខ្លាំង ពីបណ្តាគណបក្សផ្សេងៗនៅក្នុងសភា។ គួរបញ្ជាក់ថា លោក Sebastien Lecornu វ័យ៣៩ឆ្នាំ គឺជានាយករដ្ឋមន្រ្តីទី៧ របស់លោក Macron និងជានាយករដ្ឋមន្រ្តី៥ គិតក្នុងរយៈពេល២ឆ្នាំ។ លោក Lecornu ដំបូងឡើយ មានបំណងចង់ស្វែងរកការគាំទ្រពីគណបក្សនានា នៅក្នុងសភាដែលមាន​ការបែកបាក់យ៉ាងជ្រៅ។ នាយករដ្ឋមន្រ្តីបារាំង២រូបមុនលោក គឺលោក Francois Bayrou និង Michel Barnier កន្លងមកសុទ្ធតែរបូតតំណែង ​ដោយសារត្រូវបានសភាបោះឆ្នោតដកសេចក្តីទុកចិត្ត៕ ផ្ដល់សិទ្ធិដោយ៖ Fresh […]

(សេអ៊ូល)៖ មេដឹកនាំកូរ៉េខាងជើង លោក គីម ជុងអ៊ុន បានធ្វើទស្សនកិច្ចចុះត្រួតពិនិត្យនាវាពិឃាដ Choe Hyon នៅឯពិព័រណ៍យោធាមួយកាលពីថ្ងៃអាទិត្យ ទី៥ ខែតុលា ជាមួយការក្រើនរំឮកឱ្យ កងទ័ពជើងទឹកកូរ៉េខាងជើងប្រុងជើងការជាប់ជានិច្ចដើម្បីកំញើញ ឬទប់ស្កាត់ និងវាយបកលើការបង្ករឿងពីសត្រូវ។ នេះបើតាមប្រព័ន្ធផ្សព្វផ្សាយកូរ៉េខាងជើង ដកស្រង់ចេញផ្សាយដោយទីភ្នាក់ងារសារព័ត៌មាន Reuters។ ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃចន្ទ ទី៦ ខែតុលា បានរាយការណ៍ថាពិព័រណ៍អភិវឌ្ឍវិស័យការពារជាតិប្រចាំឆ្នាំត្រូវបានរៀបចំឡើងដើម្បីលើកកម្ពស់ការអភិវឌ្ឍគួរឱ្យកត់សម្គាល់ នៃការធ្វើទំនើបកម្មយោធារបស់កូរ៉េខាងជើង។ ក្រុមអ្នកវិភាគបាននិយាយថាគេមិនទាន់ដឹងច្បាស់ថាតើពេលណា ទើបនាវាពិឃាដ Choe Hyon ត្រូវបានដាក់ឱ្យធ្វើប្រតិបត្តិការជាផ្លូវការនោះទេ។ តែ SI Analytics ជាក្រុមហ៊ុនមួយមានមូលដ្ឋានក្នុងប្រទេសកូរ៉េខាងត្បូង បានឱ្យដឹងដោយផ្អែកលើរូបភាពផ្កាយរណបកាលពីខែកញ្ញាថាកូរ៉េខាងជើងបានបញ្ចប់ការដំឡើងគ្រឿងម៉ាស៊ីនលើនាវា SI Choe Hyon និងបានព្យាករថានាវាពិឃាដនេះអាចនឹងធ្វើតេស្ដសាកល្បងនៅឯសមុទ្រក្នុងពេលឆាប់ៗ ឬអាចក្នុងខែតុលានេះ។ គួរបញ្ជាក់ថា កាលពីខែឧសភាកន្លងទៅ នាវាពិឃាដ Choe Hyon បានក្រឡាប់លិចមួយផ្នែកអំឡុងពិធីសម្ពោធមួយក្រោមការចូលរួមដោយផ្ទាល់ពីលោក គីម ជុងអ៊ុន ដែលបានចាត់ទុកកំហុសនេះ ជាបទល្មើសព្រហ្មទណ្ឌ៕ ផ្តល់សិទ្ធិដោយ៖ Fresh News

