(កាប៊ុល)៖ រដ្ឋាភិបាលតាលីបង់របស់អាហ្វហ្គានីស្ថាន បាននិយាយនៅថ្ងៃសៅរ៍ ទី៨ ខែវិច្ឆិកានេះថា បទឈប់បាញ់របស់ខ្លួនជាមួយប៉ាគីស្ថាននឹងនៅតែមាន ទោះបីជាកិច្ចចរចាសន្តិភាពលេីកចុងក្រោយទទួលបរាជ័យក៏ដោយ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន AFP។ អ្នកនាំពាក្យរដ្ឋាភិបាលតាលីបង់ លោក Zabihullah Mujahid បាននិយាយថា អំឡុងពេលនៃកិច្ចចរចាសន្តិភាព ភាគីប៉ាគីស្ថានបានព្យាយាមទម្លាក់ការទទួលខុសត្រូវទាំងអស់សម្រាប់ផ្នែកសន្តិសុខរបស់ខ្លួន មកលេីរដ្ឋាភិបាលអាហ្វហ្គានីស្ថាន ខណៈបង្ហាញឆន្ទៈមិនទទួលខុសត្រូវចំពោះសន្តិសុខអាហ្វហ្គានីស្ថានផ្ទាល់នោះទេ។ យ៉ាងនេះក្តីលោកគូសបញ្ជាក់ថា «គ្មានបញ្ហាអ្វីដល់បទ ឈប់បាញ់ដែលបានព្រមព្រៀងគ្នា ជាមួយប៉ាគីស្ថាននោះទេ វាត្រូវរក្សាទុកដដែល»។ គួរបញ្ជាក់ថា អាហ្វហ្កានីស្ថាន និងប៉ាគីស្ថាន បានជួបប្រជុំគ្នាកាលពីថ្ងៃព្រហស្បតិ៍ក្នុងប្រទេសតួគីយ៉េ សម្រេចលេីបទឈប់បាញ់ដែលបានព្រមព្រៀងគ្នា កាលថ្ងៃទី១៩ ខែតុលា នៅឯកាតា បន្ទាប់ពីការប៉ះទង្គិចគ្នាយ៉ាងធ្ងន់ធ្ងរ។ ភាគីទាំងសងខាងនៅតែតឹងរ៉ឹងដាក់គ្នាលើខ្លឹមសារនៃកិច្ចចរចា ដែលសំដៅដោះស្រាយបញ្ហាសន្តិសុខជាយូរមកហេីយ៕ ផ្ដល់សិទ្ធិដោយ៖ Freshnews

(បាងកក)៖ ចិនបានពង្រីកការហាមឃាត់ការនាំចូលទឹកស៊ីរ៉ូប៍ និងម្សៅធ្វើពីសារធាតុស្ករទាំងអស់ពីប្រទេសថៃ បន្ទាប់ពីការធ្វើអធិការកិច្ចសុវត្ថិភាពចំណីអាហាររកឃើញថា មិនមានរោងកចក្រណាមួយក្នុងចំណោមរោងចក្រចំនួន១០របស់ថៃបំពេញតាមស្ដង់ដារដែលចិនចង់បាន។ នេះបើតាមការចេញផ្សាយដោយសារព័ត៌មាន Thai enquirer នៅថ្ងៃសុក្រ ទី៧ ខែវិច្ឆិកា ឆ្នាំ២០២៥។ បម្រាមរបស់ចិនខាងលើដែលបានចូលជាធរមានកាលពីថ្ងៃទី២៧ ខែតុលា ឆ្នាំ២០២៥ ត្រូវបានរំពឹងថានឹងបង្កការខូចខាតរាប់ពាន់លានបាត ហើយអាចឱ្យរោងចក្រជាច្រើន ដែលពឹងផ្អែកយ៉ាងខ្លាំងលើទីផ្សារចិនប្រឈមនឹងការបិទទ្វារ។ ចិនបានដាក់បញ្ចូលផលិតផល៤បន្ថែមទៀតទៅក្នុងបញ្ជីហាមឃាត់នាំចូលពីថៃដែលមានស្រាប់ ក្នុងនោះរួមមាន ម្សៅធ្វើពីសារធាតុស្ករ និងទឹកស៊ីរ៉ូប៍ ព្រមទាំងហាមឃាត់ការចុះបញ្ជីថ្មីសម្រាប់រោងចក្រថៃទៀតផង។ លោក Todsaporn Ruangpattananont ជាប្រធានសមាគមអ្នកផលិតស្កររបស់ថៃ បាននិយាយថាអគ្គរដ្ឋបាលគយចិនបានចុះត្រួតពិនិត្យរោងចក្រថៃចំនួន១០ កាលពីខែកក្កដា ឆ្នាំ២០២៥ ប៉ុន្តែបានរកឃើញថាគ្មានរោងចក្រថៃណាមួយក្នុងចំណោមរោងចក្រទាំង១០នេះអាចបំពេញតាមតម្រូវការស្ដង់ដារអនាម័យ និងគុណភាពដែល ចិនចង់បាននោះទេ។ ជាលទ្ធផល រោងចក្រថៃជាច្រើនមិនអាចនាំចេញទឹកស៊ីរ៉ូប៍ ឬម្សៅផលិតពីសារធាតុស្ករទៅកាន់ប្រទេសចិនទៀតឡើយ ហើយមានតែបរិមាណស្ករសុទ្ធ មួយចំនួនប៉ុណ្ណោះត្រូវបានអនុញ្ញាឱ្យនាំចេញទៅកាន់ចិន ក្រោមកូតាដែលបានកំណត់។ លោក Todsaporn ក៏បានអំពាវនាវឱ្យរដ្ឋាភិបាលធ្វើសកម្មភាព និងត្រួតពិនិត្យឡើងវិញចំពោះការនាំចេញផងដែរ។ គួរបញ្ជាក់ថា កាលពីខែឆ្នូ ឆ្នាំ២០២៤ ចិនក៏បានដាក់បម្រាមលើការនាំចូលទឹកស៊ីរ៉ូប៍ និងម្សៅផលិតពីសារធាតុស្ករពីថៃផងដែរ ដែលនៅពេលនោះការខាតបង់ត្រូវបានវាយតម្លៃ ថាមានប្រហែល ៥០ពាន់លានបាត និងជំរុញឱ្យតម្លៃស្ករធ្លាក់ចុះ៕ ផ្ដល់សិទ្ធិដោយ​៖ Fresh News

(ហាណូយ)៖ អាជ្ញាធរនៅតាមតំបន់ឆ្នេរនៅក្នុងប្រទេសវៀតណាម កំពុងវាយតម្លៃពីការខូចខាតបង្កឡើងដោយព្យុះទីហ្វុង Kalmaegi នៅថ្ងៃសុក្រ ទី៧ ខែវិច្ឆិកា បន្ទាប់ពីព្យុះដ៏កំណាច មួយនេះវាយប្រហារលើហ្វីលីពីនសម្លាប់មនុស្សយ៉ាងហោច ១៨៨នាក់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ ព្យុះ Kalmaegi បានបក់បោកលើវៀតណាមកាលពីថ្ងៃព្រហស្បតិ៍ ធ្វើឱ្យដើមឈើជាច្រើនដើមរលំ ផ្ទះមួយចំនួនរងការខូចខាត និងបង្កឱ្យដាច់ចរន្តអគ្គិសនី មុននឹងព្យុះនេះថមថយចុះ ឥទ្ធិពល។ អាជ្ញាធរវៀតណាមបានព្រមានថាភ្លៀងនឹងនៅតែបន្តធ្លាក់ខ្លាំងដែលអាចធ្វើ​ឱ្យកម្ពស់ទឹកហក់ឡើង ២០០មីលីម៉ែត្រ តាមបណ្ដាខេត្តសិ្ថតនៅភាគកណ្ដាលនៃប្រទេសរាប់ចាប់ពី ខេត្ត Thanh Hoa រហូតដល់ខេត្ត Quang Tri។ គួរបញ្ជាក់ថា ខណៈចំនួនអ្នកស្លាប់ដោយសារព្យុះ Kalmaegi នៅហ្វីលីពីនកើនឡើង ក្រុមមន្ត្រីហ្វីលីពីនក៏បានឱ្យដឹងដែរថាមនុស្ស១៣៥នាក់បានបាត់ខ្លួន និង៩៦នាក់រងរបួស។ ចំណែក នៅវៀតណាមវិញ អាជ្ញាធរមិនទាន់បញ្ជាក់ពីតួលេខអ្នកស្លាប់ ឬរបួសជាផ្លូវការនៅឡើយទេ។ ប៉ុន្តែប្រព័ន្ធផ្សព្វផ្សាយរដ្ឋបានរាយការណ៍ថាមនុស្សម្នាក់បានស្លាប់ នៅក្នុងខេត្ត Dak Lak ដោយសារផ្ទះបាក់រលំ ហើយរដ្ឋាភិបាលទីក្រុងហាណូយបានដាក់ពង្រាយទាហាន ២៦៨ ០០០នាក់ ឱ្យចូលរួមក្នុងប្រតិបត្តិការជួយសង្រ្គោះ ក៏ដូចជាព្រមានពីហានិភ័យនៃគ្រោះទឹកជំនន់៕ ផ្ដល់សិទ្ធិដោយ៖ Fresh News

(កាប៊ុល)៖ ក្រុមមន្ត្រីនៅក្នុងប្រទេសអាហ្វហ្កានីស្ថាន បានឱ្យដឹងថាគ្រោះរញ្ជួយដីកម្រិត ៦.៣រ៉ិចទ័រ បានវាយប្រហារនៅក្បែរទីក្រុង Mazar-e Sharif ស្ថិតនៅភាគខាងជើងនៃប្រទេស នៅព្រឹកថ្ងៃចន្ទ ទី៣ ខែវិច្ឆិកា ដោយសម្លាប់មនុស្សយ៉ាងហោច ៧នាក់ និង១៥០នាក់រងរបួស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ ទីភ្នាក់ឃ្លាំមើលគ្រោះរញ្ជួយដីអាមេរិក USGS គ្រោះរញ្ជួយដីខាងលើមានជម្រៅរញ្ជួយទៅក្នុងដី​២៨គីឡូម៉ែត្រ និងស្ថិតនៅក្បែរទីក្រុង Mazar-e Sharif ដែលមានប្រជាជនរស់នៅជាង ៥២៣ ០០០នាក់។ គួរបញ្ជាក់ថា អាហ្វហ្កានីស្ថាន ជារឿយៗតែងតែរងគ្រោះដោយសារគ្រោះរញ្ជួយដី ដោយសារតែប្រទេសនេះមានទីតាំងភូមិសាស្ត្រស្ថិតនៅក្បែរចំណុចប្រសព្វនៃទ្វីបអឺរ៉ាស៊ី និងស្រទាប់ឧបទ្វីបឥណ្ឌា ដែលងាយ ប្រឈមនឹងការរញ្ជួយដី។ កាលពីឆ្នាំ២០១៥ គ្រោះរញ្ជួយដីមួយបានវាយប្រហារលើភាគឦសានអាហ្វហ្កានីស្ថាន បានសម្លាប់មនុស្សជាច្រើនរយនាក់នៅអាហ្វហ្កានីស្ថាន និងនៅក្បែរភាគខាងជើងនៃប្រទេស ប៉ាគីស្ថាន។ កាលពីឆ្នាំ២០២៣វិញ មនុស្សយ៉ាងហោច ១០០០នាក់បានស្លាប់ក្នុងគ្រោះរញ្ជួយដី នៅអាហ្វហ្កានីស្ថាន៕ ផ្ដល់សិទ្ធិដោយ៖ Fresh News

(ហាណូយ)៖ អាជ្ញាធរគ្រប់គ្រងគ្រោះមហន្តរាយវៀតណាម នាថ្ងៃអាទិត្យនេះ បានឱ្យដឹងថា តួលេខអ្នកបាត់បង់ជីវិត ដោយសារភ្លៀងធ្លាក់ខ្លាំង ដែលបង្កជាគ្រោះទឹកជំនន់យ៉ាងធ្ងន់ធ្ងរ នៅតំបន់ភាគកណ្តាលប្រទេសក្នុងសប្តាហ៍នេះ បានបន្តកើនដល់៣៥នាក់ ខណៈ៥នាក់ផ្សេងទៀតនៅបន្តបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី២ ខែវិច្ឆិកា ឆ្នាំ២០២៥។ អាជ្ញាធរវៀតណាម បាននិយាយថា ករណីអ្នកស្លាប់ទាំងនោះ គឺរួមមាននៅទីក្រុង Hue និង Danang ព្រមទាំងនៅខេត្ត Lam Dong និង Quang Tri។ ទីក្រុង Hue និង Hoi An បានទទួលរងការជន់លិចខ្លាំងជាងគេ ដល់ថ្នាក់បង្ខំឱ្យប្រជាជនដែលរស់នៅទីនោះ ត្រូវធ្វើដំណើរដោយប្រើប្រាស់ទូក។ ជាមួយគ្នានេះ លំនៅដ្ឋានខ្ទង់សែនខ្នង ក៏បានរងការជន់លិច សត្វចិញ្ចឹមរាប់ម៉ឺនក្បាលត្រូវទឹក​ហូរនាំយកទឹក ហើយផលដំណាំរាប់ពាន់ហិកតា ត្រូវបានបំផ្លិចបំផ្លាញ។ គួរបញ្ជាក់ថា វៀតណាម ជាប្រទេសមួយងាយរងគ្រោះ ពីការវាយប្រហារដោយព្យុះនិងទឹកជំនន់អាក្រក់ៗ ដែលជារឿយៗបានបង្ក​ការខូចខាតទ្រព្យសម្បត្តិធ្ងន់ធ្ងរ ព្រមទាំងផ្តាច់ជីវិតមនុស្ស ជាពិសេសអំឡុងរដូវកាលព្យុះចាប់ពីខែមិថុនា ដល់ខែតុលា រៀងរាល់ឆ្នាំ៕ ផ្ដល់សិទ្ធិដោយ៖ Freshnews

(សេអ៊ូល)៖ កាលពីថ្ងៃសៅរ៍សប្តាហ៍នេះ ប្រធានាធិបតីកូរ៉េខាងត្បូង លោក Lee Jae Myung បានទទូចឱ្យប្រធានាធិបតីចិន លោក ស៉ី ជីនពីង ជួយទីក្រុងសេអ៊ូលបន្តកិច្ចសន្ទនាឡើងវិញជាមួយកូរ៉េខាងជើង ខណៈមេដឹកនាំទាំងពីរ បើកកិច្ចប្រជុំកំពូលជាលើកដំបូង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី២ ខែវិច្ឆិកា ឆ្នាំ២០២៥។ យោងតាមសេចក្តីថ្លែងការណ៍របស់ការិយាល័យប្រធានាធិបតីកូរ៉េខាងត្បូង អំឡុងកិច្ចប្រជុំខាងលើ លោក Lee បានប្រាប់លោក ស៉ី យ៉ាងដូច្នេះថា «ខ្ញុំសង្ឃឹមថា កូរ៉េខាងត្បូងនិងចិន នឹងពង្រឹងការធ្វើទំនាក់ទំនងជាយុទ្ធសាស្រ្ត ហើយ​ធ្វើការរួមគ្នាដើម្បីស្តារកិច្ចសន្ទនាឡើងវិញជាមួយកូរ៉េខាងជើង»។ ដោយសង្កត់ធ្ងន់អំពីតម្រូវការសម្រាប់ស្ថិរភាពក្នុងតំបន់ លោក Lee បានកត់សម្គាល់អំពីការធ្វើប្រាស្រ័យទាក់ទងកម្រិតខ្ពស់នាពេលថ្មីៗនេះរវាងចិននិងកូរ៉េខាងជើង ដោយលោកចង់សំដៅលើវត្តមាន​របស់មេដឹកនាំកូរ៉េខាងជើង លោក គីម ជុងអ៊ុន អំឡុងពិធីព្យុហយាត្រាយោធាដ៏ឱឡារិកនៅទីក្រុងប៉េកាំង កាលពីខែកញ្ញា។ លោក Lee បាននិយាយថា ជំនួបទាំងនោះ កំពុងជួយបង្កើនលក្ខខណ្ឌ សម្រាប់ការធ្វើទំនាក់ទំនងជាថ្មីជាមួយទីក្រុងព្យុងយ៉ាង។ គួរបញ្ជាក់ថា ជាយូរមកហើយ ទីក្រុងសេអ៊ូល បានព្យាយាមស្វែងរកតុល្យភាពក្នុងទំនាក់ទំនងរបស់ខ្លួន ជាមួយចិនដែលជាដៃគូពាណិជ្ជកម្មកំពូល ហើយនិងសហរដ្ឋអាមេរិក ដែលជាសម្ព័ន្ធមិត្តចម្បងផ្នែកការពារជាតិ៕ ផ្ដល់សិទ្ធិដោយ៖ […]

(កូរ៉េខាងត្បូង)៖ កាលពីថ្ងៃសៅរ៍សប្តាហ៍នេះ នាយករដ្ឋមន្រ្តីកាណាដា លោក Mark Carney បានប្រាប់ថា រូបលោកបានសុំទោសលោក ដូណាល់ ត្រាំ ដោយផ្ទាល់ បន្ទាប់ពីលោកប្រធានាធិបតីអាមេរិក មានការមិនពេញចិត្តជាខ្លាំង ជុំវិញការផ្សាយពាណិជ្ជកម្មនយោបាយ ធ្វើឡើងដោយខេត្ត Ontario របស់កាណាដា ដែលមានខ្លឹមសាររិះគន់ចំណាត់ការពន្ធគយ​របស់លោក ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី២ ខែវិច្ឆិកា ឆ្នាំ២០២៥។ ថ្លែងប្រាប់ក្រុមអ្នកសារព័ត៌មាន ក្រោយចូលរួមកិច្ចប្រជុំកំពូល APEC នៅប្រទេសកូរ៉េខាងត្បូង លោក Carney បាននិយាយថា រូបលោកបានសុំទោសលោក ត្រាំ ដោយផ្ទាល់ នៅពេលអ្នកទាំងពីរ ចូលរួមពិធីជប់លៀងទទួលទានអាហារពេលល្ងាច រៀបចំដោយ​ប្រធានាធិបតីកូរ៉េខាងត្បូង កាលពីថ្ងៃពុធសប្តាហ៍នេះ។ កន្លងមកនេះ ខេត្ត Ontario បានចេញផ្សាយពាណិជ្ជកម្មមួយ ដែលបានដកស្រង់សម្តីអតីតប្រធានាធិបតីអាមេរិក លោក Ronald Reagan និយាយថា ពន្ធគយបង្កឱ្យមានសង្រ្គាមពាណិជ្ជកម្មនិងមហន្តរាយសេដ្ឋកិច្ច។ ជាការឆ្លើយតប លោក ត្រាំ បានប្រកាសថា រូបលោកនឹងដំឡើងពន្ធបន្ថែមទៀតប្រឆាំងទំនិញនាំចូលពីកាណាដា និងផ្អាកកិច្ចចរចាពាណិជ្ជកម្មទាំងអស់ជាមួយកាណាដា។ […]

(GYEONGJU, កូរ៉េខាងត្បូង)៖ ប្រធានាធិបតីកូរ៉េខាងត្បូង លោក Lee Jae Myung បានជូនអំណោយក្តារអុកធ្វេីពីបន្ទះឈើដ៏ មានតម្លៃដល់ប្រធានាធិបតីចិន លោក ស៉ី ជីនពីង អំឡុងពេលនៃទស្សនកិច្ចផ្លូវរដ្ឋនាថ្ងៃសៅរ៍ ទី១ ខែវិច្ឆិកានេះ​ និងប៉ុន្មានថ្ងៃបន្ទាប់ពី បានជូនអំណោយមកុដមាសដល់ប្រធានាធិបតីអាមេរិក លោក ដូណាល់ ត្រាំ នៅក្នុងជំនួបមួយ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។ តាមការិយាល័យរបស់ Lee ក្តារអុកនេះត្រូវបានផលិតចេញពីឈើដ៏មានតម្លៃ Torreya nucifera ដែលជាដើមឈើមានដើមកំណើតនៅកោះ Jeju របស់ប្រទេសកូរ៉េខាងត្បូង។ តាមហាងធំៗមួយចំនួនក្តារអុកដែលផលិតពីឈើដូចគ្នាត្រូវបានដាក់លក់តាមអនឡាញក្នុងតម្លៃជិត ៥លានវ៉ុន ឬ ៣ ៥១៧ដុល្លារអាមេរិក។ ការិយាល័យរបស់លោក Lee បានឱ្យដឹងថា ជាការទទួលស្គាល់តួនាទីរបស់លោក ត្រាំ ក្នុងនាមជាអ្នកបង្កើតសន្តិភាពនៅឧបទ្វីបកូរ៉េ លោកសាកសមទទួលបានអំណោយមកុដចម្លងមួយដែលមានដាំជារាងទង និងស្លឹកធ្វេីពីមាស។ មកុដដើមត្រូវបានរកឃើញនៅក្នុងផ្នូរមួយនៃទីក្រុង Gyeongju រដ្ឋធានីនៃនគរ Silla បុរាណ ដែលគ្រប់គ្រងប្រហែលមួយភាគបីនៃឧបទ្វីបកូរ៉េរហូតដល់សតវត្សទី ៩។ គួរបញ្ជាក់ថា អំណោយសម្រាប់មេដឹកនាំដែលមកស្សនកិច្ច គឺរឿងដ៏សំខាន់នៃទំនាក់ទំនងការទូតអន្តរជាតិ ប៉ុន្តែពោរពេញដោយការលំបាក ជាពិសេសនៅពេលដែលអាចមានការប្រៀបធៀបគ្នា៕ […]

(ប៉េកាំង)៖ តាមការផ្សាយដំណឹងនៃការិយាល័យវិស្វកម្មយានអវកាសផ្ទុកមនុស្សរបស់ចិនបានឱ្យដឹងថា នៅវេលាម៉ោង២៣ និង៤៤នាទី យប់ថ្ងៃទី៣១ ខែតុលា តាមម៉ោងក្រុងប៉េកាំង រ៉ុក្កែតដឹកជញ្ជូន Long March-F ២១ ដែលបានផ្ទុកយានអវកាសផ្ទុកមនុស្ស Shenzhou-២១ ត្រូវបានបាញ់បង្ហោះនៅទីលានបាញ់បង្ហោះយានអវកាសដែលស្ថិតនៅក្រុង Jiuquan ប្រហែល១០នាទីក្រោយមក យានអវកាស បានបំបែកខ្លួនចេញពីរ៉ុក្កែតដោយជោគជ័យ ហើយបានហោះចូលគន្លងតារាវិថីតាមការគ្រោងទុក ក្រុមអវកាសយានិកមានសភាពល្អប្រសើរ បេសកកម្មបាញ់បង្ហោះទទួលបានជោគជ័យដោយគាប់ប្រសើរ។ បន្ទាប់ពីយានអវកាសចូលគន្លងតារាវិថី យានអវកាសផ្ទុកមនុស្សបានតភ្ជាប់ជាមួយស្ថានីយអវកាសដោយស្វ័យប្រវតិ្តនិងឆាប់រហ័ស។ នៅវេលាម៉ោង៤និង៥៨នាទី ព្រឹកថ្ងៃទី១ ខែវិច្ឆិកា តាមម៉ោងក្រុងប៉េកាំង ក្រុមអវកាសយានិកនៃយានអវកាសផ្ទុកមនុស្ស Shenzhou-២០ ដែលកំពុងបំពេញបេសកកម្មនៅតាមគន្លងតារាវិថី បានបើក“ទ្វារ”ដោយរលូន ដើម្បីស្វាគមន៍ក្រុមអវកាសយានិកនៃយានអវកាសផ្ទុកមនុស្ស Shenzhou-២១ ចូលប្រចាំការនៅស្ថានីយអវកាសនេះជាលើកទី៧ ហើយដែលក្រុមអវកាសយានិកពីរក្រុមជួបជុំគ្នានៅអវកាសក្នុងប្រវត្តិសាស្ត្រអវកាសចិន។ បន្ទាប់មក ក្រុមអវកាសយានិកពីរក្រុមនេះ នឹងផ្លាស់វេនតាមគន្លងតារាវិថីក្នុងស្ថានីយអវកាស៕ (វិទ្យុមិត្តភាពកម្ពុជាចិន)។ ផ្ដល់សិទ្ធិដោយ៖ Freshnews

(តៃប៉ិ)៖ នាថ្ងៃសុក្រនេះ មេដឹកនាំតៃវ៉ាន់ លោក Lai Ching-te បាននិយាយថា កោះតៃវ៉ាន់មិនចង់បាន គំនិត «ប្រទេសមួយ ប្រព័ន្ធគ្រប់គ្រងពីរ» របស់ចិនឡើយ ហើយនឹងប្រឹងប្រែងថែរក្សាសេរីភាព ក៏ដូចជាលទ្ធិប្រជាធិបតេយ្យរបស់ខ្លួន ព្រមទាំងប្តេជ្ញាការពារខ្លួនឯង។ នេះបើតាមការចេញផ្សាយដោយ​ ទីភ្នាក់ងារព័ត៌មាន Reuters នាថ្ងៃសុក្រ ទី៣១ ខែតុលា ឆ្នាំ២០២៥។ ក្នុងសប្តាហ៍នេះ ចិនបាននិយាយថា ខ្លួនដាច់ខាតនឹងមិនបោះបង់ចោល ជម្រើសនៃការប្រើប្រាស់កម្លាំងជុំវិញបញ្ហាតៃវ៉ាន់ទេ ខណៈវាគឺជាការបង្កើនវោហារសាស្រ្តរឹងមាំមួយ ក្រោយមួយរយៈមកនេះ ប្រព័ន្ធផ្សព្វផ្សាយរដ្ឋចិន បានចុះផ្សាយអត្ថបទជាបន្តបន្ទាប់សន្យាថា ប្រសិនបើតៃវ៉ាន់យល់ព្រមទទួលយកការអះអាងអធិបតេយ្យរបស់ចិន ទីក្រុងប៉េកាំង នឹងអនុញ្ញាតឱ្យអនុវត្តគោលនយោបាយ «ប្រទេសមួយ ប្រព័ន្ធគ្រប់គ្រងពីរ» ដែលខ្លួនប្រើសម្រាប់ទីក្រុងហុងកុង និងទីក្រុងម៉ាកាវ។ លោក Lai ដែលត្រូវចិនចាត់ទុកជាបុគ្គលចង់បំបែករដ្ឋដ៏គ្រោះថ្នាក់ បានថ្លែងប្រាប់ទាហានតៃវ៉ាន់ នៅមូលដ្ឋានយោធាមួយកន្លែងថា មានតែភាពរឹងមាំប៉ុណ្ណោះ ដែលអាចនាំមក នូវសន្តិភាពពិតប្រាកដ។ មេដឹកនាំតៃវ៉ាន់រូបនេះ បានសង្កត់ធ្ងន់ដូច្នេះថា «យើងច្រានចោល នូវគោលនយោបាយប្រទេសមួយប្រព័ន្ធគ្រប់គ្រងពីរ ដោយសារតែពួកយើងនឹងបន្ត​ថែរក្សាការពារសិទ្ធិសេរីភាព និងប្រព័ន្ធរដ្ឋធម្មនុញ្ញបែបប្រជាធិបតេយ្យរបស់យើង»។ នៅតៃវ៉ាន់ ពុំមានគណបក្សនយោបាយធំៗណាមួយ ដែលគាំទ្រគំនិត «ប្រទេសមួយ ប្រព័ន្ធគ្រប់គ្រងពីរ» ឡើយ។ លោក Lai បាននិយាយថា […]