(វ៉ាស៊ីនតោន)៖ យានអវកាសរបស់សហគ្រាសជប៉ុន នៅថ្ងៃអាទិត្យ ទី១១ ខែធ្នូនេះ ត្រូវបានបាញ់បង្ហោះទៅកាន់ឋានព្រះច័ន្ទ ដែលជាបេសកកម្មលើកដំបូងរបស់ប្រទេសទៅកាន់ឋានព្រះច័ន្ទ ហើយក៏ជាលើកទីមួយចំពោះក្រុមហ៊ុនឯកជនផងដែរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអាទិត្យ ទី១១ ខែធ្នូ ឆ្នាំ២០២២។ ការបាញ់បង្ហោះនេះ ត្រូវបានធ្វើឡើងដោយក្រុមហ៊ុន SpaceX របស់ លោក Elon Musk នៅឯ Cape Canaveral រដ្ឋ Florida សហរដ្ឋអាមេរិក បន្ទាប់ពីបានពន្យារពេលពីរដង សម្រាប់ការត្រួតពិនិត្យបន្ថែមមុនពេលហោះហើរ។ យានអវកាសដែលផលិតដោយក្រុមហ៊ុនជប៉ុន startup ispace មានមូលដ្ឋាននៅទីក្រុងតូក្យូ ត្រូវបានបាញ់បង្ហោះដោយរ៉ុក្កែត Falcon 9 នៅម៉ោង ២៖៣៨នាទីព្រឹក (ម៉ោងក្នុងតំបន់)។ លោក Takeshi Hakamada នាយកប្រតិបត្តិរបស់ក្រុមហ៊ុន Startup ispace បាននិយាយនៅក្នុងសេចក្តីថ្លែងការណ៍មួយថា «បេសកកម្មដំបូងរបស់យើង នឹងដាក់មូលដ្ឋានគ្រឹះសម្រាប់ការទាញយកសក្តានុពលពីព្រះច័ន្ទ និងផ្លាស់ប្តូរវាទៅជាប្រព័ន្ធសេដ្ឋកិច្ចដ៏រឹងមាំ និងរស់រវើក»។ គួរបញ្ជាក់ថា រហូត​មក​ដល់​ពេល​នេះ មាន​តែ​សហរដ្ឋ​អាមេរិក រុស្ស៊ី […]

រុស្ស៊ី៖ លោកប្រធានាធិបតីនៃប្រទេសរុស្ស៊ី វ៉ា្លឌីមៀ ពូទីន បាននិយាយថា រុស្ស៊ីអាចនឹងកាត់បន្ថយការផលិតប្រេងនិងឈប់លក់ប្រេងឲ្យទៅប្រទេសទាំងឡាយណា ដែលបានសម្រេចកំណត់តម្លៃប្រេងរបស់រុស្ស៊ីសម្រាប់ការដាក់លក់ទៅលើទីផ្សារពិភពលោក នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃសៅរ៍ ទី១០ ខែធ្នូនេះ។ ការថ្លែងរបស់ប្រមុខដឹកនាំរុស្ស៊ីនៅពេលនេះគឺត្រូវបានធ្វើឡើងដើម្បីឆ្លើយតបទៅនឹងការសម្រេចរបស់ក្រុមប្រទេស G7 និងប្រទេសអូស្ត្រាលី ដែលបានព្រមព្រៀងគ្នាធ្វើការកំណត់តម្លៃប្រេងដែលរុស្ស៊ីត្រូវនាំចេញទៅកាន់ទីផ្សារនៅលើពិភពលោកមិនមានតម្លៃលើសពី ៦០ដុល្លារនោះទេក្នុងមួយធុងបារ៉ែល​​ ខណៈនាពេលបច្ចុប្បន្ននេះប្រេងមួយធុងបារ៉ែលមានតម្លៃ ៨៧,២៤ ដុល្លារ។ គួររម្លឹកជូនថា ការសម្រេចរបស់ក្រុមប្រទេស G7 និងប្រទេសអូស្ត្រាលីក្នុងការកំណត់តម្លៃប្រេងរបស់រុស្ស៊ី នេះគឺត្រូវបានធ្វើឡើងដោយផ្អែកលើហេតុផលថា ដើម្បីកាត់បន្ថយប្រាក់ចំណូលរបស់រុស្ស៊ី ដែលអាចឈានទៅដល់ការកាត់បន្ថយឥទ្ធិពលរបស់រុស្ស៊ីចំពោះការធ្វើសង្គ្រាមនៅលើទឹកដីអ៊ុយក្រែន។ ចំពោះកត្តាដែលធ្វើឲ្យក្រុមប្រទេសជាសម័្ពន្ធមិត្តខាងលើនេះអាចធ្វើការកំណត់តម្លៃចំពោះប្រេងរុស្ស៊ីបានគឺដោយហេតុថា នាពេលបច្ចុប្បន្ននេះការដឹកជញ្ជូនប្រេងឆៅរបស់រុស្ស៊ីប្រមាណជា ៩០% សម្រាប់នាំទៅកាន់ទីផ្សារពិភពលោកត្រូវពឹកផ្អែកទាំងស្រុងទៅលើក្រុមហ៊ុនធំៗដែលស្ថិតនៅក្នុងប្រទេស G7 ។ សូមបញ្ជាក់ផងដែរថានាពេលកន្លងមករុស្ស៊ីធ្លាប់បានអះអាងថា ការកំណត់តម្លៃប្រេងរបស់ខ្លួននៅលើទីផ្សារពិភពលោកនឹងមិនធ្វើឲ្យឥទ្ធិពលរបស់រុស្ស៊ីចំពោះសង្គ្រាមនៅអ៊ុយក្រែនត្រូវថយចុះនោះទេ៕ ផ្តល់សិទ្ធិដោយ៖ ខ្មែរណូត

ប្រធានាធិបតីបារាំងលោក Emmanuel Macron កាលពីថ្ងៃសុក្រ ទី០៩ ខែធ្នូ ឆ្នាំ២០២២ បានប្រកាសថា ប្រទេសបារាំងនឹងផ្ដល់ស្រោមអនាម័យដោយឥតគិតថ្លៃនៅតាមឱសថស្ថាន សម្រាប់ពលរដ្ឋដែលមានអាយុក្រោម ២៥ឆ្នាំ។ ចំណាត់ការនេះបានធ្វើឡើង នៅពេលដែលជំងឺកាមរោគកំពុងកើនឡើងក្នុងចំណោមមនុស្សវ័យក្មេង ខណៈអតិផរណាពិសេសក្នុងឆ្នាំនេះ កំពុងប៉ះពាល់យ៉ាងខ្លាំងដល់ថវិការបស់ប្រជាជនក្រីក្រ។ ស្ត្រីដែលមានអាយុក្រោម ២៥ឆ្នាំ ក៏អាចទទួលបានការពន្យារកំណើតដោយឥតគិតថ្លៃ ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាល ដើម្បីធានាថា មនុស្សវ័យក្មេងមានប្រាក់ចំណូលទាំងអស់ អាចការពារការមានផ្ទៃពោះដែលមិនចង់បាន។ លោក Macron បាននិយាយកាលពីថ្ងៃព្រហស្បតិ៍ថា ស្រោមអនាម័យនឹងផ្ដល់ដោយមិនគិតថ្លៃនៅឯឱសថស្ថាន សម្រាប់នរណាម្នាក់ដែលមានអាយុពី ១៨ ទៅ ២៥ ចាប់ពីថ្ងៃទី០១ ខែមករា។ ប៉ុន្តែបន្ទាប់ពីពិធីករទូរទស្សន៍បារាំង និងអ្នកផ្សេងទៀត បានជំទាស់នឹងគាត់នៅលើបណ្តាញសង្គមកាលពីថ្ងៃសុក្រ អំពីមូលហេតុដែលវិធានការស្រោមអនាម័យមិនរាប់បញ្ចូលអនីតិជននោះ លោកប្រធានាធិបតីបានយល់ព្រមពង្រីកកម្មវិធី។ លោក Macron បាននិយាយនៅក្នុងវីដេអូដែលគាត់បានថតពីខាងក្រៅនៃកិច្ចប្រជុំកំពូលមួយក្នុងប្រទេសអេស្ប៉ាញថា «គាត់យល់ស្រប»។ ក្រោយមកគាត់បានបង្ហោះសារថា៖«អនីតិជនជាច្រើនក៏រួមភេទដែរ… ពួកគេក៏ត្រូវការពារខ្លួនផងដែរ»៕ ផ្តល់សិទ្ធិដោយ៖ ខ្មែរណូត

Goldman Sachs ដែលជាធនាគារវិនិយោគឈានមុខគេបំផុតនៅលើពិភពលោកបានព្យាករណ៍ថា GDP របស់ចិននឹងកើនឡើងខ្ពស់ជាង  GDP របស់សហរដ្ឋអាមេរិកនៅត្រឹមឆ្នាំ ២០៣៥ខាងមុខ នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅព្រឹកថ្ងៃសៅរ៍ ទី១០ ខែធ្នូនេះ។ តាមរយៈការព្យាករណ៍ថ្មីវាបានបង្ហាញថា កំណើតសេដ្ឋកិច្ចរបស់ចិនបានដើរលឿនជាងគេរំពឹងទុក ដ្បិតនាពេលកន្លងក៏មានការព្យាករណ៍ជាច្រើនបានបង្ហាញថា GDP របស់ចិនវ៉ាដាច់ GDP របស់អាមេរិកដែរនៅពេលអនាគត តែការសម្រេចបាននោះគឺអាចត្រូវមានពេលវេលាយូរបន្ថែមទៀត ពោលគឺមិនមែនត្រូវពេលត្រឹមតែជាង ១០ឆ្នាំទៀតនោះទេ។ ប្រភពខាងលើបានបន្តថា សេដ្ឋកិច្ចជាតិចិននឹងបន្តកើនឡើងជាមធ្យម ៣% ជារៀងរាល់ឆ្នាំ គិតចាប់តាំងពីឆ្នាំ ២០២៣នេះតទៅ ខណៈគិតត្រឹមឆ្នាំ ២០៣៥ ប្រាក់ចំណូលជាមធ្យមសម្រាប់ពលរដ្ឋចិនម្នាក់ៗអាចនឹងកើនឡើងដល់កម្រិតយ៉ាងតិចបំផុត ២០,០០០ដុល្លារនៅក្នុងមួយឆ្នាំ។ សូមបញ្ជាក់ថា គិតត្រឹមឆ្នាំ ២០២២នេះ  ប្រាក់ចំណូលជាមធ្យមសម្រាប់ពលរដ្ឋចិនម្នាក់ៗមានត្រឹមខ្ទង់ ១២,៥៥០ ដុល្លារនៅក្នុងមួយឆ្នាំប៉ុណ្ណោះ ហើយចិនគឺជាប្រទេសមហាអំណាចសេដ្ឋកិច្ចធំបំផុតលំដាប់ទី ២នៅលើពិភពលោក ខណៈអាមេរិកគឺជាប្រទេសមហាអំណាចសេដ្ឋកិច្ចលំដាប់ទី ១នៅលើពិភពលោក៕ ផ្តល់សិទ្ធិដោយ៖ ខ្មែរណូត

អឺរ៉ុប៖ ចាប់តាំងពីកងទ័ពរុស្ស៊ីបានឈ្លានពានចូលក្នុងប្រទេសអ៊ុយក្រែនមក ពិភពលោកបានដាក់ចេញទណ្ឌកម្មក្នុងរូបភាពផ្សេងៗជាបន្តបន្ទាន់ដើម្បីប្រឆាំងនឹងទៅនឹងរដ្ឋាភិបាលនៃប្រទេសរុស្ស៊ី និងមហាសេដ្ឋីរុស្ស៊ីមួយចំនួនដែលមានទំនាក់ទំនងយ៉ាងជិតស្និតជាមួយនឹងលោកប្រធានាធិបតីរុស្ស៊ី វ្លាឌីមៀ ពូទីន។ ជាទូទៅទណ្ឌកម្មដែលគេអាចដាក់ប្រឆាំងទៅនឹងក្រុមមហាសេដ្ឋីនិងឥស្សរិយជនរុស្ស៊ីនោះគឺការហាមឃាត់មិនឲ្យពួកគេធ្វើដំណើរចូលក្នុងប្រទេសណាមួយនិងបង្កកទ្រព្យសម្បត្តិរបស់ពួកគេជាដើម។ ជាក់ស្តែងបើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃសោរ៍  ទី១០ ខែធ្នូនេះបានបញ្ជាក់ថា គិតត្រឹមពេលនេះក្រុមប្រទេសនៅតំបន់អឺរ៉ុបបានបង្កកទ្រព្យសម្បតិ្តរបស់សេដ្ឋីរុស្ស៊ីសរុបចំនួនជាង ២០ពាន់លានដុល្លារហើយគិតចាប់តាំងពីសង្គ្រាមបានផ្ទុះឡើងមក។ ក្នុងចំណោមប្រទេសជាសមាជិកសភាពអឺរ៉ុបទាំង ២៧ប្រទេសនោះគឺគេបានកត់សម្គាល់ឃើញថាមានប្រទេសចំនួន ៤ ដែលបានបង្កកទ្រព្យសម្បត្តិឥស្សរិយជនរុស្ស៊ីច្រើនជាងគេ មានដូចជា ប្រទេសបែលហ្សិកដែលបានបង្កកទ្រព្យសម្បត្តិប្រមាណជា ៣,៧ ពាន់លានដុល្លារ ប្រទេសលុចសំបួរបានបង្កកទ្រព្យសម្បត្តិប្រមាណជា ២,៦​ពាន់លានដុល្លារ ប្រទេសអ៊ីតាលីបានបង្កកទ្រព្យសម្បត្តិប្រមាណជា ២,៤ ពាន់លានដុល្លារ និងប្រទេសអាឡឺម៉ង់បានបង្កកទ្រព្យសម្បត្តិប្រមាណជា ២,២ ពាន់លានដុល្លារ៕ ផ្តល់សិទ្ធិដោយ៖ ខ្មែរណូត

ថៃ៖ ថ្មីៗនេះមានករណីប្លន់មិនបានសម្រេចមួយ បានកើតឡើងនៅឯប្រទេសថៃ ដោយជនល្មើសមានគ្នា ៤នាក់ ជិះម៉ូតូ ២គ្រឿង ប្រដាប់ដោយអាវុធ និងឧបករណ៍កាត់ដែក បានចូលទៅប្លន់ហាងមាសមួយកន្លែង នៅមុខសាលា Takpittayakhom ក្នុងខេត្តតាក។​ នៅពេលមកដល់ចំណុចមុខហាងមាស ក្រុមជនល្មើសដែលមានអាយុប្រហែល ២៥-៣០ ឆ្នាំទាំងនោះ ក៏បាន​ទម្លាយ​ចូលទៅក្នុងហាង ដោយ​ប្រើ​កាំភ្លើងបាញ់​ទ្វារកញ្ចក់របស់ហាង។ យ៉ាងណាក៏ដោយ វាមិនងាយស្រួលដូចការរំពឹងរបស់ពួកលោកចោរនោះទេ ខណៈដែលពួកជនល្មើសបានព្យាយាមកាត់ដែកនៅបញ្ជរលក់មាស ស្រាប់តែម្ចាស់ហាងមាសទាញកាំភ្លើងវែងបាញ់តបតវិញ។ នៅក្នុងវីដេអូបានបង្ហាញថា ម្ចាស់ហាងបានប្រើប្រាស់កាំភ្លើងវែងបាញ់ទៅជនល្មើស ដែលបណ្តាលឱ្យជនល្មើស ១នាក់ រងរបួសធ្ងន់ធ្ងរដេកដួលលើដី ខណៈក្រុមជនល្មើសផ្សេងទៀតបានរត់គេចខ្លួន និងបន្សល់ទុកម៉ូតូ ១គ្រឿង ហើយខ្លះទៀតបានរត់ពួននៅម្តុំមុខហាង។ ក្រោយទទួលបានការរាយការណ៍ ប៉ូលិស​ក៏ចាប់បានចោរ​ចំនួន ​២​នាក់​ (ម្នាក់ដែលរបួស និងម្នាក់ដែលរត់ពួន) ហើយ ២ នាក់ផ្សេងទៀត បាន​រត់គេច​ខ្លួន​បាត់។ នៅក្នុងបណ្ដាញសង្គមហ្វេសប៊ុក គេក៏ឃើញមានការបង្ហោះរូបភាពកាំភ្លើងវែងរបស់ម្ចាស់ហាង និងពានរង្វាន់មួយផងដែរ ដែលអាចឱ្យដឹងបានថា ម្ចាស់ហាងគឺជាអ្នកជំនាញ ឬជាជើងឯកខាងបាញ់កាំភ្លើង៕ ផ្តល់សិទ្ធិដោយ៖ ខ្មែរណូត

ជប៉ុន៖ ដំណើរកំសាន្តទៅកាន់ឋានព្រះច័ន្ទគឺក្តីស្រមៃរបស់មនុស្សជាច្រើននៅជុំវិញពិភពលោក តែអ្នកដែលអាចសម្រេចបំណងប្រាថ្នាដ៏ធំមួយនេះបានគឺមិនមានច្រើននោះទេ ដ្បិតការធ្វើដំណើរកំសាន្តក្រៅភពផែនដីមួយនេះមានតម្លៃខ្ពស់ខ្លាំងណាស់។ យ៉ាងណាក្តី បើយោងតាមការចុះផ្សាយរបស់បណ្តាញសារព័ត៌មាន South China Morning Post នៅព្រឹកថ្ងៃសុក្រ ទី៩ ខែធ្នូនេះបានឲ្យដឹងថា មានមហាសេដ្ឋីជនជាតិជប៉ុនម្នាក់គឺលោក Yusaku Maezawa បានសម្រេចទិញកញ្ចប់ដំណើរកំសាន្តទៅកាន់ឋានព្រះច័ន្ទនៅក្នុងឆ្នាំ ២០២៣ខាងមុខនេះ។ ប្រភពខាងលើបានបន្តថា លោក Yusaku Maezawa គ្រោងនឹងធ្វើដំណើរកំសាន្តនៅកាន់ឋានព្រះច័ន្ទជាមួយនឹងមនុស្សចំនួន ៨នាក់ផ្សេងទៀតមានដូចជា លោក Steve Aoki ដែលជា DJ និងផលិតករជនជាតិអាមេរិក លោក Tim Dodd ដែលជា YouTuber ជនជាតិអាមេរិក លោក Yemi AD ដែលជាតារាសម្តែងនិងអ្នកដឹកនាំរឿងមកពីសាធារណៈរដ្ឋឆេក អ្នកនាង Rhiannon Adam អ្នកថតរូបជនជាតិអៀរឡង់ លោក Karim Iliya អ្នកថតរូបជនជាតិអង់គ្លេស លោក Brendan Hall ផលិតករភាពយន្តអាមេរិក លោក Dev Joshi តារាសម្តែងជនជាតិឥណ្ឌា និងតារា K-pop មួយរូបដែលល្បីជាងគេប្រចាំនៅក្នុងប្រទេសកូរ៉េខាងត្បូង។ តាមគម្រោងគឺលោកមហាសេដ្ឋី Yusaku Maezawa នឹងត្រូវចំណាយប្រាក់ចំនួន ៣៧លានដុល្លារសម្រាប់ដំណើរកំសាន្តមួយនេះ៕  ផ្តល់សិទ្ធិដោយ៖ […]

អាមេរិក៖ រដ្ឋាភិបាលអាមេរិកគ្រោងផ្តល់ជំនួយយោធាទៅកាន់ប្រទេសអ៊ុយក្រែនក្នុងទំហំទឹកប្រាក់ចំនួន ២៧៥លានដុល្លារបន្ថែមទៀត នេះបើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃសុក្រ​ ទី៩ ខែធ្នូនេះ។ ជំនួយយោធារបស់អាមេរិកនៅក្នុងកញ្ចប់ជិត ៣០០លាននេះនឹងមានបញ្ចូលនូវសម្ភារយោធាសំខាន់ៗមួយចំនួនសម្រាប់ប្រើប្រាស់ប្រឆាំងជាមួយនឹងយន្តហោះគ្មានមនុស្សបើក និងប្រព័ន្ធការពារដែនអាកាស។ គួរបញ្ជាក់ជូនថា ជំនួយយោធាដែលមានតម្លៃ ២៧៥លានដុល្លារនេះគឺជាផ្នែកមួយនៃកញ្ចប់ជំនួយតម្លៃ ៨០០លានដុល្លារ ដែលសភាអាមេរិកទើបអនុម័តសម្រាប់ផ្តល់ជូនទៅអ៊ុយក្រែនៅក្នុងឆ្នាំ ២០២៣ខាងមុខនេះ។ សូមបញ្ជាក់ជូនផងដែរថា គិតចាប់តាំងពីពេលកើតមានសង្គ្រាមរុស្ស៊ី-អ៊ុយក្រែនមក សហរដ្ឋអាមេរិកបានផ្តល់ជំនួយទៅកាន់ប្រទេសអ៊ុយក្រែនអស់ចំនួន ១៩,១ ពាន់លានដុល្លារហើយ ខណៈអាមេរិកធ្លាប់សន្យាថា​ នឹងបន្តជួយអ៊ុយក្រែនរហូតដល់សង្គ្រាមត្រូវបានបិទបញ្ចប់៕ ផ្តល់សិទ្ធិដោយ៖ ខ្មែរណូត

ថៃ៖ យោងតាមការចុះផ្សាយរបស់បណ្តាញសារព័ត៌មាន Nation Thailand នៅព្រឹកថ្ងៃព្រហស្បតិ៍ ទី៨ ខែធ្នូនេះបានឲ្យដឹងថា​ រថយន្តដើរដោយថាមពលអគ្គិសនី ២ប្រភេទរបស់ក្រុមហ៊ុន Tesla ត្រូវបានគេចុះកិច្ចព្រមព្រៀងរួចរាល់ក្នុងការនាំយកទៅលក់នៅក្នុងទីផ្សារប្រទេសថៃ។ តាមគម្រោងគឺអតិថិជនអាចទទួលបានរថយន្តជាក់ស្តែងនៅក្នុងអំឡុងខែកុម្ភៈ ឆ្នាំ ២០២៣ខាងមុខនេះ ខណៈការបញ្ជាទិញទុកមុនអាចត្រូវបានធ្វើឡើងចាប់ពីថ្ងៃនេះតទៅ។ រថយន្ត Tesla ទាំង ២ប្រភេទដែលនឹងមានវត្តមាននៅក្នុងប្រទេសថៃនោះរួមមាន៖ -រថយន្តប្រភេទ Model 3 ដែលមាន ៣ស៊េរី៖ ១-Single motor (rear-wheel drive) តម្លៃ ១,៥៧៩ លានបាត (៥០,៥៤៥ ដុល្លារអាមេរិក ) ២-Long range (dual motor, all-wheel drive) តម្លៃ ១,៩៩៩ លានបាត (៥៧,៤៦០ ដុល្លារអាមេរិក) ៣-Performance (dual motor, all-wheel drive) តម្លៃ ២,៣០៩ លានបាត (៦៦,៤០០ ដុល្លារអាមេរិក) -រថយន្តប្រភេទ […]

វៀតណាម៖ រដ្ឋាភិបាលនៃប្រទេសវៀតណាមគ្រោងនឹងធ្វើការផ្លាស់ប្តូរប្រព័ន្ធការពារប្រទេសទ្រង់ទ្រាយធំមួយដើម្បីជួយឲ្យវៀតណាមអាចកាត់បន្ថយការពឹងផ្អែកលើការទិញគ្រឿងសព្វាវុធពីប្រទេសរុស្ស៊ី នេះបើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃព្រហស្បតិ៍ ទី៨ ខែធ្នូនេះ។ ទន្ទឹមគ្នានេះវៀតណាមក៏បានដាក់ចេញនូវផែនការជំរុញឲ្យមានការផលិតអាវុធមួយចំនួននៅក្នុងស្រុកសម្រាប់ចេញទៅលក់នៅតាមបណ្តាប្រទេសនៅក្នុងតំបន់អាស៊ី និងអាហ្រ្វិកផងដែរ។ ប្រភពខាងលើបានបន្តថា វៀតណាមគឺជាប្រទេសដែលមានតម្រូវការទិញគ្រឿងសព្វាវុធធំបំផុតលំដាប់ទី ២០នៅលើពិភពលោក ដោយក្នុងមួយឆ្នាំៗវៀតណាមមានគម្រោងទិញគ្រឿងសព្វាវុធផ្សេងៗក្នុងទំហំទឹកប្រាក់ប្រមាណជា ១ពាន់លានដុល្លារ ខណៈភាគច្រើននៃកញ្ចប់ថវិកាទាំងនោះគឺបានហូរទៅកាន់ប្រទេសរុស្ស៊ី។ យ៉ាងណាក្តី នៅក្នុងអំឡុងពេលនេះប្រទេសរុស្ស៊ីកំពុងមមាញឹកយ៉ាងខ្លាំងនៅក្នុងការធ្វើសង្គ្រាមនៅលើទឹកដីនៃប្រទេសអ៊ុយក្រែន ដែលធ្វើឲ្យចង្វាក់នៃការផលិតនិងផ្គត់ផ្គង់អាវុធរបស់រុស្ស៊ីទៅកាន់បណ្តាប្រទេសជាច្រើនត្រូវរាំងស្ទះយ៉ាងខ្លាំង ខណៈគេក៏មិនអាចស្មានដឹងថា ពេលពេលទើបសង្រ្គាមរុស្ស៊ី-អ៊ុយក្រែនឹងត្រូវបិទបញ្ចាប់ដែរ៕ ផ្តល់សិទ្ធិដោយ៖ ខ្មែរណូត