(បរទេស)៖ ក្នុង​ព្រឹត្តិការណ៍​វិទ្យាសាស្ត្រ​ជា​ប្រវត្តិសាស្ត្រ​មួយ ក្រុម​អ្នកស្រាវជ្រាវ​បាន​ប្រើប្រាស់​បច្ចេកវិទ្យា​កែប្រែ​ហ្សែន CRISPR ដើម្បី​លុប​បំបាត់​ឌីអិនអេ (DNA) នៃ​មេរោគ​អេដស៍ (HIV) ចេញពី​កោសិកា​មនុស្ស​បាន​ទាំងស្រុង ដែល​ជា​ការ​បញ្ឈប់​ការ​ត្រឡប់​មក​វិញ​របស់​មេរោគ​នេះ​ប្រកប​ដោយ​ប្រសិទ្ធភាព។ នេះ​ជា​លើក​ទីមួយ​ហើយ​ដែល​អ្នក​វិទ្យាសាស្ត្រ​អាច​ដក​ចេញ​នូវ​សារធាតុ​ហ្សែន​របស់​មេរោគ​ពី​កោសិកា​ដែល​ឆ្លង​មេរោគ​បាន​យ៉ាង​ពេញលេញ ដែល​ជា​សញ្ញា​មួយ​នៃ​ការ​ឈាន​ទៅ​មុខ​ដ៏​ធំធេង​ឆ្ពោះ​ទៅ​រក​ការព្យាបាល​មេរោគ HIV/អេដស៍​ជា​អចិន្ត្រៃយ៍។ របកគំហើញ​នេះ​ដំណើរការ​ដោយ​ការ​ប្រើប្រាស់ CRISPR ជា​កន្ត្រៃ​ម៉ូលេគុល ដើម្បី​កំណត់​គោលដៅ និង​កាត់​ផ្តាច់​យ៉ាង​ជាក់លាក់​នូវ​ឌីអិនអេ​មេរោគ HIV ដែល​លាក់​ខ្លួន​នៅ​ក្នុង​កោសិកា​មនុស្ស។ នៅ​ពេល​ដែល​ឌីអិនអេ​មេរោគ​ត្រូវ​បាន​ដក​ចេញ កោសិកា​ទាំងនោះ​នៅ​តែ​មាន​សុខភាព​ល្អ និង​គ្មាន​ការ​ឆ្លង​មេរោគ ដោយ​រារាំង​មេរោគ​មិន​ឱ្យ​ចម្លង​ខ្លួន ឬ​លេច​ឡើង​វិញ​បាន​ឡើយ។ ការ​រក​ឃើញ​នេះ​អាច​នឹង​បដិវត្តន៍​វិធីសាស្ត្រ​ព្យាបាល​មេរោគ HIV ដោយ​ផ្តល់​ក្តីសង្ឃឹម​ដល់​មនុស្ស​រាប់​លាន​នាក់​ដែល​កំពុង​រស់នៅ​ជាមួយ​មេរោគ​នេះ​ទូទាំង​ពិភពលោក។ មិន​ដូច​ការព្យាបាល​បច្ចុប្បន្ន​ដែល​គ្រាន់តែ​ទប់ស្កាត់​មេរោគ HIV ហើយ​តម្រូវ​ឱ្យ​ប្រើ​ថ្នាំ​អស់​មួយ​ជីវិត​នោះ​ទេ វិធីសាស្ត្រ​ថ្មី​នេះ​គឺ​ជា​ការ​លុប​បំបាត់​គំរូ​ហ្សែន​របស់​មេរោគ​ដោយ​ផ្ទាល់។ អ្នក​ជំនាញ​បាន​លើកឡើង​ថា ការស្រាវជ្រាវ​នេះ​នៅ​ស្ថិត​ក្នុង​ដំណាក់កាល​ដំបូង​នៅ​ឡើយ ប៉ុន្តែ​លទ្ធផល​គឺ​ពិតជា​មាន​សង្ឃឹម​ខ្លាំង​ណាស់។ ការ​សាកល្បង​លើ​មនុស្ស​នឹង​ក្លាយជា​ជំហាន​សំខាន់​បន្ទាប់ ដើម្បី​កំណត់​ថា​តើ​វិធីសាស្ត្រ​នេះ​អាច​ប្រើប្រាស់​ដោយ​សុវត្ថិភាព និង​ប្រសិទ្ធភាព​ក្នុង​កម្រិត​ធំ​ជាង​នេះ​បាន​ដែរ​ឬ​ទេ។ ប្រសិន​បើ​ទទួល​បាន​ជោគជ័យ CRISPR អាច​ក្លាយជា​ឧបករណ៍​ដែល​ទីបំផុត​នឹង​បញ្ចប់​ការ​ប្រយុទ្ធ​ប្រឆាំង​នឹង​មេរោគ HIV អស់​ជា​ច្រើន​ទសវត្សរ៍ ហើយ​ត្រួសត្រាយ​ផ្លូវ​សម្រាប់​ការ​ព្យាបាល​ការ​ឆ្លង​មេរោគ​ផ្សេងៗ​ទៀត៕ ផ្តល់សិទ្ធិដោយ៖ Fresh News

(ហ្សាការតា)៖ នាថ្ងៃអាទិត្យ ទី៥ ខែតុលា អាជ្ញាធរនៅប្រទេសឥណ្ឌូណេស៉ី បានឱ្យដឹងថា តួលេខអ្នកបាត់បង់ជីវិត បានបន្តកើនដល់​៣៧នាក់ ក្នុងករណីបាក់ស្រុតអគារសាលារៀន កាលពីដើមសប្តាហ៍ ខណៈក្រុមសង្រ្គោះបន្តទាញយកសាកសពជនរងគ្រោះចេញពីក្រោម​គំនរអគារ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ មន្រ្តីទីភ្នាក់ងាររុករកនិងសង្រ្គោះ លោក Yudhi Bramantyo បាននិយាយថា គិតមកទល់ព្រឹកថ្ងៃអាទិត្យនេះ មនុស្ស១០៤នាក់ ដែលស្ថិតក្នុងឧបទ្ទវហេតុខាងលើ ត្រូវបានជួយសង្រ្គោះដោយមានសុវត្ថិភាព ខណៈ៣៧នាក់បានស្លាប់ ហើយ២៦នាក់ផ្សេងទៀត នៅបន្តបាត់ខ្លួន។ គួរបញ្ជាក់ថា អគារសាលារៀននោះ ដែលជាសាលាអ៉ីស្លាម និងមានច្រើនជាន់ ស្រាប់តែបានបាក់ស្រុតភ្លាមៗ កាលពីថ្ងៃចន្ទ ស្របពេលដែលសិស្សកំពុងជួបជុំគ្នា ដើម្បីធ្វើការថ្វាយបង្គំប្រចាំថ្ងៃ៕ ផ្ដល់សិទ្ធិដោយ៖ Freshnews

(បាងកកង)៖ ឆ្មាំពន្ធនាគារ ៣នាក់បានបាត់បង់ជីវិត នៅក្នុងហេតុការណ៍បាញ់ប្រហារមួយនៅឯផ្ទះស្នាក់របស់ឆ្មាំពន្ធនាគារ ស្ថិតនៅក្នុងខេត្ត Nakhon Ratchasima ប្រទេសថៃ។ នេះបេីយោងតាមការចេញផ្សាយដោយកាសែតថៃ Khaosod នៅថ្ងៃសៅរ៍ ទី៤ ខែតុលា ឆ្នាំ ២០២៥។ ការបាញ់ប្រហារនេះបានកើតឡើង នៅវេលាម៉ោង ៨យប់ថ្ងៃសៅរ៍នេះ។ ឆ្មាំពន្ធនាគារជាបុរសពីរនាក់ និងស្រ្តីម្នាក់បានស្លាប់។ ក្រុមអ្នកស៊េីបអង្កេត បង្ហើបឱ្យដឹងថា បុរសជាឆ្មាំពន្ធនាគារពីរនាក់ខាងលេីមានទំនាស់នឹងគ្នាមុនពេលកេីតហេតុ។ ប៉ូលិសកំពុងបន្តស៊េីបអង្កេតស្ថានភាពនៃការបាញ់ប្រហារ និងលំដាប់លំដោយនៃហេតុការណ៍នេះ៕ ផ្ដល់សិទ្ធិដោយ៖ Freshnews

(វ៉ាស៊ីនតោន)៖ នាយកការិយាល័យថវិកាសេតវិមាន លោក Russell Vought បាននិយាយកាលពីថ្ងៃពុធ ថា រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ នឹងចាប់ផ្តើមការបណ្តេញបុគ្គលិករដ្ឋទ្រង់ទ្រាយធំ ក្នុងរយៈពេល «មួយទៅពីរ» ថ្ងៃខាងមុខទៀត។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ។ ការប្រកាសនេះធ្វើឡើងនៅថ្ងៃដំបូងនៃការបិទទ្វាររដ្ឋាភិបាលសហព័ន្ធ ដែលជាលើកដំបូងក្នុងរយៈពេលជិត៧ឆ្នាំ បន្ទាប់ពីព្រឹទ្ធសភាបានបរាជ័យក្នុងការអនុម័តច្បាប់ចំណាយរយៈពេលខ្លី។ លោក ត្រាំ បាននិយាយកាលពីថ្ងៃអង្គារ ថា៖ «រឿងល្អជាច្រើនអាចកើតចេញពីការបិទទ្វាររដ្ឋាភិបាល…យើងអាចកម្ចាត់ចោលនូវរឿងជាច្រើនដែលយើងមិនចង់បាន»។ អនុប្រធានាធិបតីអាមេរិក លោក ជេឌី វាន់ស បានបញ្ជាក់ថា ការបណ្តេញចេញនឹងកើតមាននៅពេលឆាប់ៗ ប្រសិនបើរដ្ឋាភិបាលមិនបើកដំណើរការឡើងវិញ។ លោកបានថ្លែងថា៖ «យើងនឹងត្រូវបញ្ឈប់មនុស្សមួយចំនួនពីការងារ ប្រសិនបើការបិទទ្វារនៅតែបន្ត»។ គួរបញ្ជាក់ថា យោងតាមការិយាល័យថវិកាសភា (CBO) បុគ្គលិករដ្ឋប្រហែល៧៥០,០០០នាក់អាចនឹងត្រូវបង្ខំឱ្យផ្អាកការងារជារៀងរាល់ថ្ងៃ ដែលត្រូវចំណាយថវិកា៤០០លានដុល្លារជារៀងរាល់ថ្ងៃទៅលើប្រាក់បំណាច់។ ទោះជាយ៉ាងណា អ្នកជំនាញបានលើកឡើងថា ការបណ្តេញបុគ្គលិកនេះ នឹងមិនអាចជួយសន្សំសំចៃថវិកាជាតិបានច្រើននោះទេ។ លោក Dean Baker សហស្ថាបនិកនៃមជ្ឈមណ្ឌលស្រាវជ្រាវសេដ្ឋកិច្ច និងគោលនយោបាយ បានពន្យល់ថា ទោះបីជាត្រូវបញ្ឈប់បុគ្គលិក២០,០០០នាក់ពីការងារក៏ដោយ ក៏វានឹងជួយសន្សំសំចៃថវិកាបានតិចជាង០.០៣% នៃថវិកាសហព័ន្ធសរុបប៉ុណ្ណោះ៕ ផ្ដល់សិទ្ធិដោយ៖ Fresh News

(ហាណូយ)៖ អាជ្ញាធរគ្រប់គ្រងគ្រោះមហន្តរាយនៃប្រទេសវៀតណាម នាថ្ងៃព្រហស្បតិ៍ ទី២ ខែតុលា បានឱ្យដឹងថា ចំនួនអ្នកស្លាប់ ដោយសារព្យុះទីហ្វុង Bualoi និងគ្រោះទឹកជំនន់ដែលវាបង្កឡើង បានកើនដល់យ៉ាងហោច៣៦នាក់។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters។ ចំណែកមនុស្ស២១នាក់ទៀត នៅបន្តបាត់ខ្លួន។ ជាមួយគ្នានេះ ការវាយប្រហារនៃព្យុះខាងលើ បានបំផ្លិចបំផ្លាញផ្លូវ សាលារៀន និង​សំណង់ផ្សេងៗទៀត ហើយបណ្តាលឱ្យមានការដាច់ចរន្តអគ្គិសនី សម្រាប់ប្រជាជនរាប់ពាន់គ្រួសារ។ ផ្ទះសម្បែងសរុបច្រើនជាង ២១០ ០០០ខ្នង បានរងខាតខូចខាតឬជន់លិច ខណៈផ្ទៃដីដាំដុះស្រូវនិងដំណាំផ្សេងទៀតទំហំលើស៥១ ០០០ហិកតា ត្រូវបានបំផ្លាញ។ គួរបញ្ជាក់ថា ព្យុះទីហ្វុង Bualoi បានបោកបក់មកដល់តំបន់ភាគកណ្តាលប្រទេសវៀតណាម កាលពីថ្ងៃចន្ទដើមសប្តាហ៍នេះ។ យោង​តាមការព្យាកររបស់អាជ្ញាធរវៀតណាម នាថ្ងៃព្រហស្បតិ៍នេះ ការខូចខាតទ្រព្យសម្បត្តិដែលបង្កឡើងដោយព្យុះ Bualoi មានទំហំខ្ទង់​១១.៥ទ្រីលានដុល្លារ ឬ៤៣៥.៨០លានដុល្លារ កើនឡើងពីការព្យាករក្នុងរបាយការណ៍ កាលពីថ្ងៃពុធ ដែលមានទំហំ​៣០៣លានដុល្លារ៕ ផ្ដល់សិទ្ធិដោយ៖ Fresh News

(វ៉ាស៉ីនតោន)៖ សហរដ្ឋអាមេរិក បានអះអាងថា កាលពីថ្ងៃចន្ទ ទី២៩ ខែកញ្ញា នាយករដ្ឋមន្រ្តីអ៉ីស្រាអែល លោក Benjamin Netanyahu បានទូរសព្ទទៅនាយករដ្ឋមន្រ្តីកាតា ចេញពីសេតវិមាន ហើយលោកបានសុំអភ័យទោសសម្រាប់ការវាយប្រហារ​លើទឹកដីរបស់កាតា ដោយកំណត់គោលដៅប្រឆាំងក្រុមហាម៉ាស និងសន្យាមិនធ្វើបែបនោះម្តងទៀតឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ លោក Netanyahu ដែលចាប់តាំងពីបញ្ជាឱ្យបើកការវាយប្រហារកាលពីថ្ងៃទី៩ ខែកញ្ញា លើទឹកដីកាតា គឺមិនបានបន្ទន់ឥរិយាបថ​បន្តិចសោះឡើយនោះ បានធ្វើកិច្ចសន្ទនាទូរសព្ទខាងលើ អំឡុងពេលរូបលោកជួបជាមួយ ប្រធានាធិបតីអាមេរិក លោក ដូណាល់ ត្រាំ ដើម្បីពិភាក្សាគ្នា អំពីបទឈប់បាញ់សម្រាប់សង្រ្គាមនៅហ្កាហ្សា។ ជាច្រើនសប្តាហ៍កន្លងមកនេះ លោក Netanyahu បានប្រកាន់ជំហរយ៉ាងម៉ឺងម៉ាត់ការពារទង្វើរបស់ខ្លួន ហើយរិះគន់ប្រទេសកាតា ដែលបានផ្តល់កន្លែងជ្រកកោនដល់ក្រុមហាម៉ាស។ តាមពិតទៅ ការរៀបចំនោះជាមួយក្រុមហាម៉ាស គឺត្រូវបានធ្វើឡើងយូរមកហើយ​ និងជាមួយការយល់ស្របពីអ៉ីស្រាអែលថែមទៀត ព្រោះវារក្សាវត្តមានក្រុមហាម៉ាស ឱ្យស្ថិតក្នុងប្រទេសមួយ ដែលមានទំនាក់ទំនង​ជិតស្និទ្ធជាមួយអាមេរិក មិនមែនអ៉ីរ៉ង់។ យ៉ាងណាមិញ លោកនាយករដ្ឋមន្រ្តីអ៉ីស្រាអែល បានលើកឡើងថា ការគណនាគឺត្រូវបានផ្លាស់ប្តូរ ចាប់តាំងពីការវាយប្រហារ កាលពី​ថ្ងៃទី៧ ខែតុលា ឆ្នាំ២០២៣ របស់ក្រុមហាម៉ាស។ គួរបញ្ជាក់ថា […